ކޮންގޯގެ އަށްވަނަ ޕްރޮވިންސަކަށް އިބޯލާ ފެތުރި، މަރުވި މީހުންގެ އަދަދު 4،500 އަށްވުރެ މައްޗަށް
19 އޮކްޓޯބަރު 2026 | ހޯމަ 05:41ކޮންގޯގައި ހަލުވިކަމާއެކު އިބޯލާ ފެތުރެމުންދާއިރު، ބަލި ޖެހުނު މީހުންގެ އަދަދު 9،400 އަށް އަރައި 4،500 އަށްވުރެ ގިނަ މީހުން ވަނީ މަރުވެފައި. މިއީ, އެ ޤައުމުގެ ތާރީޚުގައި ވެސް މި ބަލިމަޑުކަން މިހާ ނުރައްކާތެރި މިންވަރަކަށް ފެތުރުނު ފުރަތަމަ ފަހަރު ކަމަށްވާއިރު، ބަލި ކޮންޓްރޯލްކުރުމަށް އާންމުންގެ އެއްބާރުލުން ބޭނުންވާކަމަށް ސިއްހީ އިދާރާތަކުން ބުނޭ. ބޯޑަރު ހުރަސްކޮށް އަވަށްޓެރި ޤައުމުތަކަށް ބަލި ފެތުރުން ހުއްޓުވުމަށް ޓަކައި ސަމާލުވުމަށް ޑަބްލިޔުއެޗްއޯއިން ވަނީ އިލްތިމާސްކޮށްފައި
ކޮންގޯގައި އިބޯލާ ޖެހިގެން މަރުވި މީހެއްގެ ހަށިގަނޑު ވަޅުލުމަށް، ޕީޕީއީ އަޅައިގެން ތިބި މީހުންގެ ޚާއްސަ ޓީމަކުން ގެންދަނީ | އަނަދޮލު އޭޖެންސީ
ޑިމޮކްރެޓިކް ރިޕަބްލިކް އޮފް ކޮންގޯގެ ތާރީޚުގައި މިހާތަނަށް ރެކޯޑުކުރެވުނު އެންމެ ނުރައްކާތެރި އިބޯލާގެ ބަލިމަޑުކަން ކޮންޓްރޯލްކުރުމަށް ކަމާބެހޭ ފަރާތްތަކުން މަސައްކަތްކުރަމުން ދަނިކޮށް، މި ބަލި އެ ޤައުމުގެ އަށްވަނަ ޕްރޮވިންސަށް ފެތުރިފައިވާ ކަމަށް، ސިއްހީ އިދާރާތަކުން އާދީއްތަ ދުވަހު ހާމަކޮށްފި އެވެ. ސެންޓްރަލް އެފްރިކަން ރިޕަބްލިކްގެ ބޯޑަރު ކައިރީގައި އޮންނަ ސަރަހައްދަކުން ދެ މީހަކު އިބޯލާއަށް ޕޮޒިޓިވްވެ، އޭގެ ތެރެއިން އެކަކު މަރުވުމާ ގުޅިގެން، ކޮންގޯގެ ހުޅަނގު އުތުރުގައި އޮންނަ އުތުރު އުބާންގީއަކީ މި ބަލި އަލަށް ފެނުނު ޕްރޮވިންސް ކަމަށް، އެ ޤައުމުގެ ސިއްހަތާ ބެހޭ ވުޒާރާއިން ބުންޏެވެ. އަލަށް ފެނުނު ކޭސްތަކަކީ ބާސް-ޔުއޭލޭ ޕްރޮވިންސާ އިންވެގެން އޮންނަ ވަޕިންޑާ ހެލްތު ޒޯނުން ފެނުނު، އުމުރުން 20 ގެ އަހަރުތަކުގެ ފިރިހެނުންތަކެއް ކަމަށް ވެސް އެ ވުޒާރާއިން ބުންޏެވެ.
