ނަފްސާނީ އެހީތެރިކަން ހޯދުމަކީ ނިކަމެތިކަމެއް ނޫން، އެއީ ހިތްވަރުގަދަކަމުގެ ނިޝާނެއް: ފަސްޓް ލޭޑީ ސާޖިދާ
1 ނޮވެމްބަރު 2026 | އާދީއްތަ 08:45ސާކް ފެޑަރޭޝަން އޮފް ސައިކިއޭޓްރިކް ކޮންފަރެންސްގައި ވާހަކަފުޅު ދައްކަވަމުން، ނަފްސާނީ ބަލިތަކަށް އޮންނަ ނުބައި ތަސައްވަރު ނައްތާލައި އޯގާތެރި މުޖުތަމައެއް ބިނާކުރުމަށް ފަސްޓް ލޭޑީ ސާޖިދާ މުޙައްމަދު ގޮވާލައްވައިފި. ސަރުކާރުގެ ސްޓްރެޓީޖިކް އެކްޝަން ޕްލޭންގެ ދަށުން ނަފްސާނީ ދުޅަހެޔޮކަމަށް ޚާއްސަ އިސްކަމެއް ދޭކަން ފާހަގަކުރައްވައި، ޒުވާނުންނާއި ކުޑަކުދިންނަށް ބޭނުންވާ އެހީތެރިކަން ފޯރުކޮށްދިނުމުގައި ގޭތެރެއާއި މުޅި މުޖުތަމައުގެ ޒިންމާ ބޮޑުކަމަށް އެކަމަނާ ވިދާޅުވި
ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުހައްމަދު | ރައީސް އޮފީސް
ޖިސްމާނީ ދުޅަހެޔޮކަމާ އެއްވަރަށް ނަފްސާނީ ދުޅަހެޔޮކަމަށް ވެސް އަހަންމިއްޔަތުކަން ދޭންޖެހޭ ކަމަށާއި، ނަފްސާނީ ދުޅަހެޔޮކަން ނެތި ސިއްހަތު ސަލާމަތުން އޮތް މުޖުތަމައެއް ބިނާނުކުރެވޭނެ ކަމަށް ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުހައްމަދު ވިދާޅުވެއްޖެ އެވެ.
ފަސްޓް ލޭޑީ ސާޖިދާ މިހެން ވިދާޅުވީ ދިވެހިރާއްޖޭގެ ގައުމީ ޔުނިވާސިޓީގައި ބޭއްވި "16 ވަނަ އިންޓަނޭޝަނަލް ކޮންފަރެންސް އޮފް ދަ ސާކް ފެޑަރޭޝަން އޮފް ސައިކިއޭޓްރިކް" ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ. ދެ ދުވަހުގެ މުއްދަތަށް ކުރިއަށްދާ މި ކޮންފަރެންސް ބޭއްވުމަށް ހަމަޖެހިފައިވަނީ 2026 ނޮވެމްބަރު 1 އިން 2 އަށެވެ.
ނަފްސާނީ ދުޅަހެޔޮކަމަކީ ހަމައެކަނި ބޭސްފަރުވާއާ ގުޅިފައިވާ ކަމެއް ނޫން ކަމަށާއި، އެއީ އިންސާނީ ކަރާމާތާއި، އިންސާނީ ގުޅުންތަކުގެ އިތުރުން، މިހާރުގެ އަދި އަންނަން އޮތް ޖީލުތަކަށްޓަކައި ބިނާކުރަން ބޭނުންވާ ދިރިއުޅުމުގެ ފެންވަރާ ގުޅިފައިވާ ކަމެއްކަން ފަސްޓް ލޭޑީ ފާހަގަކުރެއްވި އެވެ. އަދި ސަރަހައްދީ ފެންވަރުގައި ނަފްސާނީ ދުޅަހެޔޮކަމުގެ ގޮންޖެހުންތައް އިތުރުވަމުންދާކަން ފާހަގަކުރައްވައި، ހުރިހާ އުމުރެއްގެ އަދި ހުރިހާ ފަންތިއެއްގެ މީހުންނަށް ވެސް މިކަމުގެ އަސަރު ކުރަމުންދާކަމަށް އެކަމަނާ ވިދާޅުވި އެވެ.
ގިނަ ބަޔަކަށް ކުރިމަތިވާ އެންމެ ބޮޑު ދަތިކަމަކީ ބަލީގެ ހާލަތަށްވުރެ ބޮޑަށް، އެކަމާ ބެހޭގޮތުން ވާހަކަދައްކަން ޖެހިލުންވުމާއި، މުޖުތަމައުން ދެކޭ ގޮތާމެދު އޮންނަ ބިރުވެރިކަން ކަމަށް އެކަމަނާ ވިދާޅުވި އެވެ. އެހެންކަމުން، އެހީތެރިކަން ހޯދުމަކީ ނިކަމެތިކަމެއްގެ ބަދަލުގައި އެއީ ހިތްވަރުގަދަކަމެއްގެ ގޮތުގައި ބަލައިގަންނަ، އަދި ނަފްސާނީ ބަލިތަކަށް އޮންނަ ނުބައި ތަސައްވަރުގެ ބަދަލުގައި އޯގާތެރިކަމާއި ހަމްދަރުދީ އިސްކުރާ މުޖުތަމައަކަށް ވުމަށް އެކަމަނާ ގޮވައިލެއްވި އެވެ.
މައެއްގެ ހައިސިއްޔަތުން ވާހަކަފުޅު ދައްކަވަމުން ކިޔެވުމުގެ ޕްރެޝަރާއި، މުޖުތަމައުން ކުރާ އުންމީދުތަކާއި، އާއިލީ މައްސަލަތަކުގެ އިތުރުން އިންޓަނެޓްގެ ނުފޫޒުގެ ސަބަބުން ކުޑަކުދިންނާއި ޒުވާނުންގެ ނަފްސާނީ ދުޅަހެޔޮކަމަށް ކުރާ އަސަރުތަކާ މެދު ފަސްޓް ލޭޑީ ކަންބޮޑުވުން ފާޅުކުރެއްވި އެވެ. ކުދިންގެ ކިބައިން ފެންނަ ނަފްސާނީ ބަލިކަށިކަމުގެ ނިޝާންތައް ދެނެގަނެ، އެއްވެސް ތަފާތުކުރުމެއް ނެތި އެކުދިންގެ އަޑުއަހައި، އޯގާތެރިކަމާއެކު އެހީތެރިވުމުގެ މުހިންމުކަން އެކަމަނާ ފާހަގަކުރެއްވި އެވެ. އަދި ޒުވާނުންގެ ނަފްސާނީ ދުޅަހެޔޮކަން ވަރުގަދަކުރުމުގެ ޒިންމާ ފެށެނީ ގޭތެރެއިން ކަމަށާއި، އެއަށްފަހު ސްކޫލްތަކާއި މުޅި މުޖުތަމައަށް އެ ޒިންމާ ފެތުރިގެންދާކަމަށް ވިދާޅުވި އެވެ.
ދިވެހިރާއްޖެ އިން ކުރަމުންދާ މަސައްކަތްތަކަށް އަލިއަޅުއްވާލައްވަމުން، ސަރުކާރުގެ ސިއްހީ އެޖެންޑާގެ ދަށުން ނަފްސާނީ ދުޅަހެޔޮކަމަށް ބޮޑު އިސްކަމެއް ދީފައިވާކަން ފަސްޓް ލޭޑީ ފާހަގަކުރެއްވި އެވެ. އެގޮތުން 2025 އިން 2029 އަށް އެކުލަވާލާފައިވާ "ނޭޝަނަލް މެންޓަލް ހެލްތު ސްޓްރެޓީޖިކް އެކްޝަން ޕްލޭން" ގެ ދަށުން، ނަފްސާނީ ބަލިތަކަށް އޮންނަ ނުބައި ތަސައްވަރު ކުޑަކުރުމާއި، ކުރިއާލާ އެހީތެރިކަން ހޯދުމަށް ބާރުއެޅުމާއި، ރިފަރަލް ނިޒާމު ހަރުދަނާކުރުމުގެ އިތުރުން، އާންމު ސިއްހީ ހިދުމަތްތަކުގެ ތެރޭގައި ނަފްސާނީ ފަރުވާ ހިމެނުމަށް ކުރާ މަސައްކަތްތައް އެކަމަނާ ފާހަގަކުރެއްވި އެވެ.
މީގެ އިތުރުން ނޭޝަނަލް މެންޓަލް ހެލްތު ޑިޕާޓްމަންޓާއި 24 ގަޑިއިރު ހިދުމަތްދޭ ހެލްޕްލައިންގެ ދައުރުގެ މައްޗަށް ވެސް އަލިއަޅުއްވާލެއްވި އެވެ. އެކަމަނާ ވިދާޅުވީ މި މަސައްކަތްތަކުގެ ކާމިޔާބީ މިނެކިރަންވާނީ ރަނގަޅުކުރެވޭ ދިރިއުޅުންތަކާއި އާލާކުރެވޭ އުންމީދުތަކުން ކަމަށާއި، ދިރިއުޅޭ ރަށެއްގެ ސަބަބުން އެއްވެސް މީހަކަށް އެކަށީގެންވާ ވަގުތުގައި ފަރުވާ ނުލިބި ހުރެގެން ނުވާނެ ކަމަށެވެ.
ނަފްސާނީ ދުޅަހެޔޮކަމުގެ ދާއިރާގައި މަސައްކަތްކުރައްވާ ސައިކިއޭޓްރިސްޓުންނާއި، ސައިކޮލޮޖިސްޓުންނާއި، ކައުންސެލަރުންނާއި، ނަރުހުންނާއި، ސޯޝަލް ވޯކަރުންނާއި، މުދައްރިސުންނާއި، ދިރާސާކުރާ ފަރާތްތަކުގެ އިތުރުން ސިއްހީ ހިދުމަތްތެރިން ކުރައްވާ މަސައްކަތްތަކަށް ފަސްޓް ލޭޑީ ޝުކުރު އަދާކުރެއްވި އެވެ. އަދި ތައުލީމާއި ތަމްރީނާއި ދިރާސާތަކުގެ ޒަރީއާއިން ގައުމީ ފެންވަރުގައި މި ދާއިރާގެ ގާބިލުކަން އިތުރުކުރުމަށް ދިވެހިރާއްޖޭގެ ގައުމީ ޔުނިވާސިޓީ އިން ކުރާ މަސައްކަތްތަކަށް އެކަމަނާ ތައުރީފު ކުރެއްވި އެވެ. މީގެ އިތުރުން، ކުޑަކުދިންނާއި ޒުވާނުންނަށް ކުރިމަތިވާ ނަފްސާނީ ގޮންޖެހުންތަކާ ގުޅޭގޮތުން އިތުރު ދިރާސާތައް ކުރުމަށް ގޮވާލައްވަމުން، ނަފްސާނީ ފަރުވާއަކީ ދިރާސާކުރެވިގެން، އިންސާނިއްޔަތުކަމާއެކު ފޯރުކޮށްދޭންޖެހޭ ހިދުމަތެއްކަން ފާހަގަކުރެއްވި އެވެ.
އެކަމަނާގެ ވާހަކަފުޅު ނިންމަވާލައްވަމުން ނަފްސާނީ ބަލިތަކަކީ ވަކި ގައުމެއްގެ ބޯޑަރަކަށް ހުއްޓޭ ކަމެއް ނޫންކަން ފާހަގަކުރައްވައި، މިކަމުގައި ސަރަހައްދީ އެއްބާރުލުން އިތުރުކުރުމުގެ މުހިންމުކަމުގެ މައްޗަށް އަލިއަޅުއްވާލެއްވި އެވެ. އަދި މި ކޮންފަރެންސްގެ ސަބަބުން ދާއިރާގެ ތަޖުރިބާކާރުންގެ މެދުގައި ދާއިމީ ގުޅުންތަކެއް އުފެދި، ގުޅިގެން ކުރެވޭ ދިރާސާތަކާއި އަމަލީ މަސައްކަތްތަކުގެ ތެރެއިން މީހުންގެ ދިރިއުޅުމަށް ހެޔޮ ބަދަލުތަކެއް އަންނާނެ ކަމަށް އުންމީދުކުރައްވާ ކަމަށް ވެސް ވިދާޅުވި އެވެ.
