އިސްރާއީލުން ސޫރިޔާގެ ގުނައިތުރާއަށް އަރައިގަނެ އިސްތިމާރު ކުރަމުންދާ ސަރަހައްދު އިތުރަށް ފުޅާކޮށްފި

އިސްރާއީލުން ސޫރިޔާގެ ހުޅަނގު ދެކުނުގައި އޮންނަ ގުނައިތުރާ ގަވަރުނަރޭޓުގެ ސަރަހައްދުތަކަށް ވަދެގަނެ، އެ ގައުމު ހިސޯރު ކުރަމުން ގެންދާދިއުން އިތުރަށް ފުޅާކޮށްފި އެވެ.

ލުބުނާނުގެ އަލް-މަޔާދީން ޓީވީން ހޮނިހިރު ދުވަހު ރިޕޯޓުކޮށްފައިވާ ގޮތުގައި، އިސްރާއީލުގެ ސިފައިން އެ ދުވަހުގެ ހެނދުނުގެ ވަގުތެއްގައި ވަނީ ގުނައިތުރާގެ ރަށްފުށުގެ އަވަށެއް ކަމަށްވާ އަލް-ސަމަދާނިއްޔާއަށް ވަދެފަ އެވެ.

އެ ރިޕޯޓުގައި ބުނެފައިވާ ގޮތުން، އިސްރާއީލު ސިފައިން ވަނީ ސަމަދާނިއްޔާ އަވަށާއި އެ އަވަށުގެ ވަށައިގެންވާ ސަރަހައްދުތަކުގެ މައްޗަށް އޮތް ބާރުގަދަކުރުމުގެ ގޮތުން އެ ސަރަހައްދުގައި ޗެކްޕޮއިންޓެއް ގާއިމުކޮށްފަ އެވެ.

އިސްރާއީލުން މި ސަރަހައްދަށް އަރައިގަނެފައި މިވަނީ، ސޫރިޔާގެ ހުޅަނގު ދެކުނުގައި އޮންނަ ދަރާ ގަވަރުނަރޭޓުގެ ހުޅަނގު ރަށްފުށުގެ ސީސޫން އަދި ޖަމްލާ އަވަށާ ދެމެދު އޮތް ސަރަހައްދަކަށް އިސްރާއީލު ސިފައިން ވެރިވެގަތްތާ އެއް ދުވަސް ފަހުންނެވެ.

އިސްރާއީލުގެ ސިފައިން އެ ސަރަހައްދަށް ވަނުމަށްފަހު، އެ ތަނުގައި ދިރިއުޅޭ އާންމު ރައްޔިތުން އެއްތަނުން އަނެއްތަނަށް ދިއުމުގައި ހުރަސްތައް ކުރިމަތިކުރުވައި، އާންމުންނަށް އުނދަގޫ ކުރަން ވަނީ ފަށާފަ އެވެ.

2024 ވަނަ އަހަރުގެ ޑިސެމްބަރު މަހު ބައްޝާރުލް އަސަދުގެ ސަރުކާރު ވެއްޓުމާ ގުޅިގެން ސޫރިޔާގެ ސަލާމަތީ ކަންކަމުގައި އުފެދުނު ހުސްކަމުގެ ނާޖާއިޒު ފައިދާ ނަގައި، އިސްރާއީލުން ދަނީ އެ ގައުމުގެ ބިންތައް ހިފައި ބާރުގަދަކުރަމުންނެވެ.

އިސްރާއީލުން ގުނައިތުރާ އާއި ދަރާގައި އެ ގައުމުގެ އިސްތިއުމާރު ފުޅާކުރަމުންދާއިރު، ސޫރިޔާގެ ދިފާއީ އަދި ވައިގެ ސިފައިންގެ މަރުކަޒުތަކަށް ދަނީ ވަރުގަދަ ބޮމުގެ ހަމަލާތަކެއް ދެމުންނެވެ. މީގެ އިތުރުން، ސޫރިޔާގެ ދެކުނުގެ ސަރަހައްދުތަކާއި، ސޫރިޔާ، ލުބުނާނު އަދި އިސްރާއީލުން ހިފާފައިވާ ފަލަސްތީނުގެ ބޯޑަރު ގުޅޭ ހިސާބުގައި އޮންނަ ސްޓްރެޓީޖިކް މުހިންމު ފަރުބަދައެއް ކަމަށްވާ މައުންޓް ހާމަން (ޖަބަލް އަލް-ޝައިޚް) ވެސް އިސްރާއީލުން ވަނީ ހިފާފަ އެވެ.

ހަމައެއާއެކު، ސޫރިޔާގެ ވެރިރަށް ދިމިޝްގު ކައިރީގައިވާ ރަށްފުށުގެ ސަރަހައްދުތަކާއި، އުރުދުންގެ ބޯޑަރު ކައިރީގައި އޮންނަ ސުވައިދާގެ ވައިގެ ސަރަހައްދަށް ވަދެ، އިސްރާއީލުން ދަނީ ތަކުރާރުކޮށް ސޫރިޔާގެ އިސްތިގުލާލަށް އަރައިގަންނަމުންނެވެ.

މި ހުރިހާ ކަމެއް ހިނގަމުން މިދަނީ، 1967 ވަނަ އަހަރު އަރަބިންނާ ދެކޮޅަށް ކުރި ހަނގުރާމައަށްފަހު ސޫރިޔާގެ ގޯލާން ހައިޓްސް އިސްރާއީލުގެ އިސްތިއުމާރުގެ ދަށުގައި އޮންނަތާ އެތައް އަހަރެއް ވެފައިވަނިކޮށެވެ.

މާހިރުން ގަބޫލުކުރާ ގޮތުގައި އިސްރާއީލުން ސޫރިޔާގައި ހިންގަމުންދާ މި އަމަލުތަކުގެ މަގްސަދަކީ، އެ ގައުމުގެ އިސްތިއުމާރު ފުޅާކޮށް، ސޫރިޔާގެ އިތުރު ބިންތައް ރަސްމީކޮށް އިސްރާއީލުގެ ބައެއްގެ ގޮތުގައި ހަމަޖެއްސުމެވެ.