ޚާއްސަ އޮޕަރޭޝަނާއެކު މާލެއާއި ހުޅުމާލޭގައި އެކްސިޑެންޓްތައް ބޮޑުތަނުން މަދުކުރެވިފައިވޭ: ފުލުހުން

މަގުތަކުގައި ފުލުހުން ފާރަވެރިވާ މިންވަރު އިތުރުކޮށް ކުރިއަށްގެންދިޔަ ޚާއްސަ އޮޕަރޭޝަނާ ގުޅިގެން، މާލެއާއި ހުޅުމާލޭގައި ރިޕޯޓްކުރެވުނު އެކްސިޑެންޓްތަކުގެ އަދަދު ފާހަގަކޮށްލެވޭ މިންވަރަކަށް މަދުވެފައިވާ ކަމަށް ދިވެހި ފުލުހުންގެ ޚިދުމަތުން ބުނެފި އެވެ.

ފުލުހުންގެ އެންމެ ފަހުގެ އޮޕަރޭޝަނަލް ތަފާސްހިސާބުތަކުން ދައްކާ ގޮތުގައި، މި ފިޔަވަޅުތަކާއެކު މަގުމަތީގެ ހާލަތަށް ވަނީ ވަރަށް ބޮޑު ހެޔޮ ބަދަލެއް އައިސްފަ އެވެ.

Advertisement

ކޮމިޝަނަރ އޮފް ޕޮލިސްގެ އިރުޝާދުގެ ދަށުން 2026 އޮކްޓޫބަރު 8 ގައި ފެށި "އޮޕަރޭޝަން ރެކްލެސް ޑްރައިވިންގ" ގެ ނަތީޖާއަށް އަލިއަޅުވާލައި ފުލުހުން ބުނީ، މި އޮޕަރޭޝަން ފެށުމުގެ ކުރީގެ 20 ދުވަހާ އަޅާބަލާއިރު އޮޕަރޭޝަން ފެށިފަހުން ވޭތުވެދިޔަ 20 ދުވަހުގެ ތެރޭގައި އެކްސިޑެންޓްތައް ވަނީ 36 އިންސައްތަ މަދުކުރެވިފައި ކަމަށެވެ.

ޚާއްސަ އޮޕަރޭޝަނާއެކު މާލެއާއި ހުޅުމާލޭގައި އެކްސިޑެންޓްތައް ހިނގާ މިންވަރު ވަނީ ވަރަށް ބޮޑަށް ދަށް ކުރެވިފައި | މޯލްޑިވްސް ޕޮލިސް ސާރވިސް

އެއީ އޮޕަރޭޝަންގެ ކުރިން ހިނގި 117 އެކްސިޑެންޓާ އަޅާބަލާއިރު 43 އެކްސިޑެންޓްގެ މަދުވުމެކެވެ. މި މުއްދަތުގައި ހިނގާފައިވަނީ ޖުމްލަ 74 އެކްސިޑެންޓެވެ. ފުޅާ އަދި ދިގު މަގުތަކެއް އޮންނަ ހުޅުމާލޭގައި މިފަދަ ބޮޑު ދަށްވުމެއް ފެނުމަކީ ރައްޔިތުން މަގުމައްޗަށްދޭ ސަމާލުކަން އިތުރުވަމުން އަންނަކަމުގެ ހެއްކެއް ކަމަށް ވެސް ފުލުހުން ފާހަގަކުރެ އެވެ.

ހަމައެއާއެކު، ޓްރެފިކް ޕޮލިސް އެންޑް ރޯޑް މެނޭޖްމަންޓުން މާލޭގައި ކުރިއަށްގެންދިޔަ ހަރަކާތްތަކުން ވެސް އެދެވޭ ހެޔޮ ނަތީޖާއެއް ފެނިފައިވާ ކަމަށް ފުލުހުން ބުނެ އެވެ. 

އެގޮތުން 2026 ސެޕްޓެންބަރު 21 އިން އޮކްޓޫބަރު 7 ގެ ނިޔަލަށް މާލޭގައި 128 އެކްސިޑެންޓް ހިނގާފައިވާއިރު، ޚާއްސަ ފިޔަވަޅުތަކާއެކު އޮކްޓޫބަރު 8 އިން 24 ގެ ނިޔަލަށް އެ އަދަދު ވަނީ 106 އަށް ދަށްކުރެވިފަ އެވެ. މިއީ 22 އެކްސިޑެންޓް ނުވަތަ ގާތްގަނޑަކަށް 17.2 އިންސައްތައިގެ ދަށްވުމެކެވެ.

ފުލުހުން ހާމަކުރި ގޮތުގައި، ހުޅުމާލޭގައި ކުރިއަށްދިޔަ އޮޕަރޭޝަނުގެ ތެރެއިން އޮކްޓޫބަރު 8 އިން 27 ގެ ނިޔަލަށް ޖުމްލަ 3,151 އުޅަނދު ވަނީ ޗެކްކޮށްފަ އެވެ.

