ކުޅުދުއްފުށި ޕޯޓް ޕްރައިވެޓް ލިމިޓެޑަށް 2025 ވަނަ އަހަރު ޖުމްލަ ގެއްލުން 12.3 މިލިއަން ރުފިޔާއަށް އަރާފައިވޭ: އޮޑިޓް ރިޕޯޓް

ކުޅުދުއްފުށި ޕޯޓް ޕްރައިވެޓް ލިމިޓެޑަށް 2025 ވަނަ އަހަރު ޖުމްލަ ގެއްލުން 12.3 މިލިއަން ރުފިޔާއަށް އަރާކަމަށް އޮޑިޓަރ ޖެނެރަލްގެ އޮފީހުން އާންމުކުރި އެ ކުންފުނީގެ މާލީ ރިޕޯޓުން ހާމަވެއްޖެ އެވެ.

އެ އޮފީހުން އާންމު ކޮށްފައިވާ މާލީ ރިޕޯޓުން ދައްކާ ގޮތުގައި، ކުޅުދުއްފުށި ޕޯޓް ޕްރައިވެޓް ލިމިޓެޑަށް 2025 ވަނަ އަހަރު 11.5 މިލިއަން ރުފިޔާގެ ބޮޑު ގެއްލުމަކާ ވަނީ ކުރިމަތިލާން ޖެހިފަ އެވެ. އެގޮތުން، 2024 ވަނަ އަހަރު އެ ކުންފުންޏަށް ލިބުނު 10.4 މިލިއަން ރުފިޔާގެ ގެއްލުމާ އަޅާބަލާއިރު، ނިމިދިޔަ އަހަރުގެ ގެއްލުން ވަނީ 1.1 މިލިއަން ރުފިޔާ އިތުރުވެފަ އެވެ. މިއީ ގާތްގަނޑަކަށް 11 އިންސައްތައިގެ އިތުރުވުމެކެވެ.   

Advertisement

މާލީ ހިސާބުތަކަށް ބަލާއިރު، 2025 ވަނަ އަހަރު ކުޅުދުއްފުށި ޕޯޓަށް އާމްދަނީގެ ގޮތުގައި ލިބިފައިވަނީ 11.9 މިލިއަން ރުފިޔާ އެވެ. މީގެ ތެރޭގައި އެންމެ ބޮޑު ބައެއް ހިއްސާކުރަނީ މުދާ ބޭލުމުގެ ޚިދުމަތުން ލިބުނު 8.9 މިލިއަން ރުފިޔާ އެވެ.

މީގެ އިތުރުން، މުދާ ބަރުކުރުމުގެ ޚިދުމަތުން 1.1 މިލިއަން ރުފިޔާ އަދި އުޅަނދުފަހަރާއި އިކުއިޕްމަންޓް ކުއްޔަށް ދީގެން 1.8 މިލިއަން ރުފިޔާ ވަނީ ލިބިފަ އެވެ. ނަމަވެސް ކުންފުނީގެ ހިންގުމުގެ ޚަރަދުތައް އާމްދަނީއަށްވުރެ ބޮޑުވުމުގެ ސަބަބުން ކުންފުނި ވަނީ ބޮޑު ގެއްލުމެއްގައި ހިފެހެއްޓިފަ އެވެ.

ކުންފުނީގެ ޚަރަދުތަކަށް ބަލާއިރު، އެންމެ ބޮޑު ހޭދައެއް ކޮށްފައިވަނީ މުވައްޒަފުންގެ މުސާރައާއި އިނާޔަތްތަކަށެވެ. އެގޮތުން މުވައްޒަފުންނާ ގުޅުންހުރި ޚަރަދުތަކަށް 13.8 މިލިއަން ރުފިޔާ ހޭދަކޮށްފައިވާއިރު، މިއީ ކުންފުންޏަށް ލިބުނު ޖުމްލަ އާމްދަނީއަށް ވުރެ ވެސް ބޮޑު އަދަދެކެވެ. މީގެ އިތުރުން އިދާރީ އެހެނިހެން ޚަރަދުތަކަށް 6.8 މިލިއަން ރުފިޔާ އަދި ޑިޕްރިސިއޭޝަންގެ ގޮތުގައި 4.4 މިލިއަން ރުފިޔާ ވަނީ އުނިކޮށްފަ އެވެ. މި ޚަރަދުތަކާއެކު ކުންފުނީގެ ޖުމްލަ ގެއްލުން 12.3 މިލިއަން ރުފިޔާއަށް އަރަ އެވެ.

