ކޮންޓެކްޓް ޓްރޭސިންގ ފޭލުވެ ކޮންގޯގައި އިބޯލާގެ ހާލަތު ގޯހުންގޯހަށް، 8,000 މީހުންނަށް ބަލި ޖެހިއްޖެ
29 ސެޕްޓެމްބަރު 2026 | އަންގާރަ 02:26ކޮންގޯގައި އިބޯލާ ޖެހުނު މީހުންގެ އަދަދު 8،000 އަށް ވުރެ މައްޗަށް އަރާފައިވާ އިރު، މީގެ ތެރެއިން 3،901 މީހުން ވަނީ މަރުވެފައި. ބަލި ޖެހޭ މީހުން ދެނެގަތުމަށް ހުރި ގޮންޖެހުންތަކާ އެކު ބަލި ފެތުރޭ ސަރަހައްދުތައް އިތުރުވަމުންދާތީ، އަވައްޓެރި ގައުމުތަކަށް މި ބަލީގެ ނުރައްކާ ބޮޑުވެދާނެ ކަމުގެ އިންޒާރު ދުނިޔޭގެ ސިއްހަތު ޖަމްއިއްޔާއިން ވަނީ ދީފައި
ކޮންގޯގައި އިބޯލާ ޖެހިފައިވާ ކަމަށް ޝައްކުކުރެވޭ މީހަކަށް ފަރުވާދިނުމަށް ސިއްހީ ޚިދުމަތްތެރިންގެ ބަޔަކު ފީލްޑް ހޮސްޕިޓަލެއްގައި މަސައްކަތް ކުރަނީ | އަނަދޮލު އޭޖެންސީ
ޑިމޮކްރެޓިކް ރިޕަބްލިކް އޮފް ކޮންގޯގައި އިބޯލާ ޖެހުނު ކަމަށް ކަށަވަރުވި މީހުންގެ އަދަދު 8،000 އަށް ވުރެ މައްޗަށް އަރާފައިވާ އިރު، ފަހަކަށް އައިސް އެ ގައުމުގައި މި ބަލި ފެތުރުން އިތުރުވެފައި ވަނީ ކޮންޓެކްޓް ޓްރޭސިންގ ހެދުމުގައި ހުރި އުނިކަންތައްތަކާއި ފަރުވާދޭ މަރުކަޒުތަކުން ބޭރުގައި މީހުން މަރުވާ މިންވަރު މަތިވުމުގެ ސަބަބުން ކަމަށް ސިއްހީ އިދާރާތަކުން ހޯމަ ދުވަހު ހާމަކޮށްފި އެވެ.
މެއި މަހުގެ މެދުތެރޭގައި މި ބަލިމަޑުކަން އިއުލާނުކުރި ފަހުން މިހާތަނަށް ބަލި ޖެހުނު މީހުންގެ ޖުމްލަ އަދަދު 8،067 އަށް އަރާފައިވާ ކަމަށް އެ ގައުމުގެ ސިއްހަތާ ބެހޭ ވުޒާރާގެ އެންމެ ފަހުގެ ހާލަތު ބަޔާންކުރާ ރިޕޯޓުން ދައްކަ އެވެ. އޭގެ ތެރޭގައި މި ބަލީގައި މަރުވި 3،901 މީހުން ހިމެނޭ އިރު، މި ބަލި ޖެހިގެން މަރުވާ މީހުންގެ ނިސްބަތް ނުވަތަ ކޭސް ފެޓަލިޓީ ރޭޓް ހުރީ %48.4 ގަ އެވެ.
މި ފަހަރު ފެތުރެމުންދާ ބަލިމަޑުކަމުގެ އަސަރު ހަތް ޕްރޮވިންސެއްގެ 63 ޒޯނަކަށް ދަނީ ކުރަމުންނެވެ. އެއީ ހޯތު-އުއޭލޭ، އިޓޫރީ، އުތުރު ކީވޫ، ދެކުނު ކީވޫ، ބާސް-އުއޭލޭ، ޝޯޕޯ އަދި ދެކުނު-އުބާންގީ އެވެ. އަދި، މި ބަލިމަޑުކަން ފެށުނީއްސުރެ މިހާތަނަށް ފެނުނު ޖުމްލަ ވޭދަނަތަކުގެ %76.4 ހިއްސާކުރާ އިޓޫރީއަކީ އަދިވެސް އެންމެ ހަލުވިކަމާއެކު ބަލި ފެތުރެމުންދާ ސަރަހައްދެވެ.
