މެންބަރުންނަކީ "ޒަމްޒަމް ފެނުން ތާހިރުވެގެން ތިބި ބައެއް" ކަމަށް އެ ވިދާޅުވީ ކޮރަޕްޝަން އިންތިހާއަށް ބޮޑުވީމަތަ؟

ދިވެހިރާއްޖޭގެ ޑިމޮކްރެޓިކް ނިޒާމުގައި ރައްޔިތުންގެ މަޖިލީހަކީ ދައުލަތުގެ އެންމެ މަތީ ބާރުތަކުގެ ތެރެއިން ރައްޔިތުންގެ އަޑު އިއްވައި، ސަރުކާރު ޒިންމާދާރުކުރުވުމުގެ މައި ތަނބެވެ. ނަމަވެސް ފަހަކަށް އައިސް ރައްޔިތުންގެ މަޖިލީހުގެ ތަޅުމުން ފެންނަ މަންޒަރުތަކާއި، މެންބަރުން ދައްކަވާ ވާހަކަތަކުގެ ސަބަބުން މި މުހިންމު މުއައްސަސާއާ މެދު އާންމުންގެ މެދުގައި އޮތް އިތުބާރު ވަނީ ވަރަށް ބޮޑަށް ކުޑަވެފަ އެވެ. ޚާއްސަކޮށް 20 ވަނަ ރައްޔިތުންގެ މަޖިލީހުގައި ސުޕަރ މެޖޯރިޓީ އޮތް ޕީއެންސީގެ ބައެއް މެންބަރުން ތަޅުމުގައި ދައްކަވާ ހަގީގަތާ ޚިލާފު، އަދި ހަމަބުއްދިއަށް ގަބޫލުކުރަން ދަތި ވާހަކަތަކުގެ ސަބަބުން، މެންބަރުން އެ އުޅުއްވަނީ ރައްޔިތުންނަށް ޖޯކު ޖައްސަވަންތޯ ގިނަ ބަޔަކު ސުވާލު ވެސް އުފައްދަ އެވެ. 

މަޖިލީހުގެ ތާރީޚަށް ބަލާއިރު ވެސް މެންބަރުންނަކީ ރައްޔިތުންގެ މަންދޫބުންގެ ގޮތުގައި ތިއްބަވައިގެން އަމިއްލަ ޖީބު ފުރާލުމާއި، ރިޝްވަތާއި ކޮރަޕްޝަންގެ ތުހުމަތުތަކުން ސަލާމަތްވެފައިވާ ބައެއް ނޫން ކަމަށް އާންމު ރައްޔިތުން ދެކެއެއް ނުންތޯ އެވެ. ސަރުކާރުން ބޭނުންވާހާ ގޮތަކަށް ރުހުން ދީ، ގާނޫނުތައް ބަދަލުކޮށް، ދައުލަތް ޒިންމާދާރުކުރުވުމުގެ ބަދަލުގައި ވެރިކަން ދިފާއުކުރުމުގައި މެންބަރުން ތިއްބަވާ މަންޒަރު ފެނުމުން އާންމުން މަޖިލިސް ސިފަކުރަނީ "ބަކަރި ކޮއްޓެއް" ފަދަ، އެއްވެސް އަގުހުރި ބަހުސެއް ނުހިނގާ ތަނެއްގެ ގޮތުގައޭ ބުންޏަސް ދޮގަކަށް ނުވާނެ އެވެ. މަގާމަށް ވަޑައިގަތްއިރު އާދައިގެ ދިރިއުޅުމެއް އުޅުއްވި ބައެއް ބޭފުޅުން ކުޑަ ދުވަސްކޮޅެއްގެ ތެރޭގައި އިންތިހާއަށް މުއްސަނދިވެގެންދާއިރު، އެ ފައިސާ އައީ ކޮންތާކުންތޯ ބެލޭނެ ހަރުދަނާ ނިޒާމެއް ނެތުމަކީ ރައްޔިތުންގެ ނުރުހުން އިންތިހާއަށް އިތުރުވާ މައިގަނޑު ސަބަބުކަމާ މެދު ޝައްކަތްނެތެވެ. 