'ބުންޑިބޫޖޯ' ވައިރަސް ސްޓްރެއިންގެ ސަބަބުން ޖެހޭ މި ބަލި މިދިޔަ ހަފުތާއާ ހަމައަށް ފެތުރިފައި އޮތީ ހަތް ޕްރޮވިންސަކަށެވެ. އެއީ ހޯތު-ޔުއޭލޭ، އިޓޫރީ، އުތުރު ކިވޫ، ދެކުނު ކިވޫ، ބާސް-ޔުއޭލޭ، ޗޯޕޯ އަދި ދެކުނު-އުބާންގީ އެވެ. ބަލީގެ އަސަރުކޮށްފައިވާ ސަރަހައްދުތަކުގައި ބަލި ފެތުރޭ މިންވަރު އެކި ހިސާބުތަކުގައި ވަރަށް ބޮޑަށް ތަފާތު ކަމަށް، ދުނިޔޭގެ ސިއްހަތު ޖަމުއިއްޔާއިން (ޑަބްލިޔުއެޗްއޯ) އިން ބުންޏެވެ. އަދި، މި ބަލިމަޑުކަމުގެ މައިގަނޑު މަރުކަޒަކީ އަދިވެސް އިޓޫރީ ކަމަށްވާއިރު، އުތުރު ކިވޫއާއި ހޯތު-ޔުއޭލޭގައި ވެސް ހަލުވިކަމާއެކު ބަލި ފެތުރެމުންދާ ކަމަށް އެ ޖަމުއިއްޔާއިން ފާހަގަކުރެ އެވެ.
މި ބަލިމަޑުކަން ފެތުރެން ފެށިކަން މެއި މަހު އިއުލާނުކުރި ފަހުން ކޮންގޯގައި އިބޯލާ ޖެހުނުކަން ކަށަވަރުވި މީހުންގެ އަދަދު 9،400 އަށްވުރެ މައްޗަށް އަރާފައިވާއިރު، އޭގެ ތެރެއިން 4،536 މީހުންގެ މަރުވެފައިވާ ކަމަށް އެންމެ ފަހުގެ ރަސްމީ ތަފާސްހިސާބުތަކުން ދައްކަ އެވެ. މި ބަލީގައި މަރުވާ މީހުންގެ ގާތްގަނޑަކަށް ތިންބައިކުޅަ ދެބައި މީހުން މަރުވަނީ ގޭގައި ކަމަށް، ޑަބްލިޔުއެޗްއޯއިން ބުންޏެވެ. އަދި، އާންމު މުޖުތަމައުތަކުގެ ތެރޭގައި ގިނަ އަދަދަކަށް މީހުން މަރުވަމުންދާއިރު، އާންމުންގެ ފަރާތުން ފެންނަ ދެކޮޅުވެރިކަމަކީ މި ބަލި ކޮންޓްރޯލްކުރުމުގައި އޮތް އެންމެ ބޮޑު އެއް ގޮންޖެހުމެވެ. އިތުބާރު ގާއިމުކުރުމަށާއި، މުޖުތަމައުގެ ބައިވެރިވުން އިތުރުކުރުމަށާއި ގުޅިގެން ފިޔަވަޅު އެޅުމުގައި ސަރަހައްދީ ލީޑަރުންގެ ދައުރު މުހިންމު ކަމަށް، ޑަބްލިޔުއެޗްއޯގެ އެފްރިކާ ސަރަހައްދުގެ ރީޖަނަލް ޑިރެކްޓަރު މުހައްމަދު ޔައުޤޫބް ޖަނާބީ އާދީއްތަ ދުވަހު ފާހަގަކުރެއްވި އެވެ.
މިއީ ކޮންގޯގެ ތާރީޚުގައި ވެސް މިހާތަނަށް ރެކޯޑުކުރެވުނު އެންމެ ބޮޑު އަދި އެންމެ ގިނަ ބަޔަކު މަރުވި އިބޯލާގެ ބަލިމަޑުމަކެވެ. އަދި، ހުޅަނގު އެފްރިކާގައި 2014 އިން 2016 އަށް ހިނގައިދިޔަ ބަލިމަޑުކަމަށް ފަހު، މުޅި ދުނިޔޭގައި ވެސް މިހާތަނަށް ހިނގި ދެވަނައަށް އެންމެ ބޮޑު އިބޯލާގެ ބަލިމަޑުކަމަކީ މިއީ އެވެ. މި މަހު ކެންޔާއިން އިބޯލާއަށް ޕޮޒިޓިވްވި މީހުންގެ ޖުމުލަ އަދަދު އަށަކަށް އަރާފައިވާ ކަމަށާއި، އަލަށް އިތުރު މީހަކު މި ބައްޔަށް ޕޮޒިޓިވްވެފައިވާ ކަމަށް، ކެންޔާގެ ސިއްހަތާ ބެހޭ ވުޒާރާއިން އާދީއްތަ ދުވަހު ކަށަވަރުކޮށްދިނެވެ. ބޯޑަރު ހުރަސްކޮށް އިބޯލާ އިތުރަށް ފެތުރުން ހުއްޓުވުމަށް ޓަކައި އިތުރަށް ސަމާލުވުމަށް، ސިއްހީ އިދާރާތަކުން ވަނީ އިލްތިމާސްކޮށްފަ އެވެ.
މަސްދަރު: އަނަދޮލު އޭޖެންސީ
