އެމްޑީޕީގެ ސިޔާސަތުތަކަކީ ލާދީނީ އަދި ޤައުމީވަންތަކަމާ ޚިލާފު ކަންކަން ކަމަށް ސިފަކުރި ފަރާތްތަކަށް ވެރިކަން ލިބުމުން، އެ ސިޔާސަތުތަކަށް ރުޖޫއަވުން ނޫން ގޮތެއް ނެތް: ރައީސް ނަޝީދު
28 ސެޕްޓެމްބަރު 2026 | ހޯމަ 09:58އެމްޑީޕީގެ ސިޔާސަތުތަކަކީ ލާދީނީ ކަންކަން ކަމަށް ސިފަކުރި ފަރާތްތަކަށް ވެރިކަން ލިބުމުން، ގައުމު ހިންގުމުގައި އެ ނޫން ގޮތެއް މިއަދު ނެތް ކަމަށް ރައީސް ނަޝީދު ވިދާޅުވެއްޖެ. ރަސްމާލެ މަޝްރޫއުގެ ބިން ދޫކުރުމުގައި ސަރުކާރުގެ އިސްވެރިންގެ ބަސްމަގު ވަނީ ތަފާތުވެފައި
އާސްކް ސްޕީކަރ ޕްރޮގްރާމްގައި ރައީސް މުޙައްމަދު ނަޝީދު | ރައްޔިތުންގެ މަޖިލިސް
އެމްޑީޕީއާ އިދިކޮޅު ފަރާތްތަކުން މީގެ ކުރިން ލާދީނީ އަދި ޤައުމީވަންތަކަމާ ޚިލާފު ކަންކަމުގެ ގޮތުގައި ސިފަކުރި ސިޔާސަތުތަކަށް ރުޖޫއަވުން ނޫން ގޮތެއް، ދިވެހި ރައްޔިތުންނަށް ބޭނުންވާ ފާގަތިކަން ހޯދައިދިނުމުގައި އެ ފަރާތްތަކަށް މިއަދު ނެތް ކަމަށް އެމްޑީޕީގެ ޗެއަރޕާސަން އަދި ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ރައީސް ނަޝީދު މިހެން ވިދާޅުވީ، އެކްސްގައި އެމަނިކުފާނު ކުރެއްވި ޕޯސްޓެއްގަ އެވެ. އެމަނިކުފާނު ފާހަގަކުރެއްވި ގޮތުގައި، އެމްޑީޕީއާ އިދިކޮޅު ފަރާތްތަކުން އަބަދުވެސް މަސައްކަތް ކުރަމުންދަނީ އެއީ ހަމައެކަނި ޤައުމީ ލޯބި ހުރި، އަދި އިސްލާމީ ވަރުގަދަ އުސޫލުތައް ހިފަހައްޓާ ބައެއްގެ ގޮތުގައި ދެއްކުމަށެވެ. އަދި ހަމައެއާއެކު، އެމްޑީޕީ އަކީ އިސްލާމީ އުސޫލުތަކާއި ޤައުމީ މަސްލަހަތާ ޚިލާފު ބައެއްގެ ގޮތުގައި ސިފަކުރުމަށް އެ ފަރާތްތަކުން އަބަދުވެސް މަސައްކަތްކުރާ ކަމަށް ރައީސް ނަޝީދު ވިދާޅުވި އެވެ.
އެގޮތުން، އެމްޑީޕީގެ ސިޔާސަތުތަކަކީ ޤައުމަށް ގެއްލުންހުރި ކަންތައްތަކެއްގެ ގޮތުގައި ދެއްކުމަށްޓަކައި، ދައުލަތުގެ މުދާ ވިއްކުމާއި ޕްރައިވެޓައިޒްކުރުމާ ގުޅޭގޮތުން އެމްޑީޕީން ގެންގުޅުނު ސިޔާސަތުތައް އެއީ ގޯސް ކަންކަން ކަމުގައި އިދިކޮޅު ފަރާތްތަކުން ހެއްކެއްގެ ގޮތުގައި ދައްކަމުން ދިޔަކަން ރައީސް ނަޝީދު ފާހަގަކުރެއްވި އެވެ.
ނަމަވެސް، ހަގީގަތަކީ އެ ފަރާތްތަކަށް ވެރިކަން ލިބުމުން، ޤައުމު ހިންގުމަށާއި ދިވެހި ރައްޔިތުންނަށް ބޭނުންވާ ތަރައްޤީއާއި ފާގަތިކަން ހޯދައިދިނުމުގައި، މީގެ ކުރިން އެ ފަރާތްތަކުން ލާދީނީ އަދި ޤައުމީވަންތަކަމާ ޚިލާފު ކަންކަމުގެ ގޮތުގައި ސިފަކުރި ސިޔާސަތުތަކަށް ރުޖޫއަވުން ނޫން އިތުރު އެހެން އެއްވެސް ގޮތެއް އެ ފަރާތްތަކަށް ނެތުން ކަމަށް ރައީސް ނަޝީދު ވިދާޅުވި އެވެ.
ރައީސް ނަޝީދު އިތުރަށް ވިދާޅުވީ، ދިވެހި ރައްޔިތުން އަބަދުވެސް އެމްޑީޕީއަށް އިތުބާރު ކުރަނީ އެ ޕާޓީއަކީ ހާމަކަން ބޮޑު، ދެފުށް ފެންނަ އަދި ތެދުވެރި ސިޔާސަތުތަކެއް ޤައުމަށްޓަކައި ގެންގުޅޭ ހަމައެކަނި ޕާޓީއަށް ވާތީ ކަމަށެވެ.
ރައީސް ނަޝީދު މި މޭރުމުން ވާހަކަފުޅު ދައްކަވާފައި މިވަނީ ރައީސް މުއިއްޒުގެ ސަރުކާރުން ރަސްމާލެ ޕްރޮޖެކްޓް އީގަލް ހިލްސް އަށް 99 އަހަރަށް ދިނުމާ ގުޅިގެން ރައްޔިތުންގެ މެދުގައި ބޮޑެތި ކަންބޮޑުވުންތަކެއް އުފެދިފައިވާ ދަނޑިވަޅެއްގަ އެވެ. ރައީސް މުއިއްޒު ސަރުކާރުގެ ހައުސިންގ މިނިސްޓަރު މުއްތަލިބު ވިދާޅުވަނީ މި މަޝްރޫއަކީ ވަގުތުން ޗެކެއް ލިބޭ ގޮތަށް ދޫކުރެވުނު ޕްރޮޖެކްޓެއް ނޫން ކަމަށެވެ. ނަމަވެސް ރައީސް މުއިއްޒު ވިދާޅުވަނީ މިއީ ކުއްޔަށް ދިން ބިމެއް ކަމަށެވެ. ދެ ބޭފުޅުންގެ ވާހަކަފުޅުތައް ދިމާނުވާއިރު، ސޯޝަލް މީޑިއާގައި ގޮވާލަމުން ދަނީ މި މަޝްރޫއުގެ ތަފްސީލުތައް ރައްޔިތުންނަށް ހާމަކުރުމަށެވެ.
