ކުށްކޮށްގެން ހޯދާ މުދާ ދައުލަތަށް ނެގުމުގެ ބިލް މަޖިލީހަށް ހުށަހަޅައިފި
6 އޮކްޓޯބަރު 2026 | އަންގާރަ 05:32ޖިނާއީ ބޮޑެތި ކުށްތައް ކޮށްގެން ހޯދާ މުދަލާއި ފައިސާ ދައުލަތަށް ނެގުމުގެ ބާރު ޕްރޮސިކިއުޓަރ ޖެނެރަލަށް ލިބިދޭ ބިލެއް ސަރުކާރުން މަޖިލީހަށް ހުށަހަޅައިފި. މި ބިލުގެ ދަށުން ކުށް ސާބިތުނުވި ނަމަވެސް، ވަކި ހާއްސަ ހާލަތްތަކެއްގައި މަދަނީ މިންގަނޑުން މުދާ އަތުލެވޭއިރު، ބޭރު ގައުމުތަކުގައި ހުރި މިފަދަ މުދާ ހޯދުމަށް ބައިނަލްއަގުވާމީ އެހީތެރިކަން ހޯދުމުގެ މަގު ވެސް ފަހިވެގެންދާނެ
20 ވަނަ ރައްޔިތުންގެ މަޖިލީހުގެ ޖަލްސާއެއްގެ ތެރެއިން | މަޖިލިސް
ޖިނާއީ ބޮޑެތި ކުށްތައް ކުރާ ފަރާތްތަކުން ނުހައްގުން ހޯދާ މާލީ މަންފާ އާއި މުދާ ދައުލަތަށް އަތުލައި، އެފަދަ މުދަލުން އިތުރު މަންފާ ހޯދޭނެ މަގުތައް ބަންދުކުރުމަށްޓަކައި "ކުށްކޮށްގެން ހޯދާ މުދަލާ ބެހޭ ބިލު" ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހަޅައިފި އެވެ.
އަންގާރަ ދުވަހު އޮތް ރައްޔިތުންގެ މަޖިލީހަށް މި ބިލް ސަރުކާރުގެ ފަރާތުން ހުށަހެޅުއްވީ ފުވައްމުލަކު މެދު ދާއިރާގެ މެންބަރު އަލީ ފަޒާދު އެވެ.
މި ބިލު ފަރުމާކޮށްފައިވަނީ ޖިނާއީ ބޮޑެތި ކުށްތައް ކުރާ ފަރާތްތަކަށް ގާނޫނުގައި ކަނޑައެޅިފައިވާ އަދަބު ދިނުމުގެ އިތުރުން، އެ ފަރާތްތަކުން ކުށް ކޮށްގެން ހޯދާ މާލީ މަންފާ ބޭނުންކުރުން ހުއްޓުވައި، އެ މުދާ ދެނެގަނެ ހިފެހެއްޓުމަށް ކަމަށް ބިލުގައި ބުނެފައިވެ އެވެ. މިގޮތުން ކުށް ސާބިތުވުމުން މުދާ ދައުލަތަށް ނެގުމުގެ އިތުރުން، ވަކި ހާއްސަ ހާލަތްތަކެއްގައި ކުށް ސާބިތުވުމަކާ ނުލައި ވެސް މުދާ ދައުލަތަށް ނެގޭނެ އުސޫލުތަކެއް މި ބިލުގައި ވަނީ ހިމަނާފަ އެވެ.
ކުށް ސާބިތުވުމަކާ ނުލައި މުދާ އަތުލެވޭނެ އިސްތިސްނާ ހާލަތްތަކުގެ ތެރޭގައި، ކުށުގެ ތުހުމަތުކުރެވޭ ފަރާތް މަރުވުން، ނުވަތަ ފިލައިގެން އުޅުން، ނުވަތަ އެ ފަރާތުގެ މައްޗަށް ދައުވާކުރެވޭނެ ތަނެއް ނެތުން ހިމެނެ އެވެ. މިފަދަ ހާލަތްތަކުގައި މަދަނީ މިންގަނޑުން އެއީ ކުށްކޮށްގެން ހޯދާފައިވާ މުދަލެއްކަން ސާބިތުކޮށްދެވޭނަމަ، ޕްރޮސިކިއުޓަރ ޖެނެރަލަށް ސިވިލް ރިސްޓްރެއިންޓް އަމުރެއްގެ ދަށުން އެ މުދާ ހިފެހެއްޓުމުގެ ނުވަތަ ސިވިލް ފޯފީޗަރ އަމުރެއްގެ ދަށުން ދައުލަތަށް ނެގުމުގެ އިހުތިޔާރު ލިބިގެންވެ އެވެ.
މި ގާނޫނުގެ ދަށުން މުދާ އަތުލެވޭނެ ކުށްތަކުގެ ތެރޭގައި މަނީ ލޯންޑްރިން، ޓެރަރިޒަމްގެ ކުށްތައް، މީހުން މެރުން، މަސްތުވާތަކެތި ޓްރެފިކްކުރުން، މީހުން ޓްރެފިކްކުރުން، ޖިންސީ ގޯނާގެ ކުށްތައް، ކޮރަޕްޝަން އަދި އިންތިޒާމުވެގެން ކުރާ ބޮޑެތި ކުށްތައް ހިމެނެ އެވެ. މީގެ އިތުރުން 500,000 ރުފިޔާއަށް ވުރެ މަތީގެ ޓެކްސް ދެއްކުމުން އެއްކިބާވުމުގެ ކުށްތަކާއި، 100,000 ރުފިޔާއަށް ވުރެ މަތީގެ ފޭރުމުގެ ކުށްތަކާ ގުޅިގެން ހޯދާ މުދާ ވެސް މި ގާނޫނުގެ ދަށުން ދައުލަތަށް ނެގޭނެ އެވެ.
ބައިނަލްއަގުވާމީ އެހީތެރިކަމާ ގުޅޭގޮތުން ބިލުގައި ބަޔާންކޮށްފައިވަނީ، ބޭރު ގައުމުތަކުގައި ހުރި ކުށްކޮށްގެން ހޯދާފައިވާ މުދާ ހިފެހެއްޓުމަށް ނުވަތަ ދައުލަތަށް ނެގުމަށް އެދި ޕްރޮސިކިއުޓަރ ޖެނެރަލް މެދުވެރިކޮށް ބައިނަލްއަގުވާމީ އެހީއަށް އެދެވޭނެ ކަމަށެވެ. ހަމައެހެންމެ، ރާއްޖޭގައި ހުރި ބޭރު ގައުމުތަކުގެ ރައްޔިތުންނަށް ނިސްބަތްވާ އެފަދަ މުދާ ހިފެހެއްޓުމުގައި އެ ގައުމުތަކަށް އެހީތެރިކަން ފޯރުކޮށްދިނުމުގެ އުސޫލުތައް ވެސް މި ބިލުގައި ވަނީ ހިމަނާފަ އެވެ.
މި ގާނޫނު ހިނގާނީ ރާއްޖޭގައި ތިބި ދިވެހި ރައްޔިތުންނާއި ބޭރު ގައުމުތަކުގެ ރައްޔިތުންގެ މައްޗަށާއި، ރާއްޖެއިން ބޭރުގައި ތިބި ދިވެހި ރައްޔިތުންގެ މައްޗަށެވެ. އަދި ރާއްޖޭގައި ހުރި އެންމެހައި މުދަލެއްގެ މައްޗަށް ވެސް މި ގާނޫނު ހިނގާނެ އެވެ.
