ހޫޘީންގެ މިސައިލްތަކެއް ދިފާޢުކޮށް، ސައުދީ އިއްތިހާދުން ޔަމަނުގައިވާ އަސްކަރީ އަމާޒުތަކަށް ހަމަލާދީފި
27 އޮކްޓޯބަރު 2026 | އަންގާރަ 02:54ޔަމަނުގެ ހޫޘީން ސައުދީއަށް ދެމުންދާ ހަމަލާތަކަށް ރައްދުދިނުމުގެ ގޮތުން، އެ ޖަމާއަތުގެ މިސައިލް ލޯންޗަރުތަކާއި ހަތިޔާރު ގުދަންތަކަށް ސައުދީ އިއްތިހާދުން ވަރުގަދަ ވައިގެ ހަމަލާތަކެއް ދީފި. މި އޮޕަރޭޝަނަކީ ހޫޘީންގެ އަސްކަރީ ގާބިލުކަން ކުޑަކުރުމަށް ހިންގާ ހަރަކާތެއް ކަމަށް އިއްތިހާދުން ބުނާއިރު، 2015 ވަނަ އަހަރުން ފެށިގެން ކުރިއަށްދާ މި ހަނގުރާމައިގެ މަސްރަހު މިފަހަކަށް އައިސް ވަނީ ވަރަށް ބޮޑަށް ގޯސްވެފައި
ޔަމަނުގައި ހޫޘީންގެ ބާރުގެ ދަށުގައި އޮތް ވެރިރަށް ޞަންޢާގައި ހުރި އެ ޖަމާއަތުގެ އަސްކަރީ މަގާމުތަކަށް ސައުދީ އަސްކަރީ އިއްތިހާދުން ދިން ހަމަލާތަކަކަށްފަހު، އެ ސަރަހައްދުގެ ހަނގުރާމަވެރިން ލިބިފައިވާ ގެއްލުންތައް ބަލައިލަނީ | އޭއެފްޕީ
ސައުދީ އަރަބިއްޔާގެ އިރުމަތީ ޕްރޮވިންސަށް އަމާޒުކޮށް ޔަމަނުގެ ހޫޘީ ޖަމާއަތުން ފޮނުވާލި ބެލިސްޓިކް ތިން މިސައިލެއް، އެ ޤައުމުގެ ވައިގެ ދިފާޢީ ނިޒާމުން ދިފާޢުކޮށް ނައްތާލާފައިވާ ކަމަށް ސައުދީ އިސްވެ އޮންނަ އަސްކަރީ އިސްތިހާދުން އަންގާރަ ދުވަހުގެ ހެނދުނު ބުނެފި އެވެ. މި ހަމަލާތަކުގައި އެއްވެސް މީހަކަށް އަނިޔާއެއް ނުވަތަ މާއްދީ ގެއްލުމެއް ލިބުނު ކަމެއް، އަދި ހަމަލާތައް އަމާޒުކޮށްފައިވާ ވަކި ތަންތަނެއް ވެސް އިއްތިހާދުގެ ބަޔާނުގައި ސާފުކޮށްދީފައެއް ނުވެ އެވެ.
ހޯމަ ދުވަހު ވެސް ވެރިރަށް ރިޔާޟްގެ ސަރަހައްދާއި ސައުދީ އަރަބިއްޔާގެ ދެކުނުގެ ސަރަހައްދުތަކުގެ މަތިން ތިން ޑްރޯނެއް ދެނެގަނެ ވައްޓާލާފައިވާ ކަމަށް އިއްތިހާދުން ބުންޏެވެ. ނަމަވެސް، އެ ޑްރޯންތައް ފޮނުވާލި ފަރާތެއް ނުވަތަ އެ ތަކެތި އަމާޒުކުރި ވަކި ތަންތަނެއް އިއްތިހާދުން ބުނެފައެއް ނުވެ އެވެ.
މިއާއެކު، ޔަމަނުގައި ހުރި ހޫޘީންގެ އަސްކަރީ މަރުކަޒުތަކަށް ވަރުގަދަ ހަމަލާތަކެއް ދީފައިވާ ކަން އިއްތިހާދުން ވަނީ އިއުލާނުކޮށްފަ އެވެ. މި ހަމަލާތަކުގައި ބެލިސްޓިކް މިސައިލް ފޮނުވާ ލޯންޗަރުތަކާއި، ހަތިޔާރު ރައްކާކުރާ ބިންގަރާސްތަކުގެ އިތުރުން މިސައިލް ގުދަނެއް ހަލާކުކޮށްލާފައިވާ ކަމަށް އިއްތިހާދުން ބުންޏެވެ. މި އޮޕަރޭޝަންތަކުގެ މައިގަނޑު ބޭނުމަކީ ހޫޘީންގެ ބެލިސްޓިކް މިސައިލް ވިއުގަ ފުނޑުފުނޑުކޮށްލުމާއި އެ ޖަމާއަތަށް ހަތިޔާރު ފޯރުކޮށްދޭ މަގުތައް ބަންދުކުރުން ކަމަށް ކޯލިޝަންގެ ތަރުޖަމާނު ތުރުކީ އަލް-މާލިކީ ވިދާޅުވި އެވެ.
މި ފަހުގެ ކުރިމަތިލުންތައް ފެންމަތިވެފައި މި ވަނީ، ޖުލައި މަހުން ފެށިގެން ސައުދީ އަރަބިއްޔާއާއި ހޫޘީ ޖަމާއަތާ ދެމެދު މަސްރަހު އިތުރަށް ގޯސްވެފައިވާ ދަނޑިވަޅެއްގަ އެވެ. ހަމަމިއާއެކު، ބައިނަލްއަގުވާމީ ގޮތުން ބަލައިގަނެފައިވާ ޔަމަނުގެ ސަރުކާރާއި ހޫޘީންނާ ދެމެދު ވެސް ހަނގުރާމައިގެ ކުރިމަތިލުންތައް ވަނީ އަލުން ފެށިފަ އެވެ. ޔަމަނުގެ ސަރުކާރަށް ވާގިވެރިވުމުގެ ގޮތުން ހޫޘީންނާ ދެކޮޅަށް ސައުދީ އަރަބިއްޔާ އިސްވެ އަސްކަރީ އިއްތިހާދެއް ހިންގަމުން އަންނަނީ 2015 މާރިޗު މަހުން ފެށިގެންނެވެ. ހޫޘީން ވަނީ 2014 ސެޕްޓެންބަރު މަހުން ފެށިގެން ޔަމަނުގެ ވެރިރަށް ޞަންޢާގެ އިތުރުން އެ ޤައުމުގެ އެހެނިހެން ސަރަހައްދުތައް އެ މީހުންގެ ބާރުގެ ދަށަށް ގެނެސްފަ އެވެ.
މަސްދަރު: އަނަދޮލު އޭޖެންސީ
