ބޭރު ފަރާތްތަކަށް ރާއްޖޭގެ ބިން މިލްކުކުރެވޭ ގޮތަށް ދޫކޮށްލުމަކީ ރާއްޖޭގެ މައިގަނޑު ރުކުންތައް ފުނޑާލުން: ޖަމީލު
1 ނޮވެމްބަރު 2026 | އާދީއްތަ 12:19ބޭރުގެ ފަރާތްތަކަށް ރާއްޖޭގެ ބިން މިލްކުކުރެވޭ ގޮތް ހެދުމަކީ ދީނީ މިނިވަންކަމަށް މަގުފަހިވެ، ގައުމުގެ އަސާސްތައް ފުނޑިގެންދާނެ ކަމެއް ކަމަށް ވިދާޅުވެ ކުރީގެ ނައިބު ރައީސް ޑރ. ޖަމީލް ސަރުކާރަށް ވަނީ ވަރަށް ބޮޑަށް ފާޑު ވިދާޅުވެފައި. މީގެ އިތުރުން ގާނޫނުލްއުގޫބާތަށް އިސްލާހު ގެނެސްގެން ދީނީ ވާހަކަތައް ދެއްކުން ހަނިކުރާތީއާއި ގައުމުގައި ތަރައްގީގެ މަޝްރޫއުތައް ހުއްޓިފައިވާތީ ވެސް އެމަނިކުފާނު ކަންބޮޑުވުން ފާޅުކުރެއްވި
ރާއްޖެޓީވީގެ ޓީވީ ޓޯކް ޕްރޮގްރާމްގައި ކުރީގެ ނައިބު ރައީސް ޑރ. މުހައްމަދު ޖަމީލް އަހުމަދު ވާހަކަ ދައްކަވަނީ | ރާއްޖެއެމްވީ
ބޭރު ފަރާތްތަކަށް ރާއްޖޭގެ ބިން މިލްކުކުރެވޭ ގޮތަށް ދޫކޮށްލުމަކީ ދިވެހިރާއްޖޭގެ މައިގަނޑު ރުކުންތައް ފުނޑާލުން ކަމަށް ވިދާޅުވެ ކުރީގެ ނައިބު ރައީސް ޑރ. މުހައްމަދު ޖަމީލް އަހުމަދު ސަރުކާރަށް ވަރަށް ބޮޑަށް ފާޑުވިދާޅުވެއްޖެ އެވެ.
ރާއްޖެޓީވީގެ ޓީވީޓޯކް ޕްރޮގްރާމްގައި ވާހަކަދައްކަވަމުން ޖަމީލް ވިދާޅުވީ، ރާއްޖޭގެ ބިން ދޫކޮށްލުމަކީ ކޮށްގެން ވާނެ ކަމެއް ނޫން ކަމަށާއި، ބޭރު ފަރާތްތަކުން ބިން ގަންނައިރު ޣައިރު މުސްލިމުން ވެސް ގަންނާނެ ކަމީ އިންކާރު ނުކުރެވޭނެ ހަގީގަތެއް ކަމަށެވެ. އަދި އެކަން އެގޮތަށް ކޮށްފިނަމަ، އެ ފަރާތްތަކަށް ދީނީ މިނިވަންކަން ވެސް ދޭންޖެހޭނެ ކަމަށް ވިދާޅުވި އެވެ.
ޖަމީލް ވިދާޅުވީ ދީނީ މިނިވަންކަން ދިނުމަށްޓަކައި ހަދާނެ ގޮތް ހުސްވެގެން އުޅޭ މަންޒަރު ފެނިވަޑައިގަންނަވާ ކަމަށެވެ. އަދި ޖަމީލު ވިދާޅުވީ، ހައުސިން މިނިސްޓަރު ޑރ. އަބްދުﷲ މުއްތަލިބް އަދި ބަންޑާރަނައިބު އަހުމަދު އުޝާމް އަށް ވެސް މިކަމުގައި އަމަލުކުރާނެ ގޮތް ނޭނގޭކަން ހާމަވެފައިވާ ކަމަށެވެ. މީގެއިތުރުން ސައްތައިން ސައްތަ މުސްލިމު ގައުމެއްގައި ގާނޫނުލްއުގޫބާތަށް އިސްލާހު ގެނެސްގެން، ކީރިތި ގުރުއާނާއި ސުންނަތުގައި ޔަހޫދީންނާއި ނަސާރާއިންނާ ބެހޭގޮތުން އައިސްފައިވާ ވާހަކަތައް ނުދެއްކޭ ގޮތް ހަދަމުންދާތީ އެކަމާ މެދު ވެސް އޭނާ ކަންބޮޑުވުން ފާޅުކުރެއްވި އެވެ.
މިކަމާ ގުޅޭގޮތުން ކީރިތި ގުރުއާނުގެ ވަހީ ބަސްފުޅުތަކަށް ވެސް ޖަމީލު ވަނީ އަލިއަޅުއްވާލައްވާފަ އެވެ.
މައިދާ ސޫރަތުގެ 82 ވަނަ އާޔަތުގައި، އީމާންވި މީހުންނަށް މީސްތަކުންގެ ތެރެއިން އަދާވާތެރިކަން އެންމެ ބޮޑު ބަޔަކީ ޔަހޫދީންނާއި މުޝްރިކުން ކަމުގައި ވަހީކުރައްވާފައިވޭ. އަދި ބަޤަރާ ސޫރަތުގައި ވަހީކުރައްވަނީ، އެބައިމީހުންގެ ދީނަށް ތަބާވެއްޖައުމަށް ދާންދެން ޔަހޫދީންނާއި ނަސާރާއިން ރުހިގެން ނުވާނެ ކަމަށް. ދެން މި އާޔަތްތަކުގެ ވާހަކަ އަޅުގަނޑުމެން ނުދައްކަންވީތޯ؟ ގާނޫނުލްއުގޫބާތުގެ ތެރެއިން މި ވާހަކަތައް ނުދެއްކޭ ގޮތް ހަދައި، މި މިންވަރަށް އަޅުގަނޑުމެން ވައްޓާލަންވީ ކީއްވެގެންތޯ؟ޑރ. މުހައްމަދު ޖަމީލް އަހުމަދު
މީގެ އިތުރުން ރައީސް ޑރ. މުހައްމަދު މުއިއްޒުގެ ވެރިކަމަށް ތިން އަހަރު ފުރިގެން ދިޔައިރު ގައުމުގައި އެއްވެސް ތަރައްގީއެއް ނެތް ކަމަށް ވިދާޅުވެ ޖަމީލް ފާޑުވިދާޅުވި އެވެ. މެރީނާތަކުގައި މިސްކިތް އެޅި ނަމަވެސް، އެ ތަންތަނަށް ޔަހޫދީންނާއި ނަސާރާއިން ވެއްދުމުގެ ހައްގު ރައީސް މުއިއްޒަށް ދިނީ ކާކުތޯ ޖަމީލު ސުވާލު އުފެއްދެވި އެވެ. އަދި ވިދާޅުވީ ބޭރު ފަރާތްތަކަށް ރާއްޖޭގެ ބިން މިލްކުކުރެވޭ ގޮތަށް ދޫކޮށްލުމަކީ ރާއްޖޭގެ މައިގަނޑު ރުކުންތައް ފުނޑާލުން ކަމަށާއި، އެއީ ތަރައްގީ ނޫން ކަމަށެވެ.
