އޯގާތެރި އަދި ހަމަހަމަ ނަފްސާނީ ސިއްހަތުގެ ނިޒާމެއް ބިނާކުރުމުގެ މަަސައްކަތް ކުރަން ޖެހޭ: ރައީސް މުއިއްޒު
10 އޮކްޓޯބަރު 2026 | ހޮނިހިރު 08:38ރާއްޖޭގައި އޯގާތެރި އަދި ހަމަހަމަ ނަފްސާނީ ސިއްހަތުގެ ނިޒާމެއް ބިނާކުރުމަށް "މެންޓަލް ހެލްތު ސްޓްރެޓީޖިކް އެކްޝަން ޕްލޭން 2025–2029" އެކުލަވާލައި، ގާނޫނީ އޮނިގަނޑަށް އިސްލާހު ގެނައުމުގެ މަސައްކަތް ސަރުކާރުން ދަނީ ކުރަމުން. ނަމަވެސް، ސިއްހީ ޚިދުމަތުގެ ފެންވަރު ދަށްވެ، ނަފްސާނީ ބަލިތަކަށް ބޭނުންވާ ބޭސް ލިބުމުގައި ދަތިތަކެއް ހުރިކަމުގެ ޝަކުވާ އާންމު ރައްޔިތުން ދަނީ ކުރަމުން
ކެބިނެޓް ބައްދަލުވުމަކަށް ރައީސް މުއިއްޒު ވަޑައިގަންނަވަނީ | ރައީސް އޮފީސް
އޯގާތެރި އަދި ހަމަހަމަ ނަފްސާނީ ސިއްހަތުގެ ނިޒާމެއް ބިނާކުރުމުގެ މަަސައްކަތް ކުރަން ޖެހޭ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ދުނިޔޭގެ ފެންވަރުގައި ފާހަގަކުރާ ދުނިޔޭގެ ނަފުސާނީ ދުޅަހެޔޮކަމުގެ ދުވަހާ ގުޅިގެން ހޮނިހިރު ދުވަހު އެކްސްގައި ކުރެއްވި ޕޯސްޓެއްގައި ރައީސް މުއިއްޒު ވިދާޅުވީ، ދުނިޔޭގެ ނަފްސާނީ ދުޅަހެޔޮކަމުގެ ދުވަހުގެ މުނާސަބަތުގައި، ރާއްޖޭގައި އޯގާތެރި، ފަސޭހައިން ޚިދުމަތް ލިބޭނެ އަދި ހަމަހަމަ ނަފްސާނީ ސިއްހަތުގެ ނިޒާމެއް ބިނާކުރަން ޖެހޭ ކަމަށާއި، އެއީ ވެވަޑައިގެންނެވި ވައުދެއް ކަމަށެވެ.
ރައީސް މުއިއްޒު ވިދާޅުވީ، މި ނިޒާމު ބިނާކުރެވިގެންދާނީ ޚިދުމަތް ލިބިގަންނަ ފަރާތްތަކުގެ އަޑުތަކާއި އެ ފަރާތްތަކުގެ އަމަލީ ތަޖުރިބާތަކުގެ އަލީގައި، އަދި ރައްޔިތުންގެ ބޭނުންތަކާ އެއްގޮތްވާ ގޮތުގެ މަތިން ކަމަށެވެ. އަދި މި ވައުދު ފުރިހަމަކުރުމަށް ސަރުކާރުން ކުރިއަށްދަނީ "މެންޓަލް ހެލްތު ސްޓްރެޓީޖިކް އެކްޝަން ޕްލޭން 2025–2029" ގެ ދަށުން ކަމަށްވެސް އެމަނިކުފާނު ފާހަގަކުރެއްވި އެވެ.
މީގެ އިތުރުން، ގައުމީ ފެންވަރުގެ ނަފްސާނީ ސިއްހަތުގެ ސިޔާސަތެއް އެކުލަވާލުމާއި، ފުރިހަމަ ނަފްސާނީ ސިއްހަތުގެ ގާނޫނެއް އެކުލަވާލުން ހިމެނޭހެން، ސިޔާސަތުތަކާއި ގާނޫނުތަކަށް ގެންނަންޖެހޭ އިސްލާހީ ބަދަލުތައް ގެނައުމުގެ މަސައްކަތް ކުރެވެމުންދާ ކަމަށް ރައީސް މުއިއްޒު އެވެ.
ހަމައެއާއެކު، އަސާސީ ސިއްހީ ޚިދުމަތުގެ ތެރޭގައި ނަފްސާނީ ސިއްހަތުގެ ޚިދުމަތްތައް ހިމަނައި، ސަރަހައްދީ އަދި ޚާއްސަ ޚިދުމަތްތައް ހަރުދަނާކޮށް، ޓެލެ-މެންޓަލް ހެލްތާއި ކުއްލި ހާލަތްތަކުގައި އެހީތެރިކަން ފޯރުކޮށްދޭ ނިޒާމުތައް ތަރައްގީކޮށް ޚިދުމަތްތަކަށް ވާސިލުވުމުގެ ފުރުސަތުތައް ފަހިކޮށްދެމުންދާކަންވެސް ރައީސް މުއިއްޒު ފާހަގަކުރެއްވި އެވެ.
ރައީސް މުއިއްޒު ވިދާޅުވީ، ސަރުކާރުގެ މަގުސަދަކީ ބަލިތަކުން ރައްކާތެރިވުމަށާއި ކުރީބައިގައި ފިޔަވަޅު އެޅުމަށް އިސްކަންދިނުމާއި، ފެންވަރު ރަނގަޅު ސިއްހީ ޚިދުމަތްތައް ފަސޭހައިން ލިބޭނެ މަގު ކަށަވަރުކުރުން ކަމަށެވެ. އަދި ކޮންމެ ރަށެއްގައި، ކޮންމެ މުޖުތަމައެއްގައި، އަދި އިހުލާސްތެރި ކޮންމެ ވާހަކައަކުން ފަށައިގެން، މާ އޯގާތެރި އަދި އަޅާލުންބޮޑު ރާއްޖެއެއް ބިނާކުރުން ކަމަށްވެސް އެމަނިކުފާނު ވިދާޅުވި އެވެ.
މީގެ އިތުރުން މި ދުވަހާ ގުޅިގެން ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުހައްމަދު ވިދާޅުވީ، ނަފްސާނީ ދުޅަހެޔޮކަން ބިނާވެގެންވަނީ ލިބޭ އަޅާލުމާއި، ދިރިއުޅޭ މުޖުތަމައުތަކާއި އަދި ވަށައިގެންވާ މީހުންގެ ސަބަބުން ކަމަށެވެ. އަދި އެކަން ކޮންމެ ދުވަހަކުވެސް ބައްޓަންވަމުން ދަނީ ގޭތެރެއާއި، މަދަރުސާތަކާއި، ވަޒީފާގެ މާހައުލުތަކާއި މުޖުތަމައުގެ ތެރެއިން ކަމަށާއި، އެކަކު އަނެކަކަށް އަޑުއަހައިދީ އެއްބާރުލުން ދޭ ގޮތުގެ ސަބަބުން ބޮޑު ހެޔޮ ބަދަލެއް ގެނެވިދާނެ ކަމަށް އެކަމަނާ ވިދާޅުވި އެވެ.
ސާޖިދާ ވިދާޅުވީ، މާނަހުރި އެހީތެރިކަމަކީ ކޮބައިކަން ދެނެގަތުމުގައި، ނަފްސާނީ ގޮންޖެހުންތަކާ ކުރިމަތިލަމުންދާ ފަރާތްތަކުން ހިއްސާކުރާ އަގުހުރި ވިސްނުންތައް ބަލައިގަންނަން ޖެހޭ ކަމަށެވެ. އަދި ނަފްސާނީ ދުޅަހެޔޮކަމާމެދު ބޭނުންކުރާ ބަސްމަގާއި ގެންގުޅޭ ވިސްނުން ބަދަލުކޮށް، އެހީތެރިކަން ހޯދުމަށް މީހުންނަށް ހިތްވަރުދީ، އެހީތެރިކަމަށް ބޭނުންވާ ކޮންމެ މީހަކަށްވެސް އެ އެހީތެރިކަން ލިބެން ހުރިކަމުގެ ހޭލުންތެރިކަން އިތުރުކުރަން ޖެހޭ ކަމަށް ވިދާޅުވި އެވެ.
ނަފްސާނީ ބަލިތަކާ ގުޅިފައިވާ ތަފާތުކުރުންތަކާއި ނުރަނގަޅު ތަސައްވުރުތައް ނައްތާލައި، ކޮންމެ މީހެއްގެ އަޑުވެސް އަހައިދޭ އަދި އެހީތެރިކަން ލިބޭނެ މާހައުލެއް އެންމެން ގުޅިގެން ބިނާ ކުރުމަށް ވެސް އެކަމަނާ ގޮވާލެއްވި އެވެ.
ނަމަވެސް ރައީސް ޑރ.މުހައްމަދު މުއިއްޒުގެ މިސަރުކާރުގައި ސިއްހީ ޚިދުމަތުގެ ފެންވަރު ވަރަށް ބޮޑަށް ދަށްވެ، އާސަންދަ ލިބުމުގައި ވަރަށް ބޮޑަށް އުދަނގޫވެފައިވާ ކަމަށް ގިނަ ރައްޔިތުން ދަނީ ބުނަމުންނެވެ. މީގެ ކުރިން އެއްވެސް ދައްޗަކާ ނުލައި ލިބުނު ބޭސް ނުލިބޭ ކަމުގެ ޝަކުވާ ވަނީ ބޮޑުވެފަ އެވެ. މި މައްސަލަތަކަށް ހައްލު ލިބި، ބޭހުގެ މައްސަލަ ހައްލުވާނެ ކަމަށް ސަރުކާރުން އެކި ތާރީހުތައް ދިން ނަމަވެސް މިހާތަނަށް މިސަރުކާރަށް ބޭހުގެ މައްސަލަ ހައްލު ކުރެވިފައިނުވެ އެވެ. އަދި ނަފްސާނީ ބައްޔަށް ބޭސް ކުރަމުންދާ މީހުންނަށް ވެސް ބޭސް ނުލިބި އެމީހުން ބަލި ހާލަތު އިތުރަށް ގޯސްވެފައިވާ މައްސަލަތަކެއް މިފަހުން ވެސް ވަނީ ފެންމަތިވެގެން ގޮސްފަ އެވެ.
