އީގަލްސް ހިލްސް އިން 5000 ހައުސިންގ ޔުނިޓް ހިލޭ އަޅައިދޭ ކަމަށް ބުނުމަކީ ބޮޑު އޮޅުވާލުމެއް!

ސިއްރު ޑީލެއްގެ ދަށުން ޔޫއޭއީގެ އީގަލްސް ހިލްސް އަށް ރައީސް މުހައްމަދު މުއިއްޒުގެ ސަރުކާރުން، ރަސްމާލެއިން ހިލޭ ދިން 500 ހެކްޓަރުގެ މާ ސިންގާ ބިމުގެ މައްސަލަ ހޫނުވުމުން އެ މަޝްރޫއު ޖަސްޓިފައި ކުރުމުގެ ގޮތުން، ސަރުކާރުން ވަނީ، އެ ކުންފުނިން މުޅިން ހިލޭ 5،000 ހައުސިންގ ޔުނިޓް އަޅައިދޭ ކަމަށް ބުނެފަ އެވެ. އަދި ރައީސް މުއިއްޒުގެ ސަރުކާރު ޕްރޮމޯޓް ކުރާ އެކްޓިވިސްޓުން ސޯޝަލް މީޑިއާގައި ގެންދަނީ އެ ވާހަކަތައް އެ ގޮތަށް ފަތުރަމުންނެވެ. އެހެން ކަމުން މިކަމުގެ ހަގީގަތް ސާފުކުރުމުގެ ގޮތުން ކަން އޮތް ގޮތް ބަލާލުން މުހިންމު ކަމެއް ކަމުގައި ފެނެ އެވެ.

5,000 ހައުސިންގ ޔުނިޓް ހިލޭ އަޅައިދޭ ކަމުގެ ހަގީގަތް

ސަރުކާރުން ކުރިން ދެއްކި ވާހަކަތަކުން މިއީ ދައުލަތުގެ ބަޖެޓުން އެއްވެސް ޚަރަދެއް ނުގޮސް ހިލޭ ލިބޭ އެއްޗެއްގެ ގޮތުގައި ސިފަވި ނަމަވެސް، ފަހުން ހާމަވި މައުލޫމާތުތަކުން އެނގޭ ގޮތުގައި މިއީ މުޅިން ހިލޭ ލިބޭ އެއްޗެއް ނޫނެވެ. މީގެ އަސްލު ހަގީގަތަކީ:

ކޮންޓްރެކްޓަރ ފައިނޭންސް މޮޑެލް

ހުޅުމާލޭގައި އަޅާ މި 5,000 ހައުސިންގ ޔުނިޓަކީ އީގަލް ހިލްސްއިން އަމިއްލަ ޚަރަދުގައި (ގާތްގަނޑަކަށް 400 އިން 500 މިލިއަން ޑޮލަރު) އިންވެސްޓްކޮށްގެން އަޅާ ތަންތަނެވެ. ސަރުކާރުން ވަގުތުން ފައިސާ ދައްކާކަށް ނުޖެހެ އެވެ. އެހެން ނަމަވެސް މިއީ މުޅިން ހިލޭ ކުރާ މަސައްކަތެއްގެ ގޮތުގައި ބުނެ ފުއްދާލެވެން ނެތީ، މިކަމަށް ހިނގާ ޚަރަދު ހަމަޖައްސާނެ ގޮތް ހައުސިންގ މިނިސްޓަރުގެ އަމިއްލަ ބަހުން އާންމު ކުރައްވާފައިވާތީ އެވެ.

އަގު އަދާކުރާނެ ގޮތް (އޮފްސެޓް ކުރުން)

ހައުސިންގ މިނިސްޓަރު ޑރ. އަބްދުﷲ މުއްތަލިބު ލިންކްޑިންގައި ހާމަކުރެއްވި ގޮތުގައި، މި ފްލެޓްތަކުގެ އަގު ދައުލަތުން ދައްކާނީ ރަސްމާލޭގެ މުސްތަގުބަލުގެ ތަރައްގީން ސަރުކާރަށް ލިބެން އޮތް 10 އިންސައްތައިގެ ރެވެނިއު ޝެއަރ (އާމްދަނީގެ ބައި) ދޫކޮށްލައިގެންނެވެ. އެހެންކަމުން، މިއީ ދައުލަތަށް ކުރިއަށް އޮތް ތަނުގައި ލިބެން އޮތް އާމްދަނީއަކުން އުނިކޮށްގެން ފަންޑުކުރާ ތަންތަނެވެ. މިތަންތަނަށް ކުރާ ބޮޑު ހޭދަ އަށް ކެނޑުމުން އީގަލް ހިލްސް މަޝްރޫއުން ދައުލަތުގެ ބަޖެޓަށް އެއްޗެއް ވަންނާނީ ކޮން ޒަމާނަކުން ކަމެއް ސާފެއް ނޫނެވެ.

ސަރުކާރުގެ ގެރެންޓީއެއް ނެތް

ސަރުކާރުން ބުނާގޮތުގައި މީގެ ފައިސާ އަނބުރާ ދެއްކުމަށް ދައުލަތުން އެއްވެސް "ސޮވެރިން ގެރެންޓީ" އެއް ނުވަތަ ލޯނެއް ނަގާފައެއް ނުވެ އެވެ. ފްލެޓްތައް ނިމުމުން އެ ތަންތަން ވިއްކައިގެން ލިބޭ ފައިސާއިން ޚަރަދުތައް ކަވަރުކުރާނެ ކަމަށް މިނިސްޓަރު ވިދާޅުވެފައިވެ އެވެ. ސަރުކާރުން އެއްވެސް ގެރެންޓީ އެއް ދީފައި ނުވާ އިރު، 500 ހެކްޓަރުގެ ބިން އެއްވެސް އެއްޗެއް އަޕް ފްރަންޓް ކޮށް ނުލިބޭ ގޮތަށް ދީފައި، އެމީހުންނަށް އެތަންތަނުން ވިޔަފާރިކޮށްގެން މަންފާ ހޯދޭ ގޮތަށް  އޮތުމަކީ ކުޑަ ގެރެންޓީއެއްތޯ އެވެ.

ޚުލާސާއަކީ، މަޝްރޫއު ފެށުމަށް ދައުލަތުގެ ބަޖެޓުން ސީދާ ފައިސާ ނުދިޔަ ކަމުގައި ވިޔަސް، މިއީ ރާއްޖޭގެ އެންމެ އަގުބޮޑު ބިންތައް 99 އަހަރަށް ދީގެން އަދި ގައުމަށް މުސްތަގުބަލުގައި ލިބެން އޮތް އާމްދަނީން އުނިވާ ގޮތަށް ހިންގާ އަގު ބޮޑު "ބާޓަރ" ނުވަތަ ބަދަލުކުރުމުގެ މުއާމަލާތެކެވެ.