"ގޯހެއް" ރަނގަޅޭ ބުނެދޭން މުޅި ސަރުކާރު އަރުވާ ޖަހާފައި

މިއޮތީވާ ކަމެކެވެ. މުޅި ސޯޝަލް މީޑިޔާގައި އެ ވާހަކަ އެވެ. މުޅި ސަރުކާރު ވަތަށް ފައިބައިގެން ކުރަމުން އެ ދަނީ މަސައްކަތެވެ. ސޯޝަލް މީޑިޔާގައި ވާހަކަ އަނބުރަން ގެންގުޅެ ކުދިން ކުރާ ވަރުން ނުފުދިގެން ވަޒީރު ބޭފުޅުން ވެސް ކުރަމުން އެ ދަނީ އެ މަސައްކަތެވެ. ލައްކަ ކުޅިސަމާއެއް އެބަހުއްޓެވެ. އިހުތިބީން ބޮޑު މައުލޫދަކަށް ފަސް ހަރަށުން މީހުންނަށް ކިޔައިގެން ވެސް މިވަރެއް އަރުވާލި ހެނެއް ހީއެއް ނުވެ އެވެ.

ދައްކަނީ އެއްވާހަކަ އެވެ. އެކަމުގެ މޮޅު ވާހަކަ އެވެ. އެކަމުން ލިބޭނެ ޑޮލަރު ފުނިވަރުގެ ވާހަކަ އެވެ. ރައްޔިތުންނަށް ހުރި ހާ އުފާވެރިކަމެއްގެ ވާހަކަ އެވެ. އެކައްޗެއް ކޮޕީ ކޮށްކޮށްގެން ވެސް ފަށްފަށްކޮށްފައި ހަމަ އެކައްޗެއް އަނބުރާ ނަގަނީ އެވެ.

ތިޔަ ހީވީ ރަނގަޅަށެވެ. ރަސްމާލޭގެ ދެބައިކުޅަ އެއްބައި ބޭރުގެ ބަޔަކަށް ދިނުން ދިފާއު ކުރުމުގެ މަސައްކަތެވެ. މުޅި ސަރުކާރު މިދުވަސްވަރު އެހޭކެނީ އެކަމެއްގަ އެވެ. އެވެރިން ބުނާ ގޮތުންނަމަ ގޯހީ ރައްޔިތުންނެވެ. އެކަމާ ދެކޯލު ހަދާ މީހުންނެވެ. ކަން އޮތްގޮތް ކިޔައިދޭ މީހުންނަކީ އެވެރިން ގަބޫލު ކުރާ ގޮތުގައި ޚާއިނުންނެވެ. ޤައުމަށް ޣައްދާރުވާ މީހުންނެވެ. އެ ވެރިން ބުނާގޮތުންނަމަ އެކަން ބޮލާލާ ޖަހައިފިނަމަ އެ ދޫކޮށްލެވުނީ ރަނުގެ ފުރުސަތެކެވެ. ދެން ދުވަހަކު ވެސް ނުލިބޭނޭވަރުގެ މަންފާއެކެވެ. ގައުމަށް ޣައްދާރުވާ މީހުންގެ އަވައިގައި ޖެހޭނީ މޮޔައިންނެވެ. ސަރުކާރުން ކެނޑިނެޅި މަސައްކަތް އެ ކުރަނީ އެމީހުން އެބުނާ މޮޔައިންނަށް ވިސްނައިދޭށެވެ.

އެކަމަކު ހަގީގަތަކީ އޭގެ ދިމާ އިދިކޮޅެވެ. ގޯސްވެގެން މިއުޅެނީ ރައްޔިތުންނަށް އެއްޗެއް ލިބުމެއް ނޫނެވެ. ބޭރު ބަޔަކަށް ތަނެއް ހިންގާން ދީގެން އެކަމުގެ ކަންބޮޑުވުމެއް ވެސް ނޫނެވެ. ކަމުނުގޮސްގެން އުޅެނީ އެކަމުގައި ހުރި އަޑިނޭނގޭ ކަންކަމުގެ ފަހަތުގައި ހުރި ބިރުވެރިކަމެވެ. އޮޅުވާލައިގެން ރައްޔިތުން ވާވައްދައިގެން ގަންނާން އުޅޭގަނޑުގެ ނުރައްކާ ކަމެވެ.

ފުރަތަމަ ކަމަކަށް އެވަރު ބޮޑު ކަމެއްގައި ހާމަކަމެއް ނެތުމެވެ. ހުރިހާ ކަމެއް ވެސް ސިއްރުވެފައި އޮތުމެވެ. ރަސްމާލެ ދީގެންއުޅެ އިސްރާއީލުގެ ބައިވެރިޔާ ހާމަކުރާ އެއްޗަކާއި ދިވެހި ސަރުކާރުން ބުނާ އެއްޗަކާ ހާސްބައި ތަފާތުވުމެވެ. އެ ވާހަކަ ދައްކާން ފެށީމާ އެ ވެރިންގެ ވެބްސައިޓުގައި ހުރި ކަންކަން އުނިކުރުމެވެ.

އަނެއް ކަމަކީ ނެއް ގާނޫނެއްގެ މައްޗަށް ބިނާކޮށް ފަސްގަނޑުން ބައެއް ކުއްޔަކާ ނުލައި ތާއަބަދަށް ބޭރުގެ ބަޔަކަށް ދިނުމެވެ. އެ ވާހަކަ ވެސް ދައްކާން ފެށީމާ ދެން އެ ވިދާޅުވީ ޤާނޫނެއް ހަދާނެ ވާހަކަ އެވެ. މިހާ ވެސް އަޑި ނޭނގޭ، ބިރުވެރި ގޮތް ނޭނގޭ ކަމެއްގެ ތެރޭގައި ދިވެހީން ހަމަހޭގައިތިބެ އެއްބަސްވާން ބިރުގަންނަ ބިރުގަތުމެވެ.

ރައްޔިތުންނަށް ބޯހިޔާވަހިކަން ކަށަވަރުކޮށްދޭން ރައްޔިތުންގެ ރިޒާވްގައި ހުރި ޑޮލަރުކޮޅު ހުސްކޮށްލައިގެން ހިއްކި ބިން، ރައްޔިތުން ގާތު ހޭވެސް އަހާނުލައި ބޭރު ބަޔަކަށް ދޭތީ އެކަމުގެ ކަންބޮޑުވުމެވެ.

އެ ހުރިހާ ކަމަކަށްވުރެ ވެސް ގޯސްވެގެން މިއުޅެނީ އަދި މާބޮޑު ކަމެކެވެ. އެބިން ދޭ މީހާ އެތަނަށް ގެންނާނެކަން ކަށަވަރުވާ މީހުންނެވެ. އިސްރާއީލުގެ ޒައިނިސްޓުން އެތަނަށް އައިސް އެމީހުންގެ ސަހަރެއް އެތަނުގައި ގާއިމުކުރާނެތީ އެ ކަން ގޯސްވުމެވެ. އެކަން ބޮޑުވުމެވެ. އަހަރެމެންގެ ބިމުން އަހަރެމެން އެންމެ ރުޅިއަރާ ޔަހޫދީންނަށް ޖާގަދޭތީ އެކަމުގެ ނުރުހުމެވެ. އެވެރިން ހިތުހުރި ގޮތަކަށް ދިވެހީންގެ ބިމުގައި އުޅެވޭނޭ މަގު ފަހިކޮށްދޭތީ އެކަމުގެ ހިތްހަމަނުޖެހުމެވެ.

އެންމެ ބޮޑު ގޯހަކީ ރައްޔިތުން ގާތުނުކުރާނަމޭ ބުނި ކަންކަންކޮށް ވަލިއްޔުލް އަމުރު ރައްޔިތުންނަށް މުތުލަގަށް ދޮގު ހެއްދެވުމެވެ. އެންމެ ވެލިފުކެއް ވެސް ހަމަ އެންމެ ވެލިފުކެއް ވެސް ބޭރު ބަޔަކަށް ނުދޭނަމޭ ވިދާޅުވެ އާޚިރުގައި ރައްޔިތުންނަށް ދޯކާ ދެއްވީތީ އެވެ.

ކޮންމެއަކަސް މިއީ ރަސްމާލެ އިސްރާއީލުގެ އެކުވެރިއަކަށް ދޭން އުޅޭތީ ރައްޔިތުން އެކަން ގޯސްކަމަށް ދެކޭ ސަބަބުތަކެވެ. ރައްޔިތުން ގޮވާ އެނަގަނީ އެކަން އެހެން ނުކުރުމަށެވެ. އެކަމަކު މުޅި ސަރުކާރުން އަރުވާ ޖަހައިގެން ނުކުމެ އެއުޅެނީ އެ ގޯސްތަކަކީ ގޯހެއް ނޫނޭ ބުނެދިނުމަށެވެ. ދަނޑިމާރު އަޅައިގެން ވެސް ކުރެވޭތޯ އެއުޅެނީ "ގޯސް" ރަނގަޅޭ ބުނުވުމަށެވެ. މޮޅު ވާހަކަތަކަކާއި މޮޅު ދަޅައެއް ދައްކައިގެން ވެސް ރައްޔިތުން އަނެއްކާ ވެސް ހައްލާލެވޭތޯ އެވެ.