އުއްމު ދުރުމާނުގެ ކަރަންޓު ވިއުގައަށް ޑްރޯން ހަމަލާއެއް: ޚަރްތޫމުގެ ބޮޑު ސަރަހައްދެއް އަނދިރިވެ، އާންމު ހާލަތު އިތުރަށް ގޯސްވެއްޖެ
27 އޮކްޓޯބަރު 2026 | އަންގާރަ 10:03ސޫދާނުގެ އުއްމު ދުރުމާނުގައި ހުންނަ ކަރަންޓު ސަބްސްޓޭޝަނަކަށް ދިން ޑްރޯން ހަމަލާއަކާ ގުޅިގެން ވެރިރަށް ޚަރްތޫމުގެ ބޮޑު ސަރަހައްދަކުން ކަރަންޓުގެ ޚިދުމަތް ކެނޑިއްޖެ. މި ހަމަލާގެ ޒިންމާ އެއްވެސް ފަރާތަކުން އުފުލާފައި ނުވާއިރު، މީގެ ކުރިން ދިން މި ފަދަ ހަމަލާތަކުގެ ތުހުމަތު ސަރުކާރުން ކުރަނީ އާރްއެސްއެފްގެ މައްޗަށް. 2023 ވަނަ އަހަރުން ފެށިގެން ކުރިއަށްދާ މި ހަނގުރާމައިގެ ސަބަބުން ސޫދާނުގެ އުމްރާނީ ވަސީލަތްތަކަށް ބޮޑެތި ގެއްލުންތަކެއް ދަނީ ލިބެމުން
ސޫދާންގެ ޚާރްތޫމްގައި ޑްރޯން ހަމަލާއެއް އަމާޒުވެފައިވާ ކަރަންޓު ޓްރާންސްފޯމަރެއްގެ ކައިރިން ފިރިހެން ކުދިބަޔަކު ހިނގާފައި ދަނީ. | އޭއެފްޕީ
ސޫދާނުގެ ވެރިރަށް ޚަރްތޫމުގެ ހުޅަނގުގައި އޮންނަ އުއްމު ދުރުމާނުގެ ކަރަންޓު ސަބްސްޓޭޝަނަކަށް އަންގާރަ ދުވަހު ދިން ޑްރޯން ހަމަލާއަކާ ގުޅިގެން މުޅި ވެރިރަށުގެ ބޮޑު ސަރަހައްދަކުން ކަރަންޓުގެ ޚިދުމަތް ކެނޑިގެން ގޮސްފި އެވެ.
މަންޒަރު ފެނުނު މީހުން ބުނީ، އަންގާރަ ދުވަހުގެ ހެނދުނުގެ ވަގުތެއްގައި އުއްމު ދުރުމާނުގެ ހުޅަނގުއުތުރު ސަރަހައްދުގައި ހުންނަ އަލް-މަރްޚިއްޔާތު ކަރަންޓު ސަބްސްޓޭޝަނަށް ޑްރޯނަކުން ހަމަލާދިނުމާ ގުޅިގެން ޚަރްތޫމުގެ ބޮޑު ސަރަހައްދަކުން ކަރަންޓުގެ ޚިދުމަތް ކެނޑިގެން ދިޔަ ކަމަށެވެ.
އަދި، އަންގާރަ ދުވަހުގެ ހެނދުނު ކަރަންޓު ކެނޑިފައިވާކަން ވެރިރަށުގެ އެކި އަވަށްތަކުގެ ރައްޔިތުން ވެސް ވަނީ ކަށަވަރުކޮށްދީފަ އެވެ. މީސްމީޑިއާގައި ދައުރުވަމުންދާ ވީޑިއޯތަކުން ފެންނަ ގޮތުގައި އަލް-މަރްޚިއްޔާތު ކަރަންޓު މަރުކަޒުން ދަނީ ދުން އަރަމުންނެވެ. މި ހާދިސާގައި ލިބުނު ގެއްލުމުގެ ތަފުސީލު ނުވަތަ މި ހަމަލާގެ ޒިންމާ އުފުލާ ފަރާތަކާ ބެހޭގޮތުން އެއްވެސް ރަސްމީ ބަޔާނެއް ނެރެފައެއް ނުވެ އެވެ.
މި ހާދިސާ ހިނގާފައި މި ވަނީ، ސޫދާނުގެ އިރުދެކުނުގައި އޮންނަ ސިންނާރާއި، އިރުމަތީގެ އަލް-ޤަޟާރިފުގެ އިތުރުން މެދުތެރޭ ސަރަހައްދުގައި އޮންނަ އަލް-ޖަޒީރާގެ ފަސް ކަރަންޓު ސަބްސްޓޭޝަނަކަށް ޑްރޯން ހަމަލާ ދީފައިވާ ކަމަށް ބުނެ، ހަނގުރާމަވެރި ޖަމާއަތެއް ކަމަށްވާ ރެޕިޑް ސަޕޯޓް ފޯސަސްގެ (އާރްއެސްއެފް) މައްޗަށް ސޫދާނުގެ އިލެކްޓްރިސިޓީ ކުންފުނިން ތުހުމަތުކުރިތާ އެއް ދުވަސް ފަހުންނެވެ. އެ ހަމަލާތަކުގެ ސަބަބުން އެ މަރުކަޒުތަކަށް ބޮޑެތި ގެއްލުންތަކެއް ލިބި، އެ ތިން ސްޓޭޓުގެ އިތުރުން މެދުތެރޭ ސޫދާނުގައި އޮންނަ އައްނީލުލް އަބްޔަޟް ސްޓޭޓުން ކަރަންޓުގެ ޚިދުމަތް ކެނޑިގެން ގޮސްފައިވާ ކަމަށް ސަރުކާރު ހިއްސާވާ އެ ކުންފުނިން ބުންޏެވެ.
އާންމު ރައްޔިތުންގެ ޒަރޫރީ އުމްރާނީ ވަސީލަތްތަކަށް އަމާޒުކޮށް ހަމަލާދޭ ކަމުގެ ތުހުމަތު ސޫދާނުގެ ކަމާބެހޭ އިދާރާތަކުންނާއި އިންސާނީ ހައްގުތަކަށް މަސައްކަތްކުރާ ޖަމުއިއްޔާތަކުން ތަކުރާރުކޮށް އާރްއެސްއެފްގެ މައްޗަށް ކުރެ އެވެ. އެ ޖަމާއަތުން މި ފަދަ ތުހުމަތުތަކަށް އާންމުކޮށް ރައްދު ނުދިން ނަމަވެސް، އެ ފަރާތްތަކުން އަބަދު ވެސް ދައުވާކުރަނީ މަސައްކަތްކުރަނީ އާންމުން ހިމާޔަތްކުރުމަށް ކަމަށެވެ.
ސޫދާނުގެ އަސްކަރިއްޔާގެ ތެރެއަށް މި ލަޝްކަރު އެއްކޮށްލުމާ ގުޅޭގޮތުން އުފެދުނު ޚިޔާލުތަފާތުވުންތަކާ ގުޅިގެން، ސޫދާނުގެ ސިފައިންނާއި އާރްއެސްއެފާ ދެމެދު ވަރުގަދަ ހަނގުރާމައެއް ފެށިގެން ހިނގަމުން އަންނަނީ 2023 އެޕްރީލު މަހުން ފެށިގެންނެވެ. އދ. އާއި ބައިނަލްއަގުވާމީ އަންދާޒާތަކުން ދައްކާ ގޮތުގައި، މި ހަނގުރާމައިގެ ސަބަބުން އެތައް ހާސް ބަޔަކު މަރުވެ، ގާތްގަނޑަކަށް 13 މިލިޔަން މީހުން ވަނީ ގެދޮރު ދޫކޮށް ދާން މަޖުބޫރުވެފަ އެވެ. ހަމަމިއާއެކު، މުޅި ޤައުމުގައި ބޮޑު ބަނޑުހައިހޫނުކަމަކާއި އިންސާނީ ކާރިސާއެއް ވަނީ އިންތިހާއަށް ގޯސްވެފަ އެވެ.
މަސްދަރު: އަނަދޮލު އޭޖެންސީ
