ސައުދީ އަރަބިއްޔާއަށް އަމާޒުކޮށް ހޫޘީން ދިން މިސައިލް ހަމަލާތަކެއް ދިފާޢުކޮށް، ކްރޫޒް މިސައިލެއް ވައްޓާލައިފި
25 އޮކްޓޯބަރު 2026 | އާދީއްތަ 08:51ސައުދީގެ ރިޔާޟާއި ޚަމީސް މުޝައިޠަށް އަމާޒުކޮށް ހޫޘީން ފޮނުވާލި ބެލިސްޓިކް މިސައިލަކާއި ޑްރޯންތަކެއް ސައުދީ އިއްތިހާދުން ވަނީ ނައްތާލާފައި. ދެ ފަރާތުގެ ދެމެދުގައި ހަމަލާތައް ވަރުގަދަވެފައި މި ވަނީ ޔަމަނުގެ ސަރުކާރު ދިފާޢުކުރުމަށް ސައުދީން ކުރާ މަސައްކަތުގެ ތެރެއިން. މި ކުރިމަތިލުންތަކާ ގުޅިގެން ސަރަހައްދީ މަސްރަހު ވަނީ އިތުރަށް ނުތަނަވަސްވެފައި
ސައުދީ އަރަބިއްޔާގެ ވެރިރަށް ރިޔާޟުގައި އޮންނަ ކިންގް ޚާލިދު އިންޓަނޭޝަނަލް އެއާޕޯޓަށް ދެވެން އޮންނަ މައި ހަލިމަގުގައި އެއްގަމު އުޅަނދުތަކުން ދަތުރު ކުރަނީ | ރޮއިޓަރސް
ސައުދީ އަރަބިއްޔާގެ ހުޅަނގު ދެކުނުގައިވާ ޚަމީސް މުޝައިޠު ސިޓީއަށް އަމާޒުކޮށް ހޫޘީ ޖަމާއަތުން ފޮނުވާލި ކްރޫޒް މިސައިލެއް ހުއްޓުވައި، ގޮއްވާލާފައިވާ ކަމަށް ޔަމަނުގައި ހަރަކާތްތެރިވާ ސައުދީ އިސްވެ އޮންނަ އަސްކަރީ އިއްތިހާދުން އާދީއްތަ ދުވަހު ބުނެފި އެވެ.
"ޚަމީސް މުޝައިޠަށް އަމާޒުކޮށް ހޫޘީ ހަނގުރާމަވެރިން ފޮނުވާލި ކްރޫޒް މިސައިލެއް ވަނީ ހުއްޓުވައި، ނައްތާލެވިފައި،" އެ އިއްތިހާދުގެ ތަރުޖަމާނު ތުރްކީ އަލް-މާލިކީ ވިދާޅުވި އެވެ.
މީގެ އިތުރުން، އާދީއްތަ ދުވަހުގެ ކުރީކޮޅު އަލް-މާލިކީ ވިދާޅުވީ، ވެރިރަށް ރިޔާޟަށް އަމާޒުކޮށް ހޫޘީން ފޮނުވާލި ބެލިސްޓިކް މިސައިލަކާއި ދެ ޑްރޯން ވެސް އިއްތިހާދުގެ ބާރުތަކުން ހުއްޓުވައި ނައްތާލާފައިވާ ކަމަށެވެ.
މި ކުރިމަތިލުންތައް ހިނގަމުން މި ދަނީ، ސައުދީ އަރަބިއްޔާގެ ވައިގެ ދަތުރުފަތުރާއި ހަކަތައިގެ ވަސީލަތްތަކަށް އަމާޒުކޮށް ދެމުންދާ ހަމަލާތަކާއި، ޔަމަނުގައި ހުރި ހޫޘީންގެ މަގާމުތަކަށް އިއްތިހާދުން ދެމުންގެންދާ ހަމަލާތަކާ އެކު ދެ ފަރާތުގެ ދެމެދުގައި ހަމަނުޖެހުންތައް އިތުރަށް ވަރުގަދަވަމުންދާ ދަނޑިވަޅެއްގަ އެވެ.
ބައިނަލްއަގުވާމީ މުޖުތަމައުން ބަލައިގަނެފައިވާ ޔަމަނުގެ ސަރުކާރަށް ތާއީދުކޮށް، ހޫޘީންނާ ދެކޮޅަށް ހަރަކާތްތެރިވާ އަސްކަރީ އިއްތިހާދެއްގެ އިސްނަގައިގެން ސައުދީ އަރަބިއްޔާއިން މަސައްކަތް ކުރަމުން އަންނަނީ 2015 ވަނަ އަހަރުން ފެށިގެންނެވެ. ހޫޘީ ޖަމާއަތުން 2014 ވަނަ އަހަރުން ފެށިގެން އަންނަނީ ޔަމަނުގެ ވެރިރަށް ޞަންޢާއާއި އެ ޤައުމުގެ އެހެނިހެން ސަރަހައްދުތައް އެ މީހުންގެ ބާރުގެ ދަށުގައި ބާއްވައި، ކޮންޓުރޯލު ކުރަމުންނެވެ.
މަސްދަރު: އަނަދޮލު އޭޖެންސީ
