ސައުދީ އެއާޕޯޓަކަށް ދިން ހަމަލާއެއްގައި ބޮޑެތި ގެއްލުންތަކެއް: މީހުން މަރުވެ، އެމެރިކާގެ މިޝަންތަކުން މީހުން ހުސްކުރަން ފަށައިފި!
22 އޮކްޓޯބަރު 2026 | ބުރާސްފަތި 06:02ސައުދީގެ ތެޔޮ ވަޅަކަށާއި އެއާޕޯޓުތަކަށް ހޫޘީން ދެމުންދާ ހަމަލާތައް ވަރުގަދަވެ، ގިނަ ބަޔަކު މަރުވެ އަނިޔާވަމުންދާތީ އެމެރިކާގެ ޑިޕްލޮމޭޓުންނާއި އެމީހުންގެ އާއިލާތައް އެ ގައުމުން ފޭބުމަށް އެމެރިކާގެ ހާރިޖީ ވުޒާރާއިން އަންގައިފި. މި ހަމަލާތަކާ ގުޅިގެން ސަލާމަތީ އިންޒާރު ނެރެފައިވާއިރު، މިއީ ޔަމަނު ހަނގުރާމައިގެ ތެރެއިން ސައުދީއަށް އަމާޒުވަމުންދާ ނުރައްކާތެރި ހަމަލާތަކެއް
ސައުދީ އަރަބިއްޔާގެ ދައްމާމް އެއާޕޯޓުން ފަސިންޖަރުންތަކެއް ނިކުންނަނީ | ރޮއިޓަރސް
ސައުދީ އަރަބިއްޔާގެ އިރުމަތީ ސިޓީއެއް ކަމަށްވާ ދައްމާމުގެ ކިންގް ފަހުދު އިންޓަނޭޝަނަލް އެއާޕޯޓަށް ދިން ހަމަލާއެއްގައި އެކަކު މަރުވެ، އަށް މީހުން ޒަޚަމުވެފައިވާ ކަމަށް އެ ޤައުމުގެ ސިވިލް އޭވިއޭޝަން އޮތޯރިޓީން އިއުލާނުކޮށްފި އެވެ. ޒަޚަމުވި މީހުންގެ އަނިޔާތައް އާދައިގެ އަނިޔާތަކުން ފެށިގެން ސީރިއަސް ހާލަތްތަކާ ހަމައަށް ހުރިއިރު، އެ އެންމެން ވެސް ސިއްހީ ފަރުވާ ދިނުމަށް ހަސްފަތާލުތަކަށް ގެންގޮސްފައިވާ ކަމަށް ބުދަ ދުވަހު ނެރުނު ބަޔާނެއްގައި ޖެނެރަލް އޮތޯރިޓީ އޮފް ސިވިލް އޭވިއޭޝަނުން (ޖީއޭސީއޭ) ވަނީ ބުނެފަ އެވެ.
އެ ދުވަހުގެ ކުރީކޮޅު ސައުދީ އަރަމްކޯގެ ތެޔޮ ކުންފުނީގެ ޝައިބާ ތެޔޮ ވަޅުގެ ފެސިލިޓީއަކަށް ހަމަލާދޭން އުޅުނު ޑްރޯނެއް ސައުދީގެ ވައިގެ ދިފާއީ ބާރުތަކުން ވައްޓާލުމާ ގުޅިގެން ދެ މީހަކު މަރުވި ކަމަށް އެ ޤައުމުގެ ހަކަތައާ ބެހޭ ވުޒާރާއިން ވަނީ ހާމަކޮށްފަ އެވެ. މިއީ، ހޫޘީ ބާރުތަކާއި ސައުދީ އަރަބިއްޔާގެ އެހީތެރިކަން ލިބޭ ބައިނަލްއަގުވާމީ ގޮތުން ބަލައިގަނެފައިވާ ޔަމަނުގެ ސަރުކާރާ ދެމެދު ހިނގަމުންދާ ހަނގުރާމަ ވަރުގަދަވަމުންދާ ދަނޑިވަޅެއްގައި، ސައުދީ އަރަބިއްޔާގެ އެއާޕޯޓުތަކަށް އަމާޒުކޮށް ދިން ހަމަލާތަކުގެ ސިލްސިލާގެ އެންމެ ފަހުގެ ހަމަލާ އެވެ.
ރިޔާޟުގެ ކިންގް ޚާލިދު އިންޓަނޭޝަނަލް އެއާޕޯޓަށް އޮކްޓޫބަރު 11 ގައި ދިން މިސައިލް ހަމަލާއެއްގައި އެކަކު މަރުވެ، 11 މީހުން ޒަޚަމުވި ކަމަށް ނިމިދިޔަ ހަފުތާގައި އެ ޤައުމުން ވަނީ ރިޕޯޓުކޮށްފަ އެވެ. އަދި، ހަމަ އެ އެއާޕޯޓަށް އޮކްޓޫބަރު 10 ގައި ދިން ވަކި އެހެން ހަމަލާއެއްގައި 12 މީހުން މަރުވެ، 300 އަށް ވުރެ ގިނަ މީހުން ޒަޚަމުވި ކަމަށް ސިވިލް އޭވިއޭޝަން އޮތޯރިޓީން ވަނީ ހާމަކޮށްފަ އެވެ.
ހޫޘީންގެ ހަމަލާތަކާ ގުޅިގެން، ސައުދީ އަރަބިއްޔާގައި ހުންނަ އެމެރިކާގެ މިޝަންތަކުގައި ތިބި ޑިޕްލޮމޭޓުންނާއި އެ މީހުންގެ އާއިލާތަކުގެ މެންބަރުން އެ ޤައުމު ދޫކޮށް ދިއުމަށް ބުދަ ދުވަހު އަންގާފައިވާ ކަމަށް އެމެރިކާގެ ޚާރިޖީ ވުޒާރާއިން ވަނީ ހާމަކޮށްފަ އެވެ. މި ސަރަހައްދުގެ އެހެން ޤައުމުތަކުގައި ހުރި އެމެރިކާ މިޝަންތަކުގައި ތިބި އާއިލާތަކުގެ މެންބަރުން ވެސް އަނބުރާ ގެންދިއުމުގެ ރޭވުންތަކެއް އެބަހުރި ކަމަށް އެމެރިކާގެ އޮފިޝަލުން ވަނީ ބުނެފަ އެވެ. މީގެއިތުރުން، ސައުދީ އަރަބިއްޔާއަށް ހޫޘީންގެ އިތުރު ހަމަލާތަކެއް އަމާޒުވެދާނެ ކަމަށް ބަލައި، ބުދަ ދުވަހު ސަލާމަތީ އިންޒާރެއް ނެރެފައިވާ ކަމަށް ރިޔާޟުގައި ހުންނަ އެމެރިކާގެ އެމްބަސީން ވަނީ ހާމަކޮށްފަ އެވެ.
މަސްދަރު: އަލް ޖަޒީރާ
