ކޮންގޯގައި ކޮލެރާ ފެތުރި އެތައް ބަޔަކު މަރުވަނީ، ކުޑަކުދިން ރައްކާތެރިކުރަން ޖެހޭ: ޔުނިސެފް
1 އޮކްޓޯބަރު 2026 | ބުރާސްފަތި 02:41ކޮންގޯގައި ކޮލެރާ ހަލުވިކަމާއެކު ފެތުރެމުންދާއިރު، މި އަހަރުގެ މިހާތަނަށް 30،400 އަށް ވުރެ ގިނަ މީހުންނަށް ބަލިޖެހި 700 އެއްހާ މީހުން ވަނީ މަރުވެފައި. ފެންބޮޑުވުމާއި ސިއްހީ ވަސީލަތްތަކުގެ ދަތިކަމާ ހުރެ ބަލި ކޮންޓްރޯލްކުރުމަށް ހުރަސްތަކެއް ކުރިމަތިވެފައިވާއިރު، ކުޑަކުދިން މި ނުރައްކަލުން ސަލާމަތްކުރުމަށް އަވަސް ފިޔަވަޅުތަކެއް އެޅުމަށް ޔުނިސެފުން ވަނީ ގޮވާލާފައި
ރުވާންޑާގެ ކިގާލީގައި ސިއްހީ ޚިދުމަތްތެރިން ކުޑަކުދިންނަށް ވެކްސިން ދެނީ | އަނަދޮލު އޭޖެންސީ
ޑިމޮކްރެޓިކް ރިޕަބްލިކް އޮފް ކޮންގޯގެ ދެކުނު ކީވޫ ޕްރޮވިންސުން މި އަހަރު ފެށުނީއްސުރެ މިހާތަނަށް ކޮލެރާ ޖެހިފައިވާ 12،700 އަށް ވުރެ ގިނަ ކޭސް ރެކޯޑުކުރެވި، 175 މީހުން މަރުވެފައިވާ ކަމަށް އދ. ގެ ކުޑަކުދިންނާ ބެހޭ ޖަމުއިއްޔާ، ޔުނިސެފުން ބުދަ ދުވަހު ހާމަކޮށްފި އެވެ. ފުރާނަ ސަލާމަތްކުރުމަށާއި މި ބަލިމަޑުކަން ފެތުރުން ހުއްޓުވުމަށް ޓަކައި، ބައިވެރިންނާ ގުޅިގެން ޚާއްސަ މަސައްކަތްތަކެއް ފަށާފައިވާ ކަމަށް އެ ޖަމުއިއްޔާ ބުންޏެވެ. އެވެ.
"ކޮލެރާއަށް އިޖާބަދޭ ޓީމުތަކުން ބަލީގެ އަސަރުކޮށްފައިވާ ގޭބިސީތަކަށް އެހީތެރިކަން ފޯރުކޮށްދީ، މުޖުތަމައުގެ ސަވައިލެންސް ކަށަވަރުކޮށް، އަދި ބަލި ޖެހިފައިވާ ކަމަށް ޝައްކުކުރެވޭ ކޭސްތަކުގެ ލެބޯޓްރީ ތަހުލީލުތަކަށް އެހީތެރިކަން ފޯރުކޮށްދޭ،" ޔުނިސެފުން ބުނެފައިވެ އެވެ. ކޮންގޯގައި މި ބަލިމަޑުކަން ފެތުރުމަށް މަގުފަހިވަނީ ބައެއް ސަރަހައްދުތަކުގައި ފެންބޮޑުވުމާއި، ރައްޔިތުން ގެދޮރު ދޫކޮށް ދާންޖެހުމުގެ އިތުރުން ރައްކާތެރި ބޯފެން ލިބުމުގައި ހުރި ދަތިތަކުގެ ސަބަބުން ކަމަށް އެ ޖަމުއިއްޔާއިން ބުންޏެވެ.
މި އަހަރުގެ ޖަނަވަރީ މަހުން ފެށިގެން މުޅި ކޮންގޯއިން 30،400 އަށް ވުރެ ގިނަ ކޭސް ރެކޯޑުކުރެވި، ގާތްގަނޑަކަށް 700 މީހުން މަރުވެފައިވާ ކަމަށް ޔުނިސެފުން ހާމަކުރި އެވެ. އަދި، މި ބަލިމަޑުކަމުގެ މައި މަރުކަޒެއްގެ ގޮތުގައި އަދިވެސް އޮތީ އެ ގައުމުގެ އިރުމަތީގައި އޮންނަ އުތުރު ކީވޫ އަދި ދެކުނު ކީވޫ ޕްރޮވިންސް ކަމަށް ރިޕޯޓުތައް ބުނެ އެވެ. މިދިޔަ މޭ މަހުން ފެށިގެން ސިއްހީ ދާއިރާގެ ސަމާލުކަމާއި ވަސީލަތްތައް މައިގަނޑު ގޮތެއްގައި ހުއްޓިފައި އޮތީ، އެ ގައުމުގައި ހަލުވިކަމާއެކު ފެތުރެމުންދާ އިބޯލާ ކޮންޓުރޯލު ކުރުމަށެވެ. މި ކަމުގެ ސަބަބުން މުޖުތަމައުތަކުގެ ތެރޭގައި ކޮލެރާ ފެތުރުން ހުއްޓުވުމަށް ހުރަސްއެޅެމުންދާ ކަމަށް ސިއްހީ އޮފިޝަލުން ފާހަގަކޮށްފައިވެ އެވެ.
ދެކުނު ކީވޫ ޕްރޮވިންސްގެ އެންމެ ފަހުގެ ސިއްހީ ރިޕޯޓުގައި ބަޔާންކޮށްފައިވާ ގޮތުން، ސެޕްޓެންބަރު 14 އިން 20 ގެ ނިޔަލަށް އެ ޕްރޮވިންސްގެ ހަތަރު ސިއްހީ ޒޯނެއް ކަމަށްވާ ޝަބުންޑާ، ފީޒީ، އިބާންޑާ އަދި އުވީރާއިން ކޮލެރާ ޖެހިގެން 15 މީހުން މަރުވި އެވެ. އަދި، ހުޅަނގާއި މެދުތެރޭ އެފްރިކާގެ އެކި ގައުމުތަކަށް މި ބަލިމަޑުކަން ހަލުވިކަމާއެކު ފެތުރި، އެތައް ގައުމަކަށް އޭގެ އަސަރުކޮށް، އެތައް ހާސް ކުޑަކުދިންނެއް ބޮޑު ނުރައްކަލަކަށް ހުށަހެޅެމުންދާތީ، އެ ކުދިން ހިމާޔަތްކުރުމަށް އަވަސް ފިޔަވަޅުތަކެއް އެޅުމަށް ޔުނިސެފުން ވަނީ ގޮވާލާފަ އެވެ.
މަސްދަރު: އަނަދޮލު އޭޖެންސީ
