ޕުޓިންއާއި ޒެލެންސްކީގެ ބައްދަލުވުމެއް ވަރަށް އަވަހަށް ބާއްވާނަން: ޓްރަމްޕް
28 އޮކްޓޯބަރު 2026 | ބުދަ 09:05ރަޝިޔާއާއި ޔޫކްރެއިންގެ ރައީސުން ބައިވެރިވެވަޑައިގަންނަވާ ސުލްހައިގެ ޚާއްސަ ބައްދަލުވުމެއް ވަރަށް އަވަހަށް ބޭއްވުމަށް މަސައްކަތް ކުރަމުންދާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވަނީ ހާމަކުރައްވާފައި. މީގެ އިތުރުން، އީރާނުގެ މައްސަލައިގައި އެމެރިކާ އޮތީ ވަރުގަދަ މަގާމެއްގައި ކަމަށާއި، ކުރިއަށް އޮތް އިންތިޚާބަށްފަހު އެ ޤައުމާ ދެކޮޅަށް އަސްކަރީ ފިޔަވަޅު އެޅުމުގެ ފުރުސަތު އަދިވެސް އެބައޮތް ކަމަށް ޓްރަމްޕް ވިދާޅުވި
އެމެރިކާގެ ރައީސް ޑޮނަލްޑް ޓްރަމްޕާއި ރަޝިޔާގެ ރައީސް ވްލަޑިމިއަރ ޕުޓިން ބޭއްވެވި ބައްދަލުވުމެއްގައި ދެ ބޭފުޅުން ސަލާމް ކުރައްވަނީ | އަނަދޮލު އޭޖެންސީ
ރަޝިޔާގެ ރައީސް ވްލަޑީމިއަރ ޕުޓިންއާއި ޔޫކްރެއިންގެ ރައީސް ވޮލޮދީމީރް ޒެލެންސްކީ ބައިވެރިވެވަޑައިގަންނަވާ ޚާއްސަ ބައްދަލުވުމެއް "ވަރަށް އަވަހަށް" އިންތިޒާމުކުރެވިގެންދާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ބުދަ ދުވަހު ވިދާޅުވެއްޖެ އެވެ. ހަމަމިއާއެކު، އަންނަ ހަފުތާގައި ބާއްވާ އެމެރިކާގެ ދައުރުގެ މެދުތެރޭގެ އިންތިޚާބަށްފަހު، އީރާނަށް އަމާޒުކޮށް އަސްކަރީ އިތުރު ހަމަލާތަކެއް ދިނުމުގެ އިޚުތިޔާރު މުޅިން ދޫކޮށްނުލައްވާ ކަމަށް ވެސް އޭނާ ވަނީ ހާމަކުރައްވާފަ އެވެ.
ޓެކްސަސްގައި ބޭއްވި ކެމްޕޭން އެއްވުންތަކަށްފަހު އެނބުރި ވަޑައިގަންނަވައި ނޫސްވެރިންނާ ވާހަކަފުޅު ދައްކަވަމުން ޓްރަމްޕް ވިދާޅުވީ، ރިޔާސީ މަތިންދާބޯޓު 'އެއަރ ފޯސް ވަން' ގެ ތެރޭގައި ޚާރިޖީ ވަޒީރު މާރކޯ ރޫބިއޯއާއި އޭނާގެ ޚާއްސަ މަންދޫބު ސްޓީވް ވިޓްކޮފްއާއެކު މި ދެ މައްސަލައާ ގުޅޭގޮތުން މަޝްވަރާކުރައްވާފައިވާ ކަމަށެވެ.
"ރަޝިޔާއާއި ޔޫކްރެއިންގެ މައްސަލައިގައި އަޅުގަނޑުމެންނަށް ބޮޑެތި ކުރިއެރުންތަކެއް ލިބެމުންދާ ކަމަށް އަޅުގަނޑު ދެކެން. ވަރަށް އަވަހަށް ބައްދަލުވުމެއް އިންތިޒާމުކުރެވިގެންދާނެ،" ޓްރަމްޕް ވިދާޅުވި އެވެ. މި ބައްދަލުވުމުގައި ބައިވެރިވެވަޑައިގަންނަވާނީ ކޮން ބޭފުޅުންނެއްތޯ ސުވާލު ދެންނެވުމުން، "ރައީސް ޕުޓިން އަދި ރައީސް ޒެލެންސްކީ،" ކަމަށް ވިދާޅުވި ނަމަވެސް، އެ މަޝްވަރާތައް ބާއްވާނެ ސީދާ ތާރީޚެއް، ތަނެއް، ނުވަތަ ބައްދަލުވުން ކުރިއަށްދާނެ ގޮތުގެ ތަފުސީލެއް އޭނާ ނުދެއްވަ އެވެ.
