ޕެންޓަގަންގެ ސިއްރު ހިސާބުތަކެއް ފަޅާއަރައިފި: އީރާން ހަނގުރާމައަށް ހޭދަވި އަދަދު 47 ބިލިޔަން ފަހަނައަޅައިފި
28 އޮކްޓޯބަރު 2026 | ބުދަ 05:49އީރާނާ ދެކޮޅަށް ކުރާ ހަނގުރާމައިގެ ޚަރަދުތައް އިންތިހާއަށް އުފުލުމާ ގުޅިގެން، އެމެރިކާގެ ކުރިއަށް އޮތް އިންތިޚާބުގައި ރައީސް ޓްރަމްޕަށާއި ރިޕަބްލިކަން ޕާޓީއަށް ސިޔާސީ ގޮންޖެހުންތަކެއް ވަނީ ކުރިމަތިވެފައި. ހަނގުރާމައިގައި ބޭނުންކުރި ހަތިޔާރާއި ވަސީލަތްތައް އަލުން ހޯދުމަށް ބިލިޔަނުން ޚަރަދުވާނެ ކަމަށް ލަފާކުރެވޭއިރު، އިންތިޚާބަށްފަހު އަސްކަރީ އޮޕަރޭޝަންތައް ވަރުގަދަކުރުމަށް ޕެންޓަގަނުން ދަނީ ތައްޔާރުވަމުން.
އީރާނުގެ ބަނދަރުތަކުގެ ހިސާރު ތަންފީޒު ކުރުމަށް އެމެރިކާގެ އަސްކަރީ މަތިންދާބޯޓު އުފުލާ މަނަވަރު ޔޫއެސްއެސް ޖޯޖް އެޗްޑަބްލިޔު ވޮޝިންގޓަނުގައި އަސްކަރީ އޮޕަރޭޝަންތައް ހިންގަނީ | ސެންޓްކޮމް
އީރާނާ ދެކޮޅަށް އެމެރިކާގެ އަސްކަރިއްޔާއިން ކުރަމުންދާ ޣައިރުގާނޫނީ ހަނގުރާމައިގެ ޚަރަދު މިހާތަނަށް 47 ބިލިޔަން އެމެރިކާ ޑޮލަރަށް ވުރެ މައްޗަށް އަރާފައިވާ ކަމަށް ޕެންޓަގަންގެ ހިސާބުތަކުން ދައްކައިފި އެވެ. މިއީ ޖުލައި މަހު އެމެރިކާގެ ދިފާޢީ ވުޒާރާއިން އަންދާޒާކުރި މިންވަރަށް ވުރެ %25 މަތީ އަދަދެއް ކަމަށް، ރޮއިޓަރސް ނޫސް އޭޖެންސީއަށް ލިބިފައިވާ ތަފާސްހިސާބުތަކުން ވަނީ ހާމަވެފަ އެވެ. އާންމުކޮށް ހާމަކޮށްފައި ނުވާ މި ހިސާބުތަކާ ގުޅިގެން ކޮމެންޓެއް ހޯދުމަށް އެދުމުން ޕެންޓަގަނުން ޖަވާބެއް ދީފައެއް ނުވެ އެވެ.
ބޮޑުވި ޚަރަދާއި ސިޔާސީ ނުތަނަވަސްކަން
ހަނގުރާމައިގެ ޚަރަދުތައް އިންތިހާއަށް އުފުލިފައިވާކަން މި ހާމަވީ، އެމެރިކާގެ ކޮންގްރެސްގެ ދެ ގެ ކަމަށްވާ ސެނެޓާއި ހައުސް އޮފް ރެޕްރެޒެންޓެޓިވްސްގެ އަޣުލަބިއްޔަތު ކުރިއަށް އޮތް ދެ އަހަރަށް ކަނޑައަޅާނެ ނޮވެންބަރު 3 ގެ މެދުދައުރުގެ އިންތިޚާބު ބޯމަތިވެފައި ވަނިކޮށެވެ. އާންމުންގެ މެދުގައި މަގުބޫލުކަން ކުޑަ މި ހަނގުރާމައިގެ ސަބަބުން ކުރިމަތިވެފައިވާ ސިޔާސީ ނަތީޖާތަކާ ދެކޮޅަށް ވެރިކަންކުރާ ރިޕަބްލިކަން ޕާޓީން މިހާރު ދަނީ ބޮޑެތި ގޮންޖެހުންތަކަކާ ކުރިމަތިލަމުންނެވެ.
މި ހަނގުރާމައިގެ ސަބަބުން ދުނިޔޭގެ ހަކަތައިގެ ބާޒާރުގައި އަގުތައް އުފުލިގެން ދިއުމަކީ ރިޕަބްލިކަން ކެންޑިޑޭޓުންނަށް އޮތް ތާއީދު ކުޑަވެ، ރައީސް ޑޮނަލްޑް ޓްރަމްޕްގެ މަގުބޫލުކަމުގެ ރޭޓިންގަށް ބޮޑު ލޮޅުމެއް އެރި މައިގަނޑު ސަބަބެވެ. މި ވަގުތު ކޮންގްރެސްގެ ދެ ގޭގައި ވެސް ޓްރަމްޕްގެ ރިޕަބްލިކަން ޕާޓީގެ އޮތީ ހަނި އަޣުލަބިއްޔަތެކެވެ.
ހަތިޔާރާއި ވަސީލަތްތައް އަލުން ހޯދުމުގެ އަގު
ޕެންޓަގަންގެ އެންމެ ފަހުގެ ހިސާބުތައް ބިނާކޮށްފައި ވަނީ ހަނގުރާމައިގެ އޮޕަރޭޝަނަލް ޚަރަދުތަކުގެ މައްޗަށެވެ. މި ގޮތުން، މި ހަނގުރާމައިގައި ބޭނުންކޮށްފައިވާ ހަތިޔާރު އަލުން ހޯދައި ސަޕްލައި ފުރިހަމަކުރުމަށް އެކަނި ވެސް 29 ބިލިޔަން ޑޮލަރަށް ވުރެ ބޮޑު ޚަރަދެއް ހިނގާނެ ކަމަށް ލަފާކޮށްފައިވެ އެވެ. މިއާއެކު، ހަނގުރާމައިގެ ތެރޭގައި ގެއްލިފައިވާ އަސްކަރީ ސާމާނާއި، ގިނަ އަދަދެއްގެ ޑްރޯންތަކާއި އަސްކަރީ މަތިންދާބޯޓުތައް ހިމެނޭހެން "ޕްލެޓްފޯމް ގެއްލުންތައް" ފޫބެއްދުމަށް 6 ބިލިޔަން ޑޮލަރަށް ވުރެ ގިނަ ފައިސާ ބޭނުންވާނެ ކަމަށް ބުންޏެވެ.
ފެބުރުވަރީ މަހު އިސްރާއީލުން ބައިވެރިވެގެން ޓްރަމްޕް މި ހަނގުރާމަ ފެށްޓެވީ، މިއީ ވަރަށް ކުރު މުއްދަތަކުން ނިންމާލެވޭނެ ހަނގުރާމައެއް ކަމަށް ލަފާކުރައްވަމުންނެވެ. ހަނގުރާމައިގެ ފުރަތަމަ މަރުހަލާގައި ޓްރަމްޕްގެ އިސްތިރާޖު ބިނާކުރެއްވީ، އަގުބޮޑެތި އަދި އެންމެ ޒަމާނީ ޕްރިސިޝަން މިސައިލްތައް ބޭނުންކޮށްގެން އީރާނުގެ ދިފާޢީ ނިޒާމުތައް ފުނޑުފުނޑުކޮށްލުމަށެވެ. އެއަށްފަހު، އަގުހެޔޮ ހަތިޔާރުތަކާއި، ގިނަ އަދަދަކަށް ހުރި 'ޖޭޑޭމްސް' މަރުކާގެ ވައިގެ މަގުން ވައްޓާލާ ގްރެވިޓީ ބޮންތައް ބޭނުންކުރުމަށެވެ.
ހަމަލާތައް މެދުކަނޑައިލުމުގެ އެއްބަސްވުމުގެ އަސަރާއި ކުރިމަގުގެ ރޭވުންތައް
ނަމަވެސް، އެޕްރީލު މަހު އައި ހަނގުރާމަ މެދުކަނޑައިލުމުގެ އެއްބަސްވުމުގެ ސަބަބުން، ބިމުގެ އަޑީގައިވާ ގުދަންތައް އަލުން ކޮނެ، އަތްނުފޯރާ ހިސާބުގައި ހުރި ދިފާޢީ ވަސީލަތްތަކާއި މިސައިލްތަކާއި ޑްރޯންތައް އަނބުރާ އޮޕަރޭޝަނަށް ގެނައުމުގެ ފުރުސަތު އީރާނަށް ލިބުނެވެ. މި ކަމާ ގުޅިގެން، އީރާނަށް ތެލުގެ ވިޔަފާރިން ލިބޭ އާމްދަނީ ހުއްޓުވުމަށް ޓަކައި ޓްރަމްޕް ވަނީ އެ ޤައުމާ ދެކޮޅަށް ކަނޑުމަގުން ބްލޮކޭޑެއް ނުވަތަ ހިސާރެއް ގާއިމުކުރައްވާފަ އެވެ. އަދި، މިޑްޓަރމް އިންތިޚާބަށްފަހު އަސްކަރީ އޮޕަރޭޝަންތައް އަލުން ފެށިދާނެ ކަމުގެ އިންޒާރު ވެސް ދެއްވާފައިވެ އެވެ. ނަން ހާމަނުކުރުމަށް ޝަރުތުކޮށް ވާހަކަދެއްކި އެމެރިކާގެ އޮފިޝަލުން ވިދާޅުވީ، ޓްރަމްޕްގެ އަމުރެއް ލިބިއްޖެ ހިނދެއްގައި ވަރުގަދަ ހަމަލާތައް އަލުން ފެށުމަށް ޕެންޓަގަނުން ދަނީ ތައްޔާރުވަމުންނެވެ.
ޕެންޓަގަންގެ އެންމެ ފަހުގެ މި ހިސާބުތަކަކީ، ދިފާޢީ ވަޒީރު ޕީޓް ހެގްސެތު ޖުލައި މަހު ހަނގުރާމައިގެ ޚަރަދަކީ 37.5 ބިލިޔަން ޑޮލަރު ކަމަށް ވިދާޅުވި ވިދާޅުވުމާ އަޅާބަލާއިރު ވަރަށް ބޮޑު އިތުރުވުމެކެވެ. ފްލައިޓް އޮޕަރޭޝަންތަކުން ފެށިގެން ސައިބަރ ސަޕޯޓާ ހަމައަށް ހިނގާ ގިނަގުނަ އޮޕަރޭޝަނަލް ޚަރަދުތައް މި ހިސާބުތަކުގައި ހިމެނުނު ނަމަވެސް، އީރާނުގެ މިސައިލާއި ޑްރޯން ހަމަލާތަކުގެ ސަބަބުން އެމެރިކާގެ އަސްކަރީ މަރުކަޒުތަކަށް ލިބިފައިވާ ބޮޑެތި ގެއްލުންތައް މަރާމާތުކުރުމަށް ހިނގާނެ ބޮޑު ޚަރަދު މި އަންދާޒާތަކުގައި ސާފުކޮށް ހިމަނާފައި ނުވާކަން ފާހަގަކޮށްލެވެ އެވެ.
މަސްދަރު: ރޮއިޓަރސް
