އަރުތަ ޕްރޮގްރާމްގައި ބައިވެރިވުމުގެ ފުރުސަތު ހުޅުވާލައިފި
3 ސެޕްޓެމްބަރު 2026 | ބުރާސްފަތި 07:56އަރުތަ ޕްރޮގްރާމްގެ ދަށުން ސަރުކާރުން ކުރަމުން އަންނަ މަސައްކަތަކީ ޕްރޮފެޝަނަލަށް އެތުލީޓުން އުފައްދައި، ބައިނަލްއަޤުވާމީ މުބާރާތްތަކާއި ގޭމްސްތަކުން ރާއްޖެ އަށް މެޑަލް ހޯދުމުގެ މަސައްކަތް
2023 ވަނަ އަހަރު އަރުތަ ޕްރޮގްރާމް ރަސްމީކޮށް ފެށުމަށް ބޭއްވި ރަސްމިއްޔާތުގެ ތެރެއިން | މިނިސްޓްރީ އޮފް ޔޫތު އެމްޕަވަމަންޓް، ސްޕޯޓްސް އެންޑް ފިޓްނަސް
ސްޕޯޓްސް މިނިސްޓްރީ އިން ކުރިއަށް ގެންދާ އަރުތަ ޕްރޮގްރާމްގައި ބައިވެރިވުމުގެ ފުރުސަތު ހުޅުވާލައިފި އެވެ.
ސްޕޯޓްސް މިނިސްޓްރީ އިން ގެޒެޓުގައި ކޮށްފައިވާ އިއުލާނެއްގައި ބުނެފައި ވަނީ، އަރުތަ ޕްރޮގްރާމްގައި ބައިވެރިވާން ބޭނުންވާ އެތުލީޓުން މި ހިނގާ ސެޕްޓެމްބަރު މަހުގެ 30 ވަނަ ދުވަހުގެ 14:00 ގެ ކުރިން ފޯމު ހުށަހެޅުމަށް އެދޭ ކަމަށެވެ. ޕްރޮގްރާމްގައި ބައިވެރިވާން ބޭނުންވާ އެތުލީޓުން ފޯމު ހުށަހަޅަން ޖެހޭނީ މިނިސްޓްރީ އަށް، ނުވަތަ އެ މިނިސްޓްރީގެ އީމެއިލް އަށެވެ.
ޕްރޮގްރާމް އަށް ހޮވޭ އެތުލީޓުން މިނިސްޓްރީ އިން ކަނޑަ އަޅާނީ، އަރުތަ ޕްރޮގްރާމްގެ ޤަވާއިދުގައި ބަޔާން ކޮށްފައިވާ ޝަރުތުތަކަށް ބެލުމަށް ފަހު އެވެ. އަދި ޕްރޮގްރާމް އަށް ހޮވޭ އެތުލީޓުން ކަނޑަ އަޅާނީ އެކަމަށް ޚާއްސަކޮށް މިނިސްޓްރީ އިން އުފައްދާފައިވާ ކޮމެޓީ އަކުންނެވެ.
އަރުތަ ޕްރޮގްރާމްގެ ދަށުން ސަރުކާރުން ކުރަމުން އަންނަ މަސައްކަތަކީ ޕްރޮފެޝަނަލަށް އެތުލީޓުން އުފައްދައި، ބައިނަލްއަޤުވާމީ މުބާރާތްތަކާއި ގޭމްސްތަކުން ރާއްޖެ އަށް މެޑަލް ހޯދުމުގެ މަސައްކަތެވެ. އެގޮތުން އެތުލީޓުންނަށް ބޭނުންވާ އެކި އެކި ތަމްރީނުތައް މި ޕްރޮގްރާމްގެ ތެރެއިން ލިބިގެންދާނެ އެވެ.
އަރުތަ ޕްރޮގްރާމް އަކީ ކުރީގެ ރައީސް އިބްރާހީމް މުޙައްމަދު ސޯލިޙުގެ ސަރުކާރުގައި ފަށާފައިވާ ޕްރޮގްރާމް އެކެވެ. އެގޮތުން ރަސްމީކޮށް މި ޕްރޮގްރާމް ލޯންޗުކޮށްފައި ވަނީ 2023 ވަނަ އަހަރުގެ މާޗު މަހުގެ ތެރޭގައި އެވެ.