މާލީ ހާލަތު މިހާ ދަށްކޮށް އޮތް ނަމަވެސް، ކުންފުނީގެ މައި ހިއްސާދާރު ކަމަށްވާ މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ދެމުންގެންދާ މާލީ އެހީތެރިކަމާއެކު ކުންފުނި ހިންގޭނެ ކަމުގެ ޔަގީންކަން އޮޑިޓް ރިޕޯޓުގައި ވަނީ ދީފަ އެވެ. އެމްޕީއެލް އިން ވަނީ ކުރިއަށް އޮތް 12 މަސްދުވަހު ކުންފުނީގެ ދަރަނިތައް އަދާކުރުމަށް ބޭނުންވާ މާލީ އެހީތެރިކަން ފޯރުކޮށްދޭނެކަމުގެ ލިޔުން ދީފަ އެވެ. 2025 ވަނަ އަހަރު ނިމުނުއިރު އެމްޕީއެލްއަށް ދައްކަންޖެހޭ ފައިސާގެ އަދަދު ވަނީ 34.5 މިލިއަން ރުފިޔާއަށް އިތުރުވެފަ އެވެ.

އޮޑިޓް ރިޕޯޓުގައި ފާހަގަކޮށްފައިވާ މުހިންމު ކަންތައްތަކުގެ ތެރޭގައި ކުންފުނީގެ މިލްކިއްޔާތުގައިވާ މުދަލުގެ އަގު ހިމެނެ އެވެ. އެގޮތުން ކުންފުނީގެ ޖުމްލަ އެސެޓްގެ 92 އިންސައްތަ ހިއްސާކުރަނީ ގޯތިގެދޮރާއި މެޝިނަރީ ފަދަ ތަކެއްޗެވެ. މީގެ ތެރޭގައި ކުޅުދުއްފުށީ ސިޓީ ކައުންސިލުން ކުންފުންޏަށް ދީފައިވާ 76.4 މިލިއަން ރުފިޔާގެ އަގުހުރި ބިން ވެސް ހިމެނެ އެވެ. ނަމަވެސް ކުންފުނީގެ ކަރަންޓް އެސެޓް ނުވަތަ ވަގުތުން ފައިސާއަށް ބަދަލުކުރެވޭނެ މުދަލުގެ އަގު ހުރީ އެންމެ 3 މިލިއަން ރުފިޔާގަ އެވެ.

ކުޅުދުއްފުށި ޕޯޓްގެ މާލީ ހިސާބުތަކަށް އޮޑިޓަރ ޖެނެރަލް ދެއްވާފައިވަނީ "އަންކޮލިފައިޑް އޮޕީނިއަން" ނުވަތަ ސައްހަ މާލީ ހިސާބުތަކެއްގެ ގޮތުގަ އެވެ. އެހެންނަމަވެސް، ކުންފުނީގެ މާލީ ހާލަތު ހުރި ގޮތުން ކުންފުނި ހިންގުމުގައި ދެމިއޮތުމާ މެދު ސުވާލު އުފެދޭ ފަދަ ހާލަތެއް އޮތްކަން ރިޕޯޓުގައި ވަނީ ފާހަގަކޮށްފަ އެވެ.

މި ކުންފުންޏަކީ ދިވެހި ސަރުކާރުގެ 49 އިންސައްތަ ހިއްސާ އަދި އެމްޕީއެލްގެ 51 އިންސައްތަ ހިއްސާ އޮންނަ ކުންފުންޏެކެވެ.