އީރާން ހަނގުރާމައިގެ ސަބަބުން އެމެރިކާގެ ހަތިޔާރު ރިޒާވް ހުސްވެ، ތަކެތީގެ އަގު އިންތިހާއަށް!

އީރާނާ ދެކޮޅަށް އެމެރިކާއިން ކުރަމުންދާ ހަނގުރާމައިގެ ސަބަބުން އެމެރިކާގައި ތަކެތީގެ އަގުތައް އުފުލި އިންފްލޭޝަން ބޮޑުވަމުންދާ ކަމަށާއި، އަސްކަރިއްޔާގެ ހަތިޔާރުގެ ރަސްމީ ރިޒާވް ހުސްވަމުންދާ ކަމަށް އެމެރިކާގެ މިނިވަން މުއައްސަސާއެއް ކަމަށްވާ ކޮންގްރެޝަނަލް ބަޖެޓް އޮފީހުން (ސީބީއޯ) ހާމަކޮށްފަ އެވެ.

އަންގާރަ ދުވަހު ސީބީއޯއިން އާންމުކުރި ރިޕޯޓުގައި ބަޔާންކޮށްފައިވާ ގޮތުން، ފާއިތުވި ހަ މަސްދުވަހުގެ ތެރޭގައި އެކަނިވެސް މި ހަނގުރާމައަށް ކުރި ޚަރަދު ވަނީ 38 ބިލިއަން ޑޮލަރަށް އަރާފަ އެވެ. އަދި، ކުރިއަށް އޮތް ތަނުގައި މި ހަނގުރާމައަށް ކޮންމެ މަހަކު އިތުރު 3 ބިލިއަން ޑޮލަރު ހޭދަވާނެ ކަމަށް ލަފާކުރެވޭއިރު، 2027 ވަނަ އަހަރުގެ ފުރަތަމަ ތިން މަސްދުވަހުގެ ތެރޭގައި އިންފްލޭޝަން 0.5 އިންސައްތަ އިތުރުވާނެ ކަމަށް ވެސް ސީބީއޯއިން ވަނީ އަންދާޒާކޮށްފަ އެވެ.

Advertisement

ރައީސް ޑޮނަލްޑް ޓްރަމްޕް އީރާނާ ދެކޮޅަށް ފެށްޓެވި ނާކާމިޔާބު ހަނގުރާމައިގެ ސަބަބުން އެމެރިކާގެ ސިފައިންގެ ފުރާނަ ގެއްލި، ގިނަ ބަޔަކު ޒަޚަމްވެފައިވާ ކަމަށް، މި ދިރާސާ ހެދުމަށް އެދިވަޑައިގެންނެވި ހައުސް އޮފް ރެޕްރެޒެންޓޭޓިވްސްގެ ބަޖެޓް ކޮމިޓީގެ އިސް ޑިމޮކްރެޓިކް މެންބަރު ބްރެންޑަން ބޮއިލް ނެރުއްވި ބަޔާނެއްގައި ވިދާޅުވި އެވެ. އަދި، އިންސާނީ މި ބޮޑު ގެއްލުމުގެ އިތުރުން، އެމެރިކާގެ ޓެކްސް ދައްކާ ރައްޔިތުންގެ އަތުން އެތައް ބިލިއަން ޑޮލަރެއް މިހާރުވެސް ޚަރަދުވެފައިވާ ކަމަށާއި، ތަކެތީގެ އަގުތައް އިންތިހާއަށް އުފުލެމުންދާކަން ސީބީއޯގެ މިނިވަން ރިޕޯޓުން ސާފުވާ ކަމަށް ވެސް ބޮއިލް ފާހަގަކުރެއްވި އެވެ.

ފެބުރުވަރީ މަހު އެމެރިކާއާއި އިސްރާއީލް ގުޅިގެން ފެށި މި ހަނގުރާމައާ މެދު އާންމުންގެ މެދުގައި ނުރުހުން އުފެދިފައިވާ ދަނޑިވަޅެއްގައި، ޓްރަމްޕްގެ ސަރުކާރަށް ވަނީ ބޮޑެތި ފާޑުކިޔުންތަކެއް އަމާޒުވެފަ އެވެ. މި ހަނގުރާމައިގެ ސަބަބުން ދުނިޔޭގެ ހަކަތައިގެ ބާޒާރަށް ބުރޫއަރައި، ތަކެތީގެ އަގުތައް އުފުލެމުންދާތީ، ނޮވެންބަރު މަހު ބާއްވާ މިޑްޓާމް އިންތިޚާބާ ދިމާކޮށް ދިރިއުޅުމުގެ ޚަރަދުތަކާ މެދު ވޯޓުލާ މީހުން ދަނީ ކަންބޮޑުވުން ފާޅުކުރަމުން ކަމަށް ރިޕޯޓުތައް ބުނެ އެވެ.

ސީބީއޯގެ މި އަންދާޒާތަކަކީ، ޖުލައި މަހު ކޮންގްރެސްގައި ދެއްވި ބަޔާނެއްގައި އެމެރިކާގެ ދިފާއީ ވަޒީރު ޕީޓް ހެގްސެތު ދެއްވި ހިސާބުތަކާ އެއްގޮތް އަންދާޒާތަކެކެވެ. ހަނގުރާމައިގެ ޚަރަދު 37.5 ބިލިއަން ޑޮލަރަށް އަރާފައިވާ ކަމަށް އެ ފަހަރު ހެގްސެތު ވިދާޅުވި އެވެ. އަދި، މިހާރުވެސް ދުނިޔޭގެ އެންމެ ބޮޑު އަސްކަރީ ބަޖެޓް އޮންނަ އެމެރިކާގެ އަސްކަރީ ބަޖެޓް، ބޮޑުތަނުން އިތުރުކޮށްދިނުމަށް ކޮންގްރެސްގައި އޭނާ ވަނީ އެދިވަޑައިގަންނަވާފަ އެވެ.

ކޮންގްރެސްގައި ކުރިއަށްދިޔަ ހޫނު ބަހުސްތަކުގައި، ހަނގުރާމައަށް ފާޑުކިޔާ ފަރާތްތަކަށް ޕެންޓަގަންގެ ވެރިޔާ ވަނީ ރައްދު ދެއްވާފަ އެވެ. އަދި، މަދު ހަފުތާތަކެއްގެ ތެރޭގައި ނިމޭނެ ކަމަށް ޓްރަމްޕް ކުރިން ލަފާކުރެއްވި މި ހަނގުރާމައަކީ، ސަލާމަތްނުވެވޭ ފަދަ ނުރައްކާތެރި ދަލެއް ނުވަތަ "ކުއެގްމަޔާ" އެއް ނޫން ކަމަށް ވިދާޅުވެ އޭނާ ވަނީ އެ ވާހަކަތައް ދޮގުކުރައްވާފަ އެވެ.

މި ހަނގުރާމައިގެ ސަބަބުން އެމެރިކާގެ މުހިންމު ހަތިޔާރުގެ ރިޒާވް ހުސްވެ، ދުނިޔޭގެ އެހެން ސަރަހައްދުތަކުގައި އެ ގައުމުން ވެފައިވާ އަސްކަރީ ވައުދުތައް ފުއްދުމަށް ހުރަސް އެޅެމުންދާ ކަމަށް ރިޕޯޓުތަކުން ހާމަވެ އެވެ. އަދި، އެމެރިކާގެ ހަތިޔާރުގެ ރިޒާވް ކުރިން ހުރި މިންވަރަށް އިއާދަކުރުމަށް ފަސް އަހަރު ދުވަސް ނަގާނެ ކަމަށް ސީބީއޯގެ ރިޕޯޓުގައި ވަނީ ލަފާކޮށްފަ އެވެ. މި ރިޕޯޓުގައި، ހަނގުރާމައަށް ފައިސާ ހޯދުމަށް ނަގާފައިވާ ލޯނުތަކުގެ އިންޓްރެސްޓް ޚަރަދުތަކާއި، މެދުއިރުމަތީގައި ހުރި އެމެރިކާގެ އަސްކަރީ މަރުކަޒުތަކަށް އީރާނުން ދެމުންދާ ހަމަލާތަކުގެ ސަބަބުން ލިބޭ ގެއްލުންތަކުގެ ޚަރަދު ހިމަނާފައެއް ނުވެ އެވެ.

ހަތިޔާރުގެ ރިޒާވް ހުސްވަމުންދާ ކަމަށް ބުނާ ރިޕޯޓުތައް ޓްރަމްޕްގެ ސަރުކާރުން ވަނީ  ދޮގުކޮށްފަ އެވެ. އަދި، މި ހަނގުރާމައަކީ އޭގެ ޚަރަދާ އަޅާބަލާއިރު ކޮންމެހެން ކުރަން ޖެހޭ މުހިންމު ކަމެއް ކަމަށް އެ ސަރުކާރުން އަދިވެސް ބުނެ އެވެ. "ތެލުގެ އަގު ފިޔަވައި އެހެން ހުރިހާ އެއްޗެއްގެ އަގުތައް ދަނީ ވަރަށް ބޮޑަށް ދަށަށް. އީރާނާއެކު ކުރާ އަސްކަރީ ކުރިމަތިލުން ނިމުމާއެކު ތެލުގެ އަގުވެސް ވަރަށް ބޮޑަށް ވެއްޓޭނެ. އަދި އެ ދުވަސް މާލަހެއް ނުވެ އަންނާނެ،" ހޯމަ ދުވަހު ސޯޝަލް މީޑިއާގައި ކުރެއްވި ޕޯސްޓެއްގައި ޓްރަމްޕް ވިދާޅުވި އެވެ.

ސީބީއޯގެ ރިޕޯޓު ނެރެފައި މި ވަނީ، ޕެންޓަގަންގެ އިންސްޕެކްޓާ ޖެނެރަލުން އެކުލަވާލި ރިޕޯޓެއް އާންމުވިތާ އެއްދުވަސް ފަހުންނެވެ. އެ ރިޕޯޓުގައި ހަތިޔާރުގެ ދަތިކަމާއި، ހަތިޔާރު އުފެއްދުމުގައި ހުރި ހުރަސްތަކުގެ އިތުރުން، ހަނގުރާމައިގައި އެމެރިކާގެ އެތައް އަސްކަރީ މަތިންދާބޯޓެއް ގެއްލިފައިވާ ކަމުގެ ތަފްސީލުތައް ވަނީ ހިމަނާފަ އެވެ. ޓްރަމްޕް ބޭނުންފުޅުވާ ވަގުތެއްގައި އަދި ބޭނުންފުޅުވާ ތަނަކަށް ހަމަލާދިނުމަށް ބޭނުންވާ ހުރިހާ ވަސީލަތްތަކެއް އެމެރިކާގެ އަސްކަރިއްޔާގައި އެބަހުރި ކަމަށް، ހަތިޔާރުގެ ދަތިކަން ހުރި ކަމަށް ބުނާ ރިޕޯޓުތަކާ ގުޅިގެން ޕެންޓަގަންގެ ތަރުޖަމާނު ޝޯން ޕާނެލް ވިދާޅުވި އެވެ.