ފާއިތުވި 24 ގަޑިއިރު އެންމެ ބޯކޮށް ވާރޭ ވެހުނީ ގާފަރަށް، ކުރިއަށް އޮތް 24 ގަޑިއިރު ވެސް މޫސުން ގޯސްވެ ރާޅުގެ އުސްމިން 7 ފޫޓަށް އުފުލޭނެ!

ރާއްޖޭއަށް މިހާރު ކުރަމުންދާ ވިއްސާރައިގަ ފާއިތުވި 24 ގަޑިއިރު އެންމެ ބޯކޮށް ވާރޭ ވެހިފައިވަނީ ކ. ގާފަރަށް ކަމަށް މޫސުމާބެހޭ ގައުމީ އިދާރާއިން ބުނެފި އެވެ. 

އެ އިދާރާއިން ވަނީ ހުކުރު ދުވަހުގެ ހެނދުނު 8:00ން ހޮނިހިރު ދުވަހުގެ 8:00ށް އެންމެ ބޯކޮށް ވާރޭ ވެހިފައިވާ ރިކޯޑު ކުރެވިފައިވާ ރަށްތައް އާއްމުކޮށްފަ އެވެ. 

Advertisement

މޫސުމާބެހޭ ގައުމީ އިދާރާއިން ބުނީ، ކ. ގާފަރަށް 37.8 މިލިމީޓަރުގެ ވާރޭ، ކ. ކާށީދޫއަށް 37.5 މިލިމީޓަރުގެ ވާރޭ، ޅ. އޮޅުވެލިފުއްޓަށް 37.4 މިލިމީޓަރުގެ ވާރޭ، ނ. މާފަރަށް 34.6 މިލިމީޓަރުގެ ވާރޭ، ރ. އިފުރު އަދި ބ. ދަރަވަންދޫއަށް 26.5 މިލިމީޓަރުގެ ވާރޭ ވެހިފައިވާ ކަމަށެވެ. މީގެ އިތުރުން އދ. މާމިގިއްޔަށް 27 މިލިމީޓަރުގެ ވާރޭވެހިފައިވާއިރު، ކ. ދިއްފުއްޓަށް 18.3 އަދި ސ. ހިތަދޫއަށް 15.5 މިލިމީޓަރުގެ ވާރޭ ވެހިފައިވާ ކަމަށެވެ. 

ރާއްޖޭއަށް މިހާރު ކުރަމުންދާ ވިއްސާރައިގަ ފާއިތުވި 24 ގަޑިއިރު އެންމެ ބޯކޮށް ވާރޭ ވެހުނު ރަށްތައް | ރާއްޖެއެމްވީ

ރާއްޖޭގެ ރަށްތަކަށް ބޯކޮށް ވާރޭވެހިވުމުގެ ސަބަބުން ބައެއް ގެއްލުންތައް ވެސް ބައެއް ރަށްރަށަށް ލިބިފައިވެ އެވެ. 

މޫސުން ގޯސްވެފައިވާތީ ސަމާލުވާންޖެހޭކަން އިލްތިމާސްކޮށް މޫސުމާބެހޭ ގައުމީ އިދާރާއިން ބުނީ، އާދިއްތަ ދުވަހުގެ ހެނދުނު 10:00އާ ހަމައަށް އެކިހިސާބަށް ވިއްސާރަކުރާނެ ކަމަށާއި، ބައެއް ރަށްތަކަށް ގުގުރުން އެކަށީގެންވާ ކަމަށެވެ. ހުޅަނގުދެކުނާއި ހުޅަނގުން، ގަޑިއަކު 13 މޭލާއި 23 މޭލާ ދެމެދުގެ ބާރުމިނުގައި ވައިޖެހޭނެ ކަމަށާއި، ވިލާގަނޑުގައި ގަޑިއަކު ގާތްގަނޑަކަށް 40 މޭލުގެ ބާރުމިނަށް ވައިގަދަވުން އެކަށީގެންވާ ކަމަށް އެ އިދާރާއިން ބުނެ އެވެ. 

މީގެ އިތުރުން ކަނޑުތައް ގަދަވާނެ ކަމަށާއި، ރާޅުގެ އުސްމިނުގައި 7 ނުވަތަ 5 ފޫޓު ހުންނާނެ ކަމަށް މޫސުމާބެހޭ ގައުމީ އިދާރާއިން ބުނެ އެވެ. 

އެހެންކަމުން ޚާއްސަކޮށް ކަނޑުދަތުރުކުރާ ފަރާތްތަކުން ސަމާލުވުމަށް އެދިފައިވެ އެވެ.