ޗެސް އޮލިމްޕިއާޑްގައި ވާދަކުރާ ދިވެހި ޓީމަށް ޖާޒީ ހަވާލުކޮށްފި

46 ވަނަ ފިޑޭ ޗެސް އޮލިމްޕިއާޑުގައި ވާދަކުރާ ރާއްޖޭގެ ޤައުމީ ޗެސް ޓީމުގެ ކުޅުންތެރިންނަށް ޖާޒީ ހަވާލުކޮށްފި އެވެ. 

އުޒްބަކިސްތާންގެ ސަމަކަންޑުގައި މި މުބާރާތް ކުރިއަށް ދާނީ މި ހިނގާ ސެޕްޓެމްބަރު މަހުގެ 15 ވަނަ ދުވަހުން ފެށިގެން، 28 ވަނަ ދުވަހުގެ ނިޔަލަށެވެ. މި މުބާރާތުގައި ވާދަކުރާ ރާއްޖޭގެ ޤައުމީ ޓީމުގައި ޖުމުލަ 10 ކުޅުންތެރިން ހިމެނެ އެވެ.

އެއީ އަންހެން ފަސް ކުޅުންތެރިންނާއި، ފިރިހެން ފަސް ކުޅުންތެރިންނެވެ. ޓީމުގައި ހިމެނޭ ފިރިހެން ކުޅުންތެރިންނަކީ މުހައްމަދު ޝުއާއު، މުހައްމަދު ހަސަން، އަބްދުއް ރަހުމާން އަލީ، މުހައްމަދު ރާކިން ފަޔާޒް އަދި އަހުމަދު އަބޫބަކުރު އެވެ. އަންހެން ކުޅުންތެރިންޔަކީ އީނާ އަބްދުﷲ ހަސަން، ނިހާޔާ އަހުމަދު، އާއިޝަތު އަލްޔާ މުހައްމަދު ޝަރީފް، މަރްޔަމް ލައިސާ އަބްދުއް ރަޝީދު އަދި އާއިޝަތު ނޯޔާ ޝަހުރުއްދީން އަފީފް އެވެ. 

ޓީމުގެ ކުޅުންތެރިންނަށް ޖާޒީ ހަވާލު ކޮށްދެއްވާފައި ވަނީ ސްޕޯޓްސް މިނިސްޓްރީގެ ސްޓޭޓް މިނިސްޓަރު އަހުމަދު މުހައްމަދު ވަހީދު އެވެ. ޓީމަށް ޖާޒީ ހަވާލުކޮށްދެއްވުމަށް ފަހު އޭނާ ވަނީ ޓީމަށް ހިތްވަރު ދެއްވައި، ކާާމިޔާބަށް އެދިވަޑައިގެންފައި އެވެ. އަދި ކުޅުންތެރިންގެ ކުރިއެރުމާއި، ކުރިމަގަށް ކުރަން ޖެހޭ ހުރިހާ ކަމެއް ކޮށްދެއްވާނެ ކަމަށް ވެސް ވިދާޅުވެފައިވެ އެވެ. 

މިއަހަރުގެ މުބާރާތުގައި އެކި ޤައުމު ތަކުން 1800 އަށް ވުރެ ގިނަ ކުޅުންތެރިން ވާދަކުރާނެ އެވެ. ރާއްޖެ އިން ވަނީ މުބާރާތަށް ތައްޔާރުވުމުގެ ގޮތުން ކްރޮއޭޝިއާގެ ކޯޗެއްގެ އިރުޝާދު ހޯދައިފަ އެވެ.