ތައިލެންޑުގެ ކުރީގެ އެމްޕީއަކު އޮފިޝަލެއްގެ ގަޔަށް ބަޑިޖަހައި މަރާލުމަށްފަހު ޔޫޓިއުބްގައި އެކަމާ އިއުތިރާފުވެއްޖެ
10 އޯގަސްޓު 2026 | ހޯމަ 11:15ތައިލެންޑުގެ ނޮންތަބޫރީގެ ކުރީގެ މެންބަރު ޗަލޮންގް ރިއައުރައެންގް، އެ ސަރަހައްދުގެ އިސް އޮފިޝަލަކަށް ބަޑިން ހަމަލާދީ މަރާލުމަށްފަހު ޔޫޓިއުބް ލައިވްސްޓްރީމެއްގައި އެކަމަށް އިއުތިރާފުވެއްޖެ. އަމިއްލަ މައްސަލަތަކެއްގެ ތެރެއިން ހިނގި މި ހާދިސާއާ ގުޅިގެން އޭނާ ހައްޔަރުކޮށްފައިވާއިރު، މި ހަމަލާއާއެކު ތައިލެންޑުގައި ބަޑި ގެންގުޅުން ކޮންޓްރޯލްކުރުމުގެ ބަހުސްތައް ވަނީ އަނެއްކާވެސް ގަދަވެފައި
ކުރީގެ މަޖިލިސް މެންބަރު ޗަލޮންގް ރިއުވްރަންގް، ފުލުހުންގެ އިދާރާއެއްގައި ބޭއްވި ނޫސްވެރިންގެ ބައްދަލުވުމެއްގެ ތެރެއިން ސިނގިރޭޓެއް ބޯން އިނދެ ކަން ހިނގިގޮތް ކިޔައިދެނީ | ރޮއިޓާސް
ތައިލެންޑުގެ ގާނޫނު ހަދާ މަޖިލީހުގެ ކުރީގެ މެންބަރަކު އެ ގައުމުގެ އޮފިޝަލަކަށް ބަޑިން ހަމަލާދީ މަރާލުމަށްފަހު، އެކަން ޔޫޓިއުބް ލައިވްސްޓްރީމެއް މެދުވެރިކޮށް އިއުތިރާފުވެއްޖެ އެވެ. ތައިލެންޑުގެ ދެކުނުގެ ޕްރޮވިންސެއް ކަމަށްވާ ނޮންތަބޫރީގެ ކުރީގެ މެންބަރަކު އެ ސަރަހައްދުގެ އޮފިޝަލަކަށް ބަޑިން ހަމަލާދީ މަރާލުމަށްފަހު، ސިޔާސީ ކަންކަން ދިރާސާކުރާ ފަރާތަކުން ކުރިއަށްގެންދިޔަ ޔޫޓިއުބް ލައިވްސްޓްރީމަކަށް ގުޅައި، އޭނާ ކުރި ކަންތައް ވަނީ ކިޔައިދީފަ އެވެ.
ނޮންތަބޫރީގެ ކުރީގެ މެންބަރު ޗަލޮންގް ރިއައުރައެންގް، ލައިވްސްޓްރީމްގެ ހޯސްޓް އަންޗަލީ ޕައިރީރަކަށް ގުޅައި ބުނެފައިވަނީ، ފުލުހުންގެ ކުރީގެ އޮފިޝަލެއް ކަމަށްވާ ތޮންގްޗައި ޔެންޕްރަސާޓްގެ އޮފީސް ބޭރުގައި އޭނާއަށް ބަޑިން ހަމަލާދީފައިވާނެ ކަމަށެވެ. މި ޚަބަރާއެކު ޕްރޮގްރާމްގެ ހޯސްޓަށް ވަނީ ބޮޑު ސިހުމެއް ލިބިފަ އެވެ.
މި ހަމަލާގައި ކަރުގެ ފަހަތަށް ވަޒަން އެރުމުގެ ސަބަބުން ތޮންގްޗައި ވަނީ ހޮސްޕިޓަލުގައި ފަރުވާ ދެމުން ދަނިކޮށް މަރުވެފަ އެވެ. މީގެ އިތުރުން އޭނާގެ ޑްރައިވަރުގެ އަތަށާއި މުލައްދަނޑިއަށް ވެސް ވަނީ ބަޑީގެ ހަމަލާ އަމާޒުވެފަ އެވެ.
މި ހާދިސާއާ ގުޅިގެން ޗަލޮންގް ހައްޔަރުކުރި ނަމަވެސް، ފުލުހުންގެ މަރުކަޒުގައި ހުރެ ސިނގިރޭޓެއް ބޯން އިނދެ ނޫސްވެރިންނާ ވާހަކަދެއްކުމުގެ ފުރުސަތު އޭނާއަށް ވަނީ ދީފަ އެވެ. އެތަނުގައި ހުރެ އޭނާ ވަނީ ހާދިސާ ހިނގައިދިޔަ ގޮތް ކިޔައިދޭން މަސައްކަތް ކޮށްފަ އެވެ.
ނޫސްވެރިންނާ ވާހަކަދައްކަމުން ޗަލޮންގް ބުނީ، ތޮންގްޗައި ހުރީ އޭނާދެކެ "ރުޅިއައިސްފައި" ކަމަށެވެ. ނަމަވެސް އެ ރުޅިވެރިކަމުގެ ސަބަބެއް އޭނާ ހާމައެއް ނުކުރެ އެވެ. އަދި އޭނާގެ "ގާތް އެކުވެރިއެއް" ކަމަށް ސިފަކުރި ތޮންގްޗައި ގަޔަށް ބަޑިޖަހަން ގަސްދުނުކުރާ ކަމަށްވެސް އޭނާ ބުންޏެވެ.
ޗަލޮންގް ބުނި ގޮތުގައި އޭނާ ތޮންގްޗައި ގާތު ވާހަކަދައްކަން ބޭނުންވާ ކަމަށް ބުންޏެވެ. އެ ސަރަހައްދުގެ މީޑިއާ ރިޕޯޓްތައް ބުނާ ގޮތުގައި މި ދެމީހުންގެ މެދުގައި އަމިއްލަ މައްސަލަތަކެއް ޖެހިފައިވެ އެވެ.
"އޭނާ (ތޮންގްޗައި) އަހަރެން ކޮށްޕާލާފައި ބުނީ ވާހަކަދައްކަން ބޭނުން ނޫން ކަމަށް،" ޗަލޮންގް ބުންޏެވެ.
އޭގެ ފަހުން ތޮންގްޗައި އޭނާގެ ކާރާ ދިމާއަށް ދަނިކޮށް ފަހަތުން ދިޔަ ކަމަށް ޗަލޮންގް ބުންޏެވެ.
"އަހަރެން ބަޑި ނެގި އިރު އޭނާ ގަޔަށް ޖަހާކަށް ގަސްދެއް ނުކުރަން. އެކަމަކު (ތޮންގްޗައިގެ ޑްރައިވަރު) ބަޑި ނަގައި އަހަންނާ ދިމާއަށް އަމާޒުކުރުމުން އަހަރެން ބަޑިޖެހީ،" ޗަލޮންގް ކިޔައިދިނެވެ.
މަރުވި ތޮންގްޗައިއަކީ ފުލުހުންގެ ރިޓަޔާޑް ކާނަލެއްގެ އިތުރުން، ނޮންތަބޫރީ ޕްރޮވިންޝަލް އެޑްމިނިސްޓްރޭޓިވް އޯގަނައިޒޭޝަން (ޕީއޭއޯ) ނަމަކަށް ކިޔާ ލޯކަލް ގަވަރްމަންޓް އިދާރާގެ ރައީސެވެ.
މި ހާދިސާ ހިނގުމުގެ ކުޑަވަގުތުކޮޅެއް ކުރިން، ޗަލޮންގް ވަނީ ޔޫޓިއުބްގައި ލައިވްކޮށް ޕްރޮގްރާމެއް ހުށަހަޅަމުން ދިޔަ ސިޔާސީ މުހައްލިލު އަންޗަލީ ޕައިރީރަކަށް ގުޅައި، އޭނާ އަތުން މީހަކު މަރުވެފައިވާ ކަމަށް އިއުތިރާފުވެފަ އެވެ.
ޕްރޮގްރާމްގެ މެދުތެރެއިން އަންޗަލީ ފޯނެއް ނަގާ މަންޒަރު ވީޑިއޯއިން ފެނެ އެވެ. "އަހަރެން ފަހުން ގުޅާނަން... އޯހް، ބޮޑު ކަމެއް ހިނގީތަ؟ ކިޔައިދީބަލަ، ކިހިނެއްވީ؟" އޭނާ ބުންޏެވެ.
ފޯނުން ވާހަކަދެއްކި މީހާ ބުނި އެއްޗެއް ބެލުންތެރިންނަށް ސާފުނުވި ނަމަވެސް، އަންޗަލީއަށް ލިބުނު ސިހުން ވީޑިއޯއިން ފެނެ އެވެ.
އެ ވީޑިއޯގައި އަންޗަލީ ބުނެފައިވަނީ، "އޭނާ މަރުވީތަ؟ އޭނާ މަރުވީތަ؟ ކަލޭ އޭނާގެ ބޮލަށްތަ ބަޑިޖެހީ؟ ފުލުހުން އަންނަންދެން އެތަނުގައި މަޑުކުރޭ. އެއްވެސް ތަނަކަށް ނުދާތި،" މިފަދައިންނެވެ.
ހޯމަ ދުވަހު ހިނގި މި ބަޑިޖެހުމުގެ ހާދިސާ ހިނގާފައި މިވަނީ، 14 އަހަރުގެ ފިރިހެން ކުއްޖަކު އޭނާގެ ގޭގައާއި ސްކޫލުގައި އަށް މީހަކު މަރާލުމަށްފަހު އަމިއްލައަށް މަރުވި ހާދިސާއަށް ތިން ދުވަސް ފަހުންނެވެ. އެއީ 2022 ވަނަ އަހަރަށްފަހު ތައިލެންޑުގައި ހިނގި އެންމެ ނުރައްކާތެރި ބަޑިޖެހުމުގެ ހާދިސާއެވެ. ނަމަވެސް މި ދެ ހާދިސާއާ އެއްވެސް ގުޅުމެއް ނެތެވެ.
ދެކުނު އިރުމަތީ އޭޝިއާގެ ގައުމުތަކުގެ ތެރެއިން އާންމުންގެ އަތުގައި އެންމެ ގިނައިން ބަޑި ހުންނަ ގައުމަކީ ތައިލެންޑް ކަމަށްވާއިރު، މި ހާދިސާއާއެކު ބަޑި ގެންގުޅުން ކޮންޓްރޯލް ކުރުމާ ބެހޭ ބަހުސްތައް އަނެއްކާވެސް ވަނީ ގަދަވެފަ އެވެ.
ހުކުރު ދުވަހު ސްކޫލުގައި ހިނގި ބަޑިޖެހުމުގެ ހާދިސާއަށްފަހު، ތައިލެންޑުގެ ބޮޑުވަޒީރު އަނޫޓިން ޗާންވީރަކުލް ވަނީ ބަޑި ގެންގުޅުމާ ބެހޭ ގާނޫނުތައް ހަރުކަށިކުރުމަށް އަމުރުކުރައްވާފަ އެވެ. އަދި މިކަން ހުއްޓުވުމަށް ފުލުހުން ޗެކްޕޮއިންޓްތައް ގާއިމުކުރާނެ ކަމަށްވެސް ބޮޑުވަޒީރު ވިދާޅުވި އެވެ.
މީގެ އިތުރުން، ހަތިޔާރު ގެންގުޅުމާއި، ހިފައިގެން އުޅުމާއި، ބޭނުންކުރުން ކޮންޓްރޯލް ކުރުމަށް އިތުރު ފިޔަވަޅުތައް އެޅުމަށް ވެސް ވަނީ ނިންމާފަ އެވެ.
