އާރްއޭއެފް ފެއާފަޑް ކައިރިން ޓެރަރިޒަމްގެ ތުހުމަތުގައި ހައްޔަރުކުރި ފަސް މީހުން ދޫކޮށްލައިފި
29 ސެޕްޓެމްބަރު 2026 | އަންގާރަ 06:05އިނގިރޭސިވިލާތުގެ އަސްކަރީ މަރުކަޒެއް ކައިރިން ޓެރަރިޒަމްގެ ތުހުމަތުގައި ހައްޔަރުކުރި ފަސް މީހުންގެ މައްޗަށް ބޭރު ގައުމެއްގެ ނުފޫޒު އޮތްތޯ ބަލަމުންދާއިރު، އެމެރިކާގެ އިސްވެރިން ވަނީ މިކަމާ ކަންބޮޑުވުން ފާޅުކޮށްފައި. މި ހާދިސާއާ ގުޅިގެން ސަލާމަތީ ފިޔަވަޅުތައް ވަރުގަދަކޮށްފައިވާއިރު، އީރާނުން ވަނީ މިކަމުގައި އެ ގައުމުގެ ބައިވެރިވުމެއް އޮތް ކަމަށް ކުރެވޭ ތުހުމަތުތައް ދޮގުކޮށްފައި
އާރްއޭއެފް ފެއާފަޑް އަސްކަރީ އެއާޕޯޓު ކައިރީގައި ހަތިޔާރުއެޅި ފުލުހުން ފޯރިމަރަނީ | ގެޓީ އިމޭޖަސް
އިނގިރޭސިވިލާތުގެ ރޯޔަލް އެއާ ފޯސް (އާރްއޭއެފް) ފެއާފަޑް އަސްކަރީ ވައިގެ މަރުކަޒު ކައިރިން ޓެރަރިޒަމްގެ ތުހުމަތުގައި ހައްޔަރުކުރި ފަސް ފިރިހެނުން، ކަފާލާތުގެ ދަށުން ދޫކޮށްލާފައިވާ ކަމަށް އެ ގައުމުގެ ކައުންޓަ-ޓެރަރިޒަމް ފުލުހުން ހާމަކޮށްފި އެވެ.
ގްލޮސްޓެޝާގައި ހުންނަ އެ އަސްކަރީ އެއާޕޯޓު ކައިރީގައި "ޝައްކުކުރެވޭ އުޅަނދުތަކެއް" ހަރަކާތްތެރިވަމުންދާ ކަމުގެ މައުލޫމާތު އާދީއްތަ ދުވަހުގެ ފަތިހުގެ ވަގުތެއްގައި ފުލުހުންނަށް ލިބުމާ ގުޅިގެން، ކުއްލި ނުރައްކަލުގެ ހާލަތެއް އިއުލާނުކޮށް، އެ ސަރަހައްދުގެ ގިނަ އަދަދެއްގެ ގެތަކެއް ހުސްކުރި އެވެ. މި ހާދިސާއާ ގުޅިގެން ކައުންޓަ ޓެރަރިޒަމް ޕޮލިސިންގއިން (ސީޓީޕީ) ބުނީ، ބޭރުގެ ގައުމެއްގެ ފަރާތުން މަސައްކަތްކުރާ ޕްރޮކްސީން ނުވަތަ ފަރުދުން މި ކަމުގައި ބައިވެރިވެފައިވޭތޯ ބެލުން ހިމެނޭހެން، "ތަހުގީގުގެ އެކި ދިމަދިމާލަށް" ވިސްނުން ބަހައްޓަމުންދާ ކަމަށެވެ.
ހައްޔަރުކުރި ފަސް މީހުންނަކީ ވެސް ލަންޑަނަށް ނިސްބަތްވާ، އުމުރުން 20 ގެ އަހަރުތަކުގެ އިނގިރޭސިވިލާތުގެ ރައްޔިތުން ކަމަށް ފުލުހުން ހާމަކުރި އެވެ. ފުލުހުން ބުނީ، އުމުރުން 23 އަހަރާއި 25 އަހަރާ ދެމެދުގެ މި މީހުންގެ ތެރެއިން ތިން މީހުންނަކީ ވެސްޓްމިންސްޓާގައި ދިރިއުޅޭ މީހުން ކަމަށާއި، އަނެއް ދެ މީހުން ދިރިއުޅެނީ ކެމްޑަން އަދި ވިލްސްޑަންގައި ކަމަށް ފުލުހުން ފާހަގަކުރި އެވެ.
އެ މީހުން ފުރަތަމަ ހިފައްޓާފައި ވަނީ ގޮވާތަކެއްޗާ ބެހޭ ގާނޫނުގެ ދަށުން ކުށަކަށް އަރައިގަތް ކަމުގެ ތުހުމަތުގަ އެވެ. އަދި، އޭގެ ފަހުން އެ މީހުން ހައްޔަރުކޮށްފައި ވަނީ ޓެރަރިޒަމްގެ އަމަލެއް ހިންގަން ތައްޔާރުވި ކަމުގެ ތުހުމަތުގަ އެވެ. ކައުންޓަ-ޓެރަރިޒަމް ފުލުހުން ބުނީ، އެ މީހުންގެ މައްޗަށް އަދިވެސް ތަހުގީގު ހިނގަމުންދާއިރު، އެ މީހުން ދޫކޮށްލާފައިވަނީ "އެ މީހުން ދަތުރުފަތުރުކުރުމާއި އެހެން މީހުންނާ މުއާމަލާތުކުރުމުގައި ހަރުކަށި ޝަރުތުތަކަކާއެކު" ކަމަށެވެ.
މޫނު ނިވާކޮށްގެން ތިބި މީހުން ފެނުނު ކަމަށް ރިޕޯޓްކުރީ ދަނޑުވެރިއެއް
އާރްއޭއެފް ފެއާފަޑްގެ އިރުމަތީ ފަރާތުގައި އޮންނަ ވެލްފަޑްގައި ހުދު ކުލައިގެ ތިން ވޭނެއް، ޝައްކުރެވޭ ގޮތަކަށް ދަތުރުކުރަމުންދިޔަ ކަމަށް ބުނެ ކުއްލި ހާލަތްތަކުގައި ގުޅަންޖެހޭ ނަންބަރު 999 އަށް ގުޅާފައި ވަނީ އެ ސަރަހައްދުގެ ދަނޑުވެރިއެކެވެ. އޭނާ ބުނީ، އެ އުޅަނދުތައް އޭނާއަށް ފެނުނީ "ނަސީބުން" ކަމަށެވެ. ނަން ހާމަނުކުރުމަށް އެދުނު އެ އަންހެން މީހާ ބުނީ، އޭނާ އެނބުރި ގެއަށް އައިއިރު ގޯތިތެރެއަށް ވަންނަ މަގާއި މަގުމަތި ބަންދުވެފައި އޮތް ކަމަށާއި، "މޫނު ނިވާކޮށްގެން ތިބި ގިނަ އަދަދެއްގެ ފިރިހެނުން" ފެނުނު ކަމަށެވެ.
ބީބީސީ ރޭޑިއޯ 4 ގެ ޓުޑޭ ޕްރޮގްރާމަށް މައުލޫމާތު ދެމުން އޭނާ ބުނީ، "އެ މީހުންނަށް އަޅުގަނޑު ފެނުމުން އަޅުގަނޑުގެ ކުރިމަތިން ދުއްވައިގަތް. ބައެއް މީހުން ދަނޑުތަކުގެ ތެރެއަށް، އަދި އަނެއް ބަޔަކު ކައިރީގައި އޮންނަ ކެމްޕްސްފަޑް އަވަށާ ދިމާއަށް. އެ ހިސާބުން އަޅުގަނޑަށް ވިސްނުނީ އާދަޔާ ޚިލާފު ކަމެއް ހިނގަމުންދާކަން،" ކަމަށް އޭނާ ބަޔާންކުރި އެވެ. އޭނާ ބުނީ، އާރްއޭއެފް ފެއާފޯޑަގައި ހުންނަ ދިފާއީ ވުޒާރާގެ ފުލުހުންނަށް އޭނާ ގުޅި ކަމަށާއި، ނަމަވެސް އެއްވެސް ޖަވާބެއް ނުލިބުނު ކަމަށެވެ. ދެން އޭނާ 999 އަށް ގުޅުމުން، "10 މިނެޓުގެ ތެރޭގައި އެ އަވަށަށް ހަތިޔާރު އެޅި ފުލުހުން އައި" ކަން އޭނާ ހާމަކުރި އެވެ. އަދި، "އަޅުގަނޑު ގަބޫލުކުރާ ގޮތުގައި 999 އަށް އަޅުގަނޑު ކުރި ކޯލުގެ ސަބަބުން އެ މީހުން ރާވާފައިވާ ކޮންމެ ކަމެއް ވެސް ވަނީ ފޭލުކޮށްލެވިފައި،" ކަމަށް ވެސް އޭނާ ބުންޏެވެ.
ތަހުގީގާއި ބޭރުގެ ފަރާތްތަކުގެ ބައިވެރިވުން
ކައުންޓަ ޓެރަރިޒަމް ފުލުހުންގެ ވެރިޔާ އެސިސްޓެންޓް ކޮމިޝަނާ ލޯރެންސް ޓޭލާ ހޯމަ ދުވަހު ވިދާޅުވީ، ޝައްކުކުރެވޭ ތިން އުޅަނދު ވަނީ "އަސްކަރީ ވަސީލަތްތަކާއި ފޮރެންސިކް މާހިރުންގެ އެހީތެރިކަމާއެކު ތަހުލީލުކޮށްފައި" ކަމަށެވެ. އޮފިސަރުން މި ހާދިސާ ބަލަމުން ދަނީ "ބެލެން އޮތް ހުރިހާ ދިމާއަކުން" ކަމަށާއި، އޭގެ ތެރޭގައި "މިއީ ބޭރުގެ ގައުމެއްގެ ފަރާތުން ހަރަކާތްތެރިވާ ޕްރޮކްސީން، ނުވަތަ އެނގިގެން ވިޔަސް ނޭނގި ވިޔަސް އެ ފަދަ ގައުމަކަށް މަސައްކަތްކޮށްދޭ ފަރުދުން ހިންގާފައިވާ އަމަލަކަށް ވެދާނެ" ކަން ހިމެނޭ ކަމަށް ވެސް އޭނާ ވިދާޅުވި އެވެ.
އިނގިރޭސިވިލާތުގެ ބޮޑުވަޒީރު އެންޑީ ބަރނަމް ވަނީ ހޯމަ ދުވަހުގެ މެންދުރުފަހު ކޯބްރާ ކޮމިޓީގެ ބައްދަލުވުމެއްގެ ރިޔާސަތު ބަލަހައްޓަވައި، "ކަމާބެހޭ އިދާރާތަކުން ހަގީގަތް އެއްކޮށް ސާފުކުރަމުންދާއިރު، އެއްވެސް ފަރާތަކުން ކަންކަން އަމިއްލައަށް އަންދާޒާކޮށް ވާހަކަ ނުދެއްކުމަށް" އިލްތިމާސްކުރައްވާފަ އެވެ.
ލަންޑަނުގައި ހުންނަ އީރާނުގެ އެމްބަސީން ބުނީ، މި ހާދިސާއާ އިރާނާ ގުޅުވައިގެން ދައްކާ "އަސާސެއް ނެތް އަދި ނުބައި ނިޔަތެއްގައި ކުރެވޭ ތުހުމަތުތައް" އެ ގައުމުން "ދޮގުކޮށް، ހަރުކަށި އިބާރާތުން ކުށްވެރިކުރާ" ކަމަށެވެ. އަދި، މި ފަދަ ވާހަކަތަކަކީ "އިނގިރޭސިވިލާތުގައި އިރާނާ ދެކޮޅު ޕްރޮޕެގެންޑާ ފެތުރުން ފިޔަވައި އެހެން އެއްވެސް މަގުސަދެއް ހާސިލުނުވާނެ ކަމެއް" ކަމަށް އެމްބަސީން ބަޔާންކުރި އެވެ. މީގެއިތުރުން، "މީޑިއާތަކުން ފަތުރާ ހަގީގަތާ ހިލާފު އަދި ގެއްލުންދެނިވި ވާހަކަތަކާ ގުޅިގެން، ގައުމާއި ރައްޔިތުންގެ ހައްގުތަކާއި މަސްލަހަތު ހިމާޔަތްކުރުމަށް ޓަކައި އަޅަންޖެހޭ ގާނޫނީ ފިޔަވަޅުތައް އެޅުމުގެ ހައްގު އިރާނަށް ލިބިގެންވޭ،" ކަމަށް ވެސް އެމްބަސީން ބުންޏެވެ.
އެމެރިކާގެ އަސްކަރީ ބޭނުމާއި ބައިނަލްއަގުވާމީ ކަންބޮޑުވުން
އާރްއޭއެފްގެ މި މަރުކަޒަކީ އެތައް އަހަރެއް ވަންދެން އެމެރިކާގެ ވައިގެ ސިފައިން (ޔޫއެސްއޭއެފް) އަސްކަރީ އޮޕަރޭޝަންތައް ހިންގުމަށް ބޭނުންކުރަމުންދާ އެއާޕޯޓެކެވެ. އިރާނާ ދެކޮޅަށް ހަމަލާތައް ދިނުމަށް މި އެއާޕޯޓު ބޭނުންކުރުމަށް އެމެރިކާއިން އެދުނު އެދުމަށް އިނގިރޭސިވިލާތުން ހުއްދަ ދިނުމާ ގުޅިގެން، ފަހަކަށް އައިސް އެމެރިކާގެ ބޮންއަޅާ މަތިންދާބޯޓުތައް މި އެއާޕޯޓުން މެދުއިރުމައްޗަށް ފުރާފައިވެ އެވެ. ޖުލައި މަހުގެ ތެރޭގައި އީރާނުން ބުނީ، "އީރާނުގެ ސަރަހައްދަށް ހަމަލާދިނުމަށް ބޭނުންކުރާ ކޮންމެ މަރުކަޒަކީ އަޅުގަނޑުމެންގެ ސިފައިންނަށް ހަމަލާދިނުމުގެ ހުއްދަ އޮތް އަމާޒެއް" ކަމަށް ގަބޫލުކުރާ ކަމަށެވެ.
ހޯމަ ދުވަހު އެމެރިކާގެ ޚާރިޖީ ވަޒީރު މާކޯ ރޫބިއޯ ޓީވީ ޕްރޮގްރާމެއްގައި ވިދާޅުވީ، ހަފުތާ ބަންދުގައި ހިނގި ކަންކަމުގައި "ބޭރުގެ ފަރާތެއް" ގެ ބައިވެރިވުން އޮތްކަން ސާފުވާ ކަމަށެވެ. އެއްވެސް ހެއްކެއް ނުދައްކަވައި، އަދި އިތުރު ތަފުސީލެއް ނުދެއްވައި ފޮކްސް ނޫހުގެ "ހެނިޓީ" ޕްރޮގްރާމުގައި އޭނާ ވިދާޅުވީ: "ހަފުތާ ބަންދުގައި އިނގިރޭސިވިލާތުގައި ހިނގައިދިޔަ ކަންތަކާއި، ހިނގަން ކައިރިވި ކަންތަކާއި، ހިނގާފާނެ ކަމަށް ބެލެވުނު ކަންކަމަކީ ވަރަށް ނުރައްކާތެރި ހާލަތެއް. މިއީ ބޭރުގެ ފަރާތެއްގެ އަތެއް ސާފުކޮށް އެކުލެވިގެންވާ ކަމެއް،" ކަމަށެވެ.
އޭގެ ކުރިން ވައިޓް ހައުސްގެ އޯވަލް އޮފީހުގައި ވާހަކަފުޅު ދައްކަވަމުން އެމެރިކާގެ ރައީސް ޑޮނަލްޑް ޓްރަމްޕް ވިދާޅުވީ، ހައްޔަރުކުރި ފަސް މީހުން ކަފާލާތުގެ ދަށުން ދޫކޮށްނުލެއްވީސް ކަމަށާއި، އެ މީހުން ދޫކޮށްލުމުން "ހައިރާންވި" ކަމަށެވެ. "އަޅުގަނޑުމެންނަށް އެ މީހުންނާ ބެހޭ ހުރިހާ މައުލޫމާތެއް އެނގޭ، އަލުގަނޑުމެން ނަމަ އެ މީހުން ދުލެއް ނުކުރީމުސް،" ޓްރަމްޕް ވިދާޅުވި އެވެ. އަދި، މި ކަމުގައި އިނގިރޭސިވިލާތުން އެމެރިކާއާއެކު "ވަރަށް ގާތުން" މަސައްކަތްކޮށްފައިވާ ކަމަށް ވެސް ޓްރަމްޕް ވިދާޅުވި އެވެ.
ސަލާމަތީ ފިޔަވަޅުތަކާއި ވައިގެ ސަރަހައްދުގެ ހުރަސްތައް
އާރްއޭއެފް ފެއާފަޑް ކައިރީގައި ބޮޑު ސަރަހައްދެއް އަދިވެސް ބަންދުކޮށްފައި އޮތް ނަމަވެސް، އާދީއްތަ ދުވަހު ގެދޮރު ހުސްކުރި 85 ގޭބިސީގެ މީހުންނަށް އެނބުރި ގެއަށް ދެވޭނެ ކަމަށް ގްލޮސްޓެޝާ ފުލުހުން މިހާރު ވަނީ އަންގާފަ އެވެ. ނަމަވެސް، ޝައްކުކުރެވޭ ތިން އުޅަނދު އޮތް ސަރަހައްދު ބަންދުކޮށްފައި އޮންނާނެ ކަމަށް ފުލުހުން ހާމަކުރި އެވެ. ގްލޮސްޓެޝާ ކޮންސްޓެބިއުލަރީގެ ޗީފް ކޮންސްޓެބަލް މެގީ ބްލައިތު ވިދާޅުވީ، ވޭތުވެދިޔަ 48 ގަޑިއިރުގެ ތެރޭގައި "އާންމުކޮށް ހަމަހިމޭން އަދި އަމާންކޮށް އޮންނަ އަޅުގަނޑުމެންގެ މުޖުތަމައު ބައިނަލްއަގުވާމީ މީޑިއާތަކުގެ ސަމާލުކަމަށް" އައިސްފައިވާ ކަމަށެވެ. އަދި، އެ މަރުކަޒުގެ މަތިން ވައިގެ ސަރަހައްދު ބޭނުންކުރުން ހަނިކުރުމުގެ ފިޔަވަޅުތަކެއް އަޅާފައިވާއިރު، ހުއްދައަކާ ނުލައި އެ ތަނުގެ ވަށައިގެން ފަސް މޭލުގެ ސަރަހައްދެއްގެ ތެރޭގައި އުދުހުން މަނާކޮށްފައިވާ ކަމަށެވެ.
މަސްދަރު: ބީބީސީ
