ރަސްމާލެ މަޝްރޫއުގެ ކަންބޮޑުވުމަށް ވުރެ ބޮޑު ކަންބޮޑުވުމެއް މި 5 އަހަރުތެރެއަކު ނާންނާނެ، ކެރިވަޑައިގަންނަވަންޏާ ރެފަރެންޑަމްއަކަށް ދާންވީ: މީކާއިލް
26 އޮކްޓޯބަރު 2026 | ހޯމަ 08:11ރަސްމާލެ މަޝްރޫއުގެ އެއްބަސްވުމުގެ ތަފްސީލުތައް ސިއްރުކުރާތީ އެކަމުގެ ކަންބޮޑުވުން ފާޅުކޮށް، އެ މައުލޫމާތު ހާމަކުރުމަށް ގޮވާލާ ގަރާރެއް މަޖިލީހަށް ވަނީ ހުށަހަޅާފައި. މި މަޝްރޫއާ މެދު ރައްޔިތުންގެ މެދުގައި ބޮޑެތި ސުވާލުތަކެއް ހުރުމުން، ސަރުކާރުން މިކަމުގައި ރައްޔިތުންގެ ފެންނަ ނުފެންނަ ވޯޓަކަށް ދިއުމަށް މެންބަރު މީކާއިލް ނަސީމް ވަނީ ގޮވާލައްވާފައި
ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް | ރައްޔިތުންގެ މަޖިލިސް
ރައީސް ޑރ. މުހައްމަދު މުއިއްޒުގެ ސަރުކާރުގެ މި 5 އަހަރުގެ ތެރޭގައި ރަސްމާލެ މަޝްރޫއުގެ ކަންބޮޑުވުމަށް ވުރެ ބޮޑު ކަންބޮޑުވުމެއް ނާންނާނެ ކަމަށާއި ކެރިވަޑައިގަންނަވާ ނަމަ މިކަމުގައި ރެފަންރެންޑަމްއަކަށް ވަޑައިގަންނަވަންވީ ކަމަށް ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް ވިދާޅުވެއްޖެ އެވެ.
ހޯމަ ދުވަހުގެ ރައްޔިތުންގެ މަޖިލީހުގެ ޖަލްސާގައި ވަނީ އީގަލް ހިލްސް ކުންފުންޏާއެކު ދިވެހި ސަރުކާރުން "ރަސްމާލެ" މަޝްރޫއާ ގުޅޭގޮތުން ވެފައިވާ އެއްބަސްވުމުގެ އެންމެހައި ތަފްސީލުތައް ހާމަކުރުމަށް ގޮވާލައި، އެކަމާމެދު ރައްޔިތުންގެ މަޖިލީހުގެ މެންބަރު ދެކެވަޑައިގަންނަވާ ގޮތެއް ދެނެގަތުމަށްޓަކައި ހުށަހަޅާފައިވާ ގަރާރަށް ބަހުސްކޮށްފަ އެވެ.
އެ ގަރާރަށް ބަހުސް ކުރައްވަމުން މީކާއިލް ވިދާޅުވީ ރަސްމާލެ މަޝްރޫއާ ގުޅިގެން ކަންބޮޑުވުން ފާޅުކުރަނީ ހަގީގަތުގައި ވެސް ހިތުގެ އަޑިން، ގަބޫލުކުރާ ކަންބޮޑުވުންތަކެއް ހުރުމުން ކަމަށެވެ.
މި މައުލޫއާ ގުޅިގެން ދިވެހި ރައްޔިތުންގެ މެދުގައި ދެ ގޮތަކަށް ކަންބޮޑުވުން އެބައޮތް ކަމަށާއި އެއް ކަމަކީ މި އިންވެސްޓް ކުރާ ފަރާތާއެކު އޮތް ކަންބޮޑުވުން ކަމަށް މީކާއިލް ވިދާޅުވި އެވެ. ދެވަނަ ކަންބޮޑުވުމަކީ މި މަޝްރޫއިން ދިވެހި ދައުލަތަށް ލިބެން ޖެހޭ ފައިދާ ދޫކޮށްލައި ވާނުވާއެއްގެ ތެރޭ، ކޮމަރޝަލް ޓަރމްސް ނޭނގި ދިވެހި ރައްޔިތުންނަށް ވަންހަނާކޮށް، ސިއްރުވެރިކޮށް އެކަން ކުރުން ކަމަށް މެންބަރު ވިދާޅުވި އެވެ.
މީކާއިލް ވިދާޅުވީ މީގެ އަހަރުތަކެއް ފަހުން، ދިވެހި ރައްޔިތުން މި ބިމުގައި ދެވަނަ ދަރަޖައިގެ ރައްޔިތުންގެ ގޮތުގައި ދިރިއުޅޭތަން ބަލަން ބޭނުން ނުވާ ކަމަށެވެ.
