ސައުދީގެ މަދީނާއާއި ޔަމަނުގެ ޢަދަން ރިޔާސީ ގަނޑުވަރަށް މިސައިލާއި ޑްރޯންގެ ހަމަލާތަކެއް
31 އޮކްޓޯބަރު 2026 | ހޮނިހިރު 03:17ޔަމަނުގެ ޢަދަން އެއާޕޯޓަށާއި ރިޔާސީ ގަނޑުވަރަށް ހޫޘީން ބެލިސްޓިކް މިސައިލް ހަމަލާތަކެއް ދީފައިވާ ކަމަށް އެ ޤައުމުގެ އަސްކަރިއްޔާއިން ބުނުމާ ގުޅިގެން މަސްރަހު ވަނީ ވަރަށް ބޮޑަށް ހޫނުވެފައި. މި ހަމަލާތައް ޔަމަން ސަރުކާރުން ހަރުކަށި އިބާރާތުން ކުށްވެރިކުރި ނަމަވެސް، ހޫޘީން ވަނީ މި ތުހުމަތުތައް ދޮގުކޮށް އެއްވެސް އަސްކަރީ އޮޕަރޭޝަނެއް ހިންގާފައި ނުވާނެ ކަމަށް ބުނެފައި
ވައިގެ ހަމަލާތައް ދިފާޢުކުރުމަށް ސައުދީ އަރަބިއްޔާގެ އަސްކަރިއްޔާއިން ބޭނުންކުރާ ޕެޓްރިއަޓް މަރުކާގެ ވައިގެ ދިފާޢީ ނިޒާމެއް | އެސްޕީއޭ
ޔަމަނުގައި ހަރަކާތްތެރިވާ ހޫޘީ ޖަމާޢަތުން ހުކުރު ދުވަހު ސައުދީ އަރަބިއްޔާގެ ހުޅަނގުގައިވާ މަދީނާ ސަރަހައްދަށް އަމާޒުކޮށް ފޮނުވާލި ޑްރޯނެއް، އެ ޤައުމުގެ ވައިގެ ދިފާޢީ ބާރުތަކުން ދިފާޢުކޮށް ވައްޓާލާފައިވާ ކަމަށް ސައުދީ އިސްވެ އޮންނަ އަސްކަރީ އިއްތިހާދުން ބުނެފި އެވެ. މިއީ ހުކުރު ދުވަހުގެ ތެރޭގައި އެކަނި ވެސް ސައުދީ އަރަބިއްޔާއަށް އަމާޒުކޮށް ހޫޘީން ދިން ކަމަށް ރިޕޯޓުކުރެވުނު ހަތަރުވަނަ ހަމަލާ އެވެ. ހަމަމިއާއެކު، ޔަމަނުގެ ދެކުނުގެ ބަނދަރުމަތީ ސަހަރެއް ކަމަށްވާ ޢަދަންގައި ހުންނަ މަޢާޝީޤު ރިޔާސީ ގަނޑުވަރަށާއި ޢަދަން އިންޓަނޭޝަނަލް އެއާޕޯޓަށް ހޫޘީން ބެލިސްޓިކް މިސައިލް ހަމަލާތަކެއް ދީފައިވާ ކަމަށް އެ ޤައުމުގެ އަސްކަރިއްޔާއިން ބުނުމާ ގުޅިގެން، މުޅި ސަރަހައްދުގެ ސަލާމަތީ މަސްރަހު ވަނީ އިތުރަށް ހޫނުވެފަ އެވެ.
ސައުދީ އިއްތިހާދުގެ ވައިގެ ދިފާޢީ ނިޒާމުން މަދީނާ ސަރަހައްދުން ހޫޘީންގެ ޑްރޯނެއް ދިފާޢުކޮށް ނައްތާލާފައިވާ ކަމަށް، އެ އިއްތިހާދުގެ ތަރުޖަމާނު މޭޖަރ ޖެނެރަލް ތުރުކީ އަލް-މާލިކީ ވިދާޅުވި އެވެ. މީގެ އިތުރުން، އެ ދުވަހުގެ ކުރީކޮޅު ނެރުނު ބަޔާންތަކުގައި އިއްތިހާދުން ބަޔާންކޮށްފައިވާ ގޮތުގައި، ސައުދީ އަރަބިއްޔާގެ ދެކުނު ސަރަހައްދަށް އަމާޒުކުރި ބެލިސްޓިކް މިސައިލަކާއި، ހުޅަނގު ސަރަހައްދަށް ދަތުރުކުރި ކްރޫޒް މިސައިލެއްގެ އިތުރުން، މުޤައްދަސް މައްކާ ސަރަހައްދަށް އަމާޒުކޮށް ފޮނުވާލި ޑްރޯނެއް ވެސް ވަނީ ދިފާޢީ ބާރުތަކުން ކާމިޔާބުކަމާއެކު ދިފާޢުކޮށް ގޮއްވާލާފަ އެވެ.
ޢަދަނުގެ ވައިގެ ބަނދަރަށާއި ރިޔާސީ ގަނޑުވަރަށް މިސައިލް ހަމަލާތަކެއް
ސައުދީ އަރަބިއްޔާއަށް އަމާޒުވި ހަމަލާތަކުގެ އިތުރުން، ޔަމަނުގެ ދެކުނު ސަރަހައްދުގެ މުހިންމު މަރުކަޒުތަކަށް ވެސް ހޫޘީން ބެލިސްޓިކް މިސައިލް ހަމަލާތަކެއް ދީފައިވާ ކަމަށް ޔަމަނުގެ އަސްކަރިއްޔާއިން ހުކުރު ދުވަހު ބުންޏެވެ. ޔަމަން އަސްކަރިއްޔާގެ ތަރުޖަމާނު މާޖިދު ޢަބްދުﷲ އަލް-ނުޒައިލީ ވިދާޅުވީ، ހޫޘީ ޖަމާޢަތުން ބެލިސްޓިކް މިސައިލްތައް ފޮނުވާލާފައި ވަނީ ޢަދަން އިންޓަނޭޝަނަލް އެއާޕޯޓަށާއި މަޢާޝީޤު ރިޔާސީ ގަނޑުވަރަށް އަމާޒުކޮށް ކަމަށެވެ.
މި ހަމަލާތައް ދީފައި މި ވަނީ، ބުދަ ދުވަހު ހޫޘީން ދިން މިސައިލް ހަމަލާއަކާ ގުޅިގެން ޢަދަން އެއާޕޯޓުގެ ދަތުރުފަތުރުތައް ވަގުތީ ގޮތުން މެދުކަނޑާލުމަށްފަހު، އަލުން އޮޕަރޭޝަންތައް ފެށިތާ އެންމެ 24 ގަޑިއިރު ވެސް ނުވަނީހެވެ. ޔަމަނުގެ ކަމާބެހޭ އިދާރާތަކުން ބުނީ، ބުދަ ދުވަހުގެ ހަމަލާގައި އާންމުންގެ ދެ މީހަކު ޒަޚަމުވެ، އެއާޕޯޓުގެ އިމާރާތަށާއި ވަސީލަތްތަކަށް ގެއްލުން ލިބުނު ކަމަށެވެ. އަދި، އެ ހަމަލާގެ ސަބަބުން އެއާޕޯޓުގެ ރަންވޭއަށް ގެއްލުން ލިބި، ކުއްލި މަރާމާތުތަކެއް ކުރަން ޖެހުނު ކަމަށް ވެސް ރަސްމީ އިދާރާތަކުން ބުންޏެވެ.
ޔަމަން ސަރުކާރުގެ ކަންބޮޑުވުމާއި ސައުދީއާއެކު އޮތް އެއްބައިވަންތަކަން
ހޫޘީން އަލުން ދޭން ފެށި މި ހަމަލާތައް ޔަމަނުގެ ސަރުކާރުން ވަނީ ހަރުކަށި އިބާރާތުން ކުށްވެރިކޮށްފަ އެވެ. މި ގޮތުން މަޢާޝީޤު ރިޔާސީ ގަނޑުވަރަށް ދެވަނަ ފަހަރަށް އަދި ޢަދަން އިންޓަނޭޝަނަލް އެއާޕޯޓަށް ހަތްވަނަ ފަހަރަށް އަމާޒުކޮށް ދިން ހަމަލާތަކުގެ އިތުރުން، މައްކާއަށް ހަމަލާދިނުމަށް ކުރި ކަމަށް ބުނާ މަސައްކަތަކީ ސަރަހައްދީ ސަލާމަތަށް އޮތް ނުރައްކާތެރި ގޮންޖެހުމެއް ކަމަށް ސަރުކާރުން ސިފަކުރި އެވެ. އަދި، އިސްލާމީ މުޤައްދަސް ބިންތަކުގެ ހުރުމަތަށް ހޫޘީން އެއްވެސް ގަދަރެއް ނުބަހައްޓާ ކަމަށް ވެސް ސަރުކާރުން ފާހަގަކުރި އެވެ.
ސަރުކާރުން ނެރުނު ރަސްމީ ބަޔާނެއްގައި ފާހަގަކުރި ގޮތުގައި، މި ހަމަލާތަކަކީ ދައުލަތުގެ މުއައްސަސާތަކަށާއި އާންމު ރައްޔިތުންގެ ޚިދުމަތްތައް ދޭ ވަސީލަތްތަކަށް ނުރައްކާކުރުމަށް ދިން ހަމަލާތަކެކެވެ. މިއާއެކު، ސައުދީ އަރަބިއްޔާގެ ސަލާމަތާއި ރައްކާތެރިކަން ދެމެހެއްޓުމަށް ކުރަމުންދާ މަސައްކަތްތަކުގައި އެ ޤައުމާއެކު ފުރިހަމަ އެއްބައިވަންތަކަން އޮތް ކަމަށް ވެސް ޔަމަން ސަރުކާރުން ވަނީ ކަށަވަރުކޮށްދީފަ އެވެ.
ތުހުމަތުތައް ދޮގުކޮށް ހޫޘީންގެ ރައްދު
ހަމަލާތަކާ ގުޅިގެން ސައުދީ އިސްވެ އޮންނަ ކޯލިޝަނުން ކުރި ތުހުމަތުތައް ހޫޘީ ޖަމާޢަތުން ވަނީ ދޮގުކޮށްފަ އެވެ. ހޫޘީންގެ އަސްކަރީ ތަރުޖަމާނު ޔަޙްޔާ ސަރީޢު ވިދާޅުވީ، ސައުދީ އަރަބިއްޔާގެ އެއްވެސް ބިމަކަށް އަމާޒުކޮށް އެ ޖަމާޢަތުން އެއްވެސް އަސްކަރީ އޮޕަރޭޝަނެއް ހިންގާފައި ނުވާނެ ކަމަށެވެ. އަދި، މަދީނާ ސަރަހައްދުން ޑްރޯނެއް ވައްޓާލި ކަމަށް ބުނެ އިއްތިހާދުން ދެއްކި ވާހަކަތައް އޭނާ ވަނީ ދޮގުކުރައްވާފަ އެވެ.
ސަރީޢު ތުހުމަތުކުރެއްވި ގޮތުގައި، ސައުދީ އަރަބިއްޔާއިން ދައްކަނީ އެއްވެސް އަސާސެއް ނެތް، އަމިއްލައަށް ހަދައިގެން އުޅޭ ދޮގު ވާހަކަތަކެކެވެ. ނަމަވެސް، ޔަމަނާއި ސައުދީގެ އިދާރާތަކުން ބުނަމުންދަނީ މަސްރަހު ފިނިކުރުމުގެ ބަދަލުގައި ހޫޘީން އަދިވެސް އިސްކަންދެނީ އަސްކަރީ ކުރިމަތިލުންތައް ފުޅާކުރުމަށް ކަމަށެވެ.
މަސްދަރު: އަނަދޮލު އޭޖެންސީ
