ކެބިނެޓުން އިސްތިއުފާ ދެއްވި މާރިޔާ އަށް، އެމްބެސެޑަރ އެޓް ލާޖްގެ މަޤާމެއް
14 ސެޕްޓެމްބަރު 2026 | ހޯމަ 06:01ރާއްޖެ އެމްވީ އަށް މައުލޫމާތު ލިބިފައިވާ ގޮތުގައި އެމްބެސެޑަރ އެޓް ލާޖްގެ މަޤާމަށް އައްޔަނުކުރެއްވުމާ އެކު، މާރިޔާ ފޮރިން މިނިސްޓްރީ އަށް ނުކުންނަވާތާ ދުވަސްކޮޅެއް ވެއްޖެ
އެމްބެސެޑަރ އެޓް ލާޖްގެ މަޤާމަށް އައްޔަނު ކުރެއްވި ކުރީގެ މިނިސްޓަރު ޑރ. މާާރިޔާ | ރައީސް އޮފީސް
ރައީސް ޑރ. މުހައްމަދު މުއިއްޒުގެ ކެބިނެޓުން އިސްތިއުފާ ދެއްވި ކުރީގެ އެގްރިކަލްޗަރ އެންޑް އެނިމަލް ވެލްފެއަރ މިނިސްޓަރު ޑރ. މަރިޔަމް މާރިޔާ އަށް ފޮރިން މިނިސްޓްރީގެ އެމްބެސެޑަރ އެޓް ލާޖްގެ މަޤާމެއް ދެއްވައިފި އެވެ.
ރާއްޖެ އެމްވީ އަށް މައުލޫމާތު ލިބިފައިވާ ގޮތުގައި އެމްބެސެޑަރ އެޓް ލާޖްގެ މަޤާމަށް އައްޔަނު ކުރެއްވުމާ އެކު، މާރިޔާ ފޮރިން މިނިސްޓްރީ އަށް ނުކުންނަވާތާ ދުވަސްކޮޅެއް ވެއްޖެ އެވެ.
ރައީސް މުއިއްޒުގެ ކެބިނެޓުން މާާރިޔާ އިސްތިއުފާ ދެއްވާފައި ވަނީ މިއަހަރުގެ އޭޕްރީލް މަހުގެ ތެރޭގަ އެވެ. އެއީ އެ މަހުގެ ކުރީ ކޮޅު އޮތް ލޯކަލް ކައުންސިލްތަކުގެ އިންތިޚާބާއި ރައްޔިތުންގެ ޚިޔާލު ހޯދުމުގެ އާންމު ވޯޓުގައި ސަރުކާރަށް ލިބުނު ނާކާމިޔާބާ ގުޅިގެން، ރައްޔިތުން ބޭނުންވާ ފަދަ ބަދަލުތަކެއް ސަރުކާރަށް ގެނައުމަށް ކަމަށް އޭރު ވަނީ ހާމަކޮށްފަ އެވެ.
2023 ވަނަ އަހަރުގެ ނޮވެމްބަރު މަހުގެ 17 ވަނަ ދުވަހު ރައީސް މުއިއްޒު ވެރިކަމުގެ ހުވާކުރެއްވުމަށް ފަހު އެންމެ ފުރަތަމަ މާރިޔާ އައްޔަނު ކުރެއްވީ ހަޔަރ އެޑިއުކޭޝަން މިނިސްޓަރުގެ މަޤާމަށެވެ. ނަމަވެސް ފަހުން ވަނީ ކެބިނެޓަށް ގެންނެވި ބަދަލުތަކުގެ ތެރެއިން، މާރިޔާާ ވަނީ އެގްރިކަލްޗަރ އެންޑް އެނިމަލް ވެލްފެއަރގެ މަޤާމަށް ބަދަލު ކުރައްވައިފަ އެވެ.
މާރިޔާ އަށް އެމްބެސެޑަރ އެޓް ލާޖްގެ މަޤާމެއް ދެއްވާފައިވާއިރު، ކެބިނެޓުން އިސްތިއުފާ ދެއްވި އެހެން ބޭފުޅުންނަށް ވެސް މި މަޤާމު ދެއްވި އެވެ. އެގޮތުން ކުރީގެ ޓޫރިޒަމް މިނިސްޓަރު ތާރިޤު އިބްރާހީމް އާއި ކުރީގެ ލޯކަލް ގަވަމަންޓް މިނިސްޓަރު އާދަމް ޝަރީފް އުމަރަށް ވެސް އެންމެ ފުރަތަމަ ދެއްވީ އެމްބެސެޑަރ އެޓް ލާޖްގެ މަޤާމެވެ.
އޭގެ ފަހުން ތާރިޤު އައްޔަނުކުރެއްވީ ދިވެހިރާއްޖެ އިން ޔުނައިޓެޑު އަރަބް އެމިރޭޓްސް (ޔޫއޭއީ) އަށް ކަނޑައަޅުއްވާފައި ހުންނަވާ ސަފީރުގެ މަޤާމަށެވެ. އަދި އާދަމް ޝަރީފް އައްޔަނުކުރެއްވީ ދިވެހިރާއްޖެ އިން ޤަތަރަށް ކަނޑައަޅުއްވާފައި ހުންނަވާ ސަފީރުގެ މަޤާމަށެވެ.
