އާރްއޭއެފް މަރުކަޒަށް ހަމަލާދޭން ރޭވިކަމުގެ ތުހުމަތުގައި އީރާނުގެ ޕާސްޕޯޓު އޮތް މީހަކު ހައްޔަރުކޮށްފި
2 އޮކްޓޯބަރު 2026 | ހުކުރު 07:33އިނގިރޭސިވިލާތުގެ ވައިގެ މަރުކަޒަކަށް ހަމަލާދޭން އުޅުނު ކަމުގެ ތުހުމަތުގައި އީރާނު ދަރިކޮޅުގެ މީހަކު ހައްޔަރުކޮށް، އެ ގައުމުގެ ކައުންޓަރ ޓެރަރިޒަމް ފުލުހުން ދަނީ މި މައްސަލަ ތަހުގީގު ކުރަމުން. މި ހާދިސާގައި އީރާނުގެ ބައިވެރިވުން އޮތް ކަމަށް އިނގިރޭސި ސަރުކާރުން ތުހުމަތު ކުރި ނަމަވެސް، އީރާނުން ވަނީ އެ ކަން ދޮގުކޮށް އެއީ ނަފުރަތު އުފެއްދުމަށް ދައްކާ ވާހަކަތަކެއް ކަމަށް ބުނެފައި
އާދީއްތަ ދުވަހު އާރްއޭއެފް ފެއާފަރޑް އެއާބޭސްގައި ހިނގި ހާދިސާއަކާ ގުޅިގެން، ހަތިޔާރު އެޅި ފުލުހުން އެ ސަރަހައްދުގައި ފޯރިމަރަނީ | ރޮއިޓާސް
އިނގިރޭސިވިލާތުގެ ހުޅަނގު ދެކުނުގައި އޮންނަ ރޯޔަލް އެއާ ފޯސްގެ (އާރްއޭއެފް) ފެއާފަރޑް މަރުކަޒަށް ދޭން އުޅުނު ކަމަށް ބުނާ ހަމަލާ ރޭވި ކަމުގެ ތުހުމަތުގައި އީރާނުގެ ރަށްވެހިކަން އޮންނަ އިނގިރޭސިވިލާތުގެ ރައްޔިތަކު ހައްޔަރުކޮށްފި އެވެ.
އިނގިރޭސިވިލާތް ގެ ކައުންޓަރ ޓެރަރިޒަމް ފުލުހުން ބުނީ، މެދުތެރޭ ލަންޑަނުން "އިނގިރޭސިވިލާތާއި އީރާނުގެ ރަށްވެހިކަން އޮންނަ 27 އަހަރުގެ ފިރިހެނަކު ހައްޔަރުކޮށްފައިވާ" ކަމަށެވެ. އޭނާ ހައްޔަރުކޮށްފައި ވަނީ އާދީއްތަ ދުވަހު ފެއާފަރޑް މަރުކަޒު ކައިރީގައި ހިނގި ހާދިސާތަކުގެ ތަހުގީގުގެ ތެރެއިން، "ޓެރަރިސްޓް އަމަލުތަކެއް ހިންގަން ތައްޔާރުވި ކަމުގެ ތުހުމަތުގައި" ކަމަށް ފުލުހުން ބުންޏެވެ. މީގެ އިތުރުން، އިނގިރޭސިވިލާތަށް ނިސްބަތްވާ 26 އަހަރުގެ ދެވަނަ ފިރިހެނަކާ "ސުވާލުކޮށްފައިވާ" ކަމަށް ވެސް ފުލުހުންގެ ބަޔާނުގައި ބުނެފައިވެ އެވެ.
ލަންޑަނުގެ ހުޅަނގުން 160 ކިލޯމީޓަރު ދުރުގައި އޮންނަ މި މަރުކަޒަކީ، އެމެރިކާއާއި އިސްރާއީލުން ފެބުރުވަރީ 28 ގައި އީރާނާ ދެކޮޅަށް ފެށި ހަނގުރާމައިގައި، އީރާނަށް ހަމަލާދިނުމަށް ބޭނުންކުރާ އެމެރިކާގެ އަސްކަރީ މަތިންދާބޯޓުތަކުން ބޭނުންކުރާ މަރުކަޒެކެވެ. މީގެ ކުރިން މެދުއިރުމަތީގެ ގައުމުތަކާ ދެކޮޅަށް އެމެރިކާއިން ކޮށްފައިވާ ހަނގުރާމަތަކުގައި ވެސް މި މަރުކަޒު ބޭނުންކޮށްފައިވެ އެވެ.
އާދީއްތަ ދުވަހު، އާރްއޭއެފް ފެއާފަރޑްގެ ހާދިސާއާ ގުޅިގެން ގޮވާތަކެތީގެ ކުށްތަކާއި "ޓެރަރިޒަމް" ގެ ތުހުމަތުގައި ލަންޑަނަށް ނިސްބަތްވާ އުމުރުން 20 ގެ އަހަރުތަކުގެ ފަސް ފިރިހެނަކު ހައްޔަރުކުރި އެވެ. ނަމަވެސް، އެ މީހުން މިހާރު ވަނީ ކަފާލާތުގެ ދަށުން ދޫކޮށްލާފަ އެވެ. އެމެރިކާގެ ރައީސް ޑޮނަލްޑް ޓްރަމްޕް ވަނީ މި ކަމާމެދު ހިތްހަމަނުޖެހުން ފާޅުކުރައްވާފަ އެވެ.
ކައުންޓަރ ޓެރަރިޒަމް ޕޮލިސިންގގެ ސީނިއާ ނޭޝަނަލް ކޯޑިނޭޓަރު ވިކީ އެވަންސް ވިދާޅުވީ، "ގްލޮސްޓެޝަރގައި ހިނގި ކަންތައްތަކާ ގުޅޭގޮތުން ކުރިއަށްގެންދާ ތަހުގީގަކީ ވަރަށް އުނދަގޫ ތަހުގީގެއް. އަޅުގަނޑުމެންގެ ސްޕެޝަލިސްޓް ޓީމުތަކުން ދަނީ އެތައް ގޮތަކުން މައްސަލަ ތަހުގީގު ކުރަމުން" ކަމަށެވެ. "އަޅުގަނޑުމެން ސާފުކޮށްދީފައިވާ ފަދައިން، އަޅުގަނޑުމެން މި ދަނީ ހުރިހާ ދިމާލަކުން ބަލަމުން. އޭގެ ތެރޭގައި ބޭރު ގައުމެއްގެ ބައިވެރިވުން އޮތްތޯ ވެސް ހިމެނޭ،" އެވަންސް ވިދާޅުވި އެވެ.
ފުލުހުން އަންގާރަ ދުވަހު ބުނީ އާދީއްތަ ދުވަހު މަރުކަޒު ކައިރީގައި ޕާކުކޮށްފައި ހުރި އުޅަނދުތަކުން އެއްވެސް ގޮވާ އެއްޗެއް ފެނިފައިނުވާ ކަމަށާއި، ނަމަވެސް "ޕެޓްރޯލް" އަޅާފައި ހުރި އެއްޗެހިތަކެއް ހޯދިފައިވާ ކަމަށެވެ. މި ހާދިސާއާ އީރާނާ ގުޅުމެއް އޮތް ކަމަށް ބެލެވޭ ކަމުގައި އިނގިރޭސިވިލާތުގެ ބޮޑުވަޒީރު އެންޑީ ބަރނަމް މީގެ ކުރިން ވިދާޅުވެފައިވެ އެވެ. އޭނާ ވިދާޅުވީ، އެ ކަމަށް ބާރުދޭ "ވަރުގަދަ ނިޝާންތަކެއް" ފެނިފައިވާ ކަމަށެވެ.
ނަމަވެސް، އީރާނުން ވަނީ މި ހާދިސާގައި އެއްވެސް މިންވަރަކަށް ބައިވެރިވެފައި ނުވާނެ ކަމަށް ބުނެ، ބަރނަމްގެ ތުހުމަތުތައް ދޮގުކޮށްފަ އެވެ. އަދި, އީރާނުގެ ޚާރިޖީ ވަޒީރު ޢައްބާސް ޢިރާޤިޗީ ވަނީ ބަރނަމްގެ ތުހުމަތުތަކަށް ރައްދުދެއްވައި، އިނގިރޭސިވިލާތުގެ ކަމާބެހޭ ފަރާތްތަކުން ތަހުގީގު ކުރަމުން ދަނީ "ނުބައި މިސްރާބަކަށް" ކަމަށް ވިދާޅުވެފަ އެވެ. ލަންޑަނުގައި ހުންނަ އީރާނުގެ އެމްބަސީން ހޯމަ ދުވަހު ބުނީ، ވައިގެ މަރުކަޒު ކައިރިން ހައްޔަރުކުރި މީހުންނާ އީރާނާ ގުޅުވަން ކުރާ މަސައްކަތްތަކަކީ "އީރާނޮފޯބިއާ ޕްރޮޕެގެންޑާ" ނުވަތަ އީރާނާ ދެކޮޅަށް ނަފުރަތު އުފެއްދުމަށް ހިތްވަރުދީ، "އުފައްދައިގެން އުޅޭ ދޮގު ވާހަކަތަކެއް" ކަމަށެވެ.
މި ހާދިސާގެ ޚަބަރުތައް ދިރާސާކުރާ ނޫސްވެރިއެއް ކަމަށްވާ ރޯރީ ޗެލެންދްސް ބުނީ، ބުރާސްފަތި ދުވަހު ހިނގި ކަންތައްތަކަކީ މި ހާދިސާއާ ގުޅިގެން ހައްޔަރުކުރި "ހަވަނަ މީހާ" ކަމަށާއި، ނަމަވެސް ތުހުމަތުކުރެވޭ މީހާއަކީ ކޮން ގައުމަކަށް ނިސްބަތްވާ މީހެއްކަން ފިޔަވައި، "މިހާތަނަށް މި މައްސަލައިގައި އީރާނާ ގުޅުވޭނެ އެއްވެސް ކަމެއް އާންމުކޮށްފައި ނުވާ" ކަމަށެވެ. އާދީއްތަ ދުވަހު ހިނގި ކަންތައްތަކާ މެދު އަދިވެސް ސާފުނުވާ ކަންތައްތަކެއް އެބަހުރި ކަމަށް ޗެލެންދްސް ބުންޏެވެ.
"މި މުޅި ހާދިސާގެ ބޮޑު ބައެއް އަދިވެސް ވަނީ ސިއްރު ކޮށްފައި. ނުރައްކަލުގެ ބާވަތް އިނގިރޭސި ފުލުހުން އަދި ރަސްމީކޮށް ހާމަކޮށްފައެއް ނުވޭ. މި މައްސަލައިގައި މިހާތަނަށް އެއްވެސް ދައުވާއެއް އުފުލާފައެއް ނުވޭ. ކައުންޓަރ ޓެރަރިޒަމް ފުލުހުން މިހާތަނަށް ހަމައެކަނި ބުނެފައި ވަނީ މިއީ ވަރަށް އުނދަގޫ މައްސަލައެއް ކަމަށް... [އަދި] އެތައް ގޮތަކުން މައްސަލަ ބަލަމުން ގެންދާ ކަމަށް،" އޭނާ ބުންޏެވެ.
މާރިޗު މަހުން ފެށިގެން، އީރާނަށް ހަމަލާދިނުމަށް އެމެރިކާއިން އާރްއޭއެފް ފެއާފަރޑް ވައިގެ މަރުކަޒު ބޭނުންކޮށްފައިވާއިރު، ހުރްމުޒް ކަނޑުއޮޅީގައި އުޅަނދުތަކަށް އަމާޒުކޮށް ހަމަލާދޭ އީރާނުގެ މިސައިލް ސައިޓުތަކަށް ހަމަލާދިނުމަށް އެ ތަނުގައި ގާއިމުވެ ތިބި އެމެރިކާގެ ބޮންއަޅާ ބޯޓުތަކަށް އިނގިރޭސިވިލާތުން ވަނީ ހުއްދަ ދީފަ އެވެ. އީރާނުގެ ބާރުގަދަ އިސްލާމިކް ރޮވޮލޫޝަނަރީ ގާޑްސް ކޯއިން (އައިއާރްޖީސީ) ޖުލައި މަހު ވަނީ، އީރާނަށް ހަމަލާދިނުމަށް ބޭނުންކުރާ މަރުކަޒުތަކަކީ ރައްދު ހަމަލާދިނުން ހުއްދަ އަމާޒުތަކެއްގެ ގޮތުގައި ބަލާނެ ކަމަށެވެ.
މަސްދަރު: އަލް ޖަޒީރާ
