އެމެރިކާގެ ބޮންއަޅާ ބޯޓުތައް ގެންދިޔުމުން އިނގިރޭސިވިލާތަށް އޮތް ނުރައްކާ ފިލައިފި: ޑައުނިންގ ސްޓްރީޓް

އިނގިރޭސިވިލާތުގެ ގްލޮސްޓެޝަރގައި ހުންނަ އެމެރިކާގެ އަސްކަރިއްޔާއިން ބޭނުންކުރަމުން ދިޔަ ރޯޔަލް އެއާ ފޯސް (އާއޭއެފް) ފެއާފަރޑް ބޭހުގައި ހުރި އެމެރިކާގެ ބޮންއަޅާ މަތިންދާބޯޓުތައް ގެންދިޔަ ފަހުން އެ ތަނަށް އޮތް ނުރައްކާތައް ފިލާފައިވާ ކަމަށް، އިނގިރޭސިވިލާތުގެ ބޮޑުވަޒީރުގެ އޮފީސް، ނަންބަރ 10 ޑައުނިންގ ސްޓްރީޓުން ބުނެފި އެވެ.

ފެއާފަރޑް ބޭހުގައި ބީ-1 މަރުކާގެ ބޮންއަޅާ 12 މަތިންދާބޯޓު ކުރިން އޮތެވެ. އަދި، އީރާނާ ދެކޮޅަށް ކުރަމުންދާ ޣައިރުގާނޫނީ ހަނގުރާމައިގައި އެމެރިކާއިން ދިޔައީ އެ ބޯޓުތައް ބޭނުން ކުރަމުންނެވެ. ނަމަވެސް، އެ މަރުކަޒަށް އޮތް ސަލާމަތީ ކަންބޮޑުވުންތަކާ ގުޅިގެން، އެ މަތިންދާބޯޓުތައް އަނބުރާ އެމެރިކާގެ އަސްކަރީ މަރުކަޒުތަކަށް ގެންގޮސްފައިވާ ކަން ޕެންޓަގަންއިން ވަނީ އާދީއްތަ ދުވަހު ކަށަވަރު ކޮށްދީފަ އެވެ. މި ބޯޓުތައް އަނބުރާ ގެންގޮސްފައި ވަނީ އެ ބޭހަށް އަމާޒުކޮށް ދިން އިންޒާރަކާ ގުޅިގެން ކަމަށް އެމެރިކާގެ ނޫސްތަކުން ރިޕޯޓުކުރި އެވެ.

Advertisement

މި ފިޔަވަޅު އަޅާފައި މި ވަނީ، އިނގިރޭސިވިލާތުގެ ހުޅަނގުގައި ހުންނަ އާރްއޭފްއެފް ފެއާފަރޑް ކައިރިން "ޝައްކުކުރެވޭ ތިން އުޅަނދެއް" ފެނިގެން ސެޕްޓެންބަރ 27 ވަނަ ދުވަހު ފުލުހުންނަށް ރިޕޯޓުކޮށްފައި ވަނިކޮށެވެ. ބީބީސީއަށް މައުލޫމާތު ދެއްވަމުން ނަންބަރ 10 ގެ ތަރުޖަމާނަކު ވިދާޅުވީ، "ބޭރު ގައުމުތަކުގެ އަސްކަރީ އޮޕަރޭޝަންތަކާ" ގުޅޭގޮތުން ވަކި އެއްޗެއް ހާމަނުކުރާނެ ކަމަށާއި، ނަމަވެސް އާރްއޭފް ފެއާފަރޑްގެ ރައްކާތެރިކަން ކަށަވަރުވެފައިވާ ކަމަށެވެ. މާނައަކީ، އެ ތަނަށް އޮތް ނުރައްކާތައް މިހާރު ފިލާފައިވާކަން ކަމަށް މަސްރަހު ދިރާސާކުރާ ފަރާތްތަކުން ދެކެ އެވެ.

ނިމިދިޔަ ހަފްތާގައި އެމެރިކާގެ ރައީސް ޑޮނަލްޑް ޓްރަމްޕް ދެއްކެވި ވާހަކަފުޅުތަކަށް ވެސް ތަރުޖަމާނު އަލިއަޅުވާލި އެވެ. އެ މައްސަލައާ ގުޅިގެން ޓްރަމްޕް ވަނީ "އަޅުގަނޑުމެންގެ [އިނގިރޭސިވިލާތުގެ] ފުލުހުންނާއި، ދިފާއީ އަދި ސަލާމަތީ ހިދުމަތްތަކަށް ތައުރީފުކުރައްވާފައި" ތަރުޖަމާނު ފާހަގަކުރި އެވެ.

ބޮމް އަޅާ ބޯޓުތައް އާރްއޭއެފް ފެއާފަރޑުން ގެންދިއުމަށް ނިންމި ނިންމުމާއި، މިދިޔަ ހަފްތާގައި ހިނގާދިޔަ ހާދިސާއާ ސީދާ ގުޅުމެއްވާކަމަށް ނުދެކޭކަމަށް އެމެރިކާގެ ޚާރިޖީ ވަޒީރު މާކޯ ރޫބިއޯ ހޯމަ ދުވަހު ވަނީ ވިދާޅުވެފަ އެވެ. "ތަމްރީނުތަކާއި، އަލުން ރުކުރުވާލުމާއި، މީހުން ބަދަލުވުމާއި، އާ މީހުންނާއި އާ ބޯޓުތައް އައުމުގެ އިތުރުން ބާ ބޯޓުތައް ގެންދިއުމުގެ މައްޗަށް ބިނާކޮށް، ދުނިޔޭގެ އެކި ކަންކޮޅުތަކަށް ވަސީލަތްތައް ބަދަލުކުރުމަކީ އާދަޔާ ހިލާފު ކަމެއް ނޫން،" ރޫބިއޯ ވިދާޅުވި އެވެ.

އަދި، އެމެރިކާގެ ހުރިހާ ބޭސްތަކެއްގެ ރައްކާތެރިކަމާމެދު އެ ގައުމުން ފުރިހަމައަށް އިތުބާރުކުރާ ކަމަށާއި، މި ހާދިސާއަށްފަހު އިނގިރޭސިވިލާތުގެ ކަމާބެހޭ ފަރާތްތަކުން ވަރަށް ބޮޑަށް އެއްބާރުލުން ދީފައިވާ ކަމަށް އޭނާ ވިދާޅުވި އެވެ.

މި ހާދިސާއާ ގުޅިގެން ޓެރަރިޒަމްގެ ކުށްތަކުގެ ތުހުމަތުގައި ފަސް ފިރިހެނަކު ހައްޔަރުކުރި އެވެ. ނަމަވެސް، ފަހުން އެ މީހުން ވަނީ ކަފާލާތުގެ ދަށުން ދޫކޮށްލާފަ އެވެ. އަދި، މީގެ އިތުރުން އިނގިރޭސިވިލާތާއި އީރާނުގެ ރައްޔިތުކަން އޮންނަ ހަވަނަ ފިރިހެނަކު ވެސް ފަހުން ހައްޔަރުކޮށް، ކަފާލާތުގެ ދަށުން ވަނީ ދޫކޮށްލާފަ އެވެ.

ބީބީސީގެ ރިޕޯޓެއްގައި ބުނީ، ބީ-1 ބޯޓުތައް އާރްއޭއެފް ފެއާފަރޑުން ގެންދިޔުމުގެ ނިންމުމަކީ ސިޔާސީ ނިންމުމަކަށްވުރެ ބޮޑަށް އަސްކަރީ އޮޕަރޭޝަނަލް ލެވެލްގައި ނިންމާފައިވާ ނިންމުމެއް ކަމަށެވެ. އަދި، މި ކަން އެމެރިކާގެ އަސްކަރިއްޔާއިން އިނގިރޭސިވިލާތުގެ އަސްކަރިއްޔާއަށް އަންގާފައިވާ ކަމަށް ވެސް އެ ރިޕޯޓުގައި ބުނެފައިވެ އެވެ.