އަލަށް މަރުވި މީހުންގެ ތެރެއިން ބޮޑު އިންސައްތައެއް މަރުވެފައި ވަނީ ފަރުވާދޭ މަރުކަޒުތަކުން ބޭރުގައި، އާންމު މުޖުތަމައުގެ ތެރޭގައި ކަމަށް ކޮންގޯގެ ސިއްހަތާ ބެހޭ ވުޒާރާގެ ރިޕޯޓުގައި ހާމަކޮށްފައިވެ އެވެ. މިއީ އިޓޫރީ އަދި އުތުރު ކީވޫ ޕްރޮވިންސްގައި ވަގުތުންވަގުތަށް ބަލި ދެނެގަތުމަށް ހުރި ގޮންޖެހުންތަކާ ހުރެ ދިމާވި ކަމެއް ކަމަށް އެ ރިޕޯޓުގައި ބަޔާންކޮށްފައިވެ އެވެ. މިއާއެކު، ބަލި ޖެހޭ މީހުންނާ ބައްދަލުވާ މީހުން ދެނެގަތުމުގެ މަސައްކަތް ނުވަތަ ކޮންޓެކްޓް ޓްރޭސިންގެ ނިސްބަތް ވަނީ ކުރިން ހުރި %83.4 އިން %79.2 އަށް ދަށްވެފަ އެވެ.
ހޯތު-އުއޭލޭ ޕްރޮވިންސްގައި ހަލުވިކަމާއެކު ބަލި ފެތުރެމުންދާ އިރު، ޝޯޕޯ ޕްރޮވިންސްގައި އަލުން މި ބަލި ފެތުރެން ފަށާފައިވާ ކަމަށް ވެސް ކޮންގޯގެ ސިއްހަތާ ބެހޭ ވުޒާރާއިން ހާމަކުރި އެވެ. ދެކުނު-އުބާންގީއާއި ހޯތު-އުއޭލޭ ހިމެނޭހެން އަލަށް ބަލި ފެނުނު ސަރަހައްދުތަކާއެކު، ވައިރަސް ޖިއޮގްރަފީ ގޮތުން އިތުރަށް ފުޅާވުމަކީ ބޯޑަރު ހުރަސްކޮށް އެހެން ގައުމުތަކަށް ބަލި ފެތުރުމުގެ ނުރައްކާ ބޮޑުކުރާ ކަމެއް ކަމަށް ދުނިޔޭގެ ސިއްހަތު ޖަމްއިއްޔާއިން (ޑަބްލިޔުއެޗްއޯ) މިދިޔަ ހަފުތާގައި ނެރުނު ރިޕޯޓެއްގައި ވަނީ އިންޒާރު ދީފަ އެވެ.
މުޖުތަމައުގެ ތެރޭގައި މީހުން މަރުވާ އަދަދު އިތުރުވުމާއި، ބަލީގައި މަރުވާ ނިސްބަތް މައްޗަށް ދިއުމަކީ މި ބަލީގެ ނުރައްކާތެރިކަން ވަރަށް ބޮޑަށް ހާމަކޮށްދޭ ކަމެއް ކަމަށް ވެސް ޑަބްލިޔުއެޗްއޯއިން ފާހަގަކުރި އެވެ. އެފްރިކާ ސަރަހައްދުގައި އިބޯލާ ބައްޔާ ދެކޮޅަށް ކުރެވޭ މަސައްކަތްތަކަށް މަދުވެގެން 2.9 ބިލިއަން އެމެރިކާ ޑޮލަރު މިހާތަނަށް ހޯދާފައިވާ ކަމަށް، އެފްރިކާ ސެންޓާސް ފޯ ޑިޒީޒް ކޮންޓްރޯލް އެންޑް ޕްރިވެންޝަނުން (އެފްރިކާ ސީޑީސީ) ބުންޏެވެ.
މަސްދަރު: އަނަދޮލު އޭޖެންސީ
