މަޝްވަރާ ކުރުމެއް ނެތި ރައީސް މުއިއްޒުގެ އިރުޝާދާއި ލަފާފުޅުގެ މަތިން ކުރާ ހުރިހާ ކަމެއް ގޮވަނީ އަތަށް: ބޮންޑާ
19 އޮކްޓޯބަރު 2026 | ހޯމަ 08:33ކަމާބެހޭ ފަރާތްތަކުގެ މަޝްވަރާ ހޯދުމުގެ ބަދަލުގައި ހަމައެކަނި ރައީސްގެ އިރުޝާދަށް މަޖިލީހުން ކަންކަން ނިންމާތީ، ކުރީގެ މެންބަރު ބޮންޑާ ވަނީ ކަންބޮޑުވުންފާޅު ކުރައްވާފައި. ފަތުރުވެރިކަމުގެ ދާއިރާއަށް ގެންނަ ބަދަލުތަކާއި ޓެކްސްތައް ކަނޑައަޅަނީ ސްޓޭކްހޯލްޑަރުންގެ ލަފާނުހޯދައި ކަމަށްވުމުން، އޭގެ ނޭދެވޭ އަސަރު އިގްތިސާދަށް ކުރާނެކަމަށް އޭނާ ވިދާޅުވި
ރައްޔިތުންގެ މަޖިލީހުގެ މާފަންނު މެދު ދާއިރާގެ ކުރީގެ މެންބަރު އިބްރާހީމް ރަޝީދު (ބޮންޑާ) ވާހަކަ ދައްކަވަނީ | ރާއްޖެއެމްވީ
ރައްޔިތުންގެ މަޖިލީހުގައި މިހާރު ކަންކަން ނިންމަނީ ކަމާބެހޭ ފަރާތްތަކުގެ މަޝްވަރާ ހޯދުމުގެ ބަދަލުގައި ހަމައެކަނި ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ އިރުޝާދާއި ލަފާފުޅުގެ މަތިން ކަމަށާއި، މަޝްވަރާއެއް ނެތި ކުރާ ހުރިހާ ކަމެއް އަތަށް ގޮވާ ކަމަށް ރައްޔިތުންގެ މަޖިލީހުގެ މާފަންނު މެދު ދާއިރާގެ ކުރީގެ މެންބަރު އިބްރާހީމް ރަޝީދު (ބޮންޑާ) ވިދާޅުވެއްޖެ އެވެ.
ރާއްޖެޓީވީގެ "ފަލަސުރުޚީ" ޕްރޮގްރާމުގައި ވާހަކަދައްކަވަމުން ބޮންޑާ ވިދާޅުވީ، މަޖިލީހުގެ ހުރިހާ މެންބަރުންވެސް ހުރިހާ ކަމެއް ކުރައްވަނީ އެ މަނިކުފާނުގެ އިރުޝާދާއި ލަފާފުޅު މަތިން ކަމަށް ވިދާޅުވަމުން ގެންދަވާ ކަމަށެވެ. އަދި ފަތުރުވެރިކަމުގެ ދާއިރާއަށް ގެންނަ ބަދަލުތަކާ ނަގާ ޓެކްސްތަކުގައި ވެސް ކަމާބެހޭ ފަރާތްތަކާ ސަރުކާރުން މަޝްވަރާ ނުކުރާ ކަމަށް އޭނާ ވިދާޅުވި އެވެ.
ބޮންޑާ ވިދާޅުވީ، ސަރުކާރުގެ ސަގާފަތަކަށް ވެފައި އޮތީ އިރުޝާދާއި ލަފާފުޅު އަޑުއެހުން ކަމަށާއި، މި ސަރުކާރުން ކަންކަން ނިންމުމުގައި ސްޓޭކްހޯލްޑަރުންގެ ލަފާ ހޯދުމުގެ އާދައާ ވަރަށް ބީރައްޓެހި ކަމަށެވެެ. ނަމަވެސް ވޭތުވެދިޔަ މަޖިލީހުގައިވެސް ކަންކަން ކުރުމުގައި ގެންގުޅުނު އުސޫލަކީ އަދި ސަގާފަތަކީ ކަމާގުޅޭ ސްޓޭކްހޯލްޑަރުންގެ އަޑުއަހައި، އެ ފަރާތްތަކުގެ މަޝްވަރާ އާއި ލަފާ ހޯދުން ކަމަށެވެ. ނަމަވެސް މި ސަރުކާރުން އެގޮތަށް އަމަލުނުކުރާ ކަމަށް އޭނާ ވިދާޅުވި އެވެ.
މާކަޕް ޓެކްސްއަށް އިޝާރާތް ކުރައްވައި ބޮންޑާ ވިދާޅުވީ، ރާއްޖޭން ބޭރުގެ ޓުއާ އޮޕަރޭޓަރުން އަތުން މާކަޕް ޓެކްސް ނަގަން ނިންމީވެސް ރައީސް މުއިއްޒުގެ އިރުޝާދާއި ލަފާފުޅުގެ މަތިން ކަމަށެވެ. އޭރު އެ ފަރާތްތަކުން ބުނަމުން ދިޔައީ އޮފްޝޯ ޕްލެޓްފޯމްތަކުން ޓެކްސް ނަގާ ވާހަކަ ކަމަށާއި، ސްޕެޝަލް އިކޮނޮމިކް ޒޯން (އެސްއީޒެޑް) ތަކުގައި އޮފްޝޯ ބޭންކިންގ އަދި ކެސިނޯ ފަދަ ކަންކަން ހުންނަ ފަދައިން ބޭރުގެ ޓުއާ އޮޕަރޭޓަރުން އަތުން ނަގާނެ ކަމަށް ބުނެ އެކަން ނިންމީ ކަމަށް ވިދާޅުވި އެވެ.
ނަމަވެސް އެ ނިންމުން ނިންމީ ރިސޯޓުތަކާއި، ޓޫރިޒަމް ދާއިރާގައި ހަރަކާތްތެރިވާ ތަޖުރިބާކާރުންނާއި، އެ ދާއިރާގެ އިސް ފަރާތްތަކުގެ މަޝްވަރާއާއި ލަފައެއް ހޯދުމެއް ނެތި ކަމަށް ބޮންޑާ ވިދާޅުވި އެވެ. އަދި މަޖިލީހުގައިވެސް އެކަމާ ގުޅޭގޮތުން އެއްވެސް އެއްޗެއް އަހައި މަޝްވަރާ ކުރުމެއް ނެތި، ހަމަ އެ ދުވަހު ބިލު ފޮނުވައި، އެ ދުވަހުން އެ ދުވަހަށް ބިލު ފާސްކުރުމުން އެކަން "އަތަށް ގޮވީ" ކަމަށް ބޮންޑާ ވިދާޅުވި އެވެ.
މީގެއިތުރުން ބޮންޑާ ވިދާޅުވީ، ރާއްޖެއަށް ހަމައެކަނި ޓޫރިސްޓުން ގެންނަނީ ބޭރުގެ ޓުއާ އޮޕަރޭޓަރުން ނޫން ކަމަށެވެ. ވަކިން ޚާއްސަކޮށް ޑައިވިންގ ދާއިރާ އާއި، ރާއްޖޭގައި ހިންގާ ގިނަ އަދަދެއްގެ ޑައިވިންގ ސްކޫލްތަކާއި އަދި ސަފާރީތަކުންވެސް ފަތުރުވެރިން ގެންނަ ކަމަށާއި، މި ވާހަކަ ދެއްކުމުން އެކަން އެންމެ ރަނގަޅަށް އެނގޭނީ ސަފާރީ ބޯޓުތަކާއި ޑައިވިންގ ސްކޫލްތައް ހިންގާ ފަރާތްތަކަށް ކަމަށް ބޮންޑާ ވިދާޅުވި އެވެ.
