ސްޕޯޓްސް މިނިސްޓަރު ރާފިއު ތުރުކީގައި، އެ ޤައުމުގެ ސްޕޯޓްސް މިނިސްޓަރާ ބައްދަލުކުރައްވައިފި
1 އޮކްޓޯބަރު 2026 | ބުރާސްފަތި 06:05މި ބައްދަލުވުމުގައި އިސްކަންދީގެން މަޝްވަރާކުރެއްވީ ދެ ޤައުމުގެ ދެމެދުގައި ސޮއި ކުރުމަށް ހަމަޖެހިފައިވާ ފަހުމުނާމާގެ މަސައްކަތް ކުރިއަށްދާ ގޮތާއި، ދެ ޤައުމުގެ ދެމެދު އިތުރަށް ގުޅުން ބަދަހިކުރެވޭނެ ގޮތްތަކާ ބެހޭ ގޮތުން
ސްޕޯޓްސް މިނިސްޓަރު ރާފިއު އާއި، ތުރުކީގެ ސްޕޯޓްސް މިނިސްޓަރު ބޭއްވެވި ބައްދަލުވުމުގެ ތެރެއިން | މިނިސްޓްރީ އޮފް ޔޫތު އެމްޕަވަމަންޓް، ސްޕޯޓްސް އެންޑް ފިޓްނަސް
ސްޕޯޓްސް މިނިސްޓަރު ޢަބްދުﷲ ރާފިއު، ތުރުކީގެ ސްޕޯޓްސް މިނިސްޓަރު އޮސްމާން އަޝްކިއަން ބަކްއާ ބައްދަލު ކުރައްވައި، ދެ ޤައުމުގެ ދެމެދުގައި ޒުވާނުންނާއި ކުޅިވަރުގެ ދާއިރާގައި ހަރަކާތްތެރިކަން އިތުރުކުރުމާ ގުޅޭ ގޮތުން މަޝްވަރާކުރައްވައިފި އެވެ.
މި ބައްދަލުވުން ބޭއްވީ ތުރުކީގެ ކޮންޔާގައި ކުރިއަށްދާ އޯއައިސީ ޔޫތު ކެޕިޓަލް 2026 ގެ ހަރަކާތްތަކާ ގުޅިގެންނެވެ.
މި ބައްދަލުވުމުގައި އިސްކަންދީގެން މަޝްވަރާކުރެއްވީ ދެ ޤައުމުގެ ދެމެދުގައި ސޮއި ކުރުމަށް ހަމަޖެހިފައިވާ ފަހުމުނާމާގެ މަސައްކަތް ކުރިއަށްދާ ގޮތާއި، ދެ ޤައުމުގެ ދެމެދު އިތުރަށް ގުޅުން ބަދަހިކުރެވޭނެ ގޮތްތަކާ ބެހޭ ގޮތުންނެވެ.
ތުރުކީގެ ފަރާތުން ވަނީ ދެ ޤައުމުގެ ދެމެދު ސޮއިކުރުމަށް ހަމަޖެހިފައިވާ ފަހުމުނާމާ އަށް އިސްކަންދޭނެކަން ކަށަވަރުކޮށްދީފައި ކަމަށް ސްޕޯޓްސް މިނިސްޓްރީ އިން ބުނެފައިވެ އެވެ. އަދި މި ފަހުމުނާމާ ދިރާސާކޮށް ސޮއި ކުރުމަށް ކުރަންޖެހޭ މަސައްކަތް ހަލުވިކޮށް، އެންމެ އަވަހަކަށް ފަހުމުނާމާގައި ސޮއިކޮށް ތަންފީޒުކުރެވޭނެ ގޮތް ހަމަޖެއްސުމަށް މަސައްކަތް ކުރައްވާނެ ކަމަށް ވެސް ތުރުކީގެ ސްޕޯޓްސް މިނިސްޓަރު ވަނީ ވިދާޅުވެފަ އެވެ.
މީގެ އިތުރުން ތުރުކީގައި ހުރި ދުނިޔޭގެ ފެންވަރުގެ ތަމްރީނު ކޭމްޕުތަކުގެ ވަސީލަތްތައް ދިވެހި ކުޅުންތެރިންނަށް ބޭނުންކުރެވޭނެ ކަމުގެ ޔަޤީންކަން ތުރުކީގެ ފަރާތުން ވަނީ ދީފަ އެވެ. ދިވެހި ކުޅުންތެރިން އެ ޤައުމުގައި ތަމުރީނުކޮށް، މަތީ ފެންވަރުގެ ކޭމްޕުތަކުގައި ބައިވެރިވެވޭނެ ފުރުސަތުތައް ފަހިކޮށްދޭނެ ކަމަށް ވެސް ބުނެފައިވެ އެވެ.
ބާސްކެޓުބޯޅަ އާއި ވޮލީބޯޅަ ކުޅުމުގައި ތުރުކީ އަށް ލިބިފައިވާ ތަޖުރިބާ ދިވެހިންނަށް ހިއްސާކޮށް، ދިވެހި ކޯޗުންނަށް ތަމުރީނު ދިނުމާއި، ހުނަރު ތަރައްޤީކުރުމުގެ ޕްރޮގްރާމްތައް ހިންގުމުގެ ފުރުސަތުތަކާ ގުޅޭ ގޮތުން ދެ ޤައުމުގެ މިނިސްޓަރުން ވަނީ މަޝްވަރާކޮށްފަ އެވެ.
މި ބައްދަލުވުމުގައި މަޝްވަރާކުރި އިތުރު ދާއިރާތަކުގެ ތެރޭގައި ކުޅިވަރު ސައިންސާއި، ކުޅިވަރު ކުޅުމުގެ ފެންވަރު، ޚާއްސަ ބޭނުންތަކަށް ބޭނުންވާ ކުޅިވަރާއި، ޕެރަލިމްޕިކް ތަރައްޤީކުރުން އަދި އެހެނިހެން ކަންކަން ވެސް ހިމެނެ އެވެ.
