ރިޔާޟުގެ އެއާޕޯޓަށާއި ތެޔޮ ހޮޅިލައިނަށް އަމާޒުކޮށް ޙޫޘީން ދިން ހަމަލާތަކާއެކު، ސައުދީ އިއްތިހާދުން މިސައިލެއް ވައްޓާލައިފި

ސައުދީ އަރަބިއްޔާގެ ވެރިރަށް ރިޔާޟުގައި އޮންނަ ކިންގް ޚާލިދު އިންޓަނޭޝަނަލް އެއާޕޯޓަށާއި، 'އީސްޓް-ވެސްޓް' ތެޔޮ ހޮޅިލައިނުގެ އިތުރުން ދެކުނުގެ ޕްރޮވިންސްތަކުގައިވާ ސައުދީ ސިފައިންނާއި ހަތިޔާރު ގުދަންތަކަށް އަމާޒުކޮށް މިސައިލާއި ޑްރޯންގެ ވަރުގަދަ ހަމަލާތަކެއް ދީފައިވާ ކަމަށް، ޔަމަނުގެ ޙޫޘީ ޖަމާއަތުން ހޯމަ ދުވަހު ބުނެފި އެވެ.

ޙޫޘީންގެ އަސްކަރީ ތަރުޖަމާނު ޔަޙްޔާ ސަރީޢު ވިދާޅުވީ، ޔަމަނުގެ ދެކުނުގެ ޢަދަން ޕްރޮވިންސުގެ ޞަލާޙުއްދީން ސަރަހައްދަށާއި ލަޙިޖު ޕްރޮވިންސުގެ އަލް-ވަހަތު ސަރަހައްދުގައި ހުރި އަސްކަރީ މަރުކަޒުތަކަށް އަމާޒުކޮށް ބެލިސްޓިކް މިސައިލްގެ ދެ ހަމަލާއެއް ދީފައިވާ ކަމަށެވެ. މި ހަމަލާތަކުގައި ފޮނުވާލި ބެލިސްޓިކް މިސައިލްތައް އަމާޒަށް ސީދާ ވާސިލުވި ކަމަށް ދައުވާކުރައްވަމުން، "އޭގެ ސަބަބުން އެތައް ބަޔަކު މަރުވެ އަދި ޒަޚަމުވި... އަދި، ގިނަ އަދަދެއްގެ އުޅަނދުފަހަރާއި ހަތިޔާރު ގުދަންތައް ހަލާކުވެ، އަނދައި އަޅިއަށްވި" ކަމަށް ސަރީޢު ވިދާޅުވި އެވެ. ހަމަމިއާއެކު، ހަމަލާ އަމާޒުވި އަސްކަރީ މަގާމުތަކާއި ވަސީލަތްތަކަކީ ސައުދީ އޮފިސަރެއް ކަމަށްވާ ބަދްރު އަލް-ޙަރްބީގެ ބެއްލެވުމުގެ ދަށުގައި ހުރި ތަންތަން ކަމަށް ވެސް އޭނާ ވިދާޅުވި އެވެ.

Advertisement

މީގެ އިތުރުން، ހޯމަ ދުވަހުގެ ހެނދުނުގެ ވަގުތެއްގައި ރިޔާޟުގައި އޮންނަ ކިންގް ޚާލިދު އިންޓަނޭޝަނަލް އެއާޕޯޓަށް ބެލިސްޓިކް މިސައިލަކުން ހަމަލާދީފައިވާ ކަމަށާއި، 'އީސްޓް-ވެސްޓް' ހޮޅިލައިންގެ ސާފުނުކުރާ ތެޔޮ ޕަމްޕުކުރާ ސްޓޭޝަންތަކަށް ޑްރޯން ހަމަލާތަކެއް ދީފައިވާ ކަމަށް ޙޫޘީންގެ ތަރުޖަމާނު ސަރީޢު ވިދާޅުވި އެވެ. މި ހަމަލާތަކާ ގުޅިގެން ރިޔާޟަށް ނުރައްކަލުގެ އިންޒާރު ނެރެފައިވާ ކަން ސައުދީ އަރަބިއްޔާގެ ސިވިލް ޑިފެންސް ޑިރެކްޓަރޭޓުން މީގެ ކުރިން އިއުލާނުކޮށްފައިވެ އެވެ.

ނަމަވެސް، ރިޔާޟަށް އަމާޒުކޮށް ޙޫޘީން ފޮނުވާލި ބެލިސްޓިކް މިސައިލް ވައިގެ ތެރޭގައި ހުއްޓުވައި، ދިފާޢީ ބާރުތަކުން އެ މިސައިލް ހަލާކުކޮށްލާފައިވާ ކަމަށް، ސައުދީ އިސްވެ އޮންނަ އިއްތިހާދުގެ ތަރުޖަމާނު މޭޖަރ ޖެނެރަލް ތުރްކީ އަލް-މާލިކީ ވިދާޅުވި އެވެ. ޢަދަނާއި ލަޙިޖަށް ދިން ހަމަލާތަކުގެ މައުލޫމާތު ސަރީޢު ހާމަކުރެއްވީ، ރިޔާޟަށް އަމާޒުކުރި މިސައިލް ހުއްޓުވި ކަމަށް އިއްތިހާދުން ބުނިތާ މަދު ގަޑިއިރުތަކެއް ފަހުންނެވެ.

ތެޔޮ ހޮޅިލައިނުގެ މުހިންމުކަމާއި ހަނގުރާމައިގެ ފަސްމަންޒަރު

ހަމަލާތައް އަމާޒުކުރި ކަމަށް ބުނާ ހޮޅިލައިނަކީ، ދައުލަތުގެ ތެޔޮ ކުންފުނި ސައުދީ އަރަމްކޯއިން ހިންގާ، ސައުދީ އަރަބިއްޔާގެ ތެޔޮ އުފުލާ އެންމެ މުހިންމު އެއް ވަސީލަތެވެ. ސައުދީގެ އިރުމަތީ އަބްޤައިޤު ސަރަހައްދުން ފެށިގެން ރަތް ކަނޑުގެ އައްސޭރީގައިވާ ޔަންބުޢުއާ ހަމައަށް ގާތްގަނޑަކަށް 1،200 ކިލޯމީޓަރަށް ދެމިގެންވާ މި ހޮޅިލައިން އެކީގައި އޮންނަނީ ސައުދީ އަރަބިއްޔާގެ އެތެރޭގަ އެވެ. މި ހޮޅިލައިނުގެ ޒަރިއްޔާއިން އިރުމަތީ ސަރަހައްދުގައި ހުންނަ އުފެއްދުންތެރިކަމާއި ޕްރޮސެސިންގ މަރުކަޒުތަކުން ރަތް ކަނޑުގެ އައްސޭރީގައިވާ ސާފުކުރާ ކާރުޚާނާތަކަށާއި އެކްސްޕޯޓް ޓާމިނަލްތަކަށް ސާފުނުކުރާ ތެޔޮ އުފުލަ އެވެ. މި ގޮތުން، ހުރްމުޒް ކަނޑުއޮޅި މެދުވެރިކޮށް ކަނޑުމަގުން ކުރާ ދަތުރުތަކަށް ބަރޯސާނުވެ، އެއްގަމު މަގުން ރަތް ކަނޑަށް ތެޔޮ އުފުލުމުގެ ބަދަލު މަގެއް ސައުދީ އަރަބިއްޔާއަށް މި ހޮޅިލައިނުން ފަހިކޮށްދެ އެވެ.

ޙޫޘީން ޔަމަނުގެ ވެރިރަށް ޞަންޢާއާއި ގިނަ ޕްރޮވިންސެއްގެ ބާރު އަތުލުމާ ގުޅިގެން، 2014 ސެޕްޓެންބަރު މަހުން ފެށިގެން އެ ޤައުމު ވަނީ ދާޚިލީ ހަނގުރާމައެއްގެ ތެރެއަށް ވެއްޓިފަ އެވެ. ބައިނަލްއަގުވާމީ ގޮތުން ބަލައިގަނެފައިވާ ޔަމަނުގެ ސަރުކާރަށް ސައުދީ އިސްވެ އޮންނަ އިއްތިހާދުން ތާއީދުކުރަން ފަށާފައިވަނީ 2015 މާރިޗު މަހުގަ އެވެ. ފަހަކަށް އައިސް ޔަމަނުގެ ސަރުކާރުގެ ފައުޖުތަކާއި ޙޫޘީންނާ ދެމެދު ހިނގަމުންދާ ކުރިމަތިލުންތައް ވަނީ އިތުރަށް ވަރުގަދަވެފަ އެވެ. ސައުދީ އަރަބިއްޔާއިން ދެމުންދާ ހަމަލާތަކުގެ ޒިންމާ އެ ޤައުމުން އުފުލަންޖެހޭނެ ކަމަށް ތުހުމަތުކޮށް، ޙޫޘީން ދަނީ ބެލިސްޓިކް މިސައިލާއި ޑްރޯން ބޭނުންކޮށްގެން ސައުދީއަށް އަމާޒުކޮށް ހަމަލާތައް ދެމުން ކަމަށް އެ ޖަމާއަތުން ބުންޏެވެ.