އިނގިރޭސިވިލާތުގެ އެއާބޭހަކަށް ދޭން އުޅުނުކަމަށް ބުނާ ހަމަލާއާ އީރާނާ ގުޅުވައިފި، ނަމަވެސް އެއްވެސް ގޮވާއެއްޗެއް ނުފެނޭ
1 އޮކްޓޯބަރު 2026 | ބުރާސްފަތި 09:42އިނގިރޭސިވިލާތުގައި ހުންނަ އެމެރިކާގެ އަސްކަރިއްޔާއިން ބޭނުންކުރާ މަރުކަޒަކަށް ހަމަލާދޭން އުޅުނު ކަމުގެ ތުހުމަތުގައި ހައްޔަރުކުރި ފަސް މީހުން ކަފާލާތުގެ ދަށުން ދޫކޮށްލުމާ ގުޅިގެން އެމެރިކާގެ އިސް އޮފިޝަލުން ވަނީ ކަންބޮޑުވުން ފާޅުކޮށްފައި. މި ހާދިސާގެ ތަހުގީގު ކުރިއަށްދާއިރު، މިއީ ބޭރު ގައުމެއްގެ ނުފޫޒުން ހިންގި އަމަލެއްތޯ ބަލަމުންދާ ކަމަށް އިނގިރޭސި ފުލުހުން ބުނޭ
އާރްއޭއެފް ފެއާފަޑް އަސްކަރީ މަރުކަޒުން އެމެރިކާގެ އަސްކަރިއްޔާގެ ބީ1 މަރުކާގެ ބޮންއަޅާ މަތިންދާބޯޓެއް ފުރުމަށް ތައްޔާރުވަނީ | އޭޕީ
އިނގިރޭސިވިލާތުގައި ހުންނަ އެމެރިކާގެ އަސްކަރިއްޔާއިން ބޭނުންކުރާ ރޯޔަލް އެއާ ފޯސް (އާރްއޭއެފް) ފެއާފަޑް އަސްކަރީ މަރުކަޒަށް ދޭން އުޅުނުކަމަށް ބުނާ ހަމަލާގައި އީރާނުގެ ބައިވެރިވުމެއް އޮތްކަމުގެ "ވަރުގަދަ ނިޝާންތަކެއް" ފެންނަން ހުރިކަމަށް އިނގިރޭސިވިލާތުގެ ބޮޑުވަޒީރު އެންޑީ ބަރނަމް ވިދާޅުވެއްޖެ އެވެ. މި ކަމާ ގުޅިގެން އީރާނުން ވަނީ މި ތުހުމަތުތައް ދޮގުކޮށްފަ އެވެ.
އާރްއޭފް ފެއާފަޑް މަރުކަޒަށް ހަމަލާދިނުމަށް ރާވަމުންދިޔަ ކަމަށް ބެލެވޭ ރޭވުމުގެ ތަހުގީގުތައް އަދިވެސް ކުރިއަށްދާ ކަމަށް، ބުދަ ދުވަހު ބީބީސީއަށް ދެއްވި އިންޓަވިއުއެއްގައި ބަރނަމް ވިދާޅުވި އެވެ. ޓެރަރިޒަމާއި ގޮވާތަކެތީގެ ކުށްތަކުގެ ތުހުމަތުގައި، އުމުރުން 20 ގެ އަހަރުތަކުގެ ފަސް ފިރިހެނުން އާދީއްތަ ދުވަހު އެ މަރުކަޒު ކައިރިން ހައްޔަރުކުރި އެވެ. އޭގެ އެއް ދުވަސް ފަހުން އެ ހުރިހާ އެންމެން ވަނީ ކަފާލާތުގެ ދަށުން ދޫކޮށްލާފަ އެވެ. އެއީ، އިނގިރޭސިވިލާތުގެ ރައްޔިތުންނެވެ.
"މިދިޔަ ހަފުތާ ބަންދުގައި އާރްއޭއެފް ފެއާފަޑްގައި ހިނގި ހާދިސާގައި އީރާނުގެ ބައިވެރިވުމެއް އޮތް ކަމުގެ ވަރުގަދަ ނިޝާންތަކެއް އެބަހުރި، ނަމަވެސް މިއީ އަދިވެސް ކުރިއަށްދާ، އުނދަގޫ އަދި ސީރިއަސް ފުލުހުންގެ ތަހުގީގެއް،" ބަރނަމް ވިދާޅުވި އެވެ. "އަޅުގަނޑުމެން މި ދަނީ އެމެރިކާގެ އެކުވެރިންނާއެކު ވަރަށް ގާތުން މަސައްކަތް ކުރަމުން."
ތުހުމަތު ކުރެވޭ މީހުން ރާވަމުންދިޔައީ ކޮން ކަމެއް ކަން، ނުވަތަ މި ކަމުގައި އީރާނުގެ އަތެއް ވާކަމަށް އިނގިރޭސިވިލާތުން ގަބޫލުކުރާ ސަބަބުގެ އެއްވެސް ތަފްސީލެއް އޭނާ ނުދެއްވަ އެވެ. ނަމަވެސް، "މުނާސަބު ވަގުތެއްގައި އިތުރު މައުލޫމާތު ހާމަކުރައްވާނެ" ކަމަށް ބޮޑުވަޒީރު ވިދާޅުވި އެވެ.
ބަރނަމްގެ މި ތުހުމަތުތަކަކީ، އެ މަރުކަޒުގައި ހިނގި ހާދިސާތަކާއި އީރާނާ ގުޅުވައިގެން އިނގިރޭސިވިލާތުގެ ރަސްމީ ފަރާތަކުން ފާޅުގައި ވާހަކަދެއްކެވި ފުރަތަމަ ފަހަރެވެ. ނަމަވެސް، އީރާނުން ވަނީ މި ހާދިސާގައި އެ ގައުމުގެ އެއްވެސް ބައިވެރިވުމެއް އޮތްކަން ދޮގުކޮށްފަ އެވެ. އަދި، ބަރނަމްގެ ތުހުމަތުތަކަށް ރައްދު ދެއްވައި، އީރާނުގެ ޚާރިޖީ ވަޒީރު އައްބާސް އިރާގިޗީ ވަނީ އެކްސްގައި މެސެޖެއް އާންމުކުރައްވާފަ އެވެ.
"އާރްއޭއެފް ފެއާފަޑްގެ ހާދިސާގައި އީރާނުގެ ބައިވެރިވުމެއް އޮތްކަމަށް އިނގިރޭސި ސަރުކާރަށް ގަބޫލުކުރެވޭކަން ޔަގީންކޮށްދޭކަމަށް ބޮޑުވަޒީރު ބަރނަމް އެބަ ވިދާޅުވޭ،" އިރާގިޗީ ލިޔުއްވާފައިވެ އެވެ. "ބޭރު ގައުމުތަކަށް މަސައްކަތްކޮށްދޭ ކަމަށް ބެލެވޭ ޓެރަރިސްޓުން ދޫކޮށްލުމުން ހުރިހާ ވާހަކައެއް ހާމަވެގެން ހިނގައްޖެކަން އީރާނަށް ވެސް ޔަގީންކޮށްދެވިދާނެ. ތިޔަ އުޅެނީ މުޅިން ގޯސް މިސްރާބަކަށް."
ލަންޑަނުގެ ހުޅަނގުން 160 ކިލޯމީޓަރު ދުރުގައި އޮންނަ އާރްއޭއެފް މަރުކަޒަކީ، މެދުއިރުމަތީގެ ގައުމުތަކާ ދެކޮޅަށް އެމެރިކާއިން ކުރަމުންދާ ހަނގުރާމަތަކުގައި ބޭނުންކުރާ އަސްކަރީ މަތިންދާބޯޓުތައް ބެހެއްޓުމަށް، އަދި އޮޕަރޭޝަންތައް ކުރިއަށް ގެންދިޔުމަށް އެމެރިކާއިން ބޭނުންކުރާ މަރުކަޒެކެވެ. މީގެ ތެރޭގައި ފެބުރުވަރީ މަހު އީރާނާ ދެކޮޅަށް އެމެރިކާއާއި އިސްރާއީލުން ގުޅިގެން ފެށި ހަނގުރާމަ ވެސް ހިމެނެ އެވެ. އީރާނުގެ ސަރަހައްދަށް ހަމަލާދިނުމަށް ބޭނުންކުރާ ކޮންމެ މަރުކަޒަކީ ހަމަލާދިނުން ހުއްދަ އަމާޒެއް ކަމަށް އީރާނުގެ އިސްލާމިކް ރިވޮލޫޝަނަރީ ގާޑް ކޯއިން (އައިއާރްޖީސީ) ވަނީ ބުނެފަ އެވެ.
ގޮވާތަކެތި ނައްތާލާ ޓީމެއް ބޭނުންކޮށްގެން ތިން ދުވަސް ވަންދެން ކުރި ތަހުގީގުތަކަށްފަހު، އަންގާރަ ދުވަހު ފުލުހުން ބުނީ އުޅަނދުތަކުން އެއްވެސް ގޮވާ އެއްޗެއް ފެނިފައިނުވާ ކަމަށެވެ. ނަމަވެސް، އެ ތަނުން ގިނަ އަދަދެއްގެ "ޕެޓްރޯލް" ފެނިފައިވާ ކަމަށް ފުލުހުން ބުނެފައިވެ އެވެ.
މިއާއެކު، ތުހުމަތު ކުރެވޭ މީހުން ކަފާލާތުގެ ދަށުން ދޫކޮށްލަން ނިންމި ނިންމުމަށް އެމެރިކާގެ އިސް އޮފިޝަލުން ވަނީ ފާޑުވިދާޅުވެފަ އެވެ. ރައީސް ޑޮނަލްޑް ޓްރަމްޕް ވިދާޅުވީ "އަޅުގަނޑު އެ ގޮތަށް އެ ކަން ނުކުރީމުސް" ކަމަށެވެ. އަދި، އެ ނިންމުމުގެ ސަބަބުން ގިނަ ބަޔަކު "ކަންބޮޑުވެފައިވާ" ކަމަށް އެމެރިކާގެ ޚާރިޖީ ވަޒީރު މާކޯ ރޫބިއޯ ވެސް ވަނީ ވިދާޅުވެފަ އެވެ.
އިނގިރޭސިވިލާތުގެ ކައުންޓަރ ޓެރަރިޒަމް ފުލުހުންގެ އިސްވެރިޔާ ލޯރެންސް ޓެއިލާ އަންގާރަ ދުވަހު ވިދާޅުވީ، ތުހުމަތު ކުރެވޭ މީހުންގެ ތަހުގީގު އަދިވެސް ކުރިއަށްދާ ކަމަށާއި، ކަފާލާތުގެ ދަށުން ދޫކޮށްލަން ނިންމީ "ތަޖުރިބާ އާއި އިސްތިރާޖު" ގެ މައްޗަށް ބިނާކޮށް ކަމަށެވެ. މިއީ، "ބޭރު ގައުމަކަށް، އެނގިގެން ނުވަތަ ނޭނގި ނަމަވެސް، މަސައްކަތްކޮށްދޭ ބަޔަކު ނުވަތަ ވަކި ފަރުދުންތަކެއް" ހިންގި އަމަލެއްތޯ ބެލުމަކީ ތަހުގީގުގެ އެއް މިސްރާބު ކަމަށް ވެސް އޭނާ ވިދާޅުވި އެވެ.
އާދީއްތަ ދުވަހުގެ ހާދިސާތަކުގެ ސިއްރުވެރިކަން އިތުރުވެގެންދިޔައީ، މި ހާދިސާގައި ތުހުމަތުކުރެވޭ އެކަކު، ހާދިސާ ހިނގުމުގެ ކުޑަ ވަގުތުކޮޅެއް ކުރިން އެމަޖެންސީ ޚިދުމަތްތަކަށް ގުޅުމުން ކަމަށް އެމެރިކާގެ ނޫހެއް ކަމަށްވާ ދި ޓައިމްސްއިން ރިޕޯޓުކޮށްފައިވެ އެވެ.
"މިއީ ސަރވޭލަންސްއެއް ކަމަށް ވިޔަސް، ސެކިއުރިޓީ ޓެސްޓު ކުރުމަށް ކުރި 'ޑްރައި ރަން' އެއް ކަމަށް ވިޔަސް، ނުވަތަ އިނގިރޭސި ސަރުކާރަށް މެސެޖެއް ދިނުމަށް ކުރި ކަމެއް ކަމަށް ވިޔަސް، މި ހުރިހާ ކަމަކަށް ވެސް ދަނީ ވިސްނަމުން،" ދި ޓައިމްސް އިން ރިޕޯޓުކޮށްފައިވެ އެވެ. އަދި، އޭނާ ފަހު ވަގުތު ފަސްޖެހުނީ ކަމެއް ނުވަތަ އެއީ ރޭވުމުގެ ބައެއް ކަމެއް ތަހުގީގުކުރާ ފަރާތްތަކަށް ޔަގީން ނުވާ ކަމަށް ވެސް އެ ނޫހުގައި ބުނެފައިވެ އެވެ. ނަމަވެސް، އެ ނޫހުން އެއްވެސް މަސްދަރެއް ހާމަކޮށްފައެއް ނުވެ އެވެ. ތުހުމަތު ކުރެވޭ މީހުންގެ ތެރެއިން އެކަކުގެ ފޯނު ކޯލާމެދު އެއްވެސް އެއްޗެއް ބުނުމަށް ފުލުހުން ވަނީ ދެކޮޅު ހަދާފަ އެވެ.
މަސްދަރު: އަލް ޖަޒީރާ