މިސާލެއް ދަންނަވާލާނަން. ކެމްޕޭނަކަށް ނުކުންނަ އިރު ވެސް ފަންޑަރެއިޒް ކުރާއިރު ފައިސާ ދިއްކޮށްލާނެ ބައިވަރު ފަރާތްތައް ވޭ. އެހެން ނަމަވެސް ހަމަބުއްދި ހުރި ހިކުމަތްތެރި މީހަކަށް އެނގޭނެ އޭގަ އަތްލާން ޖެހޭ ފައިސާ އާއި އަތް ނުލާން ޖެހޭ ފައިސާ އަޅުގަނޑުމެންނަށް ވިސްނޭނެ. މި ރައްޔިތުންގެ މަޖިލީހަށް އިންތިޚާބުވާން، ގޭންގް ސްޓާރެއްގެ ފައިސާގައި އަތް ލީމާ، އޭގެ އަހަރުތަކެއް ފަހުން އޭނާ އައިސް ހަމަކުރާނެ އެ ރައްޔިތުންގެ މަޖިލީހުގެ މެންބަރާ. އެހެންވީމާ އޭގަ އަތް ނުލާން ވަނީމީކާއިލް އަހުމަދު ނަސީމް
ދިވެހި ދައުލަތުން ޒަޔަނިސްޓު ވިސްނުމުގެ މި އިންވެސްޓަރުގެ ފައިސާގައި އަތްލައިގެން ނުވާނެ ކަމަށާއި މިކަން ސަރުކާރުން ބަލައިގަންނަން ޖެހޭ ކަމަށް ވެސް މީކާއިލް ވިދާޅުވި އެވެ. ދިވެހި ރައްޔިތުންގެ ކަންބޮޑުވުމާއި ދިވެހި ރައްޔިތުންގެ އާދޭސް ސަރުކާރަށް އިވެން ޖެހޭ ކަމަށް ވެސް މެންބަރު ވިދާޅުވި އެވެ.
ދެ އިންތިޚާބު އެއްކުރާ ވާހަކައާ ގުޅިގެން ސަރުކާރުން ވަރަށް ފަސޭހައިން ގާނޫނު އަސާސީ އަށް ބަދަލު ގެނަސްގެން ރެފަރެންޑަމްއަކަށް ވެސް ދިޔަ ކަމަށް މީކާއިލް ވިދާޅުވި އެވެ. އަދި މިކަމުގައި ވެސް ރެފަރެންޑަމްއަކަށް ދާން ޖެހޭ ކަމަށެވެ.
މިއަށްވުރެ ބޮޑު ކަންބޮޑުވުމެއް މި 5 އަހަރު ތެރެއަކު ނާންނާނެ. ރަސްމާލެ މަޝްރޫއާ ގުޅިގެން ރައްޔިތުންގެ މެދުގައި ކަންބޮޑުވުން އޮތް މިންވަރުގެ ކަންބޮޑުވުމެއް ދެނެއް ނާންނާނެ. މިއީ ރައްޔިތުންގެ ކައިރީގައި އަހަން ޖެހޭ ވަގުތު. މިއީ ރައްޔިތުންގެ އާނ ބަސް މިކަމަށް ހޯދަން ޖެހޭ ވަގުތު. ކެރިވަޑައިގަންނަވަންޏާ ރެފަރެންޑަމް އަކަށް ވަޑައިގަންނަވަން ވީ. ދެ އިންތިޚާބު އެއްކުރަން ހޯދުނީ 30 ޕަސެންޓް. ފަސް ޕަސެންޓު ވެސް ނުލިބޭނެމީކާއިލް އަހުމަދު ނަސީމް
މީކާއިލް ހުށަހަޅުއްވާފައިވާ ގަރާރުގައި ބުނެފައިވަނީ، ރަސްމާލޭގައި "މޯލްޑިވްސް ވޯޓަރ ފްރަންޓް އެންޑް މެރީނާ" ގެ ނަމުގައި މަޝްރޫއެއް ހިންގުމަށް ދިވެހިރާއްޖޭގެ ސަރުކާރާއި، ޔޫއޭއީގެ އީގަލް ހިލްސް ކުންފުންޏާ ދެމެދު އެކުލަވާލާފައިވާ ކޮމާޝަލް ޓާމްސް އެގްރީމަންޓްގެ ތަފްސީލުތައް މިހާތަނަށް ވެސް ސަރުކާރުން ހާމަކޮށްފައި ނުވާތީ، އެ އެއްބަސްވުމުގެ އެންމެހައި ތަފްސީލުތައް ހާމަކުރުމަށް ގޮވާލާ ކަމަށެވެ.