މިފަދަ ހާލަތެއްގައި ރައްޔިތުން ތިއްބާ، މިދިޔަ އޮކްޓޫބަރު 7 ގައި އޮތް ރައްޔިތުންގެ މަޖިލީހުގެ ޖަލްސާގައި ކުށްކޮށްގެން ހޯދާ މުދަލާ ގުޅޭ ބިލަށް ބަހުސްކުރައްވަމުން ސަރުކާރު ހިންގާ ޕާޓީ، ޕީއެންސީއަށް ނިސްބަތްވާ ދިއްދޫ ދާއިރާގެ މެންބަރު އަބްދުއްލަތީފު މުހައްމަދު ދެއްކެވި ވާހަކައަކީ އާންމުންގެ މެދުގައި ބޮޑު ސިހުމަކާއި ޖޯކަކަށް ވެގެންދިޔަ ވާހަކައެކެވެ. މަޖިލީހުގެ އިދާރީ މުވައްޒަފުންނާއި މެންބަރުންނަކީ އެއްވެސް ވަރަކަށް ޚިޔާނާތްތެރިވާނެ ބައެއް ނޫން ކަމަށާއި، މަޖިލީހުގައި މި ތިއްބެވީ "ސާފު ޒަމްޒަމް ވަޅު ފެނުން ފެންވަރައިގެން އައިސް ތިބި" ބައެއް ކަމަށް ވިދާޅުވެ އޭނާ ވަނީ މަޖިލީހުގެ މެންބަރުންނަކީ އެއްވެސް ކިލަނބުކަމެއް ނެތް މާތް ބައެއްގެ ގޮތުގައި ސިފަކުރައްވާފަ އެވެ. އަދި ދައުލަތުގެ އެންމެ ފައިސާ ފޮއްޗަކަށް ޚިޔާނާތްތެރިވިޔަސް މި ސަރުކާރުން ފިޔަވަޅު އަޅާނެ ކަމަށް ވިދާޅުވެ، އެންމެން ތިބީ އަތުކުރި އޮޅާލައިގެން ކަމަށް ވެސް ވިދާޅުވި އެވެ.

ނަމަވެސް ކަންކަން އޮތީ މިހެން ނޫންކަން ގިނަ ރައްޔިތުން ގަބޫލުކުރެ އެވެ. 

ކޮރަޕްޝަނާއި ނުހައްގު މުއްސަނދިކަން އިންތިހާއަށް އަށަގެންފައިވާ މާހައުލެއްގައި، މަޖިލީހުގެ މެންބަރުންނަކީ އެއްވެސް ކުށެއް ނެތް މައުސޫމު ބައެއްގެ ގޮތުގައި ސިފަކުރުމަކީ ހަގީގަތުގައި ވެސް ރައްޔިތުންގެ ވިސްނުމާއި ބުއްދިއަށް ކުރި ވަރަށް ބޮޑު މަލާމާތެކެވެ. މެންބަރު އަބްދުލްލަތީފް އެ ވިދާޅުވި ފަދައިން މެންބަރުންނަކީ ހަމަ ހަގީގަތުގައި ވެސް ޒަމްޒަމް ފެނުން ތާހިރުވެގެން ތިބި ބައެއް ކަމަށް ގަބޫލުކުރާނެ އެންމެ ރައްޔިތަކު ވެސް މިއަދު މި ގައުމަކު ނެތޭ ވެސް ބުނުމުގެ ޖާގަ ފެންނަ މަންޒަރުތަކުންނާއި، ދައްކާ ވާހަކަތަކުން ހާމަވޭނުންތޯ އެވެ. އެހެންކަމުން މިއީ ސީދާ ރައްޔިތުން ރުޅިއަރުވައި، ރައްޔިތުންނަށް ޖޯކު ޖެހުމުގެ ނިޔަތުގައި ބުނެފައިވާ ބަސްތަކެއްގެ ގޮތުގައި ގިނަ ބަޔަކު ސިފަކުރެ އެވެ.

އަދި ސިޔާސީ ބައެއް ބޭފުޅުން ދެކޭގޮތުގައި މެންބަރު އަބްދުއްލަތީފުގެ މި ވާހަކައަކީ މަޖިލިސް ތެރޭގައި ހިނގާ ކޮރަޕްޝަން މާ ބޮޑުވެ، ރައްޔިތުން އެކަންކަން ފާހަގަކުރަމުންދާތީ، އެކަން ފޮރުވުމަށްޓަކައި  ކޮށްލެއްވި ސަމާސާއަކަށް ވެސް ވެދާނެ އެވެ. މާ ބޮޑަށް ދޮގު ހަދައި، ވައްކަން ކުރާ މީހުން އަމިއްލަ ނަފްސު ދިފާއުކުރުމަށްޓަކައި މާ މާތް ބަޔަކަށް ހެދިގެން ދައްކާ ވާހަކަތަކަކީ އަބަދުވެސް މުޖުތަމައުގައި ޖޯކަކަށް ވެފައިވާ ކަންކަމެވެ.