ބޮޑެތި އިންވެސްޓްމަންޓްތަކުން މަދުވެގެން 50 ޕަސެންޓް އިކުއިޓީ ރާއްޖެއަށް ލިބެންޖެހޭ: ކުރީގެ ފިނޭންސް މިނިސްޓަރު އަމީރު
2 ނޮވެމްބަރު 2026 | ހޯމަ 15:15ރަސްމާލެ މަޝްރޫއަކީ އިގްތިސާދީ ގޮތުން ބުއްދިވެރި މަޝްރޫއެއް ނޫން ކަމަށް ވިދާޅުވެ، ކުރީގެ ފިނޭންސް މިނިސްޓަރު އިބްރާހީމް އަމީރު އެ މަޝްރޫއަށް ވަރަށް ބޮޑަށް ވަނީ ފާޑު ވިދާޅުވެފައި. އަމީރު ވިދާޅުވީ ބޮޑެތި ބިންތައް ހިލޭ ދޫކޮށްލުމުގެ ބަދަލުގައި، ރާއްޖެއަށް މިއަށްވުރެ މާ ފައިދާހުރި އިންވެސްޓްމަންޓްތައް ހޯދުމުގެ ފުރުސަތު އެބައޮތް ކަމަށް
އެމްޑީޕީގެ ގައުމީ މަޖިލީހުގެ ހަތަރުވަނަ ދައުރުގެ 38 ވަނަ ބައްދަލުވުމުގައި ކުރީގެ ފިނޭންސް މިނިސްޓަރު އިބްރާހީމް އަމީރު ވާހަކަ ދައްކަވަނީ | ރާއްޖެއެމްވީ
ރާއްޖެއަށް އަންނަ ބޮޑެތި ބޭރުގެ އިންވެސްޓްމަންޓްތަކުން އެންމެ މަދުވެގެން 50 ޕަސެންޓްގެ އިކުއިޓީ ރާއްޖެއަށް ލިބެން ޖެހޭނެ ކަމަށާއި، މިހާރަށްވުރެ މާ ފައިދާހުރި ޑީލްތައް ހޯދުމުގެ ފުރުސަތު ރާއްޖެއަށް އެބައޮތް ކަމަށް ކުރީގެ ފިނޭންސް މިނިސްޓަރު އިބްރާހީމް އަމީރު ވިދާޅުވެއްޖެ އެވެ.
އާދިއްތަ ދުވަހުގެރޭ ކުރިއަށްދިޔަ އެމްޑީޕީގެ ގައުމީ މަޖިލީހުގެ ހަތަރުވަނަ ދައުރުގެ 38 ވަނަ ބައްދަލުވުމުގައި ވާހަކަދައްކަވަމުން އަމީރު ވަނީ ރަސްމާލެ މަޝްރޫއަށް ވަރަށް ބޮޑަށް ފާޑު ވިދާޅުވެފަ އެވެ.
އަމީރު ވިދާޅުވީ، ގައުމު އެއްކޮށް ވިއްކާލައިފިނަމަ ރާއްޖެއަށް އެއް ޓްރިލިއަން ޑޮލަރުގެ އިންވެސްޓްމަންޓް ވެސް އަންނާނެ ކަމަށާއި، މި ސަރުކާރުން ކުރިއަށް ގެންދިއުމަށް މަސައްކަތް ކުރާ ރަސްމާލެ މަޝްރޫއަކީ އިގްތިސާދީ ބުއްދި ހަމަނުޖެހޭ މަޝްރޫއެއް ކަމަށެވެ.
ރާއްޖޭގެ ތާރީޚުގައި ވެސް ނާންނަ ވަރުގެ ބޮޑު އިންވެސްޓްމަންޓެއް ގެންނަ ކަމަށް ވެރިކަން ކުރާ ޕީއެންސީން މިހާރު ފާހަގަކުރަމުންދާ ކަމަށެވެ. އަދި ކުރީގެ ރައީސުންނަށް މިފަދަ ކަންކަން ނުކުރެވުނީ ގައުމު އެއްކޮށް ވިއްކާލަން ބޭނުންނުވާތީ ކަމަށް އޭނާ ވިދާޅުވި އެވެ.
ރާއްޖޭގެ ކުރީގެ ރައީސުންނަށް މި ކަންތައްތައް މި ގޮތަށް ނުކުރެއޭ. ނުކުރަނީ މުޅި ގައުމު އެއްކޮށް ވިއްކާލީމާ އަދި މިއަށްވުރެ މާ ބޮޑެތި އިންވެސްޓްމަންޓްސްތައް އަންނާނެ. އެއް ޓްރިލިއަން ޑޮލަރު ލިބުމަކީ ވެސް އެކަށީގެންވާ ކަމެކޭއިބްރާހީމް އަމީރު
ރާއްޖޭގެ ގާނޫނުއަސާސީ އާއި ގާނޫނުތަކުގެ ތެރެއިން ސީދާ ބޭރުގެ އިންވެސްޓްމަންޓްތަކަށް (އެފްޑީއައި) އެމްޑީޕީ އާއި ކުރީގެ ހުރިހާ ސަރުކާރުތަކުން ވެސް އަބަދުވެސް ތާއީދުކުރާކަން ފާހަގަކުރައްވައި އަމީރު ވިދާޅުވީ، އީގަލް ހިލްސް، މުބާދަލާ، ނުވަތަ ސައުދީގެ ޕަބްލިކް އިންވެސްޓްމަންޓް ފަންޑް (ޕީއައިއެފް) ފަދަ ކޮންމެ ބަޔަކު ވިޔަސް އައިސް ރާއްޖޭގައި އިންވެސްޓްކުރަން މަރުހަބާ ކިޔާ ކަމަށެވެ.
ނަމަވެސް މިހާރު ފެންނަނީ އެއް ބިލިއަން ޑޮލަރު ޚަރަދުކޮށްގެން ހިއްކާފައިވާ ބިންތަކެއް ހިލޭ ބަޔަކަށް 99 އަހަރަށް ބޭނުން ގޮތަކަށް ވިޔަފާރިކުރަން ދޫކޮށްލާ މަންޒަރު ކަމަށް އަމީރު ވިދާޅުވި އެވެ. އަދި މާލެ އާއި ހުޅުމާލޭގެ މިހާރުގެ މާކެޓް އަގަށް ބަލާއިރު އެ ބިމުގެ އަގު ގާތްގަނޑަކަށް 25 އިން 30 ބިލިއަން ޑޮލަރަށް އަރާނެ ކަމަށް އޭނާ ވިދާޅުވި އެވެ.
މީގެ އިތުރުން އަމީރު ވިދާޅުވީ، މި މަޝްރޫއާ ގުޅޭގޮތުން އެކި ފަރާތްތަކުން ދައްކަނީ އެކި ވާހަކަ ކަމަށާއި، 12 ބިލިއަން ޑޮލަރު ނުވަތަ ފިނޭންސް މިނިސްޓަރު ދެއްކެވި 30 ބިލިއަން ޑޮލަރުގެ ވާހަކައަކީ ކުރިއަށް އޮތް 10 ނުވަތަ 15 އަހަރު ފަހުން އުފެދޭނެ ޓައުންޝިޕްގެ ގްރޮސް ޑިވެލޮޕްމަންޓް ވެލިއު ނުވަތަ މުޅި އެސެޓްގެ އަގު ކަމަށެވެ. އަދި ވ. އަތޮޅުގައި ވެސް ބޮޑެތި އިންވެސްޓްމަންޓްތައް ހިނގާކަން ފާހަގަކުރައްވައި، މި މަޝްރޫއަށް ފުރަތަމަ އިންވެސްޓްމަންޓެއްގެ ގޮތުގައި 500 މިލިއަން ޑޮލަރަށް ވުރެ އިތުރަށް އިންވެސްޓް ނުކުރާނެ ކަމަށްވެސް އަމީރު ވިދާޅުވި އެވެ.
އަދި އެ ބިމުން ލިބޭ އާމްދަނީން ރާއްޖެއަށް ލިބެނީ އެންމެ 10 ޕަސެންޓް ކަމަށް ބުނާއިރު، ރަނގަޅު އެފްޑީއައި މަޝްރޫއެއްނަމަ އެންމެ މަދުވެގެން ވެސް ފުރަތަމަ ދުވަހުން ފެށިގެން 50 ޕަސެންޓް އިކުއިޓީ ރާއްޖެއަށް އޮންނަންވާނެ ކަމަށް އޭނާ ވިދާޅުވި އެވެ. އަދި 1970 ގެ އަހަރުތަކުން ފެށިގެން ދުނިޔޭގެ މަގުބޫލު މަންޒިލެއްގެ ގޮތުގައި އެތައް ފަހަރަކު ހޮވިފައިވާ ގައުމަކަށް ވާއިރު، ރާއްޖެއަށް މިއަށްވުރެ މާ ފައިދާހުރި ޑީލްތައް ހޯދޭނެ ކަމަށް ވެސް އަމީރު ވިދާޅުވި އެވެ.