ޚާއްސަ އޮޕަރޭޝަނާއެކު މާލެއާއި ހުޅުމާލޭގައި އެކްސިޑެންޓްތައް ބޮޑުތަނުން މަދުވެފައިވާއިރު، ގިނަ އަދަދެއްގެ ވެހިކަލް ޗެކްކޮށްފައިވޭ

ޚާއްސަ އޮޕަރޭޝަނާއެކު މާލެއާއި ހުޅުމާލޭގައި އެކްސިޑެންޓްތައް ބޮޑުތަނުން މަދުވެފައިވާއިރު، ގިނަ އަދަދެއްގެ ވެހިކަލް ޗެކްކޮށްފައިވޭ

އޭގެ ތެރޭގައި ހިމެނެނީ 2,800 ސައިކަލާއި 351 ހަތަރުފުރޮޅުލީ އުޅަނދެވެ. ފުލުހުން ބުނީ އެ ޚިދުމަތުގެ އަމާޒަކީ ހަމައެކަނި ޖޫރިމަނާކުރުމާއި ޓޯކުރުން ނޫން ކަމަށާއި، އިސްކަންދެނީ ނުރައްކަލެއް ދިމާވުމުގެ ކުރިން ހުއްޓުވައި ހޭލުންތެރިކުރުވުމަށް ކަމަށެވެ.

އެގޮތުން މީގެ ތެރެއިން 808 ފަރާތަކަށް، އެއީ 735 ސައިކަލު އަދި 73 ހަތަރުފުރޮޅުލީ އުޅަނދު ވަނީ ފިޔަވަޅު އެޅުމުގެ ބަދަލުގައި ނަސޭހަތްތެރިވެ ވިސްނައިދީފައިވާ ކަމަށް ފުލުހުން ބުނެ އެވެ. ނަމަވެސް އެހެން މީހުންގެ ސަލާމަތަށް ނުރައްކާވާ ފަދަ ގޮތަށް ދުއްވި 23 އުޅަނދަކަށާއި، ކަމާބެހޭ ކެޓެގަރީގެ އެއްގަމު އުޅަނދު ދުއްވުމުގެ ލައިސަންސް ނެތް 85 ފަރާތެއް ޖޫރިމަނާކޮށް، 145 އުޅަނދު ޓޯކޮށްފައިވާ ކަމަށް ފުލުހުން ބުނެ އެވެ. 

މާލޭގެ މަގުތަކުގައި ކުރިއަށްގެންދިޔަ ހަރަކާތްތަކާ ގުޅޭގޮތުން ފުލުހުން ބުނީ، ބާރުދުވެލީގައި ދުއްވި 600 މައްސަލައަކާއި ނުރައްކާތެރިކޮށް ދުއްވި 19 މައްސަލައެއް ފާހަގަކޮށް ފިޔަވަޅު އަޅާފައިވާ ކަމަށެވެ. އަދި ތަކުރާރުކޮށް ނުރައްކާތެރިކޮށް ދުއްވި 13 ފަރާތަކަށް ނަސޭހަތްދީފައިވާއިރު، ބާރަށް ދުއްވި މީހުންގެ ތެރެއިން އެކި ކުންފުނިތަކާއި އިދާރާތަކަށް ނިސްބަތްވާ 23 ފަރާތެއްގެ މައުލޫމާތު އެ ތަންތަނާ ހިއްސާކޮށްގެން ޒިންމާދާރުކުރުމުގެ މަސައްކަތް ވެސް ކޮށްފައިވާ ކަމަށް ފުލުހުން ބުނެ އެވެ. 

މީގެ އިތުރުން އުޅަނދުގައި ފުރިހަމަވާންޖެހޭ ކަންކަން ފުރިހަމަނުވުމުގެ 371 މައްސަލައަކާއި، ދަތުރުފަތުރަށް ދަތިވާގޮތަށް ގަވާއިދާ ހިލާފަށް ޕާކުކުރުމުގެ 171 މައްސަލައަކަށް ވެސް ފިޔަވަޅު އަޅާފައިވާ ކަމަށް ފުލުހުން ބުނެ އެވެ. 

ފުލުހުން ބުނީ، މި އޮޕަރޭޝަންތަކުން ފެންނަމުންދާ ކާމިޔާބީގެ އެންމެ ބޮޑު ހިއްސާދާރުންނަކީ މަގުމަތީގެ ގަވާއިދުތަކަށް ބޯލަނބައި، ޒިންމާދާރުކަމާއެކު އުޅަނދު ދުއްވާ އަދި ފުލުހުންގެ ޗެކްޕޮއިންޓްތަކަށް އެއްބާރުލުންދޭ އާންމު ރައްޔިތުން ކަމަށެވެ. އަދި މަގުތަކަކީ އެންމެންގެ ފުރާނައާ ގުޅިފައިވާ ތަނަކަށްވާތީ، ހުރިހާ ފަރާތްތަކަކުން ވެސް މަގުމަތީގެ ސަލާމަތާއި ރައްކާތެރިކަމަށް އަބަދުވެސް އިސްކަންދިނުމަށް ފުލުހުން ވަނީ އިލްތިމާސްކޮށްފަ އެވެ.