ސްކޭމްގެ މައްސަލައަކާ ގުޅިގެން 3 މީހަކު ހައްޔަރުކޮށްފި
25 އޮކްޓޯބަރު 2026 | އާދީއްތަ 13:13ވަޓްސްއެޕް މެދުވެރިކޮށް 32،000 ރުފިޔާގެ ސްކޭމެއް ހިންގި މައްސަލައެއްގައި ތިން ދިވެހިން ހައްޔަރުކޮށް، އެމީހުންގެ ބަންދަށް ކޯޓުން ވަނީ މުއްދަތު ޖަހާފައި. ފުލުހުން ތަހުގީގު ކުރަމުންދާ މި މައްސަލައާ ގުޅިގެން، އޮންލައިން މުއާމަލާތްތަކުގައި ސަމާލުވުމަށާއި އޯޓީޕީ ފަދަ ޒާތީ މައުލޫމާތު ހިއްސާނުކުރުމަށް ވަނީ އިލްތިމާސްކޮށްފައި
އޮންލައިންކޮށް ހިންގި 32،000 ރުފިޔާގެ ސްކޭމްގެ މައްސަލައަކާ ގުޅިގެން 3 މީހުން ހައްޔަރުކުރުން | ޕޮލިސް މީޑިޔާ
އޮންލައިންކޮށް ހިންގި 32،000 ރުފިޔާގެ ސްކޭމްގެ މައްސަލައަކާ ގުޅިގެން ތިން މީހުން ހައްޔަރުކޮށްފި އެވެ.
ދިވެހި ފުލުހުންގެ ޚިދުމަތުން މައުލޫމާތު ދޭ ގޮތުގައި މި މައްސަލައަކީ ވަޓްސްއެޕް މެދުވެރިކޮށް ވާހަކަދައްކައި، މަކަރާއި ހީލަތުން ފައިސާ އަތުލާފައިވާ ކަމަށް، 2026 އޮކްޓޫބަރު 13 ވަނަ ދުވަހު ހުށަހަޅާފައިވާ މައްސަލައެކެވެ.
މި މައްސަލައާ ގުޅިގެން ހައްޔަރުކޮށްފައިވަނީ ހ. ވެލަސްފަރުގެ / މާލެ، ހުސައިން ސާމިރުއާއި، މުހައްމަދު ރީހާން އާއި، ޖޯޖެޑްވިލާ / މާލެ، އަހްމަދު ސުޖާއު އެވެ.
އެމީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން ހުސައިން ސާމިރު އާއި އަހްމަދު ސުޖާއު 15 ދުވަހަށް އަދި މުހައްމަދު ރީހާން ހަތްދުވަހަށް ބަންދުކުރުމަށް ވަނީ އަމުރުކޮށްފަ އެވެ.
މި މައްސަލަ ފުލުހުން ދަނީ ތަހުގީގުކުރަމުންނެވެ.
ސްކޭމްގެ މައްސަލަތަކުން ރައްކާތެރިވުމަށްޓަކައި، އޮންލައިން މެދުވެރިކޮށް ފޮނުވާ ގޮތް ނޭނގޭ ލިންކުތަކަށް ނުވަނުމަށާއި، އޯޓީޕީ ކޯޑު ހިއްސާނުކުރުމަށާއި، އޮންލައިންކޮށް ވިޔަފާރިކުރުމާއި ފައިސާގެ މުއާމަލާތްތައް ހިންގުމުގައި، މުއާމަލާތުކުރެވޭ ފަރާތުގެ ސައްހަކަން ކަށަވަރުކުރުމަށާއި، ޒާތީ މައުލޫމާތާއި ބޭންކިންގ ތަފުސީލުތައް އެހެން ފަރާތްތަކާ ހިއްސާ ނުކުރުމަށް ފުލުހުން ވަނީ އިލްތިމާސްކޮށްފަ އެވެ.
