ސައުދީގެ އެއާޕޯޓަކާއި ތެލުގެ ސިނާއަތުގެ ވަސީލަތްތަކަށް ހަމަލާތައް އަމާޒުވެ ބޮޑެތި ގެއްލުންތަކެއް!
22 އޮކްޓޯބަރު 2026 | ބުރާސްފަތި 03:03ޔަމަނުގެ ހޫޘީން ސައުދީ އަރަބިއްޔާގެ އެއާޕޯޓަކަށާއި ތެޔޮ ވަޅުތަކަކަށް އަމާޒުކޮށް ދިން ޑްރޯން ހަމަލާތަކެއްގައި ތިން މީހުން މަރުވެ، ދިހަ މީހުން ޒަޚަމުވެއްޖެ. މި ހަމަލާތަކާ ގުޅިގެން ސައުދީ އިސްވެ އޮންނަ އިއްތިހާދުން ވަނީ ހޫޘީން ފޮނުވާލި ގިނަ އަދަދެއްގެ ޑްރޯންތައް ވައިގެ ތެރޭގައި ނައްތާލާފައި. 2015 ވަނަ އަހަރުން ފެށިގެން ސައުދީން ޔަމަނުގެ ދާޚިލީ ހަނގުރާމައިގެ ތެރެއަށް ވަދެފައިވާއިރު، ފަހަކަށް އައިސް ހޫޘީން ސައުދީއަށް ދޭ ހަމަލާތައް ވަނީ ވަރަށް ބޮޑަށް އިތުރުވެފައި
![ޖިއްސާގެ ރަށްބޭރުގައި ރައް ކަނޑުގެ އައްސޭރިފަށުގައި އޮތް އަސްކަރީ މަނަވަރެއް ކައިރީގައި ސައުދީ އަރަބިއްޔާގެ ހަތިޔާރުއެޅި ސިފައިން ފޯރިމަރަނީ [އާކައިވް]](https://dyncz33htw1ec.cloudfront.net/posts/557c19b1-294a-41a5-8ff4-24e549709b09.webp)
ޖިއްސާގެ ރަށްބޭރުގައި ރައް ކަނޑުގެ އައްސޭރިފަށުގައި އޮތް އަސްކަރީ މަނަވަރެއް ކައިރީގައި ސައުދީ އަރަބިއްޔާގެ ހަތިޔާރުއެޅި ސިފައިން ފޯރިމަރަނީ [އާކައިވް] | އޭޕީ
ސައުދީ އަރަބިއްޔާއަށް އަމާޒުކޮށް ދެމުންދާ ހަމަލާތައް އިތުރުވަމުންދާ ދަނޑިވަޅެއްގައި، އެ ޤައުމުގެ އިރުމަތީ ސަރަހައްދުގެ ވައިގެ ތެރެއިން ހަތަރު ޑްރޯން ހުއްޓުވައި ނައްތާލާފައިވާ ކަމަށް ޔަމަނުގައި ހަރަކާތްތެރިވާ ސައުދީ އިސްވެ އޮންނަ އަސްކަރީ އިއްތިހާދުން ބުރާސްފަތި ދުވަހުގެ ފަތިހު ބުނެފި އެވެ.
މި ޑްރޯންތައް ހުއްޓުވިކަން ހާމަކުރެއްވީ އިއްތިހާދުގެ ތަރުޖަމާނު ތުރްކީ އަލް-މާލިކީ އެވެ. ނަމަވެސް، މި ހާދިސާއާ ގުޅޭ އިތުރު ތަފުސީލެއް އޭނާ ހާމައެއް ނުކުރައްވަ އެވެ. ބުދަ ދުވަހު ވެސް ޔަމަނުގެ ހަތިޔާރު އެޅި ހޫޘީ ޖަމާއަތުން ވަނީ ސައުދީ އަރަބިއްޔާގެ އެކި ސަރަހައްދުތަކަށް ނުރައްކާތެރި ހަމަލާތަކެއް ދީފަ އެވެ.
މި ގޮތުން، ދައްމާމުގެ ކިންގް ފަހްދު އިންޓަނޭޝަނަލް އެއާޕޯޓަށް ދިން ހަމަލާއެއްގައި އެކަކު މަރުވެ، އަށް މީހުން ޒަޚަމުވި ކަމަށް އެ ޤައުމުގެ މަދަނީ އުދުހުންތަކާ ބެހޭ އިދާރާއިން ބުންޏެވެ. މީގެ އިތުރުން، ޝައިބާ ތެޔޮ ވަޅުތައް ހުންނަ ސަރަހައްދުގައި ހުންނަ ސައުދީ އަރަމްކޯ ތެޔޮ ކުންފުނީގެ ވަސީލަތަކަށް އަމާޒުކޮށް ފޮނުވާލި ޑްރޯނެއް ވައްޓާލުމުން އޭގެ ބައިތައް ވެއްޓި ދެ މީހުން މަރުވެ، އިތުރު ދެ މީހުން ޒަޚަމުވި ކަމަށް ސައުދީ އަރަބިއްޔާގެ ހަކަތައާ ބެހޭ ވުޒާރާއިން ބުންޏެވެ.
ޔަމަނުގެ ހޫޘީ ޖަމާއަތާ ދެމެދު ބަދަލުކުރަމުންދާ ހަމަލާތައް އިތުރުވަމުންދާއިރު، ބުދަ ދުވަހު ހިނގި ވަކިވަކި ހާދިސާތަކެއްގައި ހަތް ޑްރޯން ހުއްޓުވައި ނައްތާލާފައިވާ ކަމަށް ވެސް އިއްތިހާދުން ރިޕޯޓްކުރި އެވެ.
ބައިނަލްއަގުވާމީ ގޮތުން ބަލައިގަނެފައިވާ ޔަމަނުގެ ސަރުކާރަށް ތާއީދުކޮށް، ހޫޘީ ޖަމާއަތާ ދެކޮޅަށް ސައުދީ އަރަބިއްޔާއިން އަސްކަރީ އިއްތިހާދެއް ހިންގަމުން އަންނަނީ 2015 ވަނަ އަހަރުން ފެށިގެންނެވެ. އަދި، 2014 ވަނަ އަހަރުން ފެށިގެން ޔަމަނުގެ ވެރިރަށް ޞައްޢާއާއި އިތުރު އެތައް ޕްރޮވިންސެއްގެ ކޮންޓުރޯލު ހޯދާފައި ވަނީ ހޫޘީންނެވެ.
މަސްދަރު: އަނަދޮލު އޭޖެންސީ
