ސޮފްވާންގެ މައްސަލައިގައި ހެކި ނެތިގެން، ފުލުހުން މައްސަލަ ފައިލްކޮށްފި

ޖިންސީ ގޮތުން ފުރައްސާރަ ކުރާ ކަަމަށް ބުނެ، ޤައުމީ އަންހެން ވޮލީ ޓީމުގެ ކުރީގެ ކޯޗު ސޮފްވާން އަހުމަދާ ދެކޮޅަށް ހުށަހަޅާފައިވާ މައްސަލައިގައި ޖިނާާއީ ދައުވާ ކުރެވޭ މިންވަރަށް ހެއްކާއި ޤަރީނާ ލިބިފައި ނެތުމުން މައްސަލަ ފައިލްކޮށްފި އެވެ.

މިއަހަރުގެ ޖަނަވަރީ މަހުގެ ތެރޭގައި ފުލުހުން ބުނެފައި ވަނީ، ރާއްޖޭގެ ކުޅިވަރު އެސޯސިއޭޝަނެއްގައި ކުޅުންތެރިން ތަމުރީނު ކުރުމުގެ ޒިންމާ އޮތް ފަރާތެއްގެ މައްޗަށް ކުރެވޭ ތުހުމަތެއް ތަހުގީގު ކުރަމުންދާ ކަމަށެވެ. މި މައްސަލައިގައި ވޮލީބޯޅަ އެސޯސިއޭޝަން އޮފް މޯލްޑިވްސް (ވީއޭއެމް) އިން ވަނީ ސޮފްވާންއާ ދެކޮޅަށް ހަރުކަށި ފިޔަވަޅުތަކެއް ވެސް އަޅައިފަ އެވެ.

އެގޮތުން ޤައުމީ އަންހެން ޓީމުގެ ކޯޗުކަމުގެ މަޤާމުން ސޮފްވާން ވަކިކުރުމާ އެކު، ވީއޭއެމްގެ ހިންގާ ކޮމެޓީގެ މެމްބަރުކަމުގެ މަޤާމުން ވެސް އޭނާ ވަނީ ވަކިކޮށްފަ އެވެ. އަދި ކުރިއަށް އޮތް ފަސް އަހަރު ދުވަހުގެ ތެރޭގައި އެފަދަ އެއްވެސް މަޤާމަކަށް ސޮފްވާން އަށް ނާދެވޭނެ އެންމެ ފުރަތަމަ ނިންމި އެވެ. 

މީގެ އިތުރުން ވީއޭއެމް އިން އިންތިޒާމު ކުރާ އެއްވެސް މުބާރާތެއްގައި އޮފިޝަލެއް ނުވަތަ އެ ނޫން ވެސް ހައިސިއްޔަތުން ކުރިއަށް އޮތް ފަސް އަހަރު ދުވަހުގެ ތެރޭގައި ސޮފްވާން އަށް މަސައްކަތް ނުކުރެވޭނެ ކަމަށް ވެސް ހިންގާ ކޮމެޓީ އިން އޭރު ވަނީ ނިންމައިފަ އެވެ. 

ހަމަ އެހެންމެ، ވީއޭއެމްގެ ރެފްރީން ފޮނުވައިގެން ރެފްރީކަން ކުރާ އެއްވެސް މުބާރާތެއްގެ އޮފިޝަލެއްގެ ގޮތުގައި، ނުވަތަ އެ ނޫން ވެސް ހައިސިއްޔަތުން ކުރިއަށް އޮތް ފަސް އަހަރު ދުވަހުގެ ތެރޭގައި ސޮފްވާން އަށް މަސައްކަތް ނުކުރެވޭނެ ކަމަށް ވެސް ނިންމި އެވެ. 

އެހެން ނަމަވެސް، އޭގެ ފަހުން ވީއޭއެމްގެ ޚާއްސަ އާންމު ޖަލްސާގައި ވަނީ، މުޅި އުމުރަށް ސޮފްވާން ވޮލީ ބޯޅަ އިން ސަސްޕެންޑު ކުރުމަށް ނިންމައިފަ އެވެ. 

ނަމަވެސް، ސެޕްޓެމްބަރު މަހުގެ 18 ވަނަ ދުވަހު ފުލުހުން ސޮފްވާން އަށް ފޮނުވާފައިވާ ލިޔުމެއްގައި ބުނެފައި ވަނީ، އޭނާއާ ދެކޮޅަށް ހުށަހަޅާފައިވާ މައްސަލައިގައި ޖިނާއީ ދައުވާ ކުރެވޭ މިންވަރަށް ހެއްކާއި ޤަރީނާ ލިބިފައި ނެތުމުން އެ މައްސަލަ އެ އިދާރާގައި ފައިލްކޮށްފައިވާ ކަމަށެވެ.