އީރާނުގެ ހަމަލާތަކުގައި އެމެރިކާގެ އަސްކަރީ މަރުކަޒުތަކަށް ބޮޑެތި ގެއްލުންތަކެއް!

އީރާނުން ދިން މިސައިލް އަދި ޑްރޯން ހަމަލާތަކުގައި މެދުއިރުމަތީގައި ހުރި އެމެރިކާގެ އަސްކަރީ މަރުކަޒުތަކަށް ބޮޑެތި ގެއްލުންތަކެއް ލިބިފައިވާކަން ހާމަވާ ފޮޓޯތަކެއް ސީބީއޭސް ނޫހުން އަންގާރަ ދުވަހު އާންމުކޮށްފި އެވެ. އަލަށް ލިބިފައިވާ ކަމަށް ބުނާ މި ފޮޓޯތަކުން ފެންނަ ގޮތުގައި، އެ ސަރަހައްދުގައި ހުރި އެމެރިކާގެ އަސްކަރީ އިމާރާތްތަކާއި އުޅަނދުފަހަރުގެ އިތުރުން މަތިންދާބޯޓުތަކަށް ވެސް ވަނީ ބޮޑެތި ގެއްލުންތަކެއް ލިބިފަ އެވެ.

މި ފޮޓޯތަކަކީ އަސްކަރިއްޔާގެ މީޑިއާ އުސޫލުތައް ހުންނަ ގޮތުން ނަން ހާމަނުކުރުމަށް ޝަރުތުކޮށް، އެ ސަރަހައްދުގައި ހަރަކާތްތެރިވާ އެމެރިކާ ސިފައިން ސީބީއޭސް ނޫހަށް ފޯރުކޮށްދީފައިވާ ފޮޓޯތަކެއް ކަމަށް އެ ނޫހުން ބުނެ އެވެ. މެދުއިރުމަތީގެ އެކި ސަރަހައްދުތަކުގައި ހުރި އެމެރިކާގެ އަސްކަރީ މަރުކަޒުތަކަށް ލިބިފައިވާ ގެއްލުންތައް މި ފޮޓޯތަކުން ސާފުކޮށް ފެންނަން ހުރި ކަމަށް ވެސް ވަނީ ރިޕޯޓުކޮށްފަ އެވެ.

Advertisement

"މިއީ އަޅުގަނޑުމެންގެ މަރުކަޒުތަކަށް ލިބިފައިވާ ވަރަށް ބޮޑެތި ގެއްލުންތަކެއް، ނަމަވެސް، މި ވާހަކަތައް އެމެރިކާގެ ރައްޔިތުންނާ ހަމައަކަށް ނުގެނެސްދޭ،" އެ ސަރަހައްދުގައި ތިބި ސިފައިންގެ މީހަކު އެ ނެޓްވޯކަށް ކިޔައިދީފައިވެ އެވެ. އޭނާ ބުނީ، އެ މީހުން ތިބީ "ލޯ މަރާލައިގެން މޫނުމަތީގައި ތަޅަން ދޫކޮށްލައިގެން" ތިބޭ ފަދަ ހާލަތެއްގައި ކަމަށެވެ.

ސައުދީ އަރަބިއްޔާގައި ހުންނަ ޕްރިންސް ސުލްތާން އެއާ ބޭހަށް ދިން ހަމަލާތަކާ ގުޅޭގޮތުން ސީބީއޭސް ނޫހުން ރިޕޯޓުކޮށްފައިވާ ގޮތުގައި، އެއް ފޮޓޯއަކުން ފެންނަނީ ބޯއިންގ އީ-3 ސެންޓްރީ މަރުކާގެ މަތިންދާބޯޓެއްގެ ފަހަތު ބަޔަށް ސީދާ ހަމަލާއެއް އަރާފައިވާ މަންޒަރެވެ. މި ހަމަލާގައި އެ ބޯޓުގެ ފަހަތު ބައި ވަނީ ބޯޓުގެ މައިގަނޑުން ވަކިވެ، އަނދައިގެން ގޮސްފަ އެވެ. އެ މަރުކަޒުން ލިބިފައިވާ އެހެން ފޮޓޯތަކުން ފެންނަ ގޮތުގައި، ގްރިނޭޑް އަދި މޯޓަރު ހަމަލާތަކުން ރައްކާތެރިވުމަށް ޖަހާފައިވާ ކޮންކްރީޓް 'ޓީ-ވޯލް' ހުރަސްތަކުގެ ކައިރީގައި ހުރި އިމާރާތްތަކާއި ސިފައިން ތިބޭ ބެރެކްސްތަކަށް ވެސް ވަނީ ބޮޑެތި ގެއްލުންތަކެއް ލިބިފަ އެވެ.

ކުވެއިތުގައި ހުންނަ ކޭމްޕް ބޫރިންގއަކީ އެމެރިކާ ސިފައިންނާއި، ހަނގުރާމަމަތީ އުޅަނދުތަކާއި ބައެއް މަތިންދާބޯޓުތައް ބޭނުންކުރާ މައި މަރުކަޒަކަށް ވާއިރު، އެ ތަނަށް ވެސް އީރާނުގެ ހަމަލާތަކުގައި ބޮޑެތި ގެއްލުންތަކެއް ލިބިފައިވާކަން އެ ރިޕޯޓުގައި ވަނީ ފާހަގަކޮށްފަ އެވެ. މި ފޮޓޯތައް އާންމުވެފައި މި ވަނީ، އީރާނާ ދެކޮޅަށް ކުރަމުންދާ ހަނގުރާމައިގައި އެމެރިކާގެ އަސްކަރީ ސާމާނަށް ލިބުނު ގެއްލުން 3.7 ބިލިއަން ޑޮލަރަށް އަރާނެ ކަމަށް ލަފާކޮށް، އެމެރިކާގެ ޑިފެންސް ޑިޕާޓްމަންޓުގެ އިންސްޕެކްޓަރ ޖެނެރަލް ރިޕޯޓެއް ނެރުއްވާފައިވާ ދަނޑިވަޅެއްގަ އެވެ. މި ގެއްލުންތަކުގެ ތެރޭގައި ގާތްގަނޑަކަށް 60 އަސްކަރީ މަތިންދާބޯޓު ހިމެނެ އެވެ.

އެމެރިކާގެ ކޮންގްރެސް އަށް ހުށަހެޅުއްވި ރިޕޯޓެއްގައި އިންސްޕެކްޓަރ ޖެނެރަލް ވިދާޅުވީ، ކުވެއިތާއި ބަހްރެއިން، ގަތަރު، ޔުނައިޓެޑް އަރަބް އެމިރޭޓްސް، ސައުދީ އަރަބިއްޔާ، އިރާގު، އޮމާން އަދި އުރުދުންގައި ހުރި އެމެރިކާގެ މަރުކަޒުތަކަށް އީރާނުން ހަމަލާދީފައިވާ ކަމަށް އެމެރިކާގެ ސެންޓްރަލް ކޮމާންޑުން ރިޕޯޓުކޮށްފައިވާ ކަމަށެވެ. މި ކަމާ ގުޅޭގޮތުން މައުލޫމާތު ހޯދުމަށް ސީބީއޭސް ނޫހުން އެދުމުން ޕެންޓަގަނުން އެއްވެސް ޖަވާބެއް ދީފައެއް ނުވާ ކަމަށް އެ ނޫހުން ރިޕޯޓުކުރެ އެވެ.

މާރިޗު މަހުގެ 1 ވަނަ ދުވަހު ކުވެއިތުގެ ޝުއައިބާ ބަނދަރަށް ދިން ހަމަލާގައި އެމެރިކާގެ ހަ ސިފައިން މަރުވުމާ ގުޅިގެން، ދިފާއީ ވަޒީރު ޕީޓް ހެގްސެތު ބޭނުންކުރެއްވި ބަސްމަގަށް އިޝާރާތްކޮށް، އެ ސަރަހައްދުގައި ހުރި ސިފައިންގެ މީހާ ބުނީ، މިއީ ދިފާއީ ނިޒާމުން ރައްކާތެރިނުވެވިގެން ދޫވި ކުދި ހަމަލާތަކެއް ނޫން ކަމަށެވެ. "އަޅުގަނޑުމެން މި މަރުކަޒުތަކެއް ދިފާއެއް ނުކުރަން. އަޅުގަނޑުމެން މިތިބީ މި ތަންތަން ސުންނާފަތިވަމުންދާ މަންޒަރު ބަލަން،" އެ ސިފައިންގެ މީހާ ބުނެފައިވެ އެވެ.