އިބޯލާ ޖައްސާ ބަންޑިބޫޖޯ ވައިރަހާ ދެކޮޅަށް އާ ވެކްސިން ޓެސްޓުކުރަން ފަށައިފި

ޑިމޮކްރެޓިކް ރިޕަބްލިކް އޮފް ކޮންގޯގައި ހަލުވިކަމާއެކު ފެތުރެމުންދާ އިބޯލާ ރޯގާ ކޮންޓުރޯލު ކުރުމަށް ކުރެވެމުންދާ މަސައްކަތްތަކުގެ ތެރެއިން، އެ ބައްޔާ ދެކޮޅަށް އުފައްދާފައިވާ އައު ވެކްސިނެއްގެ ކްލިނިކަލް ޓްރަޔަލް އެ ޤައުމުގެ ސިއްހީ އިދާރާތަކުން ފަށައިފި ކަމަށް ދުނިޔޭގެ ސިއްހަތު ޖަމުއިއްޔާއިން (ޑަބްލިޔުއެޗްއޯ) ހުކުރު ދުވަހު ހާމަކޮށްފި އެވެ.

ސްވާހިލީ ބަހުން "އުންމީދު" ގެ މާނަ ދޭހަކޮށްދޭ "ތުމައިނީ" ގެ ނަމުން ނަންދެވިފައިވާ މި ޓްރަޔަލްގެ ދަށުން އެންމެ ފުރަތަމަ ބައިވެރިންނަށް ވެކްސިން ދީފައި ވަނީ އިތޫރީ ޕްރޮވިންސްގެ ވެރިރަށް ބޫނިޔާގައި ކަމަށް ޑަބްލިއުއެޗްއޯގެ އެފްރިކާ ސަރަހައްދީ އޮފީހުން ބުންޏެވެ.

Advertisement

ޖިއޮގްރަފީގެ ގޮތުން އެކި ސަރަހައްދުތަކަށް ހަލުވިކަމާއެކު ފެތުރެމުން އަންނަ 'ބަންޑިބޫޖޯ' ވައިރަސް ސްޓްރެއިންގެ ސަބަބުން ޖެހޭ އިބޯލާ ބައްޔާ ދެކޮޅަށް ކުރެވޭ މަސައްކަތުގައި މި ޓްރަޔަލް ފެށުމަކީ އެޅުނު ވަރަށް މުހިންމު ފިޔަވަޅެއްގެ ގޮތުގައި ޑަބްލިއުއެޗްއޯ އިން ސިފަކުރެ އެވެ. މި އިލްމީ ދިރާސާގެ މައިގަނޑު އަމާޒަކީ، ބަލި ޖެހިފައިވާ މީހުންނާ ބައްދަލުވެފައިވާ ފަރާތްތަކުގެ މެދުގައި، ބަންޑިބޫޖޯ ވައިރަހަށް އަމާޒުކޮށްގެން ތައްޔާރުކުރެވޭ ވެކްސިން ކެންޑިޑޭޓްތަކުގެ ރައްކާތެރިކަމާއި ފައިދާ ވަޒަންކުރުމެވެ.

ބަންޑިބޫޖޯ ސްޓްރެއިންއާ ދެކޮޅަށް ފުރަތަމަ ފަހަރަށް ކުރިއަށްގެންދާ ދިރާސާ

ކޮންގޯގައި 2026 މެއި މަހު ފުރަތަމަ ފަހަރަށް ފެނުނު ކަމަށް އިއުލާނުކުރި ބަންޑިބޫޖޯ ވައިރަސް ސްޓްރެއިންއާ ދެކޮޅަށް މިހާތަނަށް ރަސްމީކޮށް އެއްވެސް ވެކްސިނަކަށް ހުއްދަ ދީފައެއް ނުވެ އެވެ. ޑަބްލިއުއެޗްއޯއިން ހާމަކުރި ގޮތުގައި މި ދިރާސާ ކުރިއަށްގެން ދަނީ އިލްމީ މިންގަނޑުތަކަށާއި، ދެފުށް ފެންނަ އުސޫލުތަކަށާއި، އަޚުލާގީ ހަމަތަކުގެ އިތުރުން ވެކްސިން ޖަހާ ފަރާތްތަކުގެ ފުރިހަމަ ރުހުމާއި މުޖުތަމައުގެ ބައިވެރިވުން ހޯދައިގެންނެވެ.

"ބަންޑިބޫޖޯ ވައިރަހަށް ޚާއްސަކޮށްގެން އުފައްދާފައިވާ ވެކްސިން ކެންޑިޑޭޓްތަކުގެ ތެރެއިން އެއްވެސް ވެކްސިނެއް މަސައްކަތްކުރޭތޯ ދެނެގަތުމަށް މި ޓްރަޔަލްގެ ސަބަބުން މަގުފަހިވެގެންދާނެ" ޑަބްލިޔުޗްއޯގެ ޑިރެކްޓަރ-ޖެނެރަލް ޓެޑްރޯސް އަދަނޮމް ގެބްރެއިޔޭސުސް ވިދާޅުވި އެވެ.

ބައިނަލްއަގުވާމީ އެހީތެރިކަމާއި ވެކްސިންގެ ހާލަތު

މި ރޯގާއާ ދެކޮޅަށް ބޭނުންކުރުމަށް ޓަކައި، ދުނިޔޭގެ އިބޯލާ ވެކްސިން ރިޒާވް ނުވަތަ ސްޓޮކުން 'އެރްވެބޯ' ވެކްސިންގެ 70،000 ޑޯޒް 2026 އޮގަސްޓު މަހު ކޮންގޯއަށް ވަނީ ލިބިފަ އެވެ. ނަމަވެސް، އެ ވެކްސިނަކީ 'ޒައީރު' އިބޯލާ ވައިރަހާ ދެކޮޅަށް ބޭނުންކުރުމަށް ކުރިން ހުއްދަ ދީފައިވާ ވެކްސިނެކެވެ. މި ފަހަރުގެ ވެކްސިން ޓްރަޔަލް ވިލަރެސްކުރަނީ ކޯލިޝަން ފޯ އެޕިޑެމިކް ޕްރިޕެއާޑްނަސް އިނޮވޭޝަންސްއިން (ސެޕީ) ނެވެ. އަދި، މި މަސައްކަތުގައި ޑަބްލިޔުއެޗްއޯގެ އިތުރުން ކޮންގޯގެ ސިއްހަތާ ބެހޭ ވުޒާރާއާއި އެކި ބައިވެރިން އެހީތެރިކަން ފޯރުކޮށްދެމުން ގެންދެ އެވެ.

ހާލަތުގެ ނުރައްކާތެރިކަމާއި އެކި ސަރަހައްދުތަކަށް ފެތުރުން

އެފްރިކާ ސެންޓަރސް ފޯ ޑިޒީޒް ކޮންޓްރޯލް އެންޑް ޕްރިވެންޝަންގެ (އެފްރިކާ ސީޑީސީ) އެންމެ ފަހުގެ ތަފާސްހިސާބުތައް ދައްކާ ގޮތުން، މި ރޯގާ ފެށުނު ފަހުން ކޮންގޯގައި ބަލި ޖެހުނު މީހުންގެ އަދަދު ވަނީ 9،700 އަށްވުރެ މައްޗަށް އަރާފަ އެވެ. އަދި، މި ބަލީގައި 4،690 އަށްވުރެ ގިނަ މީހުން ވަނީ މަރުވެފަ އެވެ. މި ބަލިމަޑުކަން މިހާރު ވަނީ އެ ޤައުމުގެ އަށް ޕްރޮވިންސަކަށް ފެތުރިފަ އެވެ. އެއީ އޯ-އުއޭލޭ، އިތޫރީ، އުތުރު ކީވޫ، ދެކުނު ކީވޫ، ބާ-އުއޭލޭ، ޗޯޕޯ، ދެކުނު އުބަންގީ އަދި އުތުރު އުބަންގީ އެވެ.

މި ބަލިމަޑުކަން ސަރަހައްދުގެ އެހެން ޤައުމުތަކަށް ފެތުރެމުން ދިއުމަކީ ރޯގާ ކޮންޓުރޯލު ކުރުމަށް ކުރަމުންދާ މަސައްކަތްތަކަށް ކުރިމަތިވެފައިވާ ބޮޑު ގޮންޖެހުމެއް ކަމަށް ސިއްހީ އޮފިޝަލުން ވިދާޅުވި އެވެ. މި ގޮތުން، ކެންޔާއިން މިހާތަނަށް ކަށަވަރުކުރެވުނު ނުވަ ކޭސް ރިޕޯޓުކޮށްފައިވާއިރު، އޭގެ ތެރެއިން ދެ މީހަކު ވަނީ މަރުވެފަ އެވެ. ހަމަމިއާއެކު، ނައިޖީރިޔާއިން ވެސް މި ހަފުތާގެ ކުރީކޮޅު އެ ޤައުމުގެ ފުރަތަމަ ކޭސް ކަށަވަރުކޮށްފައިވާއިރު، ސިއްހީ މާހިރުން ލަފާކުރަނީ އެއީ ކޮންގޯއިން އެ ޤައުމަށް އެތެރެވި ކޭހެއް ކަމަށެވެ.