ރައީސް މުއިއްޒުގެ ފާޑު ކިޔުން ކުރީގެ ރައީސް ޔާމީން އަށް: ސުޕްރީމް ކޯޓުން ޓިނު ނަގައިގެން ފަނޑިޔާރުން ހައްޔަރުކޮށް ޖަލަށްލި!
19 ސެޕްޓެމްބަރު 2026 | ހޮނިހިރު 07:31ޝަރުއީ ދާއިރާ މިނިވަންކުރުމާ ގުޅޭގޮތުން ވާހަކަފުޅު ދައްކަވަމުން، ކުރީގެ ވެރިކަމެއްގައި ފަނޑިޔާރުން ހައްޔަރުކޮށް ޝަރުއީ ނިޒާމަށް ނުފޫޒު ފޯރުވި ގޮތަށް ރައީސް މުއިއްޒު ވަރަށް ބޮޑަށް ފާޑު ވިދާޅުވި. މި ސަރުކާރުން ޝަރުއީ ދާއިރާއަށް އެއްވެސް ނުފޫޒެއް ނުފޯރުވާނެ ކަމުގެ ޔަގީންކަން ދެއްވަމުން، އަދުލުވެރިކަން ގާއިމުކުރުމަށްޓަކައި ކޯޓުތަކުގެ މިނިވަންކަން ދެމެހެއްޓުމުގެ މުހިންމުކަން އެމަނިކުފާނު ފާހަގަކުރެއްވި
ރައީސް ޑރ. މުހައްމަދު މުއިއްޒު އާއި ކުރީގެ ރައީސް އަބްދުﷲ ޔާމީން ސަލާމްކުރައްވަނީ | ރައީސް އޮފީސް
ޝަރުއީ ދާއިރާގެ މިނިވަންކަމާ ގުޅޭގޮތުން ވާހަކަފުޅު ދައްކަވަމުން ރައީސް ޑރ. މުހައްމަދު މުއިއްޒު ކުރީގެ ރައީސް އަބްދުﷲ ޔާމީންގެ ވެރިކަމުގައި ހިނގައިދިޔަ ކަންކަމަށް ވަރަށް ބޮޑަށް ފާޑުވިދާޅުވެއްޖެ އެވެ.
ހުކުރު ދުވަހުގެރޭ ކުރިއަށްދިޔަ ޕީއެންސީގެ ކޮންގްރެސް ނިންމާލުމުގެ ރަސްމިއްޔާތުގައި ވާހަކަފުޅު ދައްކަވަމުން ރައީސް މުއިއްޒު ވިދާޅުވީ އަދުލުވެރިކަމަކީ ވަރަށް ފުން މާނައެއް އެކުލެވޭ ކަމެއް ކަމަށާއި އަދުލުވެރިކަމާއެކު ވެރިކަން ކުރާނަމަ، ޝަރުއީ ދާއިރާ އޮންނަން ޖެހޭނީ މިނިވަންކޮށް ކަމަށެވެ.
އެމަނިކުފާނު ފާހަގަކުރެއްވި ގޮތުގައި މީގެ ކުރިން ގޭގައި އަރާމުގައި ނިދާފައި އޮއްވާ ފަނޑިޔާރުން ރަހީނު ކުރުމާއި، ސުޕްރީމް ކޯޓުން ޓިނު ނަގައިގެން ފަނޑިޔާރުން ހައްޔަރުކޮށް ޖަލަށްލުން ފަދަ ކަންކަން ހިނގާފައިވާ ކަމަށެވެ.
އެގޮތުން އުއްތަމަ ފަނޑިޔާރާއި ސުޕްރީމް ކޯޓުގެ ފަނޑިޔާރުންނާއި ކުރީގެ ރައީސް މައުމޫން އަބްދުލްގައްޔޫމް ޖަލުގައި ތިއްބެވި ދުވަސްވަރުގެ ހަނދާންތައް އައުކުރައްވައި ރައީސް މުއިއްޒު ވިދާޅުވީ، އޭރު ކެބިނެޓްގެ ގިނަ ވަޒީރުންގެ އެދިވަޑައިގަތުމާއެކު، އެ ބޭފުޅުންގެ ހާލު ބައްލަވަން ރައީސް މުއިއްޒު ވަޑައިގެންނެވި ކަމަށެވެ. އަދި ވިދާޅުވީ، އުއްތަމަ ފަނޑިޔާރާއި އެހެން ފަނޑިޔާރުން ކުޑަ ގޮޅީގައި ވަރަށް ހާލުގައި ތިއްބެވި މަންޒަރު ދެކިވަޑައިގެންނެވި ކަމަށެވެ.
