މީދޫ އިން ރައީސްގެ އަނބިކަނބަލުން ސާޖިދާގެ ބޮޑުބޭބެ އާއި ޕީއެންސީގެ ބަޔަކު ރާއްޖެޓީވީގެ ޓީމަށް ހަމަލާދޭން މަސައްކަތްކޮށް، މާރާމާރީ ހިންގައިފި
25 ސެޕްޓެމްބަރު 2026 | ހުކުރު 11:27ދ. މީދޫގައި ރާއްޖެޓީވީގެ "ހާލު ކިހިނެއް" ޕްރޮގްރާމްގެ މަސައްކަތް ކުރަމުންދަނިކޮށް، ސަރުކާރު ހިންގާ ޕީއެންސީއަށް ނިސްބަތްވާ ބަޔަކު އެ ޓީމަށް ހަމަލާދީ މާރާމާރީ ހިންގައިފި. މި ހާދިސާގައި ބައެއް އާންމުންނަށް އަނިޔާވެފައިވާއިރު، ހަމަލާދިން މީހުން ވަނީ ހަޑިހުތުރު ބަހުން މުއާމަލާތްކޮށް ކެމެރާ ފަދަ ސާމާނުތަކަށް ގެއްލުން ދިނުމަށް ވެސް މަސައްކަތް ކޮށްފައި. މި ޕްރޮގްރާމަކީ ރަށްރަށުގެ ހާލަތާއި ހުއްޓިފައިވާ މަޝްރޫއުތަކާ ގުޅޭގޮތުން ރައްޔިތުންގެ ކަންބޮޑުވުންތައް ގެނެސްދޭ ޕްރޮގްރާމެއް
ރާއްޖެޓިވީގެ ޓީމު، ދ. މީދޫގައި "ހާލު ކިހިނެއް" ޕްރޮގްރާމް ޝޫޓް ކުރަމުން ދަނިކޮށް، ރައީސް ޑރ. މުއިއްޒުގެ އަނބިކަނބަލުން ސާޖިދާ މުހައްމަދުގެ ބޮޑު ބޭބެ، އަބްދުﷲ ލަތީފް އާއި ޕީއެންސީގެ ބަޔަކު އައިސް މާރާމާރީ ހިންގުން | ރާއްޖެއެމްވީ
ރާއްޖެޓިވީގެ ޓީމު، ދ. މީދޫގައި "ހާލު ކިހިނެއް" ޕްރޮގްރާމް ޝޫޓް ކުރަމުން ދަނިކޮށް، ރައީސް ޑރ. މުއިއްޒުގެ އަނބިކަނބަލުން ސާޖިދާ މުހައްމަދުގެ ބޮޑު ބޭބެ، އަބްދުﷲ ލަތީފް އާއި ޕީއެންސީގެ ބަޔަކު އައިސް މާރާމާރީ ހިންގައިފި އެވެ.
ރާއްޖެޓީވީގެ "ހާލު ކިހިނެއް" ޕްރޮގްރާމް އަކީ ރާއްޖޭގެ އެކި ކަންކޮޅުތަކުން ރައްޔިތުންގެ ހާލު ގެނަސްދީ، ރަށްރަށުގައި ކުރިއަށްދާ މަޝްރޫއުތަކާ ގުޅޭ މައުލޫމާތު ގެނަސްދޭ ޕްރޮގްރާމެކެވެ. މި ޕްރޮގްރާމުގައި ވާހަކަ ދައްކާ، މައުލޫމާތު ދޭ ހުރިހާ ރައްޔިތުން ކަހަލަ ގޮތަކަށް ދަނީ މި ސަރުކާރުގެ އަމަލުތަކުގެ ސަބަބުން ރައްޔިތުން ދިރިއުޅެމުންދާ ދަތި ހާލު ހިއްސާކުރަމުންނެވެ.
އޭގެ އިތުރުން ކައުންސިލްތަކުން ދަނީ ރަށްރަށުގައި ހުއްޓިފައި ހުރި މަޝްރޫއުތަކާއި ރައްޔިތުންގެ ކަންބޮޑުވުންތަކުގެ އިތުރުން ކައުންސިލްތަކުގެ ކަންބޮޑުވުން ވެސް ހިއްސާކުރަމުންނެެވެ.
އެންމެ ފަހުގެ ޕްރޮގްރާމް ނެގުމުގެ މަސައްކަތް ކުރުމަށްޓަކައި ރާއްޖެޓީވީގެ ޓީމާއި ޕްރޮގްރާމް ގެނަސްދޭ ހެޑް އޮފް ޕްރޮގްރާމްސް އެންޑް ކޯޑިނޭޝަން އާމިރު ސަލީމް މިވަގުތު ދަނީ ދ. މީދޫގައި ހަރަކާތްތެރި ވަމުންނެވެ.
ޕްރޮގްރާމް ނެގުމުގެ މަސައްކަތް ކުރިއަށް ދަނިކޮށް، ހުކުރު ދުވަހުގެ ހަވީރުގެ ވަގުތެއްގައި ރައީސް ޑރ. މުއިއްޒުގެ އަނބިކަނބަލުން ސާޖިދާ މުހައްމަދުގެ ބޮޑު ބޭބެ، އަބްދުﷲ ލަތީފް އާއި ޕީއެންސީގެ ބަޔަކު އައިސް ވަނީ ރާއްޖެޓީވީގެ ޓީމާ، އެ ޓީމާއެކު މަސައްކަތް ކުރަމުން ދިޔަ އެ ރަށު ރައްޔިތުންނަށް ހަމަލާދީ މާރާމާރީ ހިންގާފަ އެވެ. އަދި އެ މީހުން ވަނީ މަގުމަތީގައި އަޑުގަދަކޮށް، ހަޑިހުތުރު އެއްޗެހި ގޮވާ، އެތަނުގެ މަސްލަހަތު ގެއްލުވާލުމަށް މަސައްކަތްކޮށްފަ އެވެ.
ޕީއެންސީގެ މެންބަރުން ވަނީ ރާއްޖެޓީވީގެ ކެމެރާ އިކުއިޕްމަންޓްތަކަށް ވެސް ގެއްލުން ދިނުމަށް މަސައްކަތްކޮށްފަ އެވެ. އެގޮތުން މީދޫ ކައުންސިލްގެ ކުރީގެ ނައިބު ރައީސް އަލީ ޝަރީފް ވަނީ ކެމެރާމަނުގެ ގައިގައި ސައިކަލުން ޖައްސައި އިކުއިޕްމަންޓަށް ގެއްލުން ދިނުމަށް މަސައްކަތް ކޮށްފަ އެވެ. އެހެން ނަމަވެސް އެކަން ކާމިޔާބުވާގޮތް ވަނީ ނުވެފަ އެވެ.
