ތައިލެންޑުގައި ކާފަ އާއި މާމަ މަރާލުމަށްފަހު ސްކޫލުގައި ބަޑިޖެހި 14 އަހަރުގެ ކުއްޖާ ބަޑިޖަހަން ދަސްކޮށްފައިވަނީ ސޯޝަލް މީޑިއާ އިން: ފުލުހުން

ބެންކޮކްގެ ބޭރުގައި ހުންނަ ސްކޫލެއްގައި ބަޑިޖަހައި މީހުން މަރާލި ތައިލެންޑުގެ ކުޑަކުއްޖާ، މީގެ ކުރިން އިންޓަނެޓް މެދުވެރިކޮށް އަނިޔާވެރި މަންޒަރުތައް ހިމެނޭ ވީޑިއޯތައް ބަލާފައިވާ ކަމަށާއި، މިދިޔަ އަހަރު އޭނާގެ އަތުން އެއާ ގަން (ވައި ބަޑި) އެއް ޓީޗަރަކު އަތުލާފައިވާ ކަމަށް ފުލުހުން އާދީއްތަ ދުވަހު ބުނެފި އެވެ. މި ހާދިސާއާ ގުޅިގެން ސްކޫލްތަކުގެ ސަލާމަތީ ކަންކަން ވަރުގަދަކުރުމަށް އާ އުސޫލުތަކެއް އެކުލަވާލާނެ ކަމަށް އެ ގައުމުގެ ސަރުކާރުން ވަނީ ވައުދުވެފަ އެވެ.

ވޭތުވެދިޔަ ހުކުރު ދުވަހު ހިނގި މި ނުރައްކާތެރި ހާދިސާގެ ތަހުގީގު ކުރިއަށްދާއިރު، އުމުރުން 14 އަހަރުގެ މި ފިރިހެން ކުއްޖާ ވަނީ ގޭގައި އޭނާގެ ކާފަ އާއި މާމަ ބަޑިޖަހައި މަރާލުމަށްފަހު، ސްކޫލަށް ގޮސް އިތުރު ހަ މީހަކު މަރާލާފަ އެވެ. އަދި އެއަށްފަހު އޭނާ އަމިއްލަ ގަޔަށް ބަޑިޖަހައި ވަނީ މަރުވެފަ އެވެ. ފުލުހުން ބުނި ގޮތުގައި އެ ކުއްޖާ ބަޑި ބޭނުންކުރަން ދަސްކޮށްފައިވަނީ ސޯޝަލް މީޑިއާ މެދުވެރިކޮށެވެ.

ޕްރޮވިންޝަލް ޕޮލިސް ރީޖަން 1 ގެ ޑެޕިއުޓީ ކޮމިޝަނަރު އައްތަޕޯލް އަނުސިތު ނޫސްވެރިންނަށް މައުލޫމާތު ދެއްވަމުން ވިދާޅުވީ، ހެކިންގެ ފަރާތުން ލިބުނު މައުލޫމާތަށް ބަލާއިރު، އެ ކުއްޖާ ބަޑި ބޭނުންކުރަން ދަސްކުރުމަށް ޝައުގުވެރިކަން އުފެދިފައިވާތާ މިހާރު ގާތްގަނޑަކަށް އެއް އަހަރާއި ދެ އަހަރާ ދެމެދުގެ މުއްދަތެއް ވެފައިވާ ކަމަށެވެ.

ނަމަވެސް، އެ ކުއްޖާގެ މަންމަ ބުނި ގޮތުގައި އޭނާގެ ފަރާތުން ނުރައްކާތެރި އެއްވެސް ނިޝާނެއް ކުރިން ފެނިފައެއް ނުވެ އެވެ.

ނަން ހާމަނުކުރުމަށް އެދި ރޮއިޓާސްއަށް ދިން އިންޓަވިއުއެއްގައި އެ ކުއްޖާގެ މަންމަ ބުނީ، އޭނާގެ ދަރިއަކީ ވަރަށް ވިސްނުންތޫނު، އުފާވެރި މިޒާޖެއްގެ ކުއްޖެއް ކަމަށާއި، އޭނާގެ އުޅުން ހުރީ ވަރަށް އާދައިގެ ގޮތަކަށް ކަމަށެވެ.

އަދި ސްކޫލުގައި އެއްވެސް މީހަކު އޭނާއަށް ގަނާކުރޭތޯ (ބުލީ ކުރޭތޯ) ސުވާލުކުރުމުން، އެފަދަ އެއްވެސް ކަމެއް ނުހިނގާ ކަމަށާއި، ހުރިހާ ކަމެއްވެސް އާދައިގެ ގޮތެއްގައި ކުރިއަށްދާ ކަމަށް އެ ކުއްޖާ އަބަދުވެސް ބުނާ ކަމަށް މަންމަ ކިޔައިދިނެވެ.

މިހާތަނަށް 17 ހެކިވެރިއެއްގެ ބަޔާން ނަގާފައިވާ ކަމަށް ވިދާޅުވަމުން އައްތަޕޯލް ވިދާޅުވީ، އެ ކުއްޖާގެ ދަބަހުން ވަޅިއެއް ފެނިފައިވާ ކަމަށެވެ. އަދި ހާދިސާ ހިނގި ތަނުން ފެނުނު ހެކިތަކުގެ ތެރޭގައި ބަޑިއަކާއި، ބޭނުންކޮށްފައިވާ ވަޒަންތަކުގެ ހުސް އޮށާއި، އަމިއްލަ ކޮމްޕިއުޓަރެއް ހިމެނޭ ކަމަށް އޭނާ ވިދާޅުވި އެވެ.

"އެ ކުއްޖާގެ ކޮމްޕިއުޓަރު ތަހުގީގު ކުރިއިރު، ސޯޝަލް މީޑިއާ މެދުވެރިކޮށް އަނިޔާވެރިކަން ދައްކުވައިދޭ ވީޑިއޯތައް އޭނާ ބަލާފައިވާކަން ވަނީ އެނގިފައި،" ޑެޕިއުޓީ ކޮމިޝަނަރު ވިދާޅުވި އެވެ. ނަމަވެސް، އެ ކުއްޖާ އަމަލީ ގޮތުން ބަޑިޖަހަން ފަރިތަކޮށްފައިވާ ކަމުގެ ހެއްކެއް އަދި ފެނިފައި ނުވާ ކަމަށް އޭނާ އިތުރަށް ފާހަގަކުރެއްވި އެވެ.

އައްތަޕޯލް ވިދާޅުވި ގޮތުގައި، މިދިޔަ އަހަރު އެ ކުއްޖާ ސްކޫލަށް ބީބީ ގަން (ވައި ބަޑީގެ ބާވަތެއް) އެއް ގެންދިޔުމުން ޓީޗަރަކު ވަނީ އެ އަތުލާފަ އެވެ. އަދި އެ ކުއްޖާގެ މައިންބަފައިން ވަކިވި ފަހުން، ވޭތުވެދިޔަ 12 އަހަރު އޭނާ ދިރިއުޅެމުން އައީ އޭނާގެ ކާފަ އާއި މާމައާއެކު ކަމަށްވެސް އޭނާ ވިދާޅުވި އެވެ.

ތައިލެންޑުގެ އެޑިއުކޭޝަން މިނިސްޓްރީން ބުނީ، ކުރިއަށް އޮތް ތިން މަސް ދުވަހުގެ ތެރޭގައި ސްކޫލްތަކުގެ ސަލާމަތީ ކަންކަން ވަރުގަދަކުރުމަށް އާ އުސޫލުތަކެއް އެކުލަވާލާނެ ކަމަށެވެ. މީގެ ތެރޭގައި ނަފްސާނީ ދުޅަހެޔޮކަން ދެނެގަތުމާއި، ނުރައްކާ އޮތް ކަމަށް ފާހަގަކުރެވޭ ކުދިން މާހިރުންނަށް ދެއްކޭނެ ނިޒާމެއް ގާއިމުކުރުމާއި، ކުއްލި ހާލަތްތަކުގައި އަމަލުކުރާނެ ގޮތުގެ ތަމްރީނުތައް ހިންގުމާއި، ގަނާކުރުން ހުއްޓުވުމުގެ އިތުރުން ސްކޫލަށް މަނާ ތަކެތި ވެއްދުން ހުއްޓުވުމަށް ފާސްކުރުމުގެ ނިޒާމު ހަރުދަނާކުރުން ހިމެނެ އެވެ.

މި ހާދިސާގައި މަރުވި މީހުންގެ އިތުރުން 20 އަށްވުރެ ގިނަ މީހުން ޒަހަމްވެފައިވާއިރު، މިއީ 2022 ވަނަ އަހަރަށްފަހު ތައިލެންޑުގައި ހިނގި އެންމެ ނުރައްކާތެރި ބަޑިޖެހުމުގެ ހާދިސާ އެވެ. މިކަމާ ގުޅިގެން، ދެކުނު އިރުމަތީ އޭޝިއާގައި އެންމެ ގިނައިން ބަޑި ގެންގުޅޭ ގައުމުގެ ގޮތުގައި ފާހަގަކުރެވޭ ތައިލެންޑުގައި، ހަތިޔާރު ކޮންޓްރޯލް ކުރުމާ ބެހޭ ބަހުސްތައް އަލުން ވަނީ ފެށިފަ އެވެ.

އެ ކުއްޖާ ދިރިއުޅެމުން އައީ އޭނާގެ ކާފަ އާއި މާމައާއެކު ކަމަށްވާއިރު، އޭނާގެ މަންމަ ބުނީ ދަރިފުޅާ އެންމެ ފަހުން ބައްދަލުވީ ދާދި ފަހުން ދިޔަ ސްކޫލް ބަންދު ތެރޭގައި ކަމަށެވެ.

"މި ހާދިސާ ހިނގި ދުވަހު، އެއީ އަހަރެންގެ ދަރިފުޅު ކުރި ކަމެއް ކަމެއް ނޭނގޭ،" މަންމަ ބުންޏެވެ. އޭނާ އިތުރަށް ބުނީ ސްކޫލެއްގައި ބަޑިޖެހުމުގެ ހާދިސާއެއް ހިނގައިގެން އުޅޭ އަޑު އިވުމުން، ދަރިފުޅަށް މެސެޖުކޮށް ގުޅަން މަސައްކަތް ކުރި ކަމަށެވެ. "އަހަރެން ބުނީ އެއްވެސް ކަމެއް ގޯސްކޮށް އުޅޭނަމަ ގުޅާށޭ، މަންމަ ވަރަށް ކަންބޮޑުވެއޭ. އެވަގުތު ބުނެވުނީ އެވަރު."

ދަރިފުޅުގެ އަމަލުތަކަށްޓަކައި އޭނާ ވަނީ މައާފަށް އެދިފަ އެވެ.

"އަހަރެމެން މިތިބީ ވަރަށް ބޮޑު ހިތާމައެއްގެ ތެރޭގައި. މިފަދަ ކަމެއް ހިނގައިފާނެ ކަމަކަށް އެކަކުވެސް ހިއެއް ނުކުރޭ،" އޭނާ ބުންޏެވެ.