ނުހައްގު މުއްސަނދި ކަމުން ހޯދާ މުދާ ދައުލަތަށް ނަގަން ޖެހޭ ބިލު ހުށަހަޅަން ބިރު ގަންނަން ޖެހޭނީ ރައީސް ނޫންތޯ؟: މެންބަރު އައިބީ
13 އޮކްޓޯބަރު 2026 | އަންގާރަ 13:10ނުހައްގު މުއްސަނދިކަން ހޯދާ ފަރާތްތަކުގެ މުދާ ދައުލަތަށް ނެގުމާ ގުޅޭ ބިލަށް ބަހުސްކުރައްވަމުން، ފޭދޫ ދެކުނު ދާއިރާގެ މެންބަރު އިބްރާހިމް ދީދީ ވަނީ ރައީސް މުއިއްޒުގެ މުއްސަނދިކަމާ މެދު ސުވާލު އުފައްދަވައިފައި. ދައުލަތުގެ ފައިސާ އާއި މުދަލަކީ ރައްޔިތުންގެ ހައްގަކަށް ވާއިރު، ގާނޫނާ ހިލާފަށް ކަންކަން ކުރާ ފަރާތްތަކުން މިފަދަ ބިލުތަކަށް ބިރުގަންނަން ޖެހޭނެ ކަމަށް އޭނާ ވިދާޅުވި
ރައްޔިތުންގެ މަޖިލީހުގެ މެންބަރު އަހުމަދު ދީދީ (އައިބީ) | ރައްޔިތުންގެ މަޖިލިސް
ރައީސް ޑރ. މުހައްމަދު މުއިއްޒު ހޯދައްވާފައިވާ މުއްސަނދިކަމަކީ ނުހައްގުން ހޯދާފައިވާ މުއްސަނދި ކަމެއްކަން ދޭހަވާ ފަދަ ގޮތަކަށް ރައްޔިތުންގެ މަޖިލީހުގެ ފޭދޫ ދެކުނު ދާއިރާގެ މެންބަރު އިބްރާހީމް ދީދީ، (އައިބީ) ވާހަކަދައްކަވައިފި އެވެ.
އަންގާރަ ދުވަހުގެ ރައްޔިތުންގެ މަޖިލީހުގެ ޖަލްސާގައި ވާހަކަދައްކަވަމުން މެންބަރު އައިބީ ވަނީ ނުހައްގު މުއްސަނދި ކަމުން ހޯދާ މުދާ ދައުލަތަށް ނަގަން ޖެހޭ ބިލު ހުށަހަޅަން ބިރު ގަންނަން ޖެހޭނީ ރައީސް މުއިއްޒު ނޫންތޯ ވިދާޅުވެފަ އެވެ.
އެގޮތުން މެންބަރު އައިބީ ވިދާޅުވީ، މިއަދު މި މުޖުތަމައުގައި ކަންތައްތައް ހިނގާ ގޮތުން ގެއްލެނީ ރައްޔިތުންގެ ފައިސާ ކަމަށެވެ. އަދި ދައުލަތަކީ ވަކި މީހެއްގެ ޕްރޮޕަޓީއެއް ނޫން ކަމަށާއި، ދައުލަތީ ރައްޔިތުންގެ އެއްޗެއް ކަމަށް މެންބަރު އައިބީ ވިދާޅުވި އެވެ.
މިއަދުގެ ރައީސުލްޖުމްހޫރިއްޔާ އެމަނިކުފާނުގެ ސަލާމަތާއި ރައްކާތެރިކަމަށް މިފަދަ ގާނޫނުތައް ހެދުމާ ދެކޮޅެއް ނޫންތޯ ހަދަންވީ، އަޅުގަނޑު ވެސް ދެކޮޅު ނޫންތޯ. އެކަމަކު އަޅުގަނޑުމެން މަަސައްކަތް މި ކުރަނީ ރައްޔިތުންގެ ހައްގުތައް ހިމާޔަތް ކުރުމަށްޓަކައި.އިބްރާހީމް ދީދީ (އައިބީ)
މެންބަރު އައިބީ ވިދާޅުވީ އޭނާ ގަބޫލު ކުރާ ގޮތުގައި މިހާތަނަށް ދިވެހިރާއްޖޭގައި ކަންތައްތައް ދިޔަ ގޮތަކީ ކޮންމެ ވެރިކަމެއްގައި ވެސް ދައުލަތް ބަނގުރޫޓު ކޮށްލައިގެން ކަމަށް ނަމަވެސް އެއިން އެއްވެސް މުދަލެއް އަތުވާ ގޮތް ނުވާ ކަމަށެވެ.
މީގެ އިތުރުން، މިފަދަ ގާނޫނުތައް ހަދަނީ ބިރު ދައްކަން ކަމަށާއި، ބިރެއް ނެތް ނަމަ ހިތުހުރި ގޮތަކަށް އުޅެންވީ ކަމަށް މެންބަރު އައިބީ ވިދާޅުވި އެވެ. އަދި ގާނޫނާ ހިލާފު ނުވާ ފަރާތްތަކަށް ބިރެއް ނެތް ކަމަށް ވެސް މެންބަރު އައިބީ ވިދާޅުވި އެވެ.
މެންބަރު އައިބީ މިފަދައިން ވިދާޅުވެފައިވާއިރު، ރައީސް މުއިއްޒުއަށް މިފަދަ ތުހުމަތެއް މާމިގިލި ދާއިރާގެ މެންބަރު ގާސިމް އިބްރާހީމް ވަނީ 2023 ވަނަ އަހަރު އޮތް ރިޔާސީ އިންތިހާބުގެ ކެމްޕެއިން ތެރެއިން ކުރައްވާފަ އެވެ. އެގޮތުން ގާސިމް ވަނީ ރައީސް މުއިއްޒުގެ ގެކޮޅަކީ ސިނަމާލެ ބްރިޖް އެޅުމުގެ ތެރޭގައި ހޯދާފައިވާ ފައިސާއިން އަޅާފައިވާ ގެޔެއް ކަމަށް ވިދާޅުވެފަ އެވެ. އަދި ބްރިޖްގެ ކުރެހުމުގައި އޮތް އެއް ލޭން މަދުވުމުގެ ސަބަބުން ރައްޔިތުން ވެސް އަންނަނީ މި ތުހުމަތު ރައީސް މުއިއްޒުއަށް ކުރައްވަމުންނެވެ.
