ރާސްމާލެއިން ބޮޑު ބައެއް އީގަލް ހިލްސްއަށް ދޭ ކަމަށް ވާނަމަ، އެމަޝްރޫއާ އެކު އިއާދަވަނީ ވޯރާ ވިޔަފާރިވެރިންގެ ބާރު: ތޯރިގު
22 އޮކްޓޯބަރު 2026 | ބުރާސްފަތި 05:02ރާސްމާލެ މަޝްރޫއުގެ ބޮޑު ބައެއް ބޭރު ކުންފުންޏަކަށް ދިނުމަކީ ގައުމުގެ މިނިވަންކަމަށް އޮތް ނުރައްކަލެއް ކަމަށް ވިދާޅުވެ، ކުރީގެ މެންބަރު ތޯރިގު ވަނީ ކަންބޮޑުވުން ފާޅުކުރައްވާފައި. މި ނިންމުމަކީ ވަޒީރުންގެ މަޖިލީހާއި ރައްޔިތުންގެ މަޖިލީހުގެ މަޝްވަރާ ނެތި، ސަރުކާރުގެ މަދު ބޭފުޅުންތަކެއް ނިންމާފައިވާ ނިންމުމެއް ކަމަށް އޭނާ ތުހުމަތުކުރެއްވި
ދިވެހީންގެ ބިން ދިވެހީންނަށް ޚާއްސަ ކަވަރޭޖްގައި ރައްޔިތުންގެ މަޖިލީހުގެ މަނަދޫ ދާއިރާގެ ކުރީގެ މެންބަރު މުހައްމަދު ތޯރިގު ވާހަކަ ދައްކަވަނީ | ރާއްޖެއެމްވީ
ރާސްމާލޭގެ ބޮޑު ބައެއް އީގަލް ހިލްސްއަށް ދާއިމަށް ދީފައިވާ ކަމަށް ބުނާ މައްސަލައަކީ، މާޒީގައި ވޯރާ ވިޔަފާރިވެރިން ރާއްޖެ ކޮންޓްރޯލްކޮށް ދައުލަތުގެ ކަންކަން ހިންގި ބީދައިން، އަންނަން އޮތް ޖީލުތަކަށް ކުރިމަތިވާނެ ވަރަށް ބޮޑު ނުރައްކަލެއް ކަމަށް ރައްޔިތުންގެ މަޖިލީހުގެ މަނަދޫ ދާއިރާގެ ކުރީގެ މެންބަރު މުހައްމަދު ތޯރިގު ވިދާޅުވެއްޖެ އެވެ.
"ދިވެހީންގެ ބިން ދިވެހީންނަށް" ޚާއްސަ ކަވަރޭޖްގައި ވާހަކަ ދައްކަވަމުން ތޯރިގު ވިދާޅުވީ، މި މަޝްރޫއުގެ ސަބަބުން ރާއްޖެއަށް ލިބޭނީ ފައިދާ ކަމަށް ދެއްކުމަށް ސަރުކާރުން ވަރަށް ގިނަ މަސައްކަތްތައް ކުރަމުންދާ ކަމަށެވެ. ނަމަވެސް އެ ކުންފުނީގެ ޗެއާމަން މުހައްމަދު އަލައްބާރު ރާއްޖެ ވަޑައިގެން ދެއްކެވި ވާހަކަތަކުން، މި ގައުމުގެ ރައީސަކީ ކޮން ބޭފުޅެއްކަން އޮޅޭ ހިސާބަށް ކަންކަން ގޮސްފައިވާ ކަމަށާއި، މިއީ ވަރަށް ލަދުވެތި އަދި ދެރަ މަންޒަރެއް ކަމަށް އޭނާ ފާހަގަކުރެއްވި އެވެ.
މި މައްސަލައިގައި އިތުރަށް ކަންބޮޑުވުން ފާޅުކުރައްވަމުން ތޯރިގު ވިދާޅުވީ، މިއަދު ފެންނަނީ އެވޭލާ ޒަމާނުގައި ރަށްރަށަށް ފައިސާ ހިފައިގެން މީހުން ދިއުމުން އެމީހުންގެ ފަހަތުން އެންމެން ދިޔަ ފަދަ ހާލަތަކަށް ސަރުކާރު ވެއްޓިފައިވާ މަންޒަރު ކަމަށެވެ. އަދި އޭނާ ވިދާޅުވީ ރަށްރަށުގެ ރައްޔިތުންނަކީ ތަހުޒީބު ބައެއް ނޫން ކަމަށް ބައެއް މީހުން ދެކުނު ނަމަވެސް، މިހާރު ރަށްރަށުގައި ތިބި މީހުންނަކީ މީހަކު ފައިސާ ފޮއްޗެއް ހިފައިގެން ދިޔަޔަސް އެމީހެއްގެ ފަހަތުން އަޅުވައިގެން އުޅޭނެ ބައެއް ނޫން ކަމަށެވެ. އެ ރައްޔިތުން މާ ބޮޑަށް ވިސްނުންތެރިވެފައި ގައުމާ ދޭތެރޭ ހެޔޮކޮށް ވިސްނާ ކަމަށާއި، މި ސަރުކާރުގެ އިސްވެރިންނަށްވުރެ ރަށްރަށުގެ މީހުން މާ ތަހުޒީބު ކަމަށް ތޯރިގު ވިދާޅުވި އެވެ.