އަޅުގަނޑަށް ވަރަށް އުނދަގޫ އިހުސާސެއްވީ. އެއް ބޭފުޅަކީ 30 އަހަރު ގައުމުގައި ވެރިކަން ކުރައްވާފައި ހުންނެވި ބޭފުޅެއް. ވަރަށް ގިނަ ޚިދުމަތް ކުރައްވާފައި، ނޮވެންބަރު ތިނެއްގެ ހާދިސާގައި ގައުމު ސަލާމަތްކުރެއްވި ވެރިމީހާރައީސް މުއިއްޒު
ރައީސް މުއިއްޒު ވިދާޅުވީ 17 ނޮވެންބަރު 2023 ގައި ވެރިކަމާ ހަވާލުވެވަޑައިގެންނެވި ދުވަހު ޝަރުއީ ދާއިރާ މިނިވަންކުރެއްވި ކަމަށާއި، މިއަދާ ހަމައަށް ވެސް އެ ދާއިރާއަށް ސަރުކާރުން އެއްވެސް ނުފޫޒެއް ފޯރުވާފައި ނުވާނެ ކަމަށެވެ.
ރައީސް މުއިއްޒު މި މޭރުމުން ވާހަކަފުޅު ދެއްކެވިއިރު، މި ހާދިސާތައް ހިނގާދިޔައީ ކުރީގެ ރައީސް ޔާމީންގެ ވެރިކަމުގަ އެވެ. އެ ދުވަސްވަރު ރައީސް ޔާމީންގެ ވެރިކަމުގެ ކަންކަމާ ހިޔާލުތަފާތުވާ ސިޔާސީ އިދިކޮޅު ހުރިހާ ލީޑަރުން ޖަލަށް ލައްވާފައިވެ އެވެ. އަދި މިނިވަން ނޫސްވެރިކަމަށް ވަރަށް ބޮޑަށް ހުރަސްއަޅައި، މީޑިއާތަކާއި ނޫސްވެރިން ބޮޑެތި އަދަދުތަކުން ޖޫރިމަނާކޮށްފައިވެ އެވެ. މީގެއިތުރުން 1 ފެބްރުއަރީ 2018 ގައި ސުޕްރީމް ކޯޓުން ނެރުނު އަމުރަކާ ގުޅިގެން ކުއްލި ނުރައްކަލުގެ ހާލަތު އިއުލާނުކޮށް ފަނޑިޔާރުން ހައްޔަރުކުރި އެވެ. އަދި ދިވެހި އަސްކަރިއްޔާއިން ސުޕްރީމް ކޯޓުގެ ތެރެއަށް ޓިނު ނަގައިގެން ވަދެ އޭރުގެ އުއްތަމަ ފަނޑިޔާރު އަބްދުﷲ ސައީދު އާއި އޭރު އެ ކޯޓުގައި ހުންނެވި އެންމެ އިސް ފަނޑިޔާރު އަލީ ހަމީދު ހައްޔަރު ކުރީ 2018 ވަނަ އަހަރުގެ ފެބްރުއަރީ މަހުގެ 6 ވަނަ ދުވަހު އެވެ.
ރައީސް މުއިއްޒު، ކުރީގެ ރައީސް ޔާމީންގެ ވެރިކަމުގައި ހިނގާދިޔަ ކަންކަމަށް އިޝާރާތް ކުރައްވައި ވާހަކަފުޅު ދެއްކެވިއިރު، އޭރު އެމަނިކުފާނު ހުންނެވީ ހައުސިން މިނިސްޓަރުކަމުގެ މަގާމުގައި އެސަރުކާރު ދިފާއު ކުރެއްވުމުގަ އެވެ. އަދި ރައީސް މުއިއްޒު ވެރިކަމަށް ވަޑައިގެންނެވީ ވެސް ޔާމީންގެ އޭރުގެ ޕާޓީ ޕީޕީއެމްގެ ޓިކެޓްގައި، ޔާމީންގެ ފޮޓޯފުޅު ދައްކަވައިގެންނެވެ.
