އީރާނުގެ މަޝްވަރާތަކުން ތެލުގެ ބާޒާރަށް ކުޑަ ލުޔެއް، ނަމަވެސް ހުރްމުޒާއި ސައުދީއަށް ދޭ ހަމަލާތަކުން ނުރައްކާ އަދިވެސް ބޮޑު

ސައުދީ އަރަބިއްޔާއަށް އަމާޒުކޮށް ހޫޘީން އަލުން ހަމަލާތައް ދޭން ފަށާފައިވީ ނަމަވެސް، އެމެރިކާއާއި އިސްރާއީލުން އީރާނާ ދެކޮޅަށް ކުރަމުންދާ ޣައިރުގާނޫނީ ހަނގުރާމަ ހައްލުކުރުމަށް ތެހެރާނުގައި ކުރިއަށްދާ މަޝްވަރާތަކާއެކު ތެޔޮ ފޯރުކޮށްދިނުމުގައި ދިމާވެދާނެ ދަތިތަކާ މެދު އޮތް ބިރުވެރިކަން ކުޑަވެ، އަންގާރަ ދުވަހު ތެލުގެ އަގު ގާތްގަނޑަކަށް %1 ދަށަށް ހިނގައްޖެ އެވެ.

މި ގޮތުން، ބްރެންޓްގެ ސާފުނުކުރާ ތެލުގެ ފިއުޗާސްގެ އަގު ވަނީ 1 އެމެރިކާ ޑޮލަރު ނުވަތަ %0.86 ދަށަށް ގޮސް، ފީފާއެއްގެ އަގު 114.81 ޑޮލަރަށް ވެއްޓިފަ އެވެ. އަދި، އެމެރިކާގެ ވެސްޓް ޓެކްސަސް އިންޓަމީޑިއަޓް ކްރޫޑްގެ އަގު 0.88 ޑޮލަރު ނުވަތަ %0.86 ދަށަށް ގޮސް، ފީފާއެއްގެ އަގު ހުރީ 100.88 ޑޮލަރުގަ އެވެ. ވިޔަފާރި ފެށުނު ވަގުތު މި ދެ ބާވަތުގެ އަގު ވެސް ވަނީ %1 ދަށަށް ވެއްޓިފަ އެވެ.

Advertisement

މެދުއިރުމަތީގެ މަސްރަހުގައި އުފެދިފައިވާ ނުތަނަވަސްކަން ކުޑަކުރުމުގެ މަގުސަދުގައި، ސައުދީ އަރަބިއްޔާއާއި ތުރުކީވިލާތުގެ އިތުރުން ޕާކިސްތާނުން ހޯމަ ދުވަހު ވަނީ ތެހެރާނުގައި އީރާނުގެ އޮފިޝަލުންނާ ބައްދަލުކޮށް މަޝްވަރާތައް ބާއްވާފަ އެވެ. ސުލްހައާއި އަމަންއަމާންކަން ދެމެހެއްޓުމުގައި އެއްބާރުލުން އިތުރުކުރުމުގެ މަގުސަދުގައި މި މަޝްވަރާތައް ކުރިއަށް ގެންދިއުމަށް މި ހަތަރު ޤައުމުން އެއްބަސްވެފައިވާ ކަމަށް އީރާނުގެ ދައުލަތުގެ މީޑިއާއިން ބުންޏެވެ.

"ހުޅަނގު އޭޝިޔާގައި ޑިޕްލޮމެޓިކް ގޮތުން ކުރެވޭ އާ މަސައްކަތްތަކުގެ ސަބަބުން، އެމެރިކާއާއި އީރާނާ ދެމެދު ކުރެވޭ މަޝްވަރާތަކަށް ކުރިއެރުމެއް ލިބިދާނެ ކަމުގެ އުންމީދުތައް ވަނީ ބޮޑުވެފައި. އަދި، ތެލުގެ އަގު އެތައް މަހެއްގެ ރެކޯޑު މިންވަރަކަށް އުފުލުމަށްފަހު، މިހާރު ފެންނަމުން ދަނީ ފައިދާ ނެގުމަށް ވިޔަފާރިވެރިން މަސައްކަތްކުރާ މަންޒަރު،" ނިއު ދެއްލީގެ ދިރާސާކުރާ ކުންފުންޏެއް ކަމަށްވާ އެސްއެސް ވެލްތުސްޓްރީޓްގެ ބާނީ ސުގަންދާ ސަޗްދޭވާ ވިދާޅުވި އެވެ.

ހުރްމުޒް ކަނޑުއޮޅި ކައިރިން ތެޔޮ ޓޭންކަރުތަކަށް އީރާނުން ދިން ގިނަ ހަމަލާތަކަކާ ގުޅިގެން، ހުސްވި ހަފުތާގައި ބްރެންޓް ތެލުގެ އަގު ވަނީ ފީފާއެއް 117 ޑޮލަރަށްވުރެ މައްޗަށް އަރާފަ އެވެ. މިއީ، އެޕްރީލު މަހަށް ފަހު ތެލުގެ އަގު މިހާ މައްޗަށް އުފުލުނު ފުރަތަމަ ފަހަރެވެ. ހޯމަ ދުވަހު ވެސް ބްރެންޓް ތެލުގެ އަގު ވަނީ 117 ޑޮލަރަށް އަރާފަ އެވެ. "ޖިއޯޕޮލިޓިކަލް ނުތަނަވަސްކަމާއި ނުރައްކާތެރި ކަން ދެމިއޮތުމުގެ ސަބަބުން ތެލުގެ އަގު އަދިވެސް ހުރީ މަތީގައި،" ސަޗްދޭވާ ވިދާޅުވި އެވެ.

ތެޔޮ އުފައްދާ މައި އެއް ޤައުމު ކަމަށްވާ ސައުދީ އަރަބިއްޔާއަށް، އީރާނަށް ވާގިވެރިވާ ހޫޘީން އަލުން ހަމަލާތައް ދޭން ފެށުމާއެކު ސުލްހައިގެ ފުރުސަތުތައް އަދިވެސް އޮތީ ނާޒުކު ފައްތަރެއްގަ އެވެ. 2017 ވަނަ އަހަރުން ފެށިގެން ދުނިޔޭގެ ކަނޑު ދަތުރުފަތުރުގެ ސަލާމަތީ ކަންކަން ދިރާސާކުރަމުން އަންނަ، ވޮޝިންގޓަންގެ ތިންކް ޓޭންކެއްގެ ހިސާބުތަކުން ދައްކާ ގޮތުގައި، ހުރްމުޒް ކަނޑުއޮޅިއާއި އެ ސަރަހައްދުގެ ކަނޑުގެ މަގުތަކުގައި ވިޔަފާރި އުޅަނދުފަހަރަށް ހަމަލާދިނުމުގައި އެންމެ ނުރައްކާތެރި މަހަކަށް ވެފައި ވަނީ އޮކްޓޫބަރު މަހެވެ.

މެދުއިރުމައްޗަށް ފެތުރިގެން ގޮސްފައިވާ މި ހަނގުރާމައިގެ ނުރައްކަލުގެ މެދަށް ވެއްޓިފައި ވަނީ ހުރްމުޒް ކަނޑުއޮޅި އެވެ. ފެބުރުވަރީ މަހު ހަނގުރާމަ ފެށުމުގެ ކުރިން، ދުނިޔޭގެ ހަކަތައިގެ ސަޕްލައިގެ ގާތްގަނޑަކަށް ފަސްބައިކުޅަ އެއްބައި އުފުލަމުން އައީ މި ހަނި ކަނޑުއޮޅި މަގުންނެވެ.

ތެޔޮ ފޯރުކޮށްދިނުމާއި، ލޮޖިސްޓިކްސްއާއި، ތެލުގެ ރިޒާވް އަދި ސާފުކުރުމުގެ ދާއިރާތަކަށް ކުރިމަތިވެފައިވާ ފިއްތުންތަކާއެކު، ތެލުގެ ބާޒާރު އޮތީ ވަރަށް ނާޒުކު ހާލަތެއްގައި ކަމަށް އޭއެންޒެޑް ރިސަރޗުން ނެރުނު ނޯޓެއްގައި ބުންޏެވެ. މިއާއެކު، ގަލްފު ސަރަހައްދުން ސާފުނުކުރާ ތެޔޮ ބޭރުކުރި މިންވަރު ވިދިވިދިގެން ހަތަރުވަނަ ހަފުތާއަށް ދަށަށް ގޮސްފައިވާއިރު، ހުރްމުޒް ކަނޑުއޮޅިން ތެޔޮ އުފުލާ މިންވަރު ހުރީ އާންމު ހާލަތުގެ ގާތްގަނޑަކަށް %60 ގަ އެވެ. ހަމަމިއާއެކު، ދުނިޔޭގެ ޑިސްޓިލޭޓް ރިޒާވް ހުރީ ވޭތުވެދިޔަ ފަސް އަހަރުގެ އެވްރެޖަށް ވުރެ ގާތްގަނޑަކަށް %5 ދަށުގަ އެވެ.