ޓެކްސް ގާނޫނާއި ބޭރު ފައިސާގެ ގާނޫނަށް ގެނައި ބަދަލާއެކު ރާއްޖޭގެ ސަލާމަތާއި ރައްކާތެރިކަމަށް ވެސް ނުރައްކާ އެބައޮތް: ނަޝީދު
23 ސެޕްޓެމްބަރު 2026 | ބުދަ 07:37މުދަލާއި ޚިދުމަތުގެ އަގުން ޓެކްސް ނެގުމުގެ ގާނޫނަށް ގެނައި އިސްލާހާއެކު ބޭރުގެ ޓުއާ އޮޕަރޭޓަރުން މީރާގައި ރަޖިސްޓްރީވާން މަޖުބޫރުވުމުން، ފަތުރުވެރިކަމުގެ ދާއިރާގެ ކަންބޮޑުވުންތައް އިންތިހާއަށް އިތުރުވެފައިވާ ކަމަށް ރައީސް ނަޝީދު ފާހަގަކުރެއްވި. މި ބަދަލުތަކުގެ ސަބަބުން ރާއްޖޭގެ އިގުތިސާދަށާއި ސަލާމަތަށް ނުރައްކާވެދާނެތީ، ސަރުކާރުން މިކަންކަން އަލުން މުރާޖައާކޮށް އިސްލާހީ ފިޔަވަޅު އެޅުމަށް އެމަނިކުފާނު ގޮވާލެއްވި
އެމްޑީޕީގެ ޗެއަރޕާސަން އަދި ކުރީގެ ރައީސް މުހައްމަދު ނަޝީދު | ރާއްޖެއެމްވީ
ރާއްޖޭން ބޭރުގައި ރަޖިސްޓަރީކޮށް ޗުއްޓީ ޕެކޭޖްތައް ވިއްކުމުގެ ޚިދުމަތްދޭ ފަރާތްތަކުން، އެއީ ކިތަންމެ ކުޑަ ކުންފުންޏެއް ކަމުގައިވިޔަސް މޯލްޑިވްސް އިންލަންޑް ރެވެނިއު އޮތޯރިޓީ (މީރާ) ގައި ރަޖިސްޓްރީވާން ޖެހޭ ގޮތަށް ގާނޫނަށް ގެނައި އިސްލާހާއި، ބޭރު ފައިސާގެ ގާނޫނަށް މި ސަރުކާރުން ގެނައި އިސްލާހުތަކާއެކު، ރާއްޖޭގެ ސަލާމަތާއި ރައްކާތެރި ކަމަށް ވެސް ގޮންޖެހުން ކުރިމަތިވުމުގެ ފުރުސަތު އެބައޮތް ކަމަށް އިދިކޮޅު އެމްޑީޕީގެ ޗެއަރޕާސަން އަދި ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
އެމްޑީޕީ އިން ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ނަޝީދު ވިދާޅުވީ 2026 އޯގަސްޓް 31 ގައި ތަސްދީގުކޮށް ޝާއިއުކުރި މުދަލާއި ޚިދުމަތުގެ އަގުން ޓެކްސް ނެގުމުގެ ގާނޫނަށް ގެނައި 8 ވަނަ އިސްލާހުގެ ސަބަބުން ބޭރުގެ ޓުއަރ އޮޕަރޭޓަރުންގެ ކަންބޮޑުވުންތައް އިންތިހާ އަށް ގޮސްފައިވާ ކަމަށެވެ.
ޓެކްސް ނެގުމުގެ މި އައު އުސޫލުގެ ދަށުން، ރާއްޖޭން ބޭރުގައި ރަޖިސްޓަރީކޮށް ޗުއްޓީ ޕެކޭޖްތައް ވިއްކުމުގެ ޚިދުމަތްދޭ ފަރާތްތަކުން، އެއީ ކިތަންމެ ކުޑަ ކުންފުންޏެއް ކަމުގައިވިޔަސް މީރާގައި ރަޖިސްޓްރީވާން މަޖުބޫރުވާތީ ކަންބޮޑުވުން ފާޅުކުރަމުންދާކަން ފާހަގަކުރައްވާ ނަޝީދު ވިދާޅުވީ މި ބަދަލު ގެންނަން ނިންމި ވަގުތަކީ ވަރަށް ދަތި ވަގުތެއް ކަމަށް އެ ފަރާތްތަކުން ބުނަމުންދާ ކަމަށެވެ.
ސަބަބަކީ ޓުއާ އޮޕަރޭޓަރުން ސަޕްލަޔަރުންނާއެކު އެއްބަސްވުންތައް ހަދައި، ޗުއްޓީ ޕްރޮގްރާމްތައް ތައްޔާރުކުރަނީ އެތައް މަހެއް ކުރިން ކަމަށްވާތީ ކަމަށާއި ކުރިއަށް އޮތް ޔޫރަޕްގެ ފިނި މޫސުމަށް ރާއްޖޭގެ ގިނަ ޕެކޭޖުތަކެއް މިހާރު ވެސް ވަނީ އިސްތިހާރުކޮށް، ވަކި އަގުތަކެއްގައި ވިއްކާފައި ކަމަށް އެފަރާތުން ބުނެފައިވާކަން ނަޝީދު ފާހަގަކުރެއްވި އެވެ. އަދި ވިދާޅުވީ މި ކަންކަން އިސްލާހު ނުކުރާނަމަ ރާއްޖޭގެ ފަތުރުވެރިކަމުގެ އުފެއްދުންތައް ބޭރު ގައުމުތަކުގައި އިސްތިހާރުކޮށް ވިއްކާ ކުދި އޮޕަރޭޓަރުން ރާއްޖޭގެ ޕެކޭޖުތައް ވިއްކުން ހުއްޓާލަން ޖެހިދާނެ ކަމުގެ އިންޒާރު ދެމުންދާ ކަމަށެވެ.
ފަތުރުވެރިކަމުގެ ދާއިރާގައި ހަރަކާތްތެރިވާ، ރާއްޖެ އަށް ޓުއަރިސްޓުން ފޮނުވާ، ނުވަތަ ގެންނަ ބޮޑެތި ހުރިހާ ކުންފުނިތަކުން އަޅުގަނޑުމެންނަށް ގުޅާ. އެމީހުންގެ ކަންބޮޑުވުންތައް ވަރަށް ބޮޑު. އެމީހުންނާ އެމީހުންގެ ލޯޔަރުން ދެކޭ ގޮތުގައި މިއީ ބައިނަލްއަގްވާމީ ޓެކްސްގެ އުސޫލުތަކާއި އަދި އެހެން މުއާހަދާތަކާ ވެސް ޚިލާފަށް ކުރެވޭ ކަމެއް. އެހެންވީމާ އެމީހުން ވަކާލާތު ކުރާނެ އެމީހުންގެ ޕާލިމަންޓުތަކުގައި ވެސް، ސަރުކާރުތަކުގައި ވެސް ދިވެހި ސަރުކާރުން މިހާރު އަޅަމުން އެ ދަނީ އުސޫލުތަކާ ޚިލާފު ފިޔަވަޅުތަކެކޭ. މި ރާއްޖެއަށް ވަރަށް ނާޒުކު ކަންކަން މި ހުންނަނީ. ނުރައްކާވެދާނެ ކަންކަން. ހުރިހާ ޓުއާ އޮޕަރޭޓަރުން ވެސް އެބަ ކަންބޮޑުވުން ފާޅުކުރޭމުހައްމަދު ނަޝީދު
ރައީސް ނަޝީދު ވިދާޅުވީ މި ކަންކަމުގެ ސަބަބުން ނޭދެވޭ އަސަރެއް ކުރަނީ ހަމައެކަނި ރާއްޖޭގެ މާލީ އަދި އިގުތިސާދީ ދާއިރާ އަށް ނޫނެވެ. ނަމަވެސް ސަރުކާރުގެ މި ފިޔަވަޅުތަކުގެ ސަބަބުން ރާއްޖޭގެ ސަލާމަތާ ރައްކާތެރި ކަމަށް ވެސް މީގެ ސަބަބުން ބޮޑެތި ގޮންޖެހުންތަކަކާ ކުރިމަތިވެފައިވާ ކަމަށް އެމަނިކުފާނު ވިދާޅުވި އެވެ.
އެހެން ކަމުން، ސަރުކާރުން މިކަންކަން ބަލައި، ވީހާ ވެސް އަވަހަށް، އަޅަން ޖެހޭ އިސްލާހީ ފިޔަވަޅުތައް އެޅުމަށް ނަޝީދު ގޮވާލެއްވި އެވެ. ނޫން ނަމަ، ރާއްޖޭގެ މުސްތަގްބަލު އޮތީ ނުރައްކާތެރި ބިރުވެރި ކަމެއްގެ ތެރޭގައި ކަމަށް ވެސް އެމަނިކުފާނު ވިދާޅުވި އެވެ.