ރާއްޖޭގެ ތާރީޚަށް އަލިއަޅުއްވާލައްވައި ތޯރިގު ވިދާޅުވީ، ވޯރާ ވިޔަފާރިވެރިންގެ އަމުރަށް ނޫނީ އެމީހުން ބޭނުންވާ ގޮތަކަށް ނޫން ގޮތަކަށް ދައުލަތުގެ ކަންތައްތައް ނުހިނގާ ދުވަސްވަރެއް ރާއްޖެ ދުށް ކަމަށެވެ.
އަޅުގަނޑުމެންނަށް ލިޔެކިޔުންތަކުން ފެންނަ ގޮތުގައި ވެއްޖެއްޔާ އެ ވޯރާ ވިޔަފާރިވެރިން ދައުލަތުގެ ބޮޑުންގެ އަރިހަށް ދޮލަނގު ހިފައިގެންދާ ވާހަކަ. ދެން އަޅުގަނޑު އެ މާނަކުރަނީ ރިޝްވަތު ހިފައިގެން ދިއުމަށް. އެހެންވީމާ މިއަދު އަޅުގަނޑުމެންނަށް މި ފެނުނީ އެ ރިޝްވަތު ހިފައިގެންދާ ތަން ލިޔައިމާ އެ ހަމައެއް އަޅައިގެން އެއީ ހަމަކަމަށް ބަލައިގެން އޭގެ މައްޗަށް ގްރޫނު ހަދާ ވާހަކަ ދައްކާ ވާހަކަ. މި ކަހަލަ ހަޑިހުތުރު ވާހަކަ މި ދައްކަނީމަނަދޫ ދާއިރާގެ ކުރީގެ މެންބަރު މުހައްމަދު ތޯރިގު
މީގެ އިތުރުން ތޯރިގު ވިދާޅުވީ، ރައްޔިތުންގެ ފައިސާއިން އެތައް ސަތޭކަ މިލިއަން ޑޮލަރަކާއި 500 ހެކްޓަރުގެ ބިން ބޭރު މީހަކަށް ހިލޭ ވިޔަފާރިކުރަން ދިނުމަކީ ބޮޑު ނުރައްކަލެއް ކަމަށެވެ. އަދި މި މައްސަލައިގައި ރައީސް ޑރ. މުހައްމަދު މުއިއްޒަށާއި، އެމަނިކުފާނާ ގުޅިގެން މި ހަރަކާތް ހިންގި ހުރިހާ ބޭފުޅުންނާ މެދު ރައްޔިތުންގެ ކަންބޮޑުވުން އިންތިހާއަށް އޮތް ކަމަށް އޭނާ ވިދާޅުވި އެވެ.
މީގެއިތުރުން، އެނގިވަޑައިގެންފައިވާ މައުލޫމާތުތަކަށް ބަލާއިރު މި މައްސަލައަކީ ވަޒީރުންގެ މަޖިލީހުގައި މަޝްވަރާކުރެވިފައިވާ ކަމެއް ނޫން ކަމަށާއި، އަދި ރައްޔިތުންގެ މަޖިލީހުގެ މެންބަރުންނަށް އެނގިގެން ހިނގި ކަމެއްވެސް ނޫން ކަމަށް ތޯރިގު ވިދާޅުވި އެވެ. މިއީ ސަރުކާރުގެ ތެރޭގައި ތިއްބެވި ދެތިން ހަތަރު ބޭފުޅަކު ވެގެން މަޝްވަރާކޮށްލުމަށްފަހު، އެ ބޭފުޅުންގެ މެދުގައި ނިންމައިގެން ކުރިއަށްގެންދާ ކަމެއްގެ ގޮތުގައި އޭނާ ސިފަކުރެއްވި އެވެ.
