މިނިސްޓަރުންނާއި ސިޔާސީ ބޭނުންތަކުގައި ކުޅިވަރުތައް ހަލާކު ނުކުރުމަށް އެދިފައިވޭ
ރޭސިންގ އެސޯސިއޭޝަން އޮފް މޯލްޑިވްސްގެ އިވެއްޓެއްގެ ތެރެއިން
ގަވާއިދުން ރާއްޖޭގައި ރޭސިންގެ ހަރަކާތްތައް ކުރަމުން އަންނަ ޖަމިއްޔާ އޮއްވާ، 2016 ވަނަ އަހަރުން ފެށިގެން ރޭސިންގެ ހަރަކާތެއް ނުހިންގާ ޖަމިއްޔާއެއް އެންޑޯޒް ކޮށްދިނުމަށް ސްޕޯޓްސް މިނިސްޓަރު އަބްދުﷲ ރާފިއު މަސައްކަތް ކުރައްވައިފި އެވެ.
ސްޕޯޓްސް މިނިސްޓަރުގެ ސިޓީއަކުން ލިބުނު ގެއްލުން ހާމަކޮށް ރޭސިންގ އެސޯސިއޭޝަން އޮފް މޯލްޑިވްސް އިން ނެރުނު ނޫސްބަޔާނުގައި ބުނެފައިވަނީ 2024 ވަނަ އަހަރުގެ ޑިސެމްބަރު މަހު ބޭއްވުނު ފެޑެރޭޝަން އިންޓަރނޭޝަަލް ދި އޮޓޯމޮބައިލް (އެފްއައިއޭ) ގެ މެންބަރުކަން ލިބުނު ކަމަށެވެ. އަދި ފެޑަރޭޝަން އިންޓަރނޭޝަނަލް ދި މޮޓޯސައިކްލްސްމި (އެފްއައިއެމް) ގެ މެންބަރުކަން ހޯދުމަށް ލިޔެކިޔުންތައް ފޮނުވާފައިވާ އިރު ޑިސެމްބަރު މަހު ސްވިޓްޒަލޭންޑުގައި ބާއްވާ އެފްއައިއެމްގެ ޖެނެރަލް އެސެމްބްލީ އަށް ދިއުމަށް ދައުވަތު ލިބުނު ކަމަށް އެ ޖަމިއްޔާ އިން ވަނީ ބުނެފައެވެ.
މީގެ އިތުރުން މިނިސްޓަރުގެ ސިޓީއާއި ގުޅިގެން އެފްއައިއެމް އިން އިވެލުއޭޝަން ޕްރޮސެސް ހަދަންޖެހޭ އިރު، މިކަމާއި ގުޅިގެން އެ ޖަމިއްޔާއިން މިނިސްޓްރީއަށް ފޮނުވާފައިވާ ސިޓީއަށް ވެސް މިހާތަނަށް ޖަވާބެއް ދީފައި ނުވާ ކަމަށް އެސޯސިއޭޝަނުން ބުނެ އެވެ. އަދި ގައުމީ ކުޅިވަރު ޖަމިއްޔާތައް އެކްރެޑިޓް ކުރަންޖެހެނީ ސްޕޯޓްސް ކޮމިޝަނަރަށް ވެފައި މިނިސްޓަރު ރާފިއު އެންޑޯސްމަންޓް ސިޓީއެއް ދިނީ ކޮން ހައިސިއްޔަތަކުންތޯ ވެސް އެސޯސިއޭޝަނުން ވަނީ ސުވާލު އުފައްދަވާފަ އެވެ.
އެސޯސިއޭޝަންގެ ކަންބޮޑުވުންތަކުގެ ތެރޭގައި ކުޅިވަރާއި ނުގުޅޭ ސަބަބަކާއި ގުޅިގެން ސަރުކާރުން އިވެންޓްތައް ހުއްޓުވުވާފައި ވުމާއި، ލިބުނު ގެއްލުމުގެ ބަދަލު ދޭނެކަމަށް ބުނެ ނުދިނުމާއި، އިވެންޓް ހުއްޓާލި ސަބަބު ބަޔާންކޮށް ސަރުކާރުން ލިޔުމެއް ނުދިނުމާއި ރައީސް ޑރ. މުހައްމަދު މުއިއްޒު އާއި ބައްދަލުކުރުމަށް އެދުނު ސިޓީއަށް ވެސް ޖަވާބެއް ނުދޭ ކަމަށެވެ.
ރޭސިންގ އެސޯސިއޭޝަނުން ވަނީ މިނިސްޓަރުންނާއި ސިޔާސީ ބޭނުންތަކުގައި ކުޅިވަރުތައް ހަލާކު ނުކުރުމަށް އެދިފަ އެވެ. އަދި މިހާރު ދިމާވެގެން އުޅޭ މައްސަލަ ހައްލުކުރުމަށް އެދި މިނިސްޓަރަށް ސިޓީއެއް މިދިޔަ މަހުގެ 26 ވަނަ ދުވަހު ފޮނުވި ނަމަވެސް އެ ސިޓީއަށް ވެސް ޖަވާބެއް ނުދޭކަން އެސޯސިއޭޝަނުން ބުނެފައިވެ އެވެ.
މިކަމާއި ގުޅިގެން ގާނޫނީ ވަކީލު އަދި އެމްޑީޕީގެ ލީގަލް ޑިރެކްޓަރ އަހުމަދު މައުރޫފް ވިދާޅުވީ ރޭސިންގ އެސޯސިއޭޝަން އޮފް މޯލްޑިވްސް އަކީ ރާއްޖޭގައި ރޭސިންގ އަދި މޮޓޯ ކުޅިވަރުގެ ދާއިރާއިން އެފްއައިއޭ އިން ބަލައިގަންނަ ގައުމީ އިދާރާ ކަމަށެ އެވެ. ރޭސިންގ އެސޯސިއޭޝަން އޮފް މޯލްޑިވްސްގެ ބަދަލުގައި ސްޕޯޓްސް މިނިސްޓަރު އަބްދުﷲ ރާފިއު ވަނީ އެފްއައިއޭ އަށް ސިޓީއެއް ފޮނުވާފައި ކަމަަށާއި، އެއީ ގާނޫނާ ހިލާފު އަދި އެފްއައިއޭގެ އިޖުރާއަތްތަކާ ހިލާފު އަމަލެއް ކަމަށް މައުރޫފް ވިދާޅުވި އެވެ.
