އީރާނުގެ ނިއުކްލިއަރ ސިޔާސަތާއި އެމެރިކާގެ ދަތިކުރުންތަކުގެ އަރާރުމުގެ ތެރެއިން، މެދުއިރުމަތީގެ ހަނގުރާމަ ހުއްޓުވަން ޤަތަރުން އަލުން މަޝްވަރާތައް ފަށައިފި
30 އޮކްޓޯބަރު 2026 | ހުކުރު 09:44އެމެރިކާއިން ހުށަހެޅި ސުލްހައިގެ ޑްރާފްޓަށް އީރާނުން އިންކާރުކޮށްފައިވާއިރު، މަޝްވަރާތައް ކުރިއަށް ގެންދިއުމަށް އީރާނުން ޝަރުތުކުރަނީ އެ ޤައުމާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އުވާލުމަށް. މެދުއިރުމަތީގެ ހަނގުރާމަ ހުއްޓާލުމަށް އީރާނުން ހުށަހެޅި ކަންކަމާ މެދު މެދުވެރިންނާއެކު މަޝްވަރާ ކުރަމުންދާއިރު، އެމެރިކާގެ އިސްވެރިންނާއި އީރާނާ ދެމެދު ސިއްހީ ސާމާނާ ގުޅޭ މުއާމަލާތްތަކެއް ހިނގާފައިވާ ކަމަށް ރައީސް ޓްރަމްޕް ވަނީ ވިދާޅުވެފައި
އީރާނުގެ ރައީސް މަސްޢޫދު ޕީޒިޝްކިޔާން، ޤަތަރުގެ އަމީރު ޝައިޚް ތަމީމް ބިން ޙަމަދު އަލް ޘާނީއާ ރަޝިއާގެ މޮސްކޯގައި ބައްދަލުކުރައްވަނީ | ރޮއިޓަރސް
އެމެރިކާއާއި އީރާނާ ދެމެދު އެއްބަސްވުމަކަށް ވާސިލުވުމަށް ކުރެވެމުންދާ މަސައްކަތްތަކުގެ ތެރެއިން، ޤަތަރުގެ މެދުވެރިން ހުކުރު ދުވަހު ތެހްރާނަށް ވަޑައިގަންނަވައި، އެ ޤައުމުގެ އިސް އޮފިޝަލުންނާއެކު މަޝްވަރާތައް ފަށްޓަވައިފި އެވެ. މި މަޝްވަރާތައް ކުރިއަށް ގެންދަނީ އެމެރިކާއާ ވިލަރެސްކުރެވިގެން ކަމަށް މި ކަމުގެ މަޢުލޫމާތު އިނގޭ މަަސްދަރުތަކުން ބުންޏެވެ.
ސުލްހައިގެ އެއްބަސްވުމެއްގެ ޑްރާފްޓު ޤަތަރުން އީރާނަށް ހުށަހެޅީ މިދިޔަ އާދީއްތަ ދުވަހު އެވެ. އެއީ، އެމެރިކާއިން ބޭނުންވާ ކަންކަން ހިމާނާފައިވާ ޑްރާފްޓެކެވެ. ނަމަވެސް، އީރާނުގެ އިސް އޮފިޝަލަކު ވަނީ އެ ހުށަހެޅުންތަކަކީ ބަލައިގަނެވޭނެ ކަންކަން ނޫން ކަމަށް ބުނެ، އެމެރިކާގެ އެންމެ ފަހުގެ ހުށަހެޅުންތަކަށް އިންކާރުކޮށްފަ އެވެ. އަދި، އީރާނުން ގެންގުޅޭ ނިއުކްލިއަރ ސިޔާސަތު އެ ގޮތުގައި ދަމަހައްޓާނެ ކަމަށް ވެސް އެ އޮފިޝަލް ބުންޏެވެ.
މަޝްވަރާތައް ފެށޭ ހިސާބުން ފެށިގެން ވެސް ނިއުކްލިއަރ މައްސަލަތައް ހިމެނުމަށް ވޮޝިންގޓަނުން ބޭނުންވެ އެވެ. ނަމަވެސް، ތެހްރާނުން ޝަރުތުކުރަނީ މަޝްވަރާތަކުގެ ކުރިން، އެމެރިކާއިން އީރާނުގެ ބަނދަރުތަކަށް އަޅާފައިވާ ބަންދުކުރުމުގެ ފިޔަވަޅުތައް އުވާލައި، ތެޔޮ އެކްސްޕޯޓު ކުރުމަށް އަޅާފައިވާ ދަތިކުރުމުގެ ފިޔަވަޅުތައް އުވާލުމަށެވެ.
އީރާނުގެ ޚާރިޖީ ވަޒީރު ޢައްބާސް ޢަރާޤްޗީ ބުދަ ދުވަހު ވިދާޅުވީ، މެދުއިރުމަތީގެ ހަނގުރާމަ ނިމުމަކަށް ގެނައުމަށް ޓަކައި އީރާނުން އަމިއްލައަށް ހުށަހަޅާފައިވާ ހަތް ދުވަހުގެ ހުށަހެޅުން ތަންފީޒުކުރެވޭނެ ގޮތްތަކުގެ ޚިޔާލުތައް މުރާޖާކުރުމަށް، މެދުވެރިންނާ ގާތް ގުޅުމެއް ބާއްވަމުން ގެންދަވާ ކަމަށެވެ.
މިއާއެކު، ބުރާސްފަތި ދުވަހު ވާހަކަފުޅު ދައްކަވަމުން ރައީސް ޑޮނަލްޑް ޓްރަމްޕް ވިދާޅުވީ، ނައިބު ރައީސް ޖޭޑީ ވެންސް އީރާނާއެކު ކުރެއްވި މުއާމަލާތުތަކަކީ ސިއްހީ ސާމާނާ ގުޅޭ ކަންކަމުގައި ކުރެއްވި މުއާމަލާތްތަކެއް ކަމަށެވެ. ޓްރަމްޕް މި މޭރުމުން ވިދާޅުވީ، އެ މުއާމަލާތްތަކަކީ ސުލްހައިގެ ވާހަކަތައް އަލުން ފެށުމަށް ކުރެވުނު މަސައްކަތްތަކަކާ ގުޅުންހުރި ކަމެއް ކަމަށް ބުނެ އެމެރިކާގެ މީޑިއާތަކުން ރިޕޯޓުކުރުމާ ގުޅިގެންނެވެ. އޭނާ އިޝާރާތް ކުރައްވާފައި އެ ވަނީ ވެންސް އީރާން ސަރުކާރުގެ އިސް އޮފިޝަލަކަށް ފޮނުއްވި ސިޓީއަކަށެވެ.
މަސްދަރު: ރޮއިޓަރސް