ރަޝިޔާގެ ވެރިރަށް މޮސްކޯއާއި ޔޫކްރެއިންގެ ވެރިރަށް ކިީވްއާ ދެމެދު އެމެރިކާ މެދުވެރިވެގެން ސުލްހައިގެ އެންމެ ފަހުގެ މަޝްވަރާތައް ބާއްވާފައި ވަނީ މި އަހަރުގެ ކުރީކޮޅުގަ އެވެ. މި ގޮތުން ޖަނަވަރީ އަދި ފެބުރުވަރީ މަހު އަބޫދާބީ އަދި ޖެނީވާގައި ތިން ބުރެއްގެ މަތިން މަޝްވަރާތައް ކުރިއަށްގެންގޮސްފައިވެ އެވެ. 2022 ވަނަ އަހަރު ހަނގުރާމަ ފެށުނު ފަހުން މިހާތަނަށް ދެ ޤައުމުގެ ރައީސުން އެއް މޭޒުދޮށަކުން ބައްދަލުވެވަޑައިގަންނަވާފައެއް ނުވެ އެވެ. އެހެންކަމުން، މިއީ އެ ފަދަ ބައްދަލުވުމެއް ބޭއްވޭ ފުރަތަމަ ފަހަރަށް ވެގެންދާނެ އެވެ.
ދެން ޓްރަމްޕް އަލިއަޅުއްވާލެއްވީ އީރާނާ ދެކޮޅަށް އޭނާ އިސްވެ ފެށްޓެވި ޣައިރުގާނޫނީ ހަނގުރާމައަށެވެ. ޓްރަމްޕް ވިދާޅުވީ ތެހެރާނުން އެމެރިކާއާއެކު އެއްބަސްވުމަކަށް އަންނަން ބޭނުންވި ނަމަވެސް، މަޝްވަރާތައް ކުރިއަށްގެންދިއުން އެ ޤައުމުން ލަސްކުރަމުންދާ ކަމަށެވެ. އަދި، އެ ކަން އެ ގޮތަށް ކުރަނީ ނޮވެންބަރު 3 ގައި ބާއްވާ އެމެރިކާގެ މެދުދައުރުގެ އިންތިޚާބު ނިމެންދެން ކަމަށް ލަފާކުރެވޭ ކަން ވެސް އޭނާ ފާހަގަކުރެއްވި އެވެ.
"އަޅުގަނޑު ދެކޭގޮތުގައި އީރާނުގެ މައްސަލައިގައި އަޅުގަނޑުމެން މި ތިބީ ވަރަށް ރަނގަޅު މަގާމެއްގައި. މިއީ، ހަމައެކަނި އަޅުގަނޑު މި ކަން ނިންމަން ބޭނުންވަނީ ކޮން އިރަކުތޯ އޮތް ސުވާލެއް،" ކުރިން ވެސް މި މައްސަލައިގައި ގެންގުޅުއްވި ވިސްނުންފުޅު ތަކުރާރުކުރައްވަމުން ޓްރަމްޕް ވިދާޅުވި އެވެ.
އިންތިޚާބަށްފަހު އީރާނަށް އަމާޒުކޮށް އިތުރު އަސްކަރީ ހަމަލާތަކެއް ދިނުމަށް ރާއްވަވަމުން ގެންދަވާތޯ ސުވާލު ދެންނެވުމުން، އެ ކަމާ މެދު ސީދާ ޖަވާބެއް ދެއްވުމަށް އޭނާ އިންކާރުކުރެއްވި އެވެ. "ކޮންމެ ކަމެއް ވެސް ވެދާނެ، އެކަމަކު އަދި ތިޔަކަމުގެ ތަފުސީލެއް އަޅުގަނޑަކަށް ދަންނަވާކަށް ނޭނގޭ،" ޓްރަމްޕް ވިދާޅުވި އެވެ.
ވޮޝިންގޓަނާއި ތެހެރާނާ ދެމެދު އަސްކަރީ ކުރިމަތިލުންތައް ފެށުނީ ފެބުރުވަރީ މަހުގެ ފަހުކޮޅު އެމެރިކާއާއި އިސްރާއީލުން ގުޅިގެން އީރާނަށް ދިން ވަރުގަދަ ވައިގެ ހަމަލާތަކަކާ ގުޅިގެންނެވެ. އެ ހަމަލާތަކާއެކު މުޅި ސަރަހައްދަށް ހަނގުރާމަ ފުޅާވެގެންދިޔައިރު، ހަނގުރާމަ ހުއްޓާލުމަށާއި ސުލްހައިގެ އެއްބަސްވުމެއް އެކުލަވާލުމަށް އިގުރާރުވެފައި ވީނަމަވެސް، މި މައްސަލައަށް އަދިވެސް ދާއިމީ ހައްލެއް ލިބިފައެއް ނުވެ އެވެ.
މަސްދަރު: އަނަދޮލު އޭޖެންސީ